Fomento da lectura

VI Xornada dos Clubs de Lectura

 

O 31 de maio será a data para a cita anual dos coordinadores e coordinadoras dos clubs de lectura que están a funcionar en 222 centros de ensino público de Galicia no presente curso. Será xa a VI Xornada dos Clubs de Lectura, que terá lugar en sesións de mañá e tarde nas instalacións da EGAP (Escola Galega de Administración Pública). 

Ao longo da xornada haberá ocasión para o encontro e o intercambio de experiencias; tamén está prevista a participación de Gemma Lluch, especialista en Literatura Infantil e Xuvenil, membro do grupo de investigadores ERI Lectura, da Universitat de Valencia. haberá un espazo para falar da "lectura social", a tendencia actual de intercambio de experiencia lectora a través das redes sociais, coa presenza dun dos impulsores de Redelibros, a rede social galega do libro, Xosé R. Lois. Poñerá fin á xornada o escritor Marcos Calveiro, un autor moi valorado polos lectores e as lectoras e con múltiples recoñecementos pola súa obra dentro e fóra de Galicia.

A VI Xornada dos Clubs de Lectura é unha oportunidade para coñecer as múltiples actividades que están levando a cabo os grupos de lectura creados en centros educativos de Galicia, que van constituíndose pouco a pouco e grupos de dinamización da lectura nas súas comunidades educativas de referencia, establecendo vínculos con outros grupos de lectores e contribuíndo a unha maior presenza dos libros e da lectura na vida social galega. Os clubs de lectura son unha das fórmulas de fomento da lectura coa xente nova, e cos adultos (preto dun 30% dos centros implicados teñen tamén grupo de lectura de adultos) , que máis contribúe á consolidación deste hábito, e á adquisición de competencia lectora (entre outras), esencial para a formación persoal e directamente relacionada co éxito académico. 

PROGRAMA

A construción do lector. Agustín Fernández Paz

Agustín Fernández Paz: A construción do lector from Bibliotecas Escolares de Galicia on Vimeo.

No Día Mundial do Libro, nada mellor que a palabra de Agustín Fernández Paz, lector, escritor, mestre... falando da "construción do lector" nos pasados Encontros do Plan de Mellora de Bibliotecas Escolares, celebrados en Compostela os días 7 e 8 de marzo de 2013.

 

ACCESO AO RESTO DOS VÍDEOS desta actividade

Día Mundial do Libro 2013

"Este día brinda a oportunidade de reflexionar xuntos sobre o mellor xeito de difundir a cultura escrita e de permitir que todas as persoas, homes, mulleres e nenos, accedan a ela, mediante a aprendizaxe da lectura e o apoio ao oficio da edición, as librarías, as bibliotecas e as escolas. Os libros son os nosos aliados para difundir a educación, a ciencia, a cultura e a información en todo o mundo".

(Mensaxe de Irina Bokova, Directora Xeral da UNESCO co gallo da celebración do Día Mundial do Libro e dos Dereitos de Autor, o 23 de abril de 2013) 

Coma en anos anteriores, e para celebrar este Día Mundial do Libro o vindeiro 23 de abril de 2013, edítase un marcapáxinas cun texto orixinal co que unha autora, neste caso PAULA CARBALLEIRA (narradora oral, escritora, actriz, directora de teatro), agasalla ás Bibliotecas Escolares de Galicia. Paula escribiu un texto no que destaca as potencialidades do libro para atraer aos lectores máis novos, mesmo a aqueles que (en principio) ofrecen máis resistencias. Esta edición conta coa colaboración do Ministerio de Educación, Cultura e Deporte e foi distribuído entre as bibliotecas do Plan de mellora de bibliotecas escolares. Pódese descargar AQUÍ

As bibliotecas escolares galegas comezan a difundir as súas actividades para celebrar o Día do Libro, unha data clave no calendario civil anual para poñer en valor o libro e a experiencia lectora entre a comunidade educativa: 

Pase ao "liberespazo"

 

