AUTOR: Manuel Paz (4º B)
“4 de abril de 2010”
A noite comezaba a caer coma un veo que ía tinguindo de escuridade aquela tarde que ía esmorecendo. Comezou a chover. As pingas de auga empezaron a caer contra as pedriñas que cubrían o camiño facendo que estas repinicasen con forza. No fondo xa se podían ver algúns raios que como navallas afiadas sedentas de vinganza ían rachando o ceo e este quedaba salpicado de sangue cor amarela que se expandía por toda a súa superficie. Pasado un instante, podíanse escoitar os seus bramidos atroces que resoaban con potentes ecos por todo o val.
O vento axitaba con furia as árbores do camiño e arrastraba refachos de auga de chuvia que batían unha e outra vez na faciana de Marcial, que tras cumprir satisfactoriamente todas as tarefas da súa axenda persoal considerou que xa era hora de volver ó seu fogar.
Agora o camiño inclinárase cara a arriba e a auga fluía costa abaixo arrincando bruscamente as pedras do camiño deixando ó descuberto a terra do fondo, agora convertida en lama.
Marcial estaba a punto de chegar ó cumio daquela costa cando pisa nunha parte do terreo que estaba especialmente rebrandecida pola chuvia e ve como sorprendentemente o chan afunde e queda cuberto de lama ata a cintura. Trata de liberarse e seguir camiñando, pero non o consegue. Volve tentalo unha segunda volta, pero co mesmo resultado da primeira vez. Empeza a poñerse nervioso, vendo como a chuvia segue afondando o burato no que está atrapado e o nivel da lama que o cobre segue aumentando. No terceiro intento trata de liberarse con tanto ímpetu que avanza uns cantos metros máis de onde estaba atrapado e bate irremediablemente de bruces contra o chan. Instintivamente botou as mans para tratar de de amortecer a caída pero iso non evitou o corte que fixo no labio superior e que comezaba a soltar un fío de sangue.
Coloca a palma da man na boca e esta queda totalmente tinguida de vermello. Decide meter a man nun dos petos do seu traxe para sacar un pano co que conter a hemorraxia cando se decata que o bolígrafo que levaba non estaba. Xira a cabeza cara a atrás e cre vislumbrar unha luz que escintilaba emitindo un tenue brillo e que se desprazaba cada vez con máis velocidade pola costa abaixo. Rapidamente dá media volta e comeza a persecución do seu bolígrafo. Por sorte un refacho de vento arrastrouno contra unha beira do camiño freando a súa carreira. Marcial agachouse para recollelo e introducilo de novo no peto do seu traxe. Levanta a cabeza e orienta a súa mirada cara ao ceo. As nubes comezan a desaparecer, a tronada comeza a amainar. O ceo queda totalmente descuberto. O vento deixa de soprar e por un momento deixa de haber ruído algún. Era lúa chea. Un lobo ouvea con forza quebrando o silencio que por un momento existira.
Xa podía ver ó lonxe a súa casa. Foise achegando máis e máis ata que colleu as chaves do seu maletín e entrou. Hoxe fora un día moi duro. Tocaba descansar. Seu pai non se atopaba na casa coma sempre…
(…)
“24 de xuño de 1995”
Eran as nove da mañá. O instituto estaba cheo de xente e balbordo, hoxe especialmente, dado que os cursos de 3º e 4º partían de excursión cara a Xenebra, para ver a catedral de San Pedro, dende cuxa torre se podía apreciar unha impresionante panorámica de toda a cidade, o Monumento ós Reformadores, que facía honra a todos os que participaran activamente da reforma protestante, e a casa natal de Jean-Jaques Rousseau, seguramente o pensador suízo máis importante de todos os tempos, pois foi el quen introduciu o concepto de que o poder estaba nas mans dos cidadáns e o rei era un simple representante do pobo, ideas que causaron gran impacto na súa época recollidas no seu libro O contrato social e aínda se manteñen hoxe en día vixentes. Tamén pensaban recorrer o lago Lemán en barco e o río Ródano ó paso pola cidade. Ademais irían visitar a Universidade de Xenebra e o seu museo de Arte e Historia.
Aquilo era un ir e vir para subir todas as equipaxes ó autobús. Ían con algo de retraso, xa que o avión partía de Peinador ás dez e media.
Xa ás nove e media, o autobús partía por fin. Marcial colleu o seu “walkman” colocou o seu CD preferido, un de Joaquín Sabina Física e Química, e ó ter isto feito, decidiu recostarse cara a atrás no asento e matar así o tempo da viaxe ata o aeroporto.
De súpeto, algo chamou a súa atención. Estaban pasando por riba da ponte de Rande. Podía escoitar o ruído que producía o rozamento das rodas do autobús contra o asfalto vello e cheo de gretas. Mirou cara a abaixo e puido observar a considerable altura da ponte. Os piares parecían estreitos e fráxiles contra os golpes que recibían das ondas do mar, que hoxe eran sorprendentemente agresivos, pois o día era soleado e despexado, pero non se vía reflectido nel. Os tirantes do mar repinicaban. Iso tampouco axudaba a fiarse da capacidade de aguante da ponte.
Despois da viaxe en bus subiron ó avión. Abrocharon os cintos. Xa despegaba. Pouco a pouco íanse elevando do chan. Pasadas tres horas xa estaban aterrando no aeroporto de Cointrin. Os próximos días ían ser bastante intensos coa de visitas que pensaban facer e as fotos que tirar.
(…)
“4 de abril de 2010”
Rafael levantábase espertado polas raiolas de sol que se filtraban pola súa ventá ó amencer. Almorzou unhas sinxelas torradas cun pouco de manteiga acompañadas dun vaso de zume de laranxa e dispúxose a coller a desbrozadora para comezar a súa xornada coma xornaleiro. A pesar de que xa tiña 73 anos, e xa estaba xubilado, víase obrigado a traballar para gañar un diñeiro extra e que o seu fillo puidese estudar Dereito na universidade de Salamanca. Xa se dispoñía a saír da casa cara ao almacén no que gardaba todos os apeiros de labranza. Entrou nel e empezou a subir a escaleira de caracol que o vertebraba. Cando estaba no punto máis alto, trompezou batendo irremediablemente coa cabeza nun dos chanzos. Intentou erguerse, pero a vista empezábaselle a toldar. A causa da desorientación que sufría foise cara a un lado da escaleira, e caeu esvarando por debaixo do pasamáns. Sufriu unha aparatosa caía ata o chan, facendo unha brecha na testa. Comezou a perder sangue. Este segundo tropezo era definitivo para el, sería o único da súa vida do que non se ergueu a continuación.
(…)
“26 de xuño de 1995”
Marcial ía montado nunha barquiña xunto con David, un amigo seu recorrendo o lago Lemán. Nun intre a embarcación embarrancou cunha rocha do fondo e empezou a entrar a auga. Esta emborcou e Marcial quedou atrapado dentro. Mentres ía aumentando o seu ardor nos pulmóns por mor da falta de osíxeno e ía perdendo a consciencia sabedor de que a súa vida estaba sentenciada, tiña o presentimento de que a súa misión na Terra todavía non rematara. Aínda tiña algo que buscar.