Mulleres galegas. IES Frei Martín Sarmiento (Pontevedra)

Desde a biblioteca do IES Frei Martín Sarmiento, de Pontevedra, chéganos esta presentación sobre MULLERES GALEGAS, froito dos traballos de investigación do alumnado de PDC de 4º Curso de ESO. A biblioteca como espazo de investigación e de apoio aos proxectos de aula.

Mulleres galegas from ies frei martin sarmiento on Vimeo.

8 de marzo: Día Internacional da Muller

O calendario civil continúa o seu andar e xa está chamando á porta o 8 de marzo, Día Internacional da Muller, unha das datas claves para avanzar na educación para igualdade, na formación de cidadáns e cidadás na procura dunha sociedade máis xusta.  As bibliotecas escolares achegan recursos e fan propostas de actividades, lideran iniciativas que permitan aos nenos e ás nenas, a mozas e mozos coñecer o mundo no que viven, coñecer a presenza da muller nos distintos ámbitos do saber e nos distintos momentos da historia. E sobre todo, re-coñecer a importancia e a influencia do traballo da muller nos diferentes ámbitos sociais do mundo no que eles viven e medran.

Algúns exemplos poden servir para ver a intensa actividade das bibliotecas escolares galegas nestes días previos ao 8 de marzo:

Un exemplo de programación moi sintetizada desde o CPI Vicente Otero Valcárce, de Carral: Para celebrar o 8 de marzo a nosa biblio propón un traballo de investigación ( e así poder practicar como utilizar efectivamente os buscadores). Fixemos unha recopilación de mulleres que destacaron, ou destacan, por diferentes motivos. adxudicamos unha a cada grupo. O alumnado fará un traballo de investigación e redactará unha biografía, incluíndo, de ser posible, unha fotografía. Unha selección dos traballos presentados servirá para que fagamos un libro que levará por título "Mulleres públicas" (traballando tamén a linguaxe sexista), e que pasará a formar parte dos fondos de producción propia. Ademáis Recibiremos  a visita de đúas mulleres, empresaria e cociñeira, que nos contarán a súa experiencia.

Outros recursos:

Un paseo polo IES A XUNQUEIRA II da man de Rosalía de Castro


Celebrar os 150 anos da publicación de Cantares Gallegos e manter viva a palabra de Rosalía de Castro é o obxectivo. Pero tamén serve, neste caso, para integrar a poesía na vida cotiá do instituto e, de paso, permitirnos entrar no IES A Xunqueira II, percorrer as súas instalacións e escoitar a voz de Rosalía nas voces do alumnado e de parte do persoal do centro.

21 de febreiro, Día Internacional da Lingua Materna

O 21 de febreiro foi declarado pola UNESCO en 1999 o Día Internacional da Lingua Materna co obxectivo de promover a diversidade lingüística e cultural e o multilingüísmo. Nesta ocasión, lémbrase a importancia da cultura impresa, e do libro en particular, para manter a riqueza da diversidade lingüística dos pobos e para apoiar a educación nas súas diferentes linguas, evitando así a súa perda. "O libro, eixo da educación en lingua materna" é o lema elixido para esta conmemoración. Desde a biblioteca escolar do IES San Paio, de Tui (Pontevedra), achégannos unha serie de recursos e informacións relativas a este Día Internacional da Lingua Materna.

+ Informacións

24 de febreiro, Día de Rosalía de Castro (2013)

Eu ben vin estar o moucho

enriba daquel penedo.

¡Non che teño medo, moucho;

moucho, non che teño medo!

Contra vento e marea, e coma en anos anteriores, as bibliotecas escolares galegas súmanse á celebración do aniversario de Rosalía de Castro, o día 24 de febreiro, unha das datas sinaladas no "calendario da lectura" do noso país. Pero nesta ocasión, a celebración é dobre porque neste 2013 cúmprense os 150 anos da publicación de Cantares Gallegos, libro fundamental para as xentes, a lingua e a cultura de Galicia.