"Descubrimos que os libros se relacionan uns con outros de mil maneiras, levan uns a outros por mil camiños, comunícanse -por amplos corredores ou portas secretas- como as salas dun pazo inmenso, forman parte dun organismo vivo e en continuo desenvolvemento, son follas dunha mesma árbore. Descubrimos a literatura, nunha palabra. Non como materia escolar, non como catálogo de títulos e autores, senón como mundo animado, como universo. Descubrimos a galaxia Gutenberg, o liberespazo, moi anterior ao ciberespazo e mellor cartografado, aínda que non por iso menos rico en sorpresas e aventuras. E ao converternos en libernautas accedemos, entre a infancia e a adolescencia, ao noso primeiro territorio libre." Carlo Frabetti

No Día Mundial do Libro do ano 2008 dábamos a coñecer un texto-agasallo do escritor Carlo Frabetti para as Bibliotecas Escolares de Galicia: O liberespazo. Retomamos, cinco anos despois, aquel fermoso texto e aproveitamos esta cita para deseñar, xunto co ilustrador Andrés Meixide, un "pase ao liberespazo", destinado aos lectores e lectoras. Estes poderán ir recollendo as súas "viaxes" polos libros e, a través do visado da biblioteca (que dá fe destas viaxes), acadar a categoría de "libernautas", con dereito propio a viaxar libremente polo "liberespazo".  Este material edítase en colaboración co Ministerio de Educación, Cultura e Deporte, a través do programa "Leer para aprender. Leer en la era digital"

Nos pasados Encontros do Plan de mellora de bibliotecas escolares fíxose entrega de exemplares desta pequena publicación, con destino ás bibliotecas escolares do Plan de mellora. O profesorado interesado en empregar este "pase" co seu alumnado,  pode DESCARGALO AQUÍ (imprimir a tamaño A5)e AQUÍ (con marcas de corte)

Desde a EEI Barrionovo, de Arteixo, chéganos esta primeira nova da súa presentación ás nenas e aos nenos do centro. E agora, noticia sobre os primeiros "libernautas".

+ LIBERNAUTAS no CEP Xosé María Brea Segade (Taragoña-Rianxo) 

2 de Abril: Día Internacional do Libro Infantil

O vindeiro 2 de Abril conmemórase, tal e como se vén facendo desde o ano 1967, o nacemento de Hans Christian Andersen. A IBBY declarou esa data Día Internacional do Libro Infantil, co fin de lembrar a importancia de ofrecer  bos libros a todas as nenas, a todos os nenos, libros de calidade que esperten a súa imaxinación e os axuden a medrar como lectores e como persoas.

Cada ano, esta organización internacional encárgalle unha imaxe e un texto a autores de diferentes países. Nesta ocasión, a autora do texto é a mexicana Pat Mora e o ilustrador do cartel é o estadounidense Ashley Bryan

A través da OEPLI (Organización Española para o Libro Infantil e Xuvenil) podemos acceder ao poema de Pat Mora nas catro linguas do Estado, un poema que remata así:

Lemos xuntos. Ti e eu, dando voltas e voltas,

percorrendo o mundo coa alegría nos libros. 

Unha boa oportunidade para coñecer a existencia de distintas correntes artísticas, pictóricas e literarias, que enriquecen coa súa mirada o mundo no que nos tocou vivir. 

 

21 de marzo, Día da Poesía


O 21 de marzo é unha data que concita moitas vontades e dá pé a moitas conmemoracións (os bosques, a poesía, a cor, a non discriminación racial...), non deixa de ser a Primavera que o renova todo... Nós decantámonos pola poesía, pois foi a UNESCO quen declarou este 21 de marzo, Día Mundial da Poesía en 1999. O vídeo que serve para iniciar esta entrada, na que iremos subindo novas relacionadas coa celebración deste día nas bibliotecas escolares galegas, é unha versión ben fermosa dun dos poemas fulcrais da poesía galega, "Eno sagrado en vigo", unha das Cantigas de Amigo de Martín Codax, que paga a pena compartir... o galego non ten fronteiras, ben se ve...

RECURSOS:

Ollando libros. Concurso de fotografía e lectura do IES Pedra da Aguía (Camariñas)

 

A biblioteca do IES Pedra da Aguia (Ponte do Porto-Camariñas, A
Coruña), convoca o I Certame fotográfico OLLANDO LIBROS,destinado a
alumnado de Centros de Ensino Secundario de Galicia.

