Grupo de estudantes do Máster do Profesorado co D. Germán Vargas
(28/10/2013 | 22:50)
O venres pasado o alumnado do profesor D. Gemán Vargas que está realizando a primeira fase do seu Máster do Profesorado percorreu as diferentes salas do museo e posou así de satisfeito cando rematou a súa visita no espazo dedicado ó ensino secundario e nomeadamente ós institutos históricos que forman co Mupega a Rede Mupega.
Máster do Profesorado. Especialidade Ciencias Humanas
(25/10/2013 | 10:29)
Outro grupo de estudantes posan despois de percorrer as diferentes salas do museo e descubrir a mensaxe que as pezas alí expostas lle transmiten aos visitantes.
Máster do Profesorado. Especialidade Ciencias Experimentais
(25/10/2013 | 10:25)
Dous grupos de alumnos e alumnas do Máster Universitario do Proferado que se imparte na USC visitaron o Museo Pedagóxico de Galicia en varias quendas sucesivas cos seus profesores Carmen Morán e Germán Vargas. Aquí vémolos posando nas distintas estancias do museo. Debaixo de cada imaxe está rotulado a especialidade dos estudantes.
IES Curtis (1º ESO) no MUPEGA
(21/10/2013 | 11:06)
O pasado mércores 16 de outubro, dous grupos de alumnos e alumnas de 1º de ESO do instituto de Curtis (A Coruña, visitaron por primeira vez o MUPEGA e deixáronse sorprender polos segredos que arredor da escola antiga se acubillan ao longo da nosa exposición permanente. Aquí vémolos sorrindo no vestíbulo do museo despois do seu percorrido.
CEIP Ramón de Artaza. Muros
(16/10/2013 | 09:37)
Arredor de uns sesenta alumnos e alumnas do colexio muradán visitou no día de onte as dependencias do noso museo, percorrendo e descubrindo as pegadas que a escola dos seus antepasados ten magnificamente recreadas polos distintos núcleos museográficos do museo. Agardamos volver a ver máis compañeiros e compañeiros deste activo centro de Primaria, a xulgar pola satisfacción que esta visita produciu nos maiores que onte estiveron connosco.
Exposición itinerante do MUPEGA no IES Sánchez Cantón. Pontevedra
(03/10/2013 | 12:51)
A exposición “A pedagoxía intuitiva. As láminas educativas” que o MUPEGA organizou coa colaboración dos institutos históricos da Rede Mupega, primeiro como unha mostra temporal nas súas dependencias de Santiago de Compostela, e agora como exposición itinerante por aqueles centros que así o demandan, chega a Pontevedra. A imaxe que se achega sitúa esta colección de láminas de historia natural de finais do XIX, que no seu día ofrecían unha forte carga intuitiva para aquel alumnado, nas dependencias do IES Sánchez Cantón de Pontevedra. Alí permanecerá ata principios do mes de novembro para deleite e goce do seu alumnado e orgullo do seu profesorado, verdadeiro albacea deste rico legado educativo que se pode contemplar aínda hoxe nos centros da Rede Mupega, como é caso do Sánchez Cantón.
Alumnado de 1º de Grao de Pedagoxía. USC
Alumnado de 1º de Grao de Pedagoxía. USC
Alumnado de 2º do Grao de Educación Social.USC
Alumnado dos Graos de Pedagoxía e Educación Social da USC no MUPEGA
(03/10/2013 | 10:05)
Catro numerosos e simpáticos grupos de estudantes dos Graos de Pedagoxía (1º) e Educación Social (2º) da USC, visitáronnos este primeiro martes e mércores de outubro, en senllas sesións vespertinas e acompañados polo seu profesor D. Vicente Peña Saavedra quen, deste xeito, quixo lembrar connosco aquel feliz outubro de 2004 cando, con el ó fronte, abriu as portas ó público este orixinal centro museístico. Os alumnos e alumnas da materia "Historia de Educación Social", percorreron, observaron e "escoitaron" con especial atención e interese o "murmurio" que os distintos aveños alí expostos, lles ían suxerindo. Confiamos que a súa visita, ademais de agradable fose proveitosa e, convidámolos a que volvan cando queiran. As portas do Mupega sempre están abertas para os que, coma eles e elas, aman a educación e a súa apaixoante historia. As imaxes que acompañan este texto reflicten o estado de ánimo dos nosos visitantes nos distintos núcleos museográficos do centro. Grazas e ata sempre!
Alumnado da antiga Normal de Lugo no MUPEGA
(24/09/2013 | 19:40)
Arredor de 150 estudantes de 1º curso de Grao de Educación Infantil e Primaria acompañados por parte do seu profesorado volveu a percorrer os nosos núcleos museográficos e ademais de desfrutar dunha actividade diferente no seu quefacer cotián, tamén encheron de inquedanzas o seu espírito xuvenil aberto sempre ás novidades. Agradecemos coma cada ano este vento fresco que nos traen da beira do Miño e desexamos que o curso e o grao que encetan agora, primeiro responda as súas expectativas e segundo discorra inzado de éxitos e alegrías. Pola súa actitude no día de hoxe, estamos seguros que así será. Sorte futuros e futuras docentes!