Son moitas e variadas as actividades que se levan a cabo estes días nos centros educativos e que xuntan, nunha lectura colectiva da obra da escritora, a grandes e pequenos, para manter viva, nas voces das lectoras e dos lectores, os versos de Rosalía. Moitas destas actividades súmanse á proposta da AELG que trata de involucrar a todos os sectores da sociedade, e nas que o alumnado dos centros cobra un protagonismo alentador. ACCESO AOS VÍDEOS DOS CENTROS

Velaquí algunhas propostas, actividades e recursos que se están a difundir entre o colectivo das Bibliotecas Escolares de Galicia:

A título de exemplo, a programación completa dunha biblioteca escolar arredor deste Día de Rosalía: IES Pazo da Mercé (As Neves): O venres pasado celebramos co noso alumnado e @s nos@s ilustres invitad@s da Escola Unitaria de Vide o día de Rosalía. Intercalamos o visionado de videos con poemas musicados e o recitado de poemas da escritora, no caso de "Máis ó que ben quixo un día", co acompañamento ao piano por parte dunha alumna de 1º Bach. Dúas rapazas do club de lectura léronnos "Tecín soia a miña teia" e o Equipo de Escolas Unesco colaborou interpretando "Adios ríos, adios fontes" en Yogote,linguaxe de signos. Presentouse un vídeo colaborativo realizado por un grupo de 2ºESO no que cada imaxe de Rosalía vai asociada ao nome dun alumn@. Atoparédelo no blog do noso equipo de EDLG: http://dinamizaiespazodamerce.blogspot.pt/

Ás persoas participantes se lles obsequiou cun cravo bermello e unha tarxeta cun poema e unha ilustración. Aproveitamos o acto para entregar os premios aos gañadores do concurso convocado pola biblioteca no que se debían resolver cuestións sinxelas por escrito sobre Rosalía e a sua obra, traballando en algunha das preguntas aspectos de formación de usuarios/as. Organizado tamén pola biblioteca, celebrouse o sorteo de dous exemplares de "Cantares Galegos" entre o alumnado que entregou unha tarxeta co seu nome e o título dun poema de Rosalía. E, como despedida, a "Alborada de Rosalía" interpretada á gaita por un compañeiro do departamento de Lingua Castelá.

Proxecto-piloto E-LBE, lectores electrónicos nas bibliotecas escolares.

Na mañá de hoxe, 20 de febreiro de 2013, o auditorio da Biblioteca de Galicia, na Cidade da Cultura, acolleu a presentación dun proxecto piloto para a incorporación dos lectores electrónicos nas bibliotecas escolares, E-LBE, integrado no PLAN LÍA de bibliotecas escolares, da Consellería de Cultura, Educación e Ordenación Universitaria. En novembro de 2012, a Dirección Xeral de Centros e Recursos Humanos realizou unha convocatoria destinada aos centros incluídos no Plan de mellora de bibliotecas escolares. Recibíronse un total de 327 solicitudes e procedeuse á selección de 25 centros que cumprían os dous requisitos previstos: compromisto coa biblioteca escolar (manifestado na memoria do curso anterior) e instalación en concellos rurais galegos.  Cunha sesión informativa e a entrega dos lectores electrónicos aos centros seleccionados botou a andar este pequeno proxecto que busca, fundamentalmente, proporcionar ao alumnado novas experiencias de lectura.

Nesta sesión estiveron presentes os responsables das bibliotecas do CEIP Mestre Valverde Mayo, de Mos (Pontevedra) e do IES Lama das Quendas, de Chantada (Lugo), que xa botaran a andar iniciativas de uso de lectores electrónicos nos seus centros, para comentar a súa experiencia e proporcionar, así, información sobre liñas de actuación posibles.

Os centros incluídos neste proxecto E-LBE contarán cun equipamento de 3/4 dispositivos de lectura electrónica que utilizarán en función dos obxectivos do Proxecto Lector de Centro e coa orientación que o equipo de biblioteca crea máis oportuno. A final de ano participarán, mediante un breve formulario, na elaboración dun informe para a valoración desta experiencia.

Achégase un díptico informativo e unha relación máis ampla de recursos electrónicos relacionados coa lectura dixital e o libro electrónico.

