Memorias dun neno labrego na voz dos mozos e mozas do IES Pino Manso


Durante o curso 2010/2011, os mozos e mozas xunto ao profesorado do IES Pino Manso, de O Porriño, foron grabando pequenos vídeos coas súas lecturas de MEMORIAS DUN NENO LABREGO. Balbino cobra vida a través deles e bota a correr polos camiños de hoxe, porque aínda temos moito que aprender canda el. A biblioteca escolar deste centro marcou así unha pista para futuras iniciativas, ben interesante.  Pódense ver todos os vídeos neste ENLACE

6 premios para as bibliotecas escolares galegas no Concurso Nacional de boas prácticas 2011, do Ministerio de Educación.

O Ministerio de Educación vén de comunicarlle á esta consellería que no Concurso Nacional de boas prácticas na xestión e dinamización das bibliotecas escolares, correspondente ao ano 2011, acadaron galardón seis bibliotecas escolares desta comunidade. Por segundo ano consecutivo, o primeiro premio na modalidade de ensino infantil e primario é para un centro galego. Velaquí a relación de centros premiados:

Parabéns ás comunidades educativas destes centros polo esforzo realizado, e polo recoñecemento que estes premios supoñen á profesionalidade e o compromiso do profesorado que pon en marcha e mantén estas bibliotecas, estes espazos educativos de primeiro nivel. As nenas e os nenos que se forman nelas como lectores e como cidadáns, ben o merecen.

Dúas bibliotecas escolares galegas nos VII Xornadas de Bibliotecas Escolares de Extremadura

Unha vez máis, a Consejería de Educación de Extremadura inclúe no programa das súas xornadas de bibliotecas escolares a experiencia de bibliotecas de centros incluídos no Plan de mellora de bibliotecas escolares de Galicia. Nestas VII Jornadas sobre Bibliotecas Escolares de Extremadura, a celebrar en Cáceres o día 30 de novembro, van participar dúas bibliotecas:

As bibliotecas escolares galegas celebran esta excelente representación do traballo que, a cotío, se realiza en centros educativos da nosa comunidade.

 

Marco de referencia para as bibliotecas escolares.

No contexto do pasado congreso Bibliotecas Escolares en Tránsito, celebrado en Santiago de Compostela, o Ministerio de Educación distribuíu entre os asistentes e fixo a presentación do "Marco de referencia para las bibliotecas escolares", documento elaborado no seo da Comisión Técnica de Bibliotecas Escolares (que está integrada á súa vez no Consejo de Cooperación Bibliotecaria), da que forman parte representantes do Ministerio e das distintas CCAA que traballan en materia de bibliotecas escolares e lectura nas respectivas consellerías. Tal e como se di na introdución deste documento, "el Ministerio de Educación ha creído conveniente elaborar unas orientaciones dirigidas a todos los miembros de la comunidad escolar, especialmente a los responsables de las políticas educativas y a cuantos técnicos y asesores docentes deben poner en marcha, asesorar o evaluar las bibliotecas de cada centro".

Este "documento de Santiago" presenta o modelo de biblioteca escolar que precisa o actual sistema educativo, sinala as condicións básicas para o seu correcto funcionamento e os ámbitos de actuación que, desde a biblioteca escolar, permiten o desenvolvemento de metodoloxías activas. Pode ser un instrumento para a formación dos integrantes dos equipos de biblioteca, para a orientación das comunidades educativas á hora de analizar a situación da súa biblioteca escolar e de planificar melloras na práctica xa iniciada. Xunto coa guía para a autoavaliación da biblioteca escolar, Bibliotecas escolares, ¿entre interrogantes?, tamén presentada no seo do congreso, constitúe unha equipaxe valiosa para quen, desde distintos postos e ámbitos de actuación, está interesado polas bibliotecas escolares e a calidade da ensinanza nos centros.

Outras referencias na Rede:

Unha biblioteca de outono: formación de usuari@s e Samaín.


Son moitos os centros escolares que están xa empregando os recursos audiovisuais co seu alumnado, dunha forma activa. Velaquí un exemplo de producíón propia coa colaboración do alumnado que ilustra a vida cotiá dunha biblioteca escolar, neste caso, a do IES de Ponteceso (A Coruña). Os rapaces e rapazas de 1º de ESO participan nunha sesión de formación de usuari@s; tamén podemos asistir á lectura de contos de medo, co gallo do Samaín. Un exemplo da actividade deste centro e unha iniciativa de "documentación" da actividade da biblioteca que resulta de gran interese.

