Bibliotecas escolares

Encontros do Plan de mellora de bibliotecas escolares 2015/2016

Os días 7 e 8 de abril próximos celebraranse en Compostela os Encontros do Plan de mellora de bibliotecas escolares do curso 2015/2016, coa asistencia de 145 responsables de bibliotecas integradas no programa, na primeira xornada, e representantes da totalidade dos centros (575) xa na segunda xornada.  Este encontro anual do profesorado que xestiona e coordina as bibliotecas integradas no PLAMBE, serve para avanzar na formación deste colectivo e constitúe un espazo de reflexión, intercambio de experiencias e propostas arredor dos ámbitos de actuación da biblioteca escolar: a lectura, a información, a aprendizaxe.

Abordaranse os retos educativos que a biblioteca debe enfrontar e as posibilidades que ofrece para o cambio metodolóxico imprescindible. Entre outras experiencias de interese presentaranse varios dos traballos galardoados no II Concurso de Traballos por Proxecto, coordinados ou co apoio da biblioteca escolar. 

Acompañarán ao profesorado expertos e investigadores en diversos ámbitos: Gemma LLuchMónica Baró, Eduardo Sáenz de Cabezón ou Ana Bernal. Pechará os encontros Manuela Silva, actual coordinadora da Rede de Bibliotecas Escolares de Portugal, programa que cumpre agora os 20 anos de existencia cunha excelente realidade, a pesar de todos os atrancos, faro sempre para as actuacións desde esta consellería.

Bibliotecas Escolares Solidarias. Curso 2015/2016

 

O Portal Educativo publica a Resolución da Dirección Xeral de Centros e Recursos Humanos, de 10 de decembro de 2015, pola que se convoca o programa BIBLIOTECAS ESCOLARES SOLIDARIAS para o curso 2015/2016. Este programa, destinado a centros de titularidade da Consellería de Cultura, Educación e Ordenación Universitaria, conta coa colaboración da Dirección Xeral de Xuventude, Participación e Voluntariado (Consellería de Política Social) e inclúe varias accións:

  • Selo "Biblioteca Escolar Solidaria"
  • Voluntariado na biblioteca escolar (Secundaria)
  • Voluntariado de Lectura-A (Primaria)
Bibliotecas Escolares Solidarias ten como obxectivo estimular o voluntariado cultural en relación coas bibliotecas e a lectura entre o alumnado dos niveis non universitarios e as súas familias nos centros públicos galegos, e recoñecer os esforzos das comunidades educativas por conformar bibliotecas escolares que axuden a paliar as desigualdades no acceso ao coñecemento e ao uso dos recursos culturais e de aprendizaxe. Este programa intégrase como inicativa de voluntariado nos programas da D. X. de Xuventude, Participación e Voluntariado. 

 

VI Xornadas de Bibliotecas Escolares de Galicia. Materiais

Están dispoñibles en redeBE os materiais (presentacións, informacións, ligazóns de interese) das VI Xornadas de Bibliotecas Escolares de Galicia, celebradas recentemente en Santiago de Compostela. 

ACCESO AOS MATERIAIS 

Realidade Aumentada

bescolares Realidade Aumentada

Dende a Asesoría de Bibliotecas Escolares seguimos traballando coas novas tecnoloxías, neste caso achégase a Realidade Aumentada a través da aplicación Aurasma, mediante a canle: bescolares, onde se irá ofrecendo información, de tal xeito que de forma doada, interactiva, atractiva e divertida se poida investigar, indagar e tamén recoller a información compartida.

Para acceder á información ofertada na canle bescolares do programa Aurasma compártense as seguintes ligazóns:

Como se pode ver no manual ou no vídeo comentados anteriormente, a primeira información que se pon a disposición pódese atopar enfocando dende o dispositivo móbil coa aplicación Aurasma sobre o cartel da campaña anual (curso 2015/2016) de bibliotecas escolares da  Consellería de Cultura, Educación e Ordenación Universitaria: "Biblioteca escolar, base de exploracións".