PPT Proxecto E-LBE -- PPT CEIP Valverde Mayo (Mos) -- IES Lama das Quendas (Chantada)

+ Informacións: IMIT (Iniciativas de Modernización e Innovación Tecnolóxica) -- Portal Xunta de Galicia

Aprender a buscar na rede. Un recurso para a autoformación e para a formación do alumnado. Un recurso ALFIN


Froito da xenerosidade e da colaboración de dúas profesoras, responsables das bibliotecas escolares dos seus centros, Olga Rodríguez, do CEIP Milladoiro, de Malpica, e Charo Sánchez-Gabriel, do IES Sánchez Cantón, de Pontevedra, podemos contar con este recurso de gran interese, e de gran calidade, para a formación ALFIN do alumnado: "Aprende a buscar na rede con eficiencia". Constitúe, así mesmo, unha ferramenta para a autoformación do profesorado como usuario da rede, e unha oportunidade para compartir coñecemento entre os distintos sectores da comunidade educativa. Agradecemos a estas dúas profesoras a difusión do seu traballo, en beneficio de todas as persoas interesadas na multialfabetización e, en particular, do colectivo das bibliotecas escolares galegas.

"EnREDando versos", ou a poética da colaboración.

EnrREDando versos é un blogue de poesía froito da colaboración de varias bibliotecas escolares que, neste curso, se embarcaron nun traballo conxunto arredor da poesía. A mellor presentación desta experiencia é a que fan os integrantes do grupo:

EnREDando versos é o título do proxecto que nace co obxectivo de achegar á poesía ás aulas. Os intereses comúns no campo da competencia lingüística así como nunha metodoloxía baseada no traballo colaborativo e no uso das TIC entre o alumnado fai que se constitúa un grupo de traballo intercentros co fin de aunar esforzos e intercambiar experiencias educativas que repercutan na práctica docente.

O proxecto está integrado por profesorado de dististos niveis educativos do ámbito de linguas, responsables de bibliotecas escolares, clubs de lectura, un asesor TIC e de novas tecnoloxías, procedentes de cinco centros da provincia de Pontevedra: IES de Poio, IES Ribeira de Louro, IES A Sangriña,  IES de Sanxenxo e CEIP A Lama.

Un exemplo de traballo colaborativo desde as bibliotecas escolares, en beneficio do alumnado (tamén de integración da cultura escrita e a cultura dixital), aproveitando os recursos electrónicos e as formas de comunicación propias da sociedade da información. A poesia é nesta ocasión o motivo de encontro... pero que mellor motivo!!

ALFIN: Móbiles? Unha reflexión sobre a comunicación e o acceso á información.

Desde a biblioteca do IES Marqués de Sargadelos, de Cervo (Lugo) achégannos unha presentación sobre unha temática ben interesante. Nela vemos o resultado dun traballo dos grupos de PDC de 4º de ESO arredor do uso que facemos dos móbiles. Unha interesante reflexión que, ademais, ten como escenario e como plataforma de difusión deste traballo, a biblioteca, como ben vemos na presentación.

 

Un exemplo máis do papel da biblioteca como apoio ás intervencións na aula, como oportunidade para a formación do alumnado no uso consciente das tecnoloxías da información e da comunicación. Un contido ALFIN   de carácter urxente, tratado con recursos accesibles en calquera centro.

A Fina Casalderrey, mestra, autora de literatura infantil e xuvenil... e académica.

Con motivo do nomeamento de Fina Casalderrey como membro numerario da Real Academia Galega, en datas recentes, as bibliotecas escolares galegas quixeron xuntarse de forma virtual e facerlle unha homenaxe publicando, nos seus blogues, unha mesma entrada de felicitación e recoñecemento. Con Fina Casalderrey a Literatura Infantil e Xuvenil entra na Academia como o que é, como literatura de pleno dereito. E tamén entra o profesorado cos pés na terra e o corazón vivo. Parabéns!

Día Escolar da Paz e a Non Violencia - 2013.

Iníciase o ano cos traballos preparatorios para a conmemoración dunha data significativa no calendario anual, o Día Escolar da Paz e a Non Violencia, que se celebra o 30 de xaneiro, data da morte de Gandhi (fai agora 65 anos). As bibliotecas escolares comezan a difundir as súas propostas, poñendo a disposición das súas comunidades educativas recursos variados e apoiando as iniciativas do centro para a educación en valores, que vén sendo o motivo de toda esta actividade.