O tema do concurso será: a lectura na vida cotiá e as fotografías deberán ser orixinais e realizadas no presente ano 2013.

Está previsto un premio a nivel local, dentro do centro convocante, e un premio a nivel de Galicia. 

O prazo de presentación de fotografías é o 5 de abril de 2013. 

ACCESO ÁS BASES DO CONCURSO

Son xa varias as bibliotecas que realizan certames semellantes, a nivel do seu centro. Velaquí algúns resultados:

 

Un paseo polo IES A XUNQUEIRA II da man de Rosalía de Castro


Celebrar os 150 anos da publicación de Cantares Gallegos e manter viva a palabra de Rosalía de Castro é o obxectivo. Pero tamén serve, neste caso, para integrar a poesía na vida cotiá do instituto e, de paso, permitirnos entrar no IES A Xunqueira II, percorrer as súas instalacións e escoitar a voz de Rosalía nas voces do alumnado e de parte do persoal do centro.

24 de febreiro, Día de Rosalía de Castro (2013)

Eu ben vin estar o moucho

enriba daquel penedo.

¡Non che teño medo, moucho;

moucho, non che teño medo!

Contra vento e marea, e coma en anos anteriores, as bibliotecas escolares galegas súmanse á celebración do aniversario de Rosalía de Castro, o día 24 de febreiro, unha das datas sinaladas no "calendario da lectura" do noso país. Pero nesta ocasión, a celebración é dobre porque neste 2013 cúmprense os 150 anos da publicación de Cantares Gallegos, libro fundamental para as xentes, a lingua e a cultura de Galicia.

Son moitas e variadas as actividades que se levan a cabo estes días nos centros educativos e que xuntan, nunha lectura colectiva da obra da escritora, a grandes e pequenos, para manter viva, nas voces das lectoras e dos lectores, os versos de Rosalía. Moitas destas actividades súmanse á proposta da AELG que trata de involucrar a todos os sectores da sociedade, e nas que o alumnado dos centros cobra un protagonismo alentador. ACCESO AOS VÍDEOS DOS CENTROS

Velaquí algunhas propostas, actividades e recursos que se están a difundir entre o colectivo das Bibliotecas Escolares de Galicia:

A título de exemplo, a programación completa dunha biblioteca escolar arredor deste Día de Rosalía: IES Pazo da Mercé (As Neves): O venres pasado celebramos co noso alumnado e @s nos@s ilustres invitad@s da Escola Unitaria de Vide o día de Rosalía. Intercalamos o visionado de videos con poemas musicados e o recitado de poemas da escritora, no caso de "Máis ó que ben quixo un día", co acompañamento ao piano por parte dunha alumna de 1º Bach. Dúas rapazas do club de lectura léronnos "Tecín soia a miña teia" e o Equipo de Escolas Unesco colaborou interpretando "Adios ríos, adios fontes" en Yogote,linguaxe de signos. Presentouse un vídeo colaborativo realizado por un grupo de 2ºESO no que cada imaxe de Rosalía vai asociada ao nome dun alumn@. Atoparédelo no blog do noso equipo de EDLG: http://dinamizaiespazodamerce.blogspot.pt/

Ás persoas participantes se lles obsequiou cun cravo bermello e unha tarxeta cun poema e unha ilustración. Aproveitamos o acto para entregar os premios aos gañadores do concurso convocado pola biblioteca no que se debían resolver cuestións sinxelas por escrito sobre Rosalía e a sua obra, traballando en algunha das preguntas aspectos de formación de usuarios/as. Organizado tamén pola biblioteca, celebrouse o sorteo de dous exemplares de "Cantares Galegos" entre o alumnado que entregou unha tarxeta co seu nome e o título dun poema de Rosalía. E, como despedida, a "Alborada de Rosalía" interpretada á gaita por un compañeiro do departamento de Lingua Castelá.

"EnREDando versos", ou a poética da colaboración.

EnrREDando versos é un blogue de poesía froito da colaboración de varias bibliotecas escolares que, neste curso, se embarcaron nun traballo conxunto arredor da poesía. A mellor presentación desta experiencia é a que fan os integrantes do grupo:

EnREDando versos é o título do proxecto que nace co obxectivo de achegar á poesía ás aulas. Os intereses comúns no campo da competencia lingüística así como nunha metodoloxía baseada no traballo colaborativo e no uso das TIC entre o alumnado fai que se constitúa un grupo de traballo intercentros co fin de aunar esforzos e intercambiar experiencias educativas que repercutan na práctica docente.