Algúns centros xa están a traballar coa Realidade Aumentada. A modo de exemplo:

Licenza da música empregada na xeración do vídeo: BY-NC-ND

VI Xornadas de Bibliotecas Escolares de Galicia

Nos vindeiros 20 e 21 de novembro celebraranse en Compostela as VI XORNADAS DE BIBLIOTECAS ESCOLARES DE GALICIA, unha actividade de formación permanente do profesorado, organizada conxuntamente pola Dirección Xeral de Centros e Recursos Humanos, a través da Asesoría de bibliotecas escolares, e a Dirección Xeral de Educación, Formación Profesional e Innovación Educativa (a través do CAFI). Agárdase a asistencia dun milleiro de profesoras e profesores de toda Galicia, coma en anos anteriores. 

O programa previsto contempla un bo feixe de experiencias de bibliotecas escolares galegas que funcionan como "bases de exploracións", en alusión ao lema da campaña de bibliotecas escolares deste curso 2015/2016, así como experiencias de traballos por proxectos coordinados por distintas bibliotecas escolares. Acudirán, así mesmo, expertos de distintos ámbitos que axudarán á reflexión sobre os novos retos que deben enfrontar as bibliotecas escolares e os centros, en definitiva, para facilitar a adquisición das competencias clave por parte do alumnado, tendo nas bibliotecas escolares o gran aliado. Carlos MagroXurxo MariñoGuadalupe JoverFelicidad Campal, Rosa Piquín e Ana Siro acompañarán ao profesorado galego nesta cita anual para o intercambio de experiencias, a análise o desenvolvemento de recursos para unha mellor práctica. 

PROGRAMA 

Novembro, Mes da Ciencia en Galego nas Bibliotecas-2015

Por segundo ano consecutivo, desde a Consellería de Cultura, Educación e Ordenación Universitaria promóvose a celebración de novembro como  MES DA CIENCIA EN GALEGO NAS BIBLIOTECAS, sumándose á celebración doutras iniciativas como o Día da Ciencia en Galicia, da Real Academia Galega de Ciencias, celebrado o pasado 1 de xuño e dedicado á oceanógrafa galega Ánxeles Alvariño, ou o Día da Ciencia en Galego, a celebrar o 4 de novembro, a instancia da Institución Galega de Ciencia entre outras institucións. 
Desta vez o autor do manifesto para o Mes da Ciencia en Galego nas Bibliotecas é o científico e divulgador da Universidade de Santiago, Jorge Mira, quen lembra no seu fermoso texto que "o galego, tanto pola riqueza que lle dá o seu milenio de historia, como pola súa condición de porta aberta a centos de millóns de persoas da lusofonía, é vehículo esencial para transportar masivamente a ciencia e o labor dos moitos científicos de excelencia que temos en Galicia."
Desde a consellería editouse, tamén, un FOLLETO INFORMATIVO con informacións diversas sobre a celebración deste Mes da Ciencia en Galego nas Bibliotecas, recollendo a programación das bibliotecas públicas nodais (dependentes da administración autonómica), así como otras informacións de Bibliotecas Escolares de Galicia, en relación con esta temática. 
Desde a Asesoría de bibliotecas escolares ofrécese a páxina de Recursos para a Ciencia en Galego como unha contribución ao traballo nos centros. 
As bibliotecas escolares, ao igual que en anos anteriores, comezan a difundir as actividades programadas para este mes. A Modo de exemplo, desde a biblioteca do CEIP Alexandre Bóveda, de Vigo, fálannos do material elaborado desde o equipo TIC do centro para a conmemoración  do Día da Ciencia en Galego, sobre a figura de Ángeles Alvariño. Outras actuacións: 

24 de outubro, Día da Biblioteca, tamén da Biblioteca Escolar.