Recursos para traballar a multiculturalidade

A biblioteca escolar apoia os proxectos de centro. Baixo esta premisa acóllense moitas das accións do profesorado que integra os equipos de biblioteca. Un exemplo é a recompilación de recursos para o tratamento de distintas temáticas de contido curricular.

A temática da multiculturalidade (nas súas diferentes expresións e con diferente alcance) é tratada periodicamente na maioría dos centros. Incluímos aquí algúns recursos elaborados por distintas bibliotecas, con esta finalidade:

Resolución da convocatoria de clubs de lectura para o curso 2012/2013

O Portal Educativo publica hoxe a resolución da convocatoria da Dirección Xeral de Centros e Recursos Humanos, destinada a apoiar o funcionamento de clubs de lectura en centros de titularidade da Consellería de Educación e O.U. que matriculan alumnado de ESO, bacharelato, formación profesional, educación de adultos ou ensinanzas de réxime especial, para o curso 2012, 2013. En total, reciben axuda os 222 centros que a solicitaron, e van destinadas a sufragar o desenvolvemento das actividades previstas no proxecto presentado, fundamentalmente á adquisición dos libros para os diferentes grupos de lectura incluídos en cada un dos clubs (existen clubs con varios grupos de lectura, mesmo un 25% destes clubs contan con grupos de lectura de adultos, integrando así nesta actividade aos distintos sectores da comunidade escolar). Esta iniciativa encádrase no programa HORA DE LER para o fomento da lectura en centros de ensino, unha das liñas de acción do Plan LÍA de biblitoecas escolares (Lectura, Información, Aprendizaxe).

+ INFORMACIÓN: LER EN MAN COMÚN (Blogue dos clubs de lectura)LIBROS A EITO (Banco de libros)

Paseo virtual por unha biblioteca escolar


Desde a Biblioteca "Mª Victoria Moreno" do IES Gonzalo Torrente Ballester, de Pontevedra chéganos este "paseo virtual" polo que ha ser a finais deste curso a súa biblioteca escolar, logo das transformacións nas que están embarcados. Interesante produción feita con respecto e con agarimo polo espazo, pero sobre todo polas actividades e as oportunidades de convivencia e de aprendizaxe que este "entorno" pode favorecer. Parabéns!

Revista Galega de Educación nº 48, especial bibliotecas escolares (2010). O pdf

Xa no momento da súa publicación (2010) déramos noticia deste número 48 da Revista Galega de Educación, do movemento de renovación pedagóxica Nova Escola Galega, dedicado especialmente ás bibliotecas escolares galegas.

Agora os responsables da publicación autorizan a difusión vía internet desta publicación, o que facilita o acceso a un material de interese: un artigo de Manuel Area sobre o papel da biblioteca escolar na alfabetización no século XXI; artigos sobre as bibliotecas escolares galegas e as transformacións que viviron na última década a cargo de Pilar Sampedro e Cristina Novoa, responsables da Asesoría de bibliotecas escolares da consellería; unha entrevista a Juan Mata; experiencias de máis dunha ducia de centros e visións da biblioteca desde a dirección dun centro ou desde a función de inspección. Compleméntase cunha selección de recursos impresos e dixitais en relación coa biblioteca escolar, a lectura e a competencia informacional.

Os clubs de lectura, a Hora de Ler, as mochilas viaxeiras, os proxectos documentais integrados, os axudantes de biblioteca, a integración das TIC, o Proxecto Lector de Centro, a colaboración tentre distintas bibliotecas, a biblioteca escolar como factor de compensación social... Todos estes aspectos e moitos máis que protagonizan o día a día das bibliotecas escolares galegas, recollidos neste especial que recomendamos como documento de referencia.

