q Que é a nova gripe A?

A nova gripe é unha enfermidade respiratoria aguda causada por un novo virus da gripe tipo A ante o cal, precisamente por ser novo, non estamos inmunizados.

q Que síntomas presenta?

Os síntomas da gripe A nas persoas son similares aos da gripe estacional ou común, entre os que se inclúen febre alta (38⁰ C ou máis), sobre todo os dous primeiros días, acompañada por algún ou varios dos seguintes síntomas:

« Respiratorios (tose, esbirros, mucosidade nasal, dificultade respiratoria, etc.).

« Dor de cabeza, de gorxa, dores musculares e malestar xeral.

« Algunhas veces, pode asociarse a diarrea e vómitos.

A meirande parte das gripes son leves, do mesmo xeito ca nos casos de gripe estacional; esta gripe podería ser grave para algúns grupos máis vulnerables, ou de risco, da poboación. Moi excepcionalmente, podería ser grave en persoas sas que non pertencen a estes grupos.

No caso de que se considere que se ten a gripe A e non se presenta ningún síntoma de gravidade, débese quedar na casa ata que remitan os síntomas. Agora ben, hai que estar atento por se se produce algún síntoma de gravidade.

q Como se transmite?

A gripe A contáxiase entre as persoas da mesma maneira cá gripe estacional, directamente dunha persoa a outra, principalmente cando unha persoa con gripe tose, esbirra ou fala. Tamén pode contraerse a enfermidade indirectamente ao tocar algo contaminado polo virus da gripe e levar as mans á boca ou ao nariz.

O período no que se pode contaxiar o virus vai, por norma xeral, dende as 24 horas anteriores á aparición dos síntomas, ata os 7 días despois do seu inicio, aínda que o período de máximo contaxio é nos 3 primeiros días de iniciados os síntomas. Os nenos/as poden contaxiar algo máis de tempo.

Aínda que a recomendación para a poboación sa cando padece unha gripe, sempre que non pertenza a un colectivo no que estea indicada outra cousa, é permanecer na casa ata 24 horas despois de que cese a febre unha vez se deixa o tratamento para baixala:

Recoméndaselle ao alumnado e profesorado de educación infantil e primaria que permaneza na súa casa ata 24 horas despois de que cesen os síntomas e sempre que pasasen 7 días.

q Tratamento

A maioría dos casos da gripe cura soa coas medidas habituais: beber líquidos en abundancia (auga, zumes, infusións, etc.).

O novo virus da gripe trátase como a gripe estacional, con medicamentos que alivien os síntomas, para baixar a febre, para a tose, para as dores musculares, etc. Débense seguir as recomendacións dos profesionais sanitarios ata recuperarse para evitar o contaxio a outras persoas. É importante extremar as medidas de hixiene.

Os antibióticos non están indicados, por tratarse dun virus. Só son útiles, sempre baixo prescrición médica, no caso de producírense complicacións bacterianas.

Os coñecidos como antivirais só se empregan baixo prescrición médica e só para tratar as persoas que pertencen aos grupos de risco.

q Hai vacina fronte a este virus?

A vacina contra a gripe estacional protexe as persoas contra as cepas habituais dos virus da gripe. As vacinas que se usan contra a gripe estacional non demostraron eficacia fronte ao novo virus. Nestes momentos, estase a probar a eficacia da vacina contra a gripe A e prevese que estea dispoñible para administrarlla á poboación nun espazo breve de tempo.

q Que persoas teñen máis risco de contraer a gripe?

Actualmente, os datos dispoñibles son insuficientes para determinar dunha maneira precisa quen ten maior risco de complicacións da gripe A. Así pois, neste momento, considéranse os mesmos grupos de persoas con factores de risco que para a gripe común. Estes grupos son:

ü As mulleres embarazadas, especialmente no segundo e terceiro trimestre.

ü Persoas con enfermidades cardiovasculares crónicas (excluíndo a hipertensión).

ü Persoas con enfermidades respiratorias crónicas (que inclúe displasia broncopulmonar e fibrose cística e asma moderada-grave persistente).

ü Persoas con diabetes mellitus tipo I e tipo II con tratamento farmacolóxico.

ü Persoas con insuficiencia renal moderada ou grave.

ü Persoas con enfermidades do sangue, como hemoglobinopatías ou anemias moderadas ou graves.

ü Persoas con asplenia (sen bazo).

ü Persoas con enfermidade hepática crónica avanzada.

ü Persoas con enfermidade neuromuscular grave.

ü Adultos e nenos que teñen inmunosupresión (incluída a orixinada polo VIH, fármacos ou receptores de transplantes).

ü Persoas con obesidade mórbida (persoas cun índice de masa corporal superior a 40).

ü Nenos e adolescentes (menores de 18 anos) que reciben aspirina a longo prazo e que poderían estar en risco de experimentar a síndrome de Reye logo da infección polo virus da gripe.

Estes grupos poden sufrir cambios segundo avance o coñecemento sobre a enfermidade, polo que é importante consultar con frecuencia a web: http://www.galiciasaude.es/gripe.

q Cando se debe acudir ao médico?

Aínda que a recomendación xeral cando se ten gripe, especialmente para adultos sans, é non acudir a un centro sanitario, todas as persoas deben estar atentas e, se presentasen algún ou algúns dos signos ou síntomas de agravamento da enfermidade que se indican a continuación, deben solicitar asistencia médica.

« Nos nenos e nenas:

« Respiración rápida ou dificultade para respirar.

« Cor gris azulada da pel.

« Non beber suficientes líquidos.

« Vómitos persistentes.

« Non espertar ou non interactuar.

« Estar moi irritable.

« Nos mozos e nos adultos:

« Dificultade para respirar ou dor no peito.

« Cor púrpura ou azul dos beizos.

« Ter vómitos e non poder reter os líquidos e ter signos de deshidratación, tales como mareos ao estar de pé, ausencia da micción.

« Ter convulsións.

De presentar algún destes síntomas, debe solicitarse asistencia médica de inmediato, a través do 061.