O 24 de Outubro é recoñecido como o Día da Biblioteca, desde que hai anos comezara a celebrarse grazas ao empeño da Asociación Española de Amigos del Libro Infantil y Juvenil, no 1997. Amparado agora polo Ministerio de Educación, Cultura y Deporte, o DÍA DA BIBLIOTECA celébrase en todo o estado e serve para dar visibilidade a todas e cada unha das bibliotecas que abren as súas portas día a día para acoller ás persoas en procura de lectura e de coñecemento, pero tamén de espazos "amigables" nos que compartir experiencia lectora, pensar e traballar xunto con outros en proxectos diversos. Porque iso son as actuais bibliotecas, eses "terceiros lugares" capaces de acollernos e axudarnos a desenvolver proxectos persoais de moi distinto tipo. 
As bibliotecas escolares celebran todos os días a súa existencia, froito dos esforzos das comunidades educativas que as poñen en pé, pero tamén arredor desta data, e durante todo o mes de outubro, sucédense actividades ao longo das bibliotecas dos nosos centros, dedicadas a dar a coñecer as súas posibilidades, ensinar ao alumnado a usar os seus recursos e animar a grandes e pequenos a que aproveiten as súas oportunidades: libros, materiais audiovisuais, recursos electrónicos, equipamentos, espazos atractivo, actividades tentadoras (recitais, presentacións, lecturas compartidas, acompañamentos lectores, hora do conto, "olimpiadas do saber", exposicións e presentacións de traballos, formación de usuarios e usarias, "aprender a investigar", mochilas viaxeiras, clubs de lectura... ). As bibliotecas como base de exploración persoal e colectiva, como inicio de viaxes reais ou imaxinarias, como espazo de encontro consigo mesmo e cos outros. 
Estes son só algúns exemplos da actividade das bibliotecas escolares galegas nestes días. Unha visita aos blogues de PRIMARIA ou SECUNDARIA permitirá coñecer moitas outras. Convidámos á facer esta exploración nestes días finais de outubro, mes da Biblioteca Escolar segundo propón a IASL

Biblioteca escolar, base de exploracións

"Biblioteca escolar, base de exploracións" é o lema elixido este curso 2015/2016 para o cartel da campaña anual de bibliotecas escolares da  Consellería de Cultura, Educación e Ordenación Universitaria. A imaxe responde á interpretación do lema elixido por parte do ilustrador e autor de banda deseñada FRAN BUENO
O lema "Biblioteca escolar, base de exploracións" chama a traballar coa información; convida a explorar o mundo e a compartir o aprendido.  

 

 

 

Resolución definitiva da convocatoria do Plan de mellora de bibliotecas escolares - PLAMBE 2015/2016

 
O DOG de hoxe, 9 de setembro, publica a Orde de 1 de setembro de 2015 coa resolución definitiva da convocatoria do Plan de mellora de bibliotecas escolares en centros públicos de titularidade da consellería de Cultura, Educación e Ordenación Universitaria, para o curso 2015/2016. 
O PLAMBE é un programa iniciado en 2005 que está a impulsar a transformación das bibliotecas escolares en centros de recursos de lectura, información e aprendizaxe. Pero máis aló dos recursos, as bibliotecas son un instrumento esencial para a innovación educativa na medida en que propician e lideran a utilización de metodoloxías activas, a integracións das TIC en contextos reais de aprendizaxe e o traballo por proxectos.
As bibliotecas  facilitan oportunidades de aprendizaxe en moi distintos ámbitos e son un espazo de encontro entre os diferentes membros da comunidade escolar. O seu funcionamento é esencial para o desenvolvemento do currículo pois apoia a todas as áreas e materias, non só cos recursos informativos que proporciona, senón tamén coas actividades que organiza en beneficio de toda a comunidade escolar. A lectura, entendida en sentido amplo, como alfabetización múltiple, a lectura do século XXI, é a base de todas as actuacións da biblioteca, pero tamén son fundamentais as actividades relacionadas co mundo da información. O alumnado precisa de forma urxente ser formado no uso, tratamento, aproveitamento e produción da información, nos múltiples formatos e soportes nos que hoxe se presenta na sociedade.
O Plan de mellora de bibliotecas escolares facilita recursos, formación e obxectivos comúns a un profesorado interesado en facer da súa biblioteca un espazo de aprendizaxe, en liña coas esixencias da normativa educativa vixente. Un total de 575 centros públicos forman parte desta "rede de bibliotecas escolares" de Galicia. 

Biblioteca escolar, base de exploracións

"Biblioteca escolar, base de exploracións" é o lema elixido este curso para o cartel da campaña anual de bibliotecas escolares que a Consellería de Cultura, Educación e Ordenación Universitaria, enviará en breve a todos os centros públicos como reforzo das actuacións da biblioteca escolar e para apoiar a visibilidade dos seus recursos e das súas oportunidades de aprendizaxe. 

A imaxe do cartel responde á interpretación que deste lema fixo o ilustrador e autor de cómic FRAN BUENO,  e ten suficiente carga simbólica e información como para espertar o interese do alumnado.