 

ACCESO AO PDF AS BIBLIOTECAS ESCOLARES (Revista Galega de Educación, nº 48)

Un PDI (Proxecto Documental Integrado) arredor do Pan de Nadal


As nenas e nenos do CEIP de Frián-Teis (Vigo, Pontevedra) investigaron profundamente o tema dos pans doces de inverno, a súa procedencia e as súas diferentes versións por Europa e outros lugares do mundo (a través do PDI A lingua sabe a pan) e prepararon este "informativo" para nos dar a coñecer os seus descubrimentos, un exemplo de xornalismo de investigación. Unha actividade de álfabetización mediática e informacional, unha oportunidade de aprendizaxe global... e unha ocasión para larpeiros, lambóns e lambereteiros!

Lectura para tempos fríos. Guías de lectura para o Nadal 2012

Achéganse os días de Nadal e as Bibliotecas Escolares Galegas comezan a difundir as súas recomendacións de lectura para estes días fríos. Estas "guías de lectura" recollen títulos de libros para todas as idades e sensibilidades lectoras e, nalgúns casos, tamen películas, música e enderezos electrónicos de interese. Responden ao traballo de selección realizado polos equipos de bibliotecas dos centros, e son un material de apoio ás familias co obxectivo de orientalas no seu labor de creación de hábitos de lectura entre os máis novos. Varias destas guías teñen o interese engadido de seren seleccións temáticas e estaren relacionadas con proxectos interdisciplinares ou proxectos documentais integrados, levados a cabo no centro durante o presente curso.

 

E para sumar sempre, selección de lecturas das Bibliotecas Municipais do concello de A Coruña: Guía Historias de regalo 2012 - Historias de regalo: regala cine, música e libros 2012

Felicitacións navideñas con l de libro e i de imaxinación.

Desde o IES A Fonsagrada (A Fonsagrada, Lugo) unha felicitación colectiva, con humor e boas vibracións.

E desde o IES As Barxas (Moaña, Pontevedra), coa colaboración do Departamento de Plástica, unha felicitación sorprendente e marcada de lirismo. Exemplos do bo traballo que se está a facer no ensino público galego. Parabéns!

Cineducación: Linguaxe audiovisual


O alumnado do Master de Comunicación y Educación da Universidade Autónoma de Barcelona vén de estrear unha miniserie sobre a linguaxe audiovisual que pode servir, perfectamente, de material para a formación do noso alumnado, en obradoiros de imaxe ou actividades da biblioteca escolar relacionadas coa Alfabetización Mediática e Informacional.

+ Información

As bibliotecas escolares galegas, bibliotecas de premio!




O luns 10 de decembro tivo lugar en Madrid, na Biblioteca Nacional, o acto de entrega de diplomas acreditativos dos Premios Nacionais de boas prácticas na xestión e dinamización de bibliotecas escolares, correspondente ao ano 2011, e última convocatoria deste premio, ata o momento. Estiveron presentes os representantes dos seis centros galegos galardoados, acompañados do Director Xeral de Centros e Recursos Humanos e o Conselleiro de Cultura, Educación e Ordenación Universitaria.

Modalidade A (centros de ensino infantil, primaria, educ. especial e educ. de adultos):  

Súmanse así, aos 29 centros que obtiveran premio nacional nas convocatorias no período 2003-2010:

2003
IES ANXEL CASAL-MONTE ALTO (A Coruña)
2004
CEIP de Présaras-Vilasantar (A Coruña)
IES Fernando Esquío de Xubia-Neda (A Coruña)
2005
CPI Luis Díaz Moreno, de Baralla (Lugo)
IES Sánchez Cantón, de Pontevedra
IES Terra do Xallas, de Santa Comba (A Coruña)
IES Xulián Magariños, de Negreira (A Coruña)
2006
IES Ramón María Aller Ulloa, de lalín (Pontevedra)
IES Leliadoura, de Ribeira (A Coruña)
2007
CEIP A Ponte, de Lugo.
CEIP San Martiño-Salcedo, Pontevedra
CEIP Milladoiro, de Malpica (A Coruña)
IES Marqués de Suanzes, de Ferrol
2008
IES CARLOS CASARES, Viana do Bolo (Ourense).
IES Afonso X O Sabio, Cambre (A Coruña)
COLEGIO LA SALLE, Santiago de Compostela.
2009
CEIP Frián-Teis, de Vigo (Pontevedra)
CRA Mestre manuel Garcés, de Tomiño (Pontevedra)
CEIP A Pedra, de Bueu (Pontevedra)
IES Sanxenxo (Pontevedra)
IES de Catabois, de Ferrol (A Coruña)
2010
CRA Mestra Clara Torres, de Tui (Pontevedra)
CPI Tino Grandío, de Guntín (Lugo)
CEIP de Cervo, Cervo (Lugo)
CEIP Os Muíños, de Muxía (A Coruña)
CEIP Quintela de Moaña (Pontevedra)
IES de Monterroso, Monterroso (Lugo)
IES de Fene, Fene (A Coruña)
IES Manuel Antonio (actual CIFP) de Vigo (Pontevedra)

