CEIP Monte Valiño de Ferreira de Pantón
(21/06/2013 | 21:13)
Un animado grupo de nenos e nenas de todos os cursos de Primaria do centro da Ribeira Sacra realizaron unha viaxe fin de curso ata Santiago e aproveitaron a súa estadía para visitar o noso museo. Percorreron as diferentes aulas históricas e traballaron como o facían seus avós na aula-obradoiro.
Alumnado de Ciclo Superior de E.I. do Colexio Santa Apolonia
(14/06/2013 | 11:35)
Un grupo de alumnos e alumnas do Ciclo Superior de Educación Infantil do centro compostelán pasou polas salas do MUPEGA para coñecer de preto as vicisitudes que acompañaron á historia da escola na nosa Comunidade. Detiveronse en cada un dos rincóns do museo na procura de elementos que lle facilitaran a súa actual formación pedagóxica. Aquí vémolos posando como auténticos escolares na aula obradoiro instalada na planta baixa do museo.
IES Espiñeira (Boiro)
(07/06/2013 | 14:36)
Arredor de cincuenta estudantes boirenses do IES Espiñeira visitaron esta mañá o noso museo, compartindo co Instituto Galego de Estatística a actividade extraescolar. Así, a metade deles estivo no museo e a outra metade visitou as instalacións e coñeceu os programas e actividades do IGE. Aquí vémolos posando na entrada do museo pouco antes de retomar o camiño de volta.
CPI Tino Grancío
(05/06/2013 | 14:49)
Un amplo grupo de estudantes de Educación Primaria do centro integrado de Guntín (Lugo) pasou a mañá deste 5 de xuño nas instalacións do noso museo, descubrindo a memoria da escola dos seus avós e bisavós presente nas distintas salas do noso centro. Aquí vemos como posan na porta do edifico coa nova imaxe corporativa ao fondo. Agardamos ver axiña outra representación de escolares do activo e animoso CPI que leva o nome do pintor de Lousada; Tino Grandío. Ata sempre!
Alumnos e alumnas do CPI Monte Caxado na exposición temporal
O CPI Monte Caxado das Pontes de García Rodriguez de visita no MUPEGA
(31/05/2013 | 13:11)
Un animado grupo de rapaces de 5º e 6º de EP do centro integrado pontés pasou media mañá no museo visitando as diferentes salas pero deténdose especialmente na exposición temporal "Luces de Alén Mar" por ser coñecedores de primeira man do extraordinario labor dos emigrantes galegos no eido educativo, tan ben representado no seu concello e arredores. Por outra banda estes afortunados estudantes teñen un magnífico museo etnográfico no seu centro dende a década dos oitenta polo que entenden perfectamente o labor que desempeñan os depositarios do patrimonio cultural en xeral e educativo en particular.
CPR La Milagrosa (Lugo)
(31/05/2013 | 09:26)
Un numeroso grupo de estudantes do centro lucense da Praza de Ferrol, como vén sendo habitual nos últimos anos achegouse a Compostela para coñecer de preto os tesouros que agocha a nosa cidade. Visitaron a zona histórica, a Cidade da Cultura e o noso museo, onde tomaron un respiro coa práctica de varios xogos tradicionais no noso patio escolar.
CEIP de Xuño (Porto do Son)
(31/05/2013 | 09:22)
Un divertido grupo de nenos e nenas de 3º e 4º de EP do colexio de Xuño pasaron polo noso museo para coñecer de preto a escola dos avós, a través dos diferentes xogos e propostas didácticas. Aqui aparacen fotografados na entrada do museo coa nova imaxe decorativa da fachada ao fondo.
Mesa do acto de presentación do libro "Tastarabás"
(30/05/2013 | 09:53)
Onte ás 19:00h nun entrañable acto presidido polo Secretario Xeral de Política Lingüísita, D. Valentín García e coa presenza do autor da monumental enciclopedia de enredos e brinquedos tradicionais, o profesor e escritor ferrolán Antón Cortizas, ademáis do director da editorial Xerais, D.Manuel Bragado, tivo lugar a presentación desta fermosa obra, froito de dez anos de traballo. Obra de máis de mil páxinas, cun extenso catálogo dos brinquedos e enredos diversos que forman parte da nosa tradicional cultura lúdica. Máis de 2.500 fotografías acompañan os arredor de 1.000 brinquedos, enredos e mesmo brincadeiras efémeras que compoñen o volume, todos eles descritos de forma pormenorizada e completados con informacións sobre o seu uso, a dificultade de construción, as súas variantes, os lugares de recolla das informacións, anécdotas dos informantes relativas aos xoguetes descritos e tamén textos literarios ou doutra índole, nos cales un gran número de autores se refiren a eles. O MUPEGA, que dende o seu momento auroral, vén apostando pola recuperación e posta en valor de este patrimonio lúdico organizou este acto dentro da programación específica con motivo do Día Internacional dos Museos.