Organización social

Organización social

Diferencia-la sociedade castrexa é tarefa difícil á vista das diferentes interpretacións que se dan dos datos proporcionados polas fontes, que ó seren escasas e parciais, facilitan as interpretacións contradictorias e en todo caso sempre sometidas á revisión a medida que van aparecendo novos datos.

Con moita cautela pois, poderiamos afirmar que a sociedade castrexa fundaméntase na familia, aspecto sobre o que parece haber unha certa coincidencia, se ben non hai total acordo en se esta é de tipo nuclear ou extensa. Polo que respecta ó papel da muller, parece estar descartada a existencia do matriarcado, aínda que tiña unha posición de certa importancia nas áreas económicas relación co interior do castro como a agricultura, mentres que as máis relacionadas co exterior (minería, pesca, intercambios comerciais...) estarían nas mans dos homes, que tamén detentaban o poder político-militar.

A primeira unidade suprafamiliar, a que da nome a esta cultura, sería o castro ou castellum. As teorías sobre a división social dentro do castro apuntan en dúas direccións contrarias: as que defenden a existencia dunha sociedade fundamentalmente igualitaria e as que falan da existencia dunhas elites guerreiras diferenciadas do resto da poboación. En todo caso parece que as desigualdades sociais non serían demasiado acusadas.

Agrupando varios castros estaría o populus, entidade político-administrativa que foi mantida por Roma na Gallaecia. Estes populus son de difícil definición, e do papel político desempeñado por estas unidades nada se sabe, tal vez os notables dos diferentes castros formaban unha asemblea con poder decisorio. O que si parece claro é que os castros gozaban dunha grande autonomía.