Pódese acceder de xeito directo, se se cumpren determinadas condicións, ou mediante unha proba, para a que se reserva o 20% das prazas. Nos ciclos formativos de grao superior reservarase como mínimo o 3% das prazas que se oferten en cada ciclo para o alumnado con algún grao acreditado de discapacidade física, motora ou sensorial que obtivese dictame favorable da Comisión Autonómica de Escolarización.

Acceso directo. Para cursar os ciclos formativos de grao superior requírese cumprir algún dos seguintes requisitos:
Posuír o título de Bacharelato.
Ter superado o segundo ciclo da reforma das ensinanzas medias (REM).
Ter superado o curso de orientación universitaria ou preuniversitario.
Posuír o título de técnico especialista, técnico superior ou equivalente para efectos académicos.
Posuír unha titulación universitaria ou equivalente.

Acceso mediante proba. Poden acceder mediante unha proba as persoas que non cumpran os requisitos académicos e teñan cumpridos os 19 anos ou os cumpran no ano de realización da proba. No caso de posuír o título de técnico, pódese acceder mediante proba a un ciclo de grao superior da mesma familia profesional; neste caso o requisito de idade é o de cumprir 18 anos no ano de realización da proba.

Orde de prioridade no acceso

Acceso directo. No caso de que o número de solicitudes de admisión por acceso directo supere o número de prazas ofrecidas establecerase a seguinte orde de prelación para a adxudicación de prazas:

1. As persoas solicitantes que cumpran requisitos en xuño teñen preferencia, en calquera caso, sobre as que cumpran os requisitos en setembro.

2. Nos ciclos formativos de grao superior de formación profesional, e segundo o disposto no artigo 27.5º do Decreto 30/2007, do 15 de marzo, cando non existan prazas suficientes terá prioridade o alumnado que:
Cursase a modalidade de bacharelato que se determine para cada ciclo coas materias vinculadas a el.
Cursase a modalidade de bacharelato sen algunha das materias vinculadas ao ciclo.
Cursase algunha das modalidades de bacharelato distintas das establecidas nos parágrafos anteriores.
Dispoña do título de técnico superior ou equivalente.
Dispoña dunha titulación universitaria ou equivalente.

3. Dentro de cada un dos colectivos anteriores, a orde de prioridade virá determinada por:
1) Maior nota media no expediente académico en relación á titulación académica de acceso.
2) Maior nota ou maior nota media nas materias vinculadas.
3) En caso de empate entre varias persoas solicitantes por un mesmo posto escolar, e co obxectivo de favorecer o fomento das vocacións nas áreas con infrarrepresentación de mulleres ou de homes, seleccionarase en virtude do sexo menos representado na área profesional en que se demande a praza de formación.
4) De persistir o empate, resolverase mediante sorteo público.

Acceso mediante proba. O 20% das prazas reservadas para solicitantes que acceden mediante proba asignarase, no caso de que o número de solicitantes supere o número de prazas, atendendo ás maiores notas acadadas na proba de acceso. En caso de empate, efectuarase un sorteo ante a Comisión Autonómica de Escolarización en ciclos de grao superior. O acceso por proba é incompatible co acceso directo.

Reserva para alumnos con necesidades educativas especiais. O 3% das prazas reservadas para este colectivo asignarase segundo a orde de prelación vista para o acceso directo, no caso de que o número de solicitantes que acceda por esta reserva supere o número deprazas ofrecidas.

As sucesivas vacantes en cada quenda de reserva serán cubertas por solicitantes en espera que solicitaran acceder por esa mesma quenda. As persoas solicitantes que pretendían acceder pola reserva para alumnado con necesidades educativas especiais e non obteñan prazas poderán acceder mediante acceso directo, sempre que conten co ditame favorable.

As prazas que queden vacantes das reservadas para o acceso mediante proba ou para alumnado con necesidades educativas especiais acumularanse ás ofrecidas para o acceso directo.

Proba de acceso. A proba de acceso consta de dúas partes:

Parte xeral. Neste exercicio, a persoa aspirante deberá acreditar a madureza en relación cos obxectivos do bacharelato, nomeadamente en contidos procedementais de:

• Lingua galega e literatura.
• Lingua castelá e literatura.
• Lingua estranxeira (opción de inglés ou de francés).
• Matemáticas.

A cualificación da área lingüística determinarase mediante o cálculo da media aritmética das puntuacións acadadas en cada unha das tres materias que a integran: lingua galega e literatura, lingua castelá e literatura e lingua estranxeira (opción de inglés ou de francés). A cualificación da parte xeral será a media aritmética das cualificacións obtidas nas áreas lingüística e de matemáticas.

Parte específica. A persoa aspirante deberá acreditar a súa capacidade de formación profesional de base relacionada co campo profesional do ciclo formativo ao que se solicite acceder. Deberá elixir a opción que lle permita o acceso ao ciclo formativo que desexe cursar dentro dos ofrecidos nesta comunidade autónoma. A cualificación desta parte específica determinarase calculando a media aritmética das puntuacións obtidas en cada unha das materias específicas da opción vinculada ao ciclo formativo para o que se solicitara a proba de acceso.

A valoración de cada unha destas partes expresarase numericamente entre cero e dez. A nota final da proba calcularase sempre que se obteña polo menos unha puntuación de catro en cada unha das partes e será a media aritmética destas, expresada con dous decimais. Será positiva a cualificación de cinco puntos ou superior.

Exencións da proba de acceso. Poderán quedar exentas desta proba as persoas que acrediten ter superadas as probas de acceso á universidade para maiores de 25 anos. No caso de obter a exención total da proba a cualificación final será de 5,00.

Períodos de inscrición e calendario de celebración da proba. A inscrición para a proba de acceso aos ciclos formativos de grao superior farase na secretaría dos institutos públicos de educación secundaria e nos centros integrados en que se impartan ensinanzas de formación profesional inicial nas datas que determine a Consellería de Educación e Ordenación Universitaria, segundo o modelo de inscrición que se facilite a tal efecto.

Validez da certificación de superación da proba. Expediráselle a acreditación correspondente ao alumnado que superara a referida proba. Para facilitar a mobilidade do alumnado, a certificación que se obteña tras a superación da proba de acceso aos ciclos formativos de grao superior de formación profesional específica será válida como requisito de acceso a todos os ciclos formativos relacionados coa opción elixida para a proba. A certificación de superación da proba terá validez como requisito de acceso en todo o Estado, e manterá a súa vixencia sempre que non se modifique o título e as ensinanzas correspondentes ao ciclo formativo.