O proxecto está integrado por profesorado de dististos niveis educativos do ámbito de linguas, responsables de bibliotecas escolares, clubs de lectura, un asesor TIC e de novas tecnoloxías, procedentes de cinco centros da provincia de Pontevedra: IES de Poio, IES Ribeira de Louro, IES A Sangriña,  IES de Sanxenxo e CEIP A Lama.

Un exemplo de traballo colaborativo desde as bibliotecas escolares, en beneficio do alumnado (tamén de integración da cultura escrita e a cultura dixital), aproveitando os recursos electrónicos e as formas de comunicación propias da sociedade da información. A poesia é nesta ocasión o motivo de encontro... pero que mellor motivo!!

Resolución da convocatoria de clubs de lectura para o curso 2012/2013

O Portal Educativo publica hoxe a resolución da convocatoria da Dirección Xeral de Centros e Recursos Humanos, destinada a apoiar o funcionamento de clubs de lectura en centros de titularidade da Consellería de Educación e O.U. que matriculan alumnado de ESO, bacharelato, formación profesional, educación de adultos ou ensinanzas de réxime especial, para o curso 2012, 2013. En total, reciben axuda os 222 centros que a solicitaron, e van destinadas a sufragar o desenvolvemento das actividades previstas no proxecto presentado, fundamentalmente á adquisición dos libros para os diferentes grupos de lectura incluídos en cada un dos clubs (existen clubs con varios grupos de lectura, mesmo un 25% destes clubs contan con grupos de lectura de adultos, integrando así nesta actividade aos distintos sectores da comunidade escolar). Esta iniciativa encádrase no programa HORA DE LER para o fomento da lectura en centros de ensino, unha das liñas de acción do Plan LÍA de biblitoecas escolares (Lectura, Información, Aprendizaxe).

+ INFORMACIÓN: LER EN MAN COMÚN (Blogue dos clubs de lectura)LIBROS A EITO (Banco de libros)

Lectura para tempos fríos. Guías de lectura para o Nadal 2012

Achéganse os días de Nadal e as Bibliotecas Escolares Galegas comezan a difundir as súas recomendacións de lectura para estes días fríos. Estas "guías de lectura" recollen títulos de libros para todas as idades e sensibilidades lectoras e, nalgúns casos, tamen películas, música e enderezos electrónicos de interese. Responden ao traballo de selección realizado polos equipos de bibliotecas dos centros, e son un material de apoio ás familias co obxectivo de orientalas no seu labor de creación de hábitos de lectura entre os máis novos. Varias destas guías teñen o interese engadido de seren seleccións temáticas e estaren relacionadas con proxectos interdisciplinares ou proxectos documentais integrados, levados a cabo no centro durante o presente curso.

 

E para sumar sempre, selección de lecturas das Bibliotecas Municipais do concello de A Coruña: Guía Historias de regalo 2012 - Historias de regalo: regala cine, música e libros 2012

Libros sobre bibliotecas: "Erase una biblioteca".

Co gallo da celebración do Día da Biblioteca, o pasado 24 de outubro, a Biblioteca Civican Pamplona edita unha completísima guía de lectura titulada ÉRASE UNA BIBLIOTECA, con títulos de libros e películas que teñen como protagonista a biblioteca e os libros.

Esta biblioteca edita interesantes guías de lectura, todas elas dispoñibles a través da súa páxina web; un material de gran axuda á hora de seleccionar materiais para a biblioteca escolar.

Convocatoria de Clubs de Lectura para o curso 2012/2013

Club de lectura. IES Leiras Pulpeiro. LugoO Portal Educativo publica hoxe, 4 de setembro, a convocatoria da Dirección Xeral de Centros e Recursos Humanos pola que se incentiva o funcionamento de clubs de lectura, para o curso 2012/2013, en centros públicos que matriculan alumnado de ensino secundario, bacharelato, formación profesional e ensinanzas de réxime especial.

