CEE Manuel López Navalón
(24/05/2013 | 19:33)
Un ano máis un grupo de estudantes do centro compostelán achegoranse polo noso museo para pasar unha mañá diferente compartindo xogos, actividades didácticas variadas que lles achegaron á escola do pasado. Aqui posan diante da reprodución do cadro da "escola de Doloriñas" e do puzzle que compuxeron arredor do seu contido.
Cartel anunciador do DiM 2013
(18/05/2013 | 13:43)
Desde o ano 1977 o ICOM (Consello Internacional dos Museos), vinculado á UNESCO, vén mantendo o empeño encomiable de escoller un tema para lembrar á sociedade en xeral a existencia e o labor dos museos como centros de servizo cultural e educativo ademais de ser institucións albaceas da memoria histórica e patrimonial da humanidade. Nesta ocasión o lema elexido foi: Museos (memoria+creatividade)= progreso social. Ecuación que reflicte as potencialidades dos nosos centros e que nos debe permitir estar cada día máis preto do noso público, da nosa comunidade. O MUPEGA nesta ocasión articulou unha programación que abrangue todo o mes e compartiuna con outros cinco museos da cidade nun proxecto conxunto e que de seguro ha de servir para partillar no futuro máis iniciativas que redunden nun mellor servizo e atención para os nosos usuarios.
Nenos e nenas e avoas xuntos no MUPEGA
Nenos e nenas  explican os xogos ós maiores
(17/05/2013 | 18:27)
Dentro do programa de actividades programadas polo noso museo para a celebración do Día Internacional dos Museos(18 de maio), tivemos a inmensa alegría de disfrutar cun encontro de usuarias de AGADEA de Santiago de Compostela,asociación que traballa con persoas con enfermidade tipo Alzheimer, e un simpático e colaborador grupo de alumnos e alumnas de 5º e 6º de Primaria do CEIP Vite. O encontro xirou arredor do xoguete e dos xogos tradicionais, con demostracións prácticas por parte dos dous colectivos. Papiroflexia, zoadeiras e buxainas foron os nexos de unión entre os maiores e a infancia. O MUPEGA agradece a excelente disposición do colexio de Vite e a confianza depositada en nós pola Asociación AGADEA. Aqui reflictimos dúas imaxes que demostran esa feliz interactividade e ese correcto e profesional traballo. Ata sempre amigas e amigos!
Persoal do Instituto de Estatística no MUPEGA
(17/05/2013 | 18:15)
Un considerable número de funcionarios/as do Instituto de Estatística quixeron coñecer de preto nas diferentes estancias do noso museo. Para iso solicitaron unha visita guiada e quedaron encantados coas atencións recibidas, coas explicacións ofrecidas e coa rica arqueoloxía escolar que se acubilla no MUPEGA. Aquí posan no vestíbulo do centro con evidentes mostras de contento.
Alumnado e profesorado do CEIP Pena de Francia (Mos)
(17/05/2013 | 18:09)
Unha ampla representación do alumnado do centro pontevedrés cunha parte do seu profesorado visitou as nosas instalacións e descubriu a historia da escola en Galicia a través das diferentes representacións que dela están instaladas no noso museo.
Catálogo da exposición "Luces de Alén Mar. As escolas de americanos en Galicia"
(15/05/2013 | 13:15)
Preto de 3000 persoas xa levan visitado á exposición temporal presente no MUPEGA centrada no labor dos emigrantes galegos no eido educativo. O catálogo da mostra acaba de presentar unha nova edición revisada e ampliada con máis textos e imaxes que ilustran este orixinal fenómeno. Pode descargarse no enlace do portal do Consello da Cultura Galega: http://consellodacultura.org/mediateca/documento.php?id=1841
Cartel anunciador da exposición itinerante do IES Xelmírez I
(10/05/2013 | 09:55)
O IES Xelmírez I acolle estes días a mostra itinerante do MUPEGA formada por diferentes láminas educativas do fondo histórico do propio museo e dos institutos históricos que se articulan na denominada Rede MUPEGA.Quedou instalada nas dependencias onde se acubilla a súa colección visitable de material científico e poderá ser visitada en horario lectivo previa concertación co propio centro.
Alumnado do IES C.Casares de Viana do Bolo
(08/05/2013 | 19:34)
Un simpático grupo de estudantes de 1º e 2º de ESO pasou a tarde de hoxe no noso museo visitando as distintas salas e despexando as dúbidas e segredos que para eles e elas escondía a escola dos seus maiores. Aquí aparecen posando co fondo da nova fachada rotulada do MUPEGA.