Falamos de libros

Luz Méndez. Lingüista. Experta en toponímia. Mércores 16 de xaneiro. Cursos 5º e 6º.

Naceu en Laxe, parroquia de Ventosa (Agolada) co ano 1965. Vive en Santiago desde 1983. No eido profesional, impartiu docencia como profesora asociada da Universidade de Vigo de 1998 a 2005. Ademais traballa desde 1989 como Asesora Lingüística da Televisión de Galicia.É membro fundadora da Asociación Galega de Onomástica (AGOn) e foi a súa presidenta dos anos 2002 a 2006.

Forma parte do Consello de Redacción da Biblioteca Galega de Onomástica.

É no terreo da Onomástica onde desenvolve o seu labor investigador e sobre este tema versan a maioría dos seus escritos, en concreto, sobre toponimia de Galicia. No ano 2000 publicou a obra ¿Por que se chama así este sitio? (O significado dos nosos nomes de lugar).

Pere Tobaruela. Autor de contos infantís. “A rebelión das rúas”. Mércores 27 de febreiro. Cursos 3º e 4º.

Pere é un neno que medrou e medrou, pero que aínda é un neno, non vos pensedes outra cousa. Hai moito tempo, Pere vivía na afastada Cataluña. E alí escribía e contaba contos aos nenos. Un día, Pere chegou a Galicia e decidiu seguir co seu labor: escribir e contar contos aos nenos.

Por iso está hoxe aquí, para paparvos a todos, ¡perdón!, quero dicir para falarvos a todos sobre o mundo dos contos.

Xosé Durán, licenciado en Química, xornalista e escritor, traballa na Televisión de Galicia desde hai case 23 anos.  Despois de traballar na redacción de informativos e deportes, onde foi Redactor-Xefe e Xefe de Deportes, dirixiu diversos documentais de carácter cultural. No departamento de Programas foi autor de guións que deron lugar a varios programas. Exerceu de director e presentador de Reporteiros, O Semanal, entrevistas, programas especiais e actualmente dirixe e presenta o programa de divulgación científica, Ciencianosa.
Como escritor, ademais da súa colaboración con diversas revistas culturais, Xosé Durán publicou:

O Asasino Invisible, un libro de dez relatos de ficción científica, editado por Galaxia.
Blanco torres. Xornalista e Poeta, unha biografía do autor galego ó que se lle dedicou o Día das letras Galegas do ano 1998, publicado por Galaxia.
A televisión, as novas tecnoloxías e a conduta dos nenos, un ensaio sobre o consumo de televisión por parte dos máis pequenos en Galicia, publicado por Laiovento.
A lección máis solidaria, un libro para ler e representar de teatro escolar, publicado por Edicións Fervenza.
No ano 2005 foi o primeiro autor galego en distribuir, a través de Internet, unha serie de audiolibros en galego. Estes audiolibros, gravados coa voz do autor, pódense descargar desde calquera parte do mundo ó disco duro dun ordenador, para escoitar despois en forma de CD ou en MP3. Entre os centos de descargas, hai varias dos Estados Unidos, Canadá, Australia e Gran Bretaña.

Paula Carballeira. Autora, poeta, contacontos... Mércores [16/04/08]. Cursos 1º e 2º .

Paula Carballeira (Fene, 1972) é licenciada en Filoloxía Hispánica; dedícase profesionalmente ao teatro e á narración oral. Participa en diversos programas da TVG e ten colaborado como locutora na Radio Galega. Como autora de literatura infantil publicou as seguintes obras: “A percura” (1990); “Robín e a boa xente” (1995); “Troulas, andainas, solpores e unha farsa anónima” (1996); “Olo-iepu-iepu” (1999); “Mateo” (1999); “Un porco e unha vaca xa fan zoolóxico” (Xerais 1999); “Paco” (2001); “Correo urxente” (2001); “O ganso pardo” (2002), “A era de Lázaro” (2004), “Smara” (2006) e “Boas noites” (Xerais 2007), Premio Manuel María de Literatura Dramática Infantil 2007. Ten publicado, ademais, o poemario “Contatrás” (2006).

Ana Guerra. Editora. “A fabulación”.“Obradoiro dun libro”. Mércores [28/05/08]. Curso  4º. 

Ana Guerra é nestes momentos a directora da Editorial Obradoiro, filial de Santillana, adicada en gran medida ao libro de texto.