En efecto, a biblioteca escolar pode ser a base desde a que explorar o mundo real, pero tamén os mundos imaxinarios; os materiais impresos e os recursos electrónicos achégannos informacións sobre todo aquelo que queremos coñecer e comprender; é un espazo para a investigación individual e para o traballo en equipo; é un espazo integrador cheo de oportunidades de aprendizaxe.

O lema "Biblioteca escolar, base de exploracións" chama a traballar coa información, a mirar fóra, a facerse preguntas e pescudar posibles respostas, a interesarse polo outro, polo diferente, polo alleo; a estudar xeografías e inventar rutas para novas aventuras; a coñecer as viaxes que fixeron os grandes exploradores e aquelas outras que, cada día, bota ao camiño a milleiros de persoas na procura dun mundo máis xusto. Convida a explorar o mundo e a compartir o aprendido. 

Instrucións sobre o funcionamento da biblioteca escolar para o curso 2015/2016

Os centros docentes disporán dunha biblioteca escolar. Tomaranse as medidas organizativas necesrias para que a biblioteca escolar teña un funcionamento estable e sirva aos obxectivos do proxecto lector de centro (Decreto 86/2015 do 25 de xuño polo que se establece o currículo de educación secundaria obrigatoria e do bacharelato da Comunidade Autónoma de Galicia, artigo 38, punto 3.)

Comeza un novo curso escolar e o Portal Educativo publica as INSTRUCIÓNS de 1 de setembro de 2015, da Dirección Xeral de Centros e Recursos Humanos, en relación coa organización e o funcionamento das bibliotecas escolares, para o curso 2015/2016, destinadas aos centros non universitarios de titularidade da Consellería de Cultura, Educación e Ordenación Universitaria. 

ACCESO AO DOCUMENTO DE INSTRUCIÓNS

Resolución provisional do Plan de mellora de bibliotecas escolares (2015/2016)

O Portal Educativo vén de publicar a Resolución provisional do Plan de mellora de bibliotecas escolares para o curso 2015/2016, segundo o recollido na Orde de convocatoria de 30 de marzo de 2015 (DOG de 15/04/2015). Esta resolución provisional recolle a listaxe de 25 centros que, segundo o contemplado na convocatoria, serán incorporados ao Plan de mellora de bibliotecas escolares no vindeiro curso 2015/2016, cunha asignación provisional de contías.

Trala lectura e valoración das memorias dos centros até o momento integrados no PLAMBE, correspondentes ao curso que remata, e vistas as renuncias ou baixas ocasionadas (que na medida do posible serán suplidas con novas incorporacións), publicarase a resolución definitiva no DOG no mes de setembro. Nesta resolución recollerase a totalidade de centros que conformarán este programa no vindeiro curso (575) e as correspondentes contías asignadas para o curso 2015/2016.

RESOLUCIÓN  PROVISIONAL PLAMBE 15/16

Congreso Iberoamericano de Bibliotecas Escolares: CIBES 2015

Baixo o lema "Educación por competencias: reto del milenio para la interculturalidad y la inclusión social", celebrase en Getafe (Madrid), do 26 ao 28 de outubro, na Universidade Carlos III de Madrid, o I Congreso Iberoamericano de Bibliotecas Escolares, froito da colaboración entre esta universidade, o concello de Getafe e a Universidade Estatal Paulista de Brasil. 

O colectivo de profesionais vinculados ás bibliotecas escolares poderán presentar comunicacións asociadas a algún dos catro eixos temáticos previstos:

  1. A biblioteca escolar no proceso educativo: ensinanza e aprendizaxe
  2. Comprensión lecto-escritora como factor de inclusión
  3. As alfabetizacións na Biblioteca Escolar  
  4. Contidos para o desenvolvemento de competencias naBiblioteca Escolar

O prazo para a presentación de resumes de comunicacións remata o 6 de xullo. 

+ INFORMACIÓN SOBRE O CONGRESO 

Selos "Biblioteca Escolar Solidaria"

O programa "Bibliotecas Escolares Solidarias", que botaba a andar o pasado 5 de decembro de 2014, contemplaba entre as súas accións, a concesión anual dun SELO "BIBLIOTECA ESCOLAR SOLIDARIA"  como recoñecemento a aquelas bibliotecas que son o resultado do esforzo de comunidades educativas  atentas ás necesidades de todos os seus integrantes en materia de lectura e de acceso ao coñecemento. 

Valoradas as candidaturas presentadas, concédense selos de "biblioteca escolar solidaria" a catro centros de ensino primario:

Este selo é un distintivo de calidade en termos de traballo solidario e a favor da comunidade educativa, no ámbito da lectura e as compensacións das desigualdades en materia de acceso aos recursos culturais e de aprendizaxe. Parabéns ás comunidades educativas destes centros. (En breve publicarase un resume das súas actividades).

ACCESO á Resolución da Dirección Xeral de Centros e RRHH, de 16 de xuño de 2015, que dá a coñecer a concesión destes selos, correspondentes ao ano 2015. 

 

Voluntariado de Lectura - A: centros seleccionados para as xornadas de convivencia 2015

 

Publicada no Portal Educativo a resolución de 13 de maio de 2015 pola que se comunica a selección de centros que, finalmente, participarán nas xornadas de convivencia do Voluntariado de Lectura-A (5º e sexto de primaria), que terán lugar no CRD da Coruña (Culleredo) entre o 26 e o 29 de maio. Un grupo de 50 nenas e nenos, en representación dos voluntarios e voluntarias da biblioteca escolar do seu centro, asistirá a estas xornadas nas que participarán en obradoiros e actividades diversas relacionadas coa lectura expresiva, a narración oral, os xogos cooperativos e tradicionais, o traballo colaborativo, a robótica, o teatro, as danzas do mundo ou bailes tradicionais. Visitarán, así mesmo a Biblioteca "Ágora" e o Museo Nacional de Ciencia e Tecnología (MUNCYT) na Coruña. Dos 45 centros inscritos neste curso presentaron memorias das súas actividades un total de 42 centros, con experiencia nas distintas modalidades (colaboración na biblioteca escolar, lecturas compartidas dentro do centro, lecturas compartidas fóra do centro). Estes"voluntarios de lectura" procederán dos seguintes centros:

  • CEIP Francisco Vales Villamarín (Betanzos, A Coruña)
  • CEIP Ramón Falcón (Castro de Rei, Lugo)
  • CEIP Carlos Casares (Xinzo da Limia, Ourense)
  • CEP Altamira (Salceda de Caselas, Pontevedra)


Convocatoria do Plan de mellora de bibliotecas escolares para o curso 2015/2016

O DOG do 15 de abril publica a Orde de 30 de marzo de 2016 pola que se convoca o Plan de mellora de bibliotecas escolares para o curso 2015/2016, destinada a centros públicos non universitarios de titularidade da Consellería de Cultura, Educación e Ordenación Universitaria.

Trátase da undécima convocatoria dun programa polo que se estimula a renovación das bibliotecas escolares de cara a que cada centro conte cunha biblioteca que poida exercer as funcións que o sistema educativo e a sociedade de información demandan: un centro de recursos de lectura, información e aprendizaxe; pero tamén un espazo de encontro entre os distintos sectores da comunidade educativa, no que poder medrar e formarse como lectores e como usuarios da información. Bibliotecas que apoian a alumnado e profesorado en todos os procesos de aprendizaxe, que facilitan recursos variados e actualizados; favorecen a adquisición de competencias clave para o alumnado (lectura, aprender a aprender, competencia dixital, competencia informacional....); ofrecen formación específica para o uso e produción de información, e posibilitan o acceso a actividades de extensión cultural  como presentacións de libros, recomendacións, recitais, lecturas compartidas, clubs de lectura, etc. As modernas bibliotecas escolares son tamén laboratorios de ideas e espazos de experimentación no que alumnado, profesorado e familias poden compartir inquedanzas, formación e lecer e nas que a cultura impresa e a cultura dixital se integran de forma natural. O empeño de profesorado, os recursos, as orientacións, a difusión das boas prácticas e a formación permiten avances neste programa, incluído no PLAN LÍA  (Lectura, Información e Aprendizaxe) de Bibliotecas Escolares da consellería. 

Os centros integrados no Plan de mellora de bibliotecas escolares no curso 2014/2015 deben solicitar a continuidade no programa, se así o desexan. Os centros que aspiren a formar parte do PLAMBE (Plan de mellora de bibliotecas escolares) poderán, así mesmo solicitalo con data límite do 15 de maio (incluído). Recoméndase en ámbolos dous casos unha lectura detallada da orde de convocatoria.
 