Esta iniciativa está encadrada no programa HORA DE LER para o fomento da lectura en centros de ensino, integrando á súa vez no Plan LÍA (Lectura, Información e Aprendizaxe) da Consellería de Cultura, Educación e Ordenación Universitaria. O prazo para a presentación de solicitudes remata o 15 de outubro.

+ información AQUÍ

Vídeo resume da V Xornada dos Clubs de Lectura


Xornada Clubs de Lectura 9 de Xuño - HD 1080p from Bibliotecas Escolares de Galicia on Vimeo.

O pasado 9 de xuño celebrouse en Compostela a V Xornada dos Clubs de Lectura, con asistencia dos profesores que coordinan os clubs de lectura nos 215 centros públicos de ensino secundario de Galicia e que contaron con axudas da Dirección Xeral de Centros e Recursos Humanos para o funcionamento dun club durante o curso que agora remata. Os clubs de lectrua son unha iniciativa integrada no programa Hora de ler, para o fomento da lectura nos centros de ensino.

Esta actividade de formación para o profesorado implicado, reuníu nesta ocasión tamén a unha boa representación de alumnos e alumnas que integran os clubs de lectura, xunto cunha pequena representación de nais, pais ou persoal non docente, que forman parte dos grupos de lectura de adultos, presentes nalgúns centros. A través deste vídeo podemos coñecer algo do que alí pasou. 

Todos os vídeos das sesións plenarias, así como outros materiais e informacións, están dispoñibles AQUÍ (entrar como convidado)

V Xornada de Clubs de Lectura

 
Por V ano consecutivo convócase a Xornada dos Clubs de Lectura, destinada ao intercambio de experiencias e á formación do profesorado que coordina os clubs de lectura presentes en 215 centros públicos de ensino secundario de toda Galicia, con apoio da Dirección Xeral de Centros e Recursos Humanos da Consellería de Cultura, Educación e O.U., a través do seu programa HORA DE LER e da convocatoria anual de axudas.
Ademais do profesorado, nesta V Xornada de Clubs de Lectura vai participar tamén alumnado integrante de clubs de distintos puntos de Galicia, así como pais e nais que forman parte dos grupos de lectura de adultos existentes nun 25% dos centros con club de lectura. Será ocasión para o intercambio de experiencias de lectores de distintas idades e intereses. O programa inclúe conferencias, mesas de debate, reunións por perfís de asistentes, e obradoiros para os mozos e mozas.
Esta actividade está cofinanciada polo Ministerio de Educación, Cultura y Deporte, en virtude do convenio de colaboración asinado en 2011 para o programa Leer para aprender.

 

 

Mireia Manresa: "Els hàbits de lectura: dels perfils lectors a la intervenció docent"

 

Intervención de Mireia Manresa nunha xornada sobre o gusto pola lectura, na Universitat Autònoma de Barcelona, o pasado 27 de abril.

Pódese seguir AQUÍ

 

 

 

 

23 de abril, Día Mundial do Libro.

 

Co gallo da celebración do Día Mundial do Libro - 2012, edítase un novo marcapáxinas que inclúe, desta vez, un texto-agasallo de Agustín Fernández Paz, OS RÍOS DA VIDA, escrito para esta ocasión por un dos autores más lidos por grandes e pequenos no noso país, e recoñecido a nivel internacional.  

 

"ABRIR UN LIBRO E DEIXARSE LEVAR POLA FERVENZA DE VOCES, DE LINGUAS, DE RECENDOS, DE PAISAXES... UNHA MAXIA SECRETA E INESGOTABLE, QUE A NÓS NOS CORRESPONDE DESCUBRIR".

2 de abril: Día Internacional do Libro Infantil

"Ao ler, ao contar ou ao escoitar contos en voz alta tamén estamos repetindo un ritual moi antigo que cumpriu un papel fundamental na historia da civilización: facer comunidade. Ao redor deses contos reuníronse as culturas, as épocas e as xeracións para dicirnos que somos un só os xaponeses, os alemáns e os mexicanos; aqueles que viviron no século XVII e nós que lemos un conto en Internet; os avós, os pais e os fillos. Os contos énchenos por igual aos seres humanos, a pesar das nosas enormes diferencias, porque todos somos, no fondo, os seus protagonistas".

