Ante a situación xerada pola aparición da gripe A, a Consellería de Educación e Ordenación Universitaria, en coordinación coa Consellería de Sanidade e seguindo as directrices do Ministerio de Sanidade e Política Social e da Organización Mundial da Saúde (OMS), quere informar os centros docentes e transmitirlles unhas indicacións co obxectivo de actuar da forma máis correcta ante as situacións que se lles poidan presentar e contribuír a despexar as dúbidas do conxunto da comunidade escolar (colectivo docente e non docente, alumnado, nais e pais de alumnos/as).

As medidas que se están adoptando van encamiñadas a evitar a propagación do virus causante desta nova gripe e ao correcto tratamento de todas as persoas afectadas. Son medidas cun carácter eminentemente preventivo dirixidas tanto ás persoas como ao contorno, que tamén se deben adoptar nos centros educativos.