Materiais dos Encontros do Plan de mellora de bibliotecas escolares 2014/2015

Os pasados 12 e 13 de marzo de 2015 celebráronse en Santiago de Compostela os Encontros do Plan de mellora de bibliotecas escolares 2014/2015, coa asistencia de 550 profesoras e profesores, responsables das bibliotecas escolares integradas neste programa da consellería. 

En redeBE, o espazo moodle de Bibliotecas Escolares de Galicia, están dispoñibles xa os materiais destes encontros, co fin de que os equipos de bibliotecas e todo o profesorado interesado poida acceder ás presentacións dos relatores e a outras informacións de interese sobre os contidos do programa. En breve subiranse tamén os vídeos gravados nas diferentes sesións.

Entre os materiais dispoñibles, a versión pdf do cómic VIVIR NO SOLO, con guión de Marilar Aleixandre, editado co gallo da celebración do ano 2015 como Ano Internacional dos Solos. Esta publicación, da Delegación Territorial da Sociedade Española da Ciencia do Solo en Galicia, coa colaboración do concello de Santiago de Compostela, foi distribuída nos encontros de forma que puidese chegar, en formato impreso, a todas as bibliotecas do Plan de mellora. 

Nos encontros distribuíuse tamén o libro "Choven palabras no futuro" editado pola Xunta de Galicia (Secretaría Xeral de Cultura) en colaboración con GALIX, co gallo da conmemoración dos 25 anos desta Asociación Galega do Libro Infantil e Xuvenil. 

redeBE: materiais Encontros PLAMBE15

Premio "Francisco Fernández del Riego á colaboración no ámbito editorial e cultural" para Bibliotecas Escolares de Galicia

A Asociación Galega de Editores decidiu conceder o Premio "Francisco Fernández del Riego á difusión do ámbito editorial e cultural,  correspondente ao ano 2014,  ás Bibliotecas Escolares de Galicia. O pasado venres 13 de marzo, o conselleiro Cultura, Educación e O.U. recibiu o premio, no acto celebrado no Pazo da Cultura de Pontevedra, en representación  de todo o profesorado e das comunidades educativas que fan posible a existencia de bibliotecas activas e útiles nos centros educativos galegos.

Desde a Dirección Xeral de Centros e Recursos Humanos, e desde a Asesoría de bibliotecas escolares, agradécese aos editores galegos este recoñecemento. Xa en ocasións anteriores, os editores galegos amosaran interese polos programas de mellora das bibliotecas escolares e de fomento da lectura no contexto educativo ao convidar  a integrantes da Asesoría de bibliotecas escolares para participar no seu simposio anual do libro e da lectura, en diferentes anos, co fin de expoñer as características e os  logros destas iniciativas da administración educativa galega. Agradécense, así mesmo, estas ocasións para dar visibilidade a unha realidade educativa e cultural que contribúe á mellora dos índices de lectura da sociedade galega, e traballa por ofrecer oportunidades de aprendizaxe renovadoras e actuais a todo o alumnado.

Encontros do Plan de mellora de bibliotecas escolares 2014/2015

Os vindeiros 12 e 13 de marzo terán lugar en Compostela (Palacio de Congresos) os Encontros do Plan de mellora de bibliotecas escolares, unha cita anual do profesorado que coordina e representa aos equipos de bibliotecas escolares dos centros integrados neste programa. No presente curso participan deste Rede de bibliotecas escolares que supón o PLAMBE, un total de 550 centros distribuídos por toda a xeografía do país.  

Coma en anos anteriores, a participación nos encontros será do seguinte xeito:

  • 12 de marzo: responsables das bibliotecas dos 33 centros que se incorporaron ao PLAMBE na convocatoria de 2014.
  • 13 de marzo: responsables do resto das bibliotecas do PLAMBE ata un total de 550. 
O programa elaborado desde a Asesoría de bibliotecas escolares, en colaboración co CAFI (Servizo de Formación do Profesorado), conta coa presenza de expertos como Casildo Macías (coordinador da Rede de bibliotecas escolares de Extremadura, coautor do Marco de referencia para las bibliotecas escolares- MEC,2011), Ana Garralón (experta e crítica de literatura infantil e xuvenil), Elisa Yuste (consultora con formación e experiencia no ámbito bibliotecario, editorial cultural e educativo), Ana Basterra (Asesora do ámbito socio-lingüístico no Berritzegune -centro de profesores- de Leioa, en Bizkaia, experta en metodoloxía de proxectos). Presentaranse experiencias de bibliotecas escolares de centros que salientan polas súas boas prácticas, e os participantes poderán tamén acudir a unhas reunións temáticas (sobre a formación audiovisual, as apps na biblioteca escolar , a colaboración entre as bibliotecas escolares e coas bibliotecas públicas ou sobre avaliación dos servizos da biblitoeca, entre outras). Poñerá o punto final aos encontros o catedrático de Mediciña Legal da USC, experto internacional en xenética e divulgador científico, Ángel Carracedo, autor do manifesto publicado no pasado novembro, con ocasión do Mes da Ciencia en Galego nas Bibliotecas