Había unha vez un conto que contaba o mundo enteiro é o texto que Francisco Hinojosa, poeta, dramaturgo, narrador, editor e ensaísta mexicano, cedeu á IBBY para a conmemoración do Día Internacional do Libro Infantil 2012. Cada ano, a International Board on Books for Young People encarga a unha das súas seccións a edicíón do cartel conmemorativo deste día no que se lembra o nacemento de Hans Christian Andersen. Nesta ocasión foi a sección Mexicana quen acolleu esta iniciativa, e velaquí  tamén o cartel que elaborou para a ocasión o ilustrador deste país, Juan Gedovius.  

As datas significadas, coma esta, poden ser útiles para insistir nos beneficios da lectura, na necesidade de ofrecer ao alumnado textos de calidade que os axuden a medrar como cidadáns xustos e felices. Aínda que estas celebracións por si soas non consiguen nada, cando vaian acompañadas de actividades sistemáticas, de tempos e espazos para a lectura (na familia e na escola), e de bos libros (en papel ou en pantalla), seguramente poidamos avanzar como sociedade lectora, máis culta e máis igualitaria.

21 de marzo: Día Mundial da Poesía

A poesía é unha fogueira,

queimémonos nela.

Celso Emilio Ferreiro.

"Nun mundo que está en plena mutación, sacudido por unha vertixe de cambios e transformacións sociais, os poetas acompañan os movementos cívicos e atinan tanto a sacudir as conciencias polas inxustizas do mundo como a conmovelas pola súa beleza. Nós vemos tamén as posibilidades que ofrecen as novas tecnoloxías e as breves mensaxes que circulan polas redes sociais para conferir un novo alento á poesía e favorecer a creación e o intercambio de poemas ou versos capaces de dilatar a nosa relación co mundo."

Da mensaxe de Irina Bukova, Directora Xeral da UNESCO, co gallo do Día Mundial da Poesía, 2012.

As bibliotecas escolares galegas comezan a facernos chegar as crónicas das súas actividades para celebrar o Día da Poesía.

RECURSOS:

  1. LEER.ES
  2. Literalia.Tv
  3. REDE LECTURA: POESÍA  POESÍA INFANTIL  POESÍA XUVENIL

¡A poesía é o gran milagre do mundo!

Luís Pimentel

Ai, amor, amor! Hai moito amor na biblioteca escolar...

Ilustración de Pedro SeromenhoHai datas con gran presencia na sociedade do consumo que, ao igual que outros fenómenos coma o deporte de masas, por exemplo, poden servir para avanzar en habilidades de lectura, escritura e investigación. Téñeno claro os docentes que dinamizan as bibliotecas escolares galegas, que aproveitan estes días fríos de febreiro para poñer en valor a poesía amorosa... porque "aos mozos e ás mozas gústalles a poesía", inda que algúns non queiran crelo. Velaquí algunhas actividades e propostas destes días:

Clubs de lectura 2011/2012. Resolución da convocatoria

O Portal Educativo da Consellería de Educación e O.Universitaria, publica a Resolución de 30 de decembro de 2011, da Dirección Xeral de Centros e Recursos Humanos, pola que se adxudican contías para o funcionamento de CLUBS DE LECTURA, para o curso 2011/2012, ao abeiro da convocatoria de 1 de setembro. En total, reciben axudas 215 centros públicos que matriculan alumnado de ESO, Bacharelato, Formación Profesional, Ensinanzas de Persoas Adultas, Ensinanzas de Réxime Especial.

RESOLUCIÓN

Recomendacións de lectura para tempos fríos: Nadal 2011

Achégase o final de ano e con el o tempo de Nadal. As bibliotecas escolares galegas comezan a difundir as súas recomendacións de lecturas para estas datas: seleccións de títulos recentes e outros non tanto, que hai moito bo que recuperar para os lectores máis novos. Libros, cine, música... porque as lectoras, os lectores, que medran en contacto coas diversas manifestacións da cultura desenvolven maiores capacidades de comprensión dos textos, teñen máis recursos cos que enfrentarse ás novas aprendizaxes. Porque a ler se aprende lendo, velaquí algunhas propostas: