Anisia Miranda
Unha das voces máis tenras da nosa literatura infantil, Anisia Miranda, deixounos o xoves 22 de outubro. Todos os que lemos os seus Mitos e lendas da vella Grecia, a súa Pardela amiga, Os contos do Compay Grilo, A casa dos títeres, as Cantarolas e os contos prá xente miúda... sentímonos un chisco orfos. Tamén todos aqueles que puidemos compartir con ela o amor pola lectura, pola lingua e polas dúas queridas patrias, a cubana e a galega.
Anisia sempre tivo moi presente o punto de vista dos nenos e das nenas, polo que sempre escribiu pensando neles. En Cuba, exercendo a súa profesión de xornalista, foi cofundadora e xefa de redacción das revistas infantís Zunzún e Bijirita, revistas pensadas para os máis pequenos.
Cando se instalaron en Galicia, en Gres, a parroquia natal do seu compañeiro de vida Xosé Neira Vilas, xuntos crearon o Premio Estornela de teatro e o Premio Arume de poesía para nenos e nenas, premios convocados desde o ano 2000 pola Fundación Neira Vilas, da cal era vicepresidenta.
Animádevos a ler a súa obra e poderedes seguir dialogando con ela!
Anisia, boa viaxe e moitos bicos con mel!