Bibliotecas escolares galegas

Bibliotecas Escolares en Tránsito [GAL] from Bibliotecas Escolares de Galicia on Vimeo.

Este vídeo foi rodado en centros do Plan de mellora de bibliotecas escolares de diferentes recunchos de Galicia, e presentouse no Congreso Bibliotecas Escolares en Tránsito, celebrado en Compostela os días 10, 11 e 12 de novembro, organizado pola Consellería de Educación en colaboración co Ministerio de Educación.
As imaxes exemplifican a distribución de espazos nas novas bibliotecas, e algunhas das actividades que o alumnado realiza nelas día tras día.

 

"Bibliotecas escolares, ¿entre interrogantes?"

A Fundación Germán Sánchez Ruipérez, a través do portal especializado en lectura LECTURA LAB, vén de publicar a guía para a autoavaliación das bibliotecas escolares, que se presentara hai uns días no Congreso Bibliotecas Escolares en Tránsito. Inés Miret, Inmaculada Vellosillo, Teresa Mañá e Mónica Baró son as autoras desta ferramenta, "Bibliotecas escolares, ¿entre interrogantes?", que pretende facilitar ás comunidades educativas radiografiar as súas propias bibliotecas, contribuír á mellora da súa práctica neste ámbito, e potenciar o uso destes recursos educativos, en beneficio dunha educación máis adaptada ás necesidades do alumnado actual. Éste material publícase coa colaboración do Ministerio de Educación.

Biblioteca escolar, última xeración

Achégase o mes de outubro e as bibliotecas escolares están xa inmersas en proxectos e actividade. Por moi escuro que sexa o futuro, sen dúbida está aí, chamando á porta, e as bibliotecas han estar preparadas e adiantarse un paso, sen deixar de soñar.

Para celebrarmos o Día da biblioteca (24 de outubro), o mes da biblioteca escolar (segundo convocatoria da IASL), un curso máis, a Consellería de Educación edita un cartaz cunha imaxe dun autor galego. Nesta ocasión, Emma Ríos, ilustradora do mundo do cómic, interpreta o lema proposto, Biblioteca escolar, última xeración, e ofrécenos unha visión alegre e cómplice do que son e poden ser as bibliotecas escolares: lugares de encontro e de convivencia, espazos de aprendizaxe e de contacto gozoso coa cultura escrita; integración dos distintos soportes e formatos que albergan a información e os contidos culturais, oportunidades para soñar e imaxinar; apoio para a adquisición de competencias básicas e construción de coñecementos de calquera tipo; escolas de cidadanía.

+ información sobre EMMA RÍOS no portal Banda Deseñada, do Consello da Cultura Galega.

+ Emma Ríos na Wikipedia

Formación de usuari@s na biblioteca CEIP de Pedrouzos (Brión, A Coruña)

 
Desde a biblioteca do CEIP de Pedrouzos (Brión), achégannos un enlace á súa aula virtual onde podemos entrar como convidados e coñecer un material de formación de usuarios, feito coa ferramenta LIM e que exemplifica o tipo de actividades que se poden levar a cabo desde a biblioteca, coa finalidade de desenvolver no alumnado habilidades específicas para o uso das fontes informativas e dos recursos que esta pode ofrecer. Agradecemos a xenerosidade do equipo da biblioteca poñendo a disposición de todos esta ferramenta.

Resolución do Plan de mellora de bibliotecas escolares 2011/2012

logo de Bibliotecas Escolares de GaliciaO DOG do 13 de setembro publica a Orde de 1 de setembro pola que se resolve o Plan de mellora de bibliotecas escolares en centros públicos non universitarios de titularidade da Consellería de Educación, para o curso 2011/2012. Incorpóranse 84 novos centros a este programa, que se iniciara no curso 2005/2006 co obxectivo de impulsar a renovación e a actualización das bibliotecas dos centros de ensino non universitario. Actualmente integran o Plan de mellora de b.e. un total de 449 centros públicos, de distintos niveis de ensino.

RESOLUCIÓN

Lembrando a IV Xornada dos Clubs de Lectura


Vídeo resume da IV Xornada dos Clubs de Lectura, celebrada en Santiago de Compostela o pasado 10 de xuño.

+ INFORMACIÓN e MATERIAIS

"Un bosque para ler e navegar", ou como artellar un Proxecto Documental Integrado (PDI).

O 2011 foi declarado Ano Internacional dos bosques polos organismos internacionais. Esta circunstancia foi aproveitada por moitos centros escolares para centrar a súa actividade, nalgún momento do curso, no mundo dos bosques, desde destintos enfoques. Un exemplo de bo facer é este Proxecto Documental Integrado (PDI), Un bosque para ler e navegar, deseñado e desenvolvido durante todo o curso no CEIP Frián-Teis, de Vigo, coa participación de toda a comunidade educativa. Recomendamos unha visita aos distintos apartados deste traballo, apoiado pola biblioteca a través dos seus recursos informativos, porque ilustra estupendamente como se pode aprender e ensinar aproveitando fontes diversas, partindo do medio, do máis próximo e significativo para o alumnado, sumando forzas, creando vínculos entre os distintos sectores da comunidade escolar, integrando tecnoloxías tradicionais e dixitais... en definitiva, educando a alumnado actual con metodoloxías axeitadas, sen esquecer o importante: o dereito das nenas e dos nenos a aprender e a medrar como cidadáns activos.

UN BOSQUE PARA LER E NAVEGAR

Ver: Proxectos Documentais Integrados. Rosa Piquín. 2006

Selo "Buena práctica Leer.es" do mes de xullo para o CEIP A Lama

O centro virtual LEER.ES, do Ministerio de Educación, vén de conceder os seus "selos de boas prácticas" correspondentes ao mes de xullo. Novamente, unha biblioteca escolar galega acada esta distinción que vén recoñecer un traballo ben feito no ámbito da lectura e a innovación educativa. O CEIP A Lama (A Lama, Pontevedra) desenvolveu este ano un PDI (Proxecto Documental Integrado) arredor do tema da auga. Lectura, investigación, aprendizaxe significativa, metodoloxías adaptadas ao alumnado, ás formas de aprender na sociedade da información, relación co medio, comunicación, interdisciplinariedade... entusiasmo, profesionalidade e aproveitamento dos recursos culturais e do medio. Parabéns ao profesorado responsable deste proxecto e á biblioteca escolar que lle dá apoio e soporte a este tipo de actividades.

Hora de botar contas, de facer números, de ver indicadores... Hora de avaliar.

A cultura da avaliación entrou nas bibliotecas escolares galegas e vaise asentando, poñendo de manifesto a profesionalidade do profesorado que as xestiona e lles dá vida. Se ben o indicador do préstamo vai perdendo protagonismo fronte a outros de maior significado, o certo é que este servizo é un dos máis importantes na biblioteca escolar. Unha ollada atenta á súa evolución dentro dun centro pode servir para reorientar as decisións a tomar na política de adquisicións, no necesario equilibrio da colección, na planificación de novas propostas e servizos.

Velaquí os datos do préstamo dunha biblioteca escolar, a do IES As Mariñas, de Betanzos, correspondente ao curso que remata, e o gráfico da evolución do préstamo nos últimos cursos, así como a interesante valoración que fan os responsables da biblioteca destes datos.

Resolución provisional. Centros que se incorporan ao Plan de mellora de bibliotecas escolares 2011/2012

Publicada no Portal Educativo a resolución provisional pola que se incorporan 83 novos centros ao Plan de mellora de bibliotecas escolares, para o curso 2011/2012, seguindo o proceso que se recolle na Orde de 17 de marzo de 2011 (DOG de 5 de abril), de convocatoria.

Na resolución definitiva, que se publicará no DOG, no mes de setembro, recollerá a totalidade dos centros integrados neste programa no vindeiro curso, unha vez rematado todo o proceso de valoración de memorias correspondentes ao ano académico 2010/2011, entre outros trámites pertinentes.

Un verán de libros: recomendacións de lectura das bibliotecas escolares galegas

Remata o curso escolar pero non remata o tempo da lectura. Ben o saben as nenas e os nenos que nos últimos días andiveron reservando as súas lecturas para o verán na biblioteca do centro. Son cada vez máis numerosas as bibliotecas que prestan lotes de libros para as vacacións aos distintos membros da comunidade educativa. Outra función da biblioteca, a de orientar en lecturas de calidade, ponse de manifesto, nestes días, a través das guías de lectura, boletíns de recomendacións e outras publicacións en papel e en internet. Recomendamos visitar os blogues das bibliotecas escolares galegas. PRIMARIA  -  SECUNDARIA , e poñemos aquí algúns exemplos:

"Desmontando prexuizos" ou "dedicado a quen afirma que os nenos non len"...

 


 

"Un ano entre libros" é o título deste vídeo do CEIP CHANO PIÑEIRO (Gondomar, Pontevedra) que vén a resumir e dar conta da intensa actividade dunha biblioteca escolar ao longo do curso... un bo exemplo das dinámicas existentes por todo o territorio galego. Parabéns!!!

+ información no PAPORRUBIO, o blogue da biblioteca do Ceip Chano Piñeiro.

IV Xornada dos Clubs de Lectura. Materiais

 

 

O 10 de xuño celebrouse en Santiago de Compostela a IV Xornada de Clubs de Lectura, coa asistencia de 205 profesoras e profesores de toda Galicia, coordinadores dos clubs de lectura que funcionaron este curso 2010/2011 en centros públicos que matriculan alumnado de ESO, bacharelato, formación profesional, idiomas ou ensinanzas artísticas. Os materiais da xornada están accesibles a todo o profesoado neste enlace (entrar como convidado). Están tamén dispoñibles os vídeos das diferentes sesións.

+ información en LER EN MANCOMÚN

 

IV Xornada dos Clubs de Lectura

   

O venres 10 de xuño, na EGAP (Escola Galega de Administración Pública), de Santiago de Compostela, reunirase o profesorado que coordina os clubs de lectura que, no actual curso 2010/2011, están a ter funcionamento en máis de 200 centros de ensino secundario de toda Galicia. Esta IV Xornada dos Clubs de Lectura será oportunidade para o encontro, o intercambio de propostas, a creación de canles de colaboración futuras, a presentación de experiencias e a reflexión sobre as múltiples posibilidades desta fórmula de fomento da lectura e de formación de lectores e lectoras competentes. Axudarán a tal efecto, a profesora da Universitat de Barcelona, Ana Díaz-Plaja, e o escritor Fernando Marías. Unha mesa de experiencias baixo o lema, Un club de lectura é algo máis, servirá para coñecer algúns exemplos de clubs de lectura que colaboran en actividades conxuntas, implican ás familias ou realizan actividades de fondo calado nas súas respectivas comunidades educativas, espallando o pracer de ler no seu medio máis próximo, ampliando a súa actividade a outras bibliotecas, visitando librerías, creando roteiros literarios nas súas vilas e cidades, ou colaborando con outros clubs de lectura de centros educativos doutras comunidades autónomas, a través do programa ARCE, do Ministerio de Educación, e mesmo doutros países, a través do programa europeo e-Twinning.

Retransmitirase en directo, a través desta páxina, toda a xornada.  Tamén no blogue LER EN MANCOMÚN, dos clubs de lectura

PROGRAMA

Biblioteca no IES Ribeira do Louro


Unha visita virtual á biblioteca do IES Ribeira do Louro (O Porriño, Pontevedra), da man dos rapaces e rapazas que nola van ensinando...  Espazos para o traballo, a consulta, o pracer de ler e de aprender.

Normas de uso da biblioteca no Frei Sarmiento de Pontevedra


Untitled from IES Frei Martín Sarmiento (Bibl on Vimeo.

No IES Frei Sarmiento, de Pontevedra, na estela do que xa fixeran no IES de Ponteceso (Ponteceso, A Coruña) e coa colaboración do Obradoiro de Imaxe do centro e dos rapaces  e rapazas de 3º de ESO, elaboraron este vídeo para difundir as normas de uso da biblioteca. "Maneiras de vivir" a biblioteca que benefician a tod@s.

Maletas viaxeiras: "Os mundos de Cunqueiro"

O 2011 foi declarado polo Consello da Cultura Galega, "Ano Cunqueiro" por mor de celebrarse o centenario do seu nacemento.

Con este motivo, recóllense nunha nova "maleta viaxeira" algunhas das obras do escritor, xunto con outros títulos de autoría diversa, inspirados no fértil imaxinario creado por Álvaro Cunqueiro. Acompáñanse, entre outro material, dunha breve mostra de músicas publicadas a partir dos seus poemas.

As maletas "Os mundos de Cunqueiro" están dispoñibles para os centros que as soliciten, en préstamo temporal. Contacto: bibliotecasescolares@edu.xunta.es.

Esta maleta vense unir ás xa existentes de lectura, cómic e poesía, que andan a rolar polos centros de toda Galicia. A partir do vindeiro curso, estarán todas centralizadas na Asesoría de bibliotecas escolares.

Unha biblioteca escolar que se transforma: CEIP de Chans de Bembrive


Velaquí un vídeo que ilustra o proceso de transformación da biblioteca escolar en centro de recursos de lectura, información e aprendizaxe, ao tempo que facilita a formación de usuarios e usuarias. Parabéns á comunidade educativa do CEIP Chans de Bembrive (Vigo, Pontevedra), pola súa nova biblioteca e polo seu traballo.