Parabéns. novamente, ás comunidades educativas que fan posible, día a día, a presenza de bibliotecas escolares ÚTILES para un ensino eficaz e para a tan necesaria construción dunha sociedade lectora .

Materiais IV Xornadas de Bibliotecas Escolares de Galicia

 

Desde a Aula Virtual do CAFI (Centro Autonómico de Formación e Innovación) pódese acceder xa aos materiais das IV Xornadas de Bibliotecas Escolares de Galicia, celebradas en Santiago de Compostela os pasados 9 e 10 de novembro. Estes materiais completaranse en breve, unha vez editados os vídeos correspondentes ás diferentes sesións, así como o vídeo resume da xornada.  ACCESO aberto (entrar como convidado).

Engadimos desde aquí informacións complementarias e enlaces relacionados coa temática das xornadas, LER PARA VER, relativa á formación para a competencia mediática e informacional, co apoio dos recursos da biblioteca escolar.

 

 

Imaxes das xornadas (C.Novoa)

Lectura poética contra a violencia de xénero.


Desde a biblioteca do IES Pino Manso, de O Porriño, as mozas do Club de lectura súmanse ás actividades levadas a cabo en moitas bibliotecas, e na practica totalidade de centros galegos, en contra da violencia de xénero. Tecendo sociedade igualitarua e xusta.

A biblioteca do IES Lama das Quendas (Chantada) presenta a campaña contra a violencia de xénero.


Na biblioteca do IES Lama das Quendas, de Chantada (Lugo), hai tempo que levan emprengando a linguaxe audiovisual como ferramenta de expresión nas súas actividades e propostas. Anteriormente realizaran spots publicitarios para promocionar a lectura entre a comunidade educativa. Agora véñen de presentar na televisión local a súa campaña contra a violencia de xénero. Un bo exemplo de biblioteca escolar como espazo de convivencia e de formación para unha cidadanía máis igualitaria e máis xusta. Parabéns!

"Caderno de bitácora". Materiais do IES Pedras Rubias para a competencia informacional.

Desde o IES Pedras Rubias, de Salceda de Caselas (Pontevedra), achégannos un excelente material para traballar a competencia informacional co alumnado, froito dun Grupo de Traballo que se desenvolveu no centro ao longo do curso 2011/2012.  Segundo nos conta a responsable da  biblioteca o título que lle deron a este material está ben xustificado: A  nosa unidade trata de solucionar a educación documental dixital, a través dunha especie de "Caderno de bitácora" no que guiarse para aprender buscas na Rede, distinguir páxinas fiables, etc. En definitiva, a tan nomeada e necesaria alfabetización dixital. ACCESO a "Caderno de Bitácora". Educación documental dixital.

Selección de recursos para unha pedagoxía da igualdade e en contra da violencia de xénero. 25 de novembro

Achégase o 25 de novembro, Día Internacional para a eliminación da violencia de xénero, e son moitas as institucións e organismos que se suman a unha dinámica de sensibilización e de formación cidadá neste ambito, cada día máis necesaria. Tamén as bibliotecas escolares seleccionan fontes informativas adaptadas ao seu alumnado, e múltiples recursos que poñen a disposición do profesorado, en apoio das actividades que desenvolven unha educación para a igualdade e a xustiza. Segundo teñamos noticia deles,  ou de actividades arredor deste día, iremos incorporándoas a esta páxina.

E tamén: