Alumnado da antiga Normal de Lugo no MUPEGA
(24/09/2013 | 19:40)
Arredor de 150 estudantes de 1º curso de Grao de Educación Infantil e Primaria acompañados por parte do seu profesorado volveu a percorrer os nosos núcleos museográficos e ademais de desfrutar dunha actividade diferente no seu quefacer cotián, tamén encheron de inquedanzas o seu espírito xuvenil aberto sempre ás novidades. Agradecemos coma cada ano este vento fresco que nos traen da beira do Miño e desexamos que o curso e o grao que encetan agora, primeiro responda as súas expectativas e segundo discorra inzado de éxitos e alegrías. Pola súa actitude no día de hoxe, estamos seguros que así será. Sorte futuros e futuras docentes!
Nenos e nenas do campamento urbano de Fontiñas ( Santiago)
(31/07/2013 | 11:04)
Un animado e numeroso grupo de nenos e nenas que se atopan no campamento urbano de Fontiñas visitaron na mañá do martes 30 o noso museo, disfrutando das diversas actividades lúdicas que nel lle foron ofertadas arredor da temática da escola antiga, da escola dos avós.
Grupo de visitantes da Asociación ASPADEZA (Lalín)
(04/07/2013 | 08:47)
Uns corenta usuarios e usuarias do centro comarcal de ASPADEZA sito na parroquia de Mouriscada (Vilanova) de Lalín coas súas monitoras e varios voluntarios acudiu na tarde de onte a coñecer de preto as nosas salas expositivas. O centro, creado no 2000, desenvolve actividades e talleres para mellorar a vida das persoas con discapacidade intelectual tentando acadar unha mellor integración social e laboral. Tan importante tarefa comprende tamén variadas visitas culturais e lúdicas coma a que realizaron na tarde de onte e onde puideron descubrir como eran as escolas e a ensinanza dos seus antergos. Parabéns polo seu traballo encomiable e ata sempre!
Visitantes observan con detalle a exposición nas salas do MUPEGA
(29/06/2013 | 14:35)
Este pasado venres 28 rematou a presenza no MUPEGA da exposición: “Luces de Alén Mar. As escolas de americanos en Galicia”. Durante a súa estadía no noso museo foi visitada por máis de 3500 persoas cun notable éxito de crítica e aceptación. Nenos, rapaces e maiores deleitáronse coa plasticidade e a completa información que a exposición desprende. A mostra organizada polo Consello da Cultura Galega a través do seu Arquivo da Emigración e que conta coa colaboración da Secretaría Xeral de Emigración da Xunta de Galicia continuará co seu percorrido pola nosa xeografía, recalando nos próximos días no concello coruñés de As Pontes de García Rodríguez. Parabéns e moitos éxitos!
Comisión de Onomástica da RAG no MUPEGA
(29/06/2013 | 14:22)
Aquí podemos ver, de esquerda a dereita: Antón Santamarina, Isabel Boullón, Antón Palacio, Luz Méndez, Ramón Lorenzo (presidente da Comisión), Gonzalo Navaza, Xosé Mª Lema, Xesús Ferro (secretario da Comisión), e Vicente Feijoo, quen xestiona os traballos de revisión, corrección e actualización do Nomenclátor de Galicia. As sesións de traballo desta comisión da RAG véñense desenvolvendo na biblioteca do Museo Pedagóxico de Galicia. Un traballo completo e minucioso a prol da recuperación e posta ao día da toponimia da nosa Comunidade. O MUPEGA séntese orgulloso de dar acubillo nas súas dependencias a este grupo de expertos e expertas nun campo tan importante para a lingua galega como é o nome dos lugares, que é tanto coma o nome da nosa infancia. Parabéns e ánimo para continuar!
Grupo de usuarios de Senet Cit. Negreira
(25/06/2013 | 18:18)
Esta empresa que traballa no eido do envellecemento activo e no desenvolvemento intelixente do tempo de lecer acudiu ao noso museo cun grupo de usuarios que percorreron con verdadeira paixón os distintos espazos museográficos do noso centro, dende as incompletas escolas de ferrado ata a escola da época franquista pasando polas racionalistas escolas de emigrantes.
CEIP Chans de Bembivre (Vigo)
(21/06/2013 | 21:30)
Un grupo máis de estudantes dentro do aluvión de visitas de estas últimas semanas estivo no noso museo como colofón a súa visita de estudo de fin de curso. Algo cansos pero satisfeitos co descuberto na súa visita aparecen aquí posando no vestíbulo do museo. Felices vacacións!!
Alumnado de 3º e 4º do colexio Cervantes de Lugo
(21/06/2013 | 21:26)
Aquí vemos este animado grupo que, cos seus profesores ó frente pasaron unha longa hora visitando cada unha das salas do noso museo e, descubrindo deste xeito o proceso educativo que tivo lugar noutros tempos e noutras condicións.