Informe Proxecto E-LBE 2012-2014

A finais do curso 2013/2014 remitiuse un formulario web de avaliación aos 115 centros participantes no Proxecto E-LBE, iniciado en novembro de 2012 co fin de introducir os lectores electrónicos nas bibliotecas integradas no Plan de mellora de bibliotecas escolares. Pretendíase recolleras valoracións do equipo de biblioteca en relación coa súa experiencia cos lectores electrónicos. Respostaronao formulario, no prazo sinalado, 105 centros. A partir das súas respostas elaborouse o presente INFORME

O proxecto E-LBE foi unha oportunidade para introducir os dispositivos de lectura dixital nas bibliotecas escolares, motivar ao profesorado a coñecer as súas posibilidades e facilitar ao alumnado oportunidades de achegamento ao libro dixital, nun contexto de aprendizaxe e coa guía do profesorado. Permitiu, así mesmo, que o alumnado das zonas rurais puidese achegarse á realidade do libro electrónico e vivir a experiencia da lectura neste tipo de dispositivos. Desta forma, a biblioteca escolar podía cumprir unha das súas funcións, a de paliar as desigualdades no acceso aos recursos culturais. Cómpre lembrar que a ubicación do centro en concello de baixa densidade de poboación foi un dos criterios á hora de atender as solicitudes de participación neste programa. 

TEXTO DO INFORME

Novos artigos de bibliotecas escolares na revista EDUGA

A Consellería de Cutlura, Educación e Ordenación Universitaria publica o nº 68 da súa Revista Galega do ensino, EDUGA. Entre as diferentes seccións, a de BIBLIOTECAS ESCOLARES acolle un bo número de artigos que permiten coñecer experiencias en distintos centros, sexa sobre o desenvolvemento de proxectos de carácter interdisciplinar ou sobre actividades máis centradas no fomento da lectura; outros artigos constitúen un percorrido polo conxunto de actividades que deseñan, cumprindo así o seu papel de centros de lectura, información e aprendizaxe. Este número inclúe, así mesmo, un artigo en relación ás actividades propostas desde o programa de bibliotecas escolares da consellería, que teñen como finalidade a integración das ciencias e as humanidades nas actividades das bibliotecas escolares, e que tanto éxito están a ter no conxunto dos centros. 
  1. Apartado BIBLIOTECA ESCOLAR
    1. CIENCIA NA BIBLIOTECA ESCOLAR, MATEMÁTICO! (Asesoría de Bibliotecas Escolares)
  2. Apartado BOAS PRÁCTICAS:

    1. OS XOGOS TRADICIONAIS. Un proxecto interdisciplinar coordinado pola biblioteca (IES Rafael Dieste, A Coruña)
    2. VOLUNTARIADO DE LECTURA NAS BIBLIOTECAS ESCOLARES (Responsables das bibliotecas dos centros seleccionados na convocatoria de Voluntariado de Lectura-A, no curso 2013/2014)
    3. NAVEGANDO NUN MAR DE INFORMACIÓN (CEIPPlurilingüe de Andrade, Pontedeume)
    4. A BIBLIOTECA NO CENTRO (CEIP de Pazos, Ferrol)
    5. A BIBLIOTECA MUSICAL NUN CONSERVATORIO DE MÚSICA (CEMUS Xan Viaño, Ferrol)
    6. CIENCIA E BIBLIOTECA ESCOLAR (CEIP de Cespón, Boiro)
    7. COMPARTINDO A BIBLIOTECA (IES As Mariñas, Betanzos)
    8. FEIRA DA CIENCIA E DA TECNOLOXÍA. BIBLIOTECA E CIENCIA 2014 (IES Eduardo Blanco Amor, Ourense)
    9. ÁFRICA DIVERSA, COÑECER PARA COMPRENDER (IES Antón Losada Diéguez, A Estrada) 
  3. Apartado HORA DE LER:
    1. CINCO ANOS NA BOCA DO LOBO (Club de lectura "A boca do lobo", do IES de Mugardos)
    2. TERTULIAS LITERARIAS EN ALLARIZ (IES de Allariz)
    3. LEMOS LE. BIBLIOTECAS E LIBRERÍAS UNIDAS POR E PARA A LECTURA (CEIP Virxe do Carme, de Sober; CEIP A Gándara, de Monforte de Lemos)
    4. BENVIDA E BENVIDOS Á NOSA BIBLIOTECA (CEIP Saco e Arce, de Toén)

ESTE ENLACE dá acceso a todos os artigos publicados até o momento porla revista EDUGA na sección de BIBLIOTECAS. 

Materiais das V Xornadas de Bibliotecas Escolares de Galicia

 

Están dispoñibles en redeBE os materiais das V Xornadas de Bibliotecas Escolares de Galicia, celebradas en Santiago de Compostela os pasados 7 e 8 de novembro. 

A través deste espazo moodle  pódese acceder ás presentacións de expertos e docentes incluídos no programa das xornadas; os blogues de cada unha das bibliotecas e outras informacións de interese. 

En breve, subiránse tamén á redeBE as gravacións realizadas nas distintas salas.

 

 

 

Mes da Ciencia en Galego nas Bibliotecas

ENTUSIASMO E PROXIMIDADE SON A CLAVE DA DIVULGACIÓN CIENTÍFICA. Ángel Carracedo.

 

Desde a Consellería de Cultura, Educación e Ordenación Universitaria vaise impulsar a celebración anual do mes de novembro como MES DA CIENCIA EN GALEGO NAS BIBLIOTECAS. Iníciase esta actuación coa elección dunha imaxe e a difusión dun texto, a modo de MANIFESTO,  do científico Ángel Carracedo, profesor de Medicina Legal, Ética Médica e Bioloxía Molecular da Universidade de Santiago de Compostela. Conocido investigador e divulgador científico, Ángel Carracedo ten colaborado coas bibliotecas, tanto públicas como escolares, na difusión dos valores científicos e do acceso ao coñecemento. 

Desde a Asesoría de bibliotecas escolares realizouse unha recompilación de recursos dixitais relacionados coa ciencia, en galego, que se pon a disposición de todas as bibliotecas: libros e unidades didácticas descargables en formato pdf, páxinas web de institucións, museos e asociacións de profesores e divulgadores científicos, convocatorias e propostas, blogues de ciencia dos centros educativos, experiencias de bibliotecas escolares, etc. 

  • MANIFESTO DE ÁNGEL CARRACEDO
  • FOLLETO INFORMATIVO: MES DA CIENCIA EN GALEGO NAS BIBLIOTECAS
  • MATERIAIS. MES DA CIENCIA EN GALEGO NAS BIBLIOTECAS
  • Ámpliase a oferta de maletas viaxeiras

     

    Coincidindo co mes da biblioteca escolar, neste mes de outubro, a Asesoría de Bibliotecas Escolares daba a coñecer unha nova aplicación que, baixo o nome de MALETAS VIAXEIRAS, permite ás bibliotecas dos centros interesados a reserva de maletas de diferentes temáticas para levar en préstamo temporal, como apoio ás súas actividades. 

    Ademais das xa coñecidas sobre cómic, lectura, Camiño de Santiago, Os mundos de Cunqueiro, matemáticas, e materiais para as familias, veñen de incorporarse dúas maletas moi especiais e que poden ser do interese dos centros de ensino secundario e formación profesional. Trátase das maletas de "economía", cunha selección coidada de libros e recursos audiovisuais que poden contribuír ao coñecemento das claves para entender o momento económico e social que vivimos nos últimos anos, pero tamén para introducir ao alumnado no ensaio, un xénero que precisa dun lector específicamente activo. 

    As maletas ofrécense en préstamo temporal (15 días, agás excepcións) e os centros deben recollelas e entregalas na Asesoría de bibliotecas escolares (Consellería de Educación, San Caetano, Santiago de Compostela), persoalmente ou a través dos medios que consideren oportuno.  INSTRUCIÓNS