1º e 2º de ESO do CPR Niño Jesús de Praga de Vigo
(15/02/2013 | 21:08)
Un grupo de estudantes de 1º e 2º de ESO do CPR. Niño Jesús de Praga de Vigo visitou está mañá o noso museo, descubrindo con interés como foi a escolarización dos seus antepasados. O alumnado detívose na exposición temporal “Luces de Alén Mar. As escolas de americanos en Galicia”, presente no primeiro andar do MUPEGA e puido comprobar o impagable esforzo inversor que os nosos emigrantes fixeron a prol da educación en Galicia, e nomeadamente daqueles orixinarios da súa bisbarra. Remataron a súa viaxe no tempo nas aulas históricas onde observaron con sorpresa o mobiliario antigo e o variado enxoval escolar propio doutros tempos. A antigüidade do seu centro -1903- favoreceu a familiarización co material exposto e coas historias contadas.
A exposición: "Luces de Alén Mar. As escolas de americanos en Galicia " inaugurada no MUPEGA
A exposición: "Luces de Alén Mar. As escolas de americanos en Galicia " inaugurada no MUPEGA
(06/02/2013 | 19:09)
A exposición:‘Luces de alén mar. As escolas de americanos en Galicia’ que consta de 41 paneis temáticos e abondosos materiais orixinais –como traballos de alumnos, estatutos, regulamentos, libros de actas ou planos das escolas–, que permiten reconstruír e interpretar o enorme labor educativo e cultural realizado a prol do desenvolvemento social e do progreso de Galicia desde a outra beira do Atlántico, inaugurouse no día de hoxe na sala de exposicións temporais do MUPEGA con asistencia das máis altas autoridades do mundo educativo, cultural e da emigración. ‘Luces de alén mar’ está comisariada polo que foi primeiro Coordinador Científico do MUPEGA, o profesor universitario D. Vicente Peña Saavedra e situase no primeiro andar do museo onde se musealiza de forma permanente un aula dunha escola tamén fundada por americanos como claro homenaxe que fai un museo que acubilla a memoria escolar de Galicia ao traballo xeneroso e excepcional dos aqueles paisanos bos e xenerosos. A exposición poderá ser visitada desde mañá e até o vindeiro 28 de xuño en horario normal de apertura do museo (martes a sábado en horario de 10.00 a 14.00 h. e de 16.00 a 20.00 h.) A entrada é gratuíta.
Alumnado de 6º de EP do CEIP Monte dos Postes.
(06/02/2013 | 18:57)
Unha ampla representación do alumnado do colexio compostelán visitou cos seus titores as nosas instalacións desfrutando das actividades didácticas programas co gallo de que coñezan dun xeito ameno as vicisitudes da escolarización dos seus maiores. Aquí aparecen no vestíbulo do museo posando satisfeitos coa súa estadía.
Exposición Itinerante do MUPEGA
(28/01/2013 | 13:42)
Unha coidada selección de láminas, cartelas e paneis informativos organizados en torno ás láminas como recurso educativo comezou a súa itinerancia polos centros da Rede Mupega cunha primeira parada no instituto Lucus Augusti de Lugo, que vén de clausurar unha fermosa exposición gráfica e documental sobre os seus primeiros 170 anos de vida. A exposición de láminas permanecerá en Lugo ata finais de febreiro, continuando logo o seu percorrido ata rematar o presente 2013.
2º de ESO do IES Cacheiras
(22/01/2013 | 13:35)
Un animado grupo de estudantes de 2º de ESO do instituto de Cacheiras visitou nesta mañanciña as dependencias do MUPEGA, descubrindo a través dos aveños escolares presentes a historia da educación en Galicia. Especial atención despertou o espazo dedicado ás escolas da emigración, por coñecer de preto o labor dos seus devanceiros na Habana plasmada na súa parroquia veciña de Luou. Un comportamento exquisito durante o seu demorado percorrido polas aulas do noso museo. Grazas pola visita e ata outra.
IES Monte Neme (Carballo).2º ESO
(21/01/2013 | 11:39)
Un animado grupo de rapaces e rapazas do instituto carballés visitaron as dependencias do MUPEGA o pasado venres 18 de xaneiro coa atenta mirada na arqueoloxía escolar que se atopa espallada polas distintas estancias do museo. Cun comportamento exquisito recollemos aquí as súas facianas alegres despois de ter coñecido de preto a escola dos seus devanceiros.
Alumnado e profesorado do CEIP Praia Xardin no MUPEGA
(16/01/2013 | 20:22)
Alumnado de 5º e 6º do colexio boirense Praia Xardín visitaron na mañá de hoxe día 16 de xaneiro o noso museo, descubrindo cos seus propios ollos a escola e o mundo infantil en xeral da época dos seus avós. Percorreron as diferentes salas expositivas e atenderon moi interesados as explicacións recibidas co que agardamos saiban un pouco máis de cómo vivian, estudaban e xogaban os seus antepasados. Agardamos volver a velos axiña por este centro, onde se gardan fermosos materiais das escolas que foron pechando pola comarca do Barbanza. Aqui posan na entrada do museo co profesorado que os acompañou.
Alumnado de 1º de EP do Colexio Cluny no MUPEGA
(16/01/2013 | 20:13)
Arredor duns cincuenta nenos e nenas dos primeiros cursos de Primaria pasaron unha mañá diferente e divertida no MUPEGA. Descubriron como era a escola dos seus avós, a través de variadas actividades didácticas dirixidas polos educadores do museo, e acompañados das súas profesoras Enma e Estefanía. Aquí aparecen posando contentos no vestíbulo do museo preparados para iniciar a súa "viaxe no tempo".