SEMANA CULTURAL, 2016

O venres, 20 de maio celebramos un gran feirón enmarcado dentro da Semana Cultural para festexar as Nosas Letras. Levamos a cabo distintos obradoiros (chapas, marcadores, flores, xogos colaborativos e didácticos) e degustamos  batidos de froitas, churros con chocolate e torta de San Ramón. A ANPA tamén colaborou coa realización dun divertido e inxeñoso obradoiro de xoaniñas de mazá. Foi unha axetreada e doce mañá, na que toda a comunidade educativa gozamos deste gran día.

Para ver fotos visitade a entrada feita no blog da Biblioteca Avelaiona Luíña

http://bibliotecacespon.blogspot.com.es/2016/05/feiron-semana-cultural.html

SEMANA CULTURAL.....CHARLA: NOVAS TECNOLOXÍAS

Enmarcada dentro das actividades da Semana Cultural tivo lugar esta estupenda charla a cargo da Garda Civil sobre a seguridade na rede: facer un bo uso das novas tecnoloxías, adoptando unha serie de moi valiosas recomendacións. Visionado de vídeos de casos reais onde o alumnado se decataba dos perigos que pode levar o facer un mal uso de imaxes ou chats con persoas descoñecidas. Esta mesma charla tivo lugar na hora de titorías para as familias.

SEMANA CULTURAL: VISITAMOS RIANXO

     Dentro das actividades enmarcadas na Semana Cultural preparada polo Equipo de Dinamización da Lingua,  realizamos unha visita cultural a fermosa vila mariñeira de Rianxo. Todo o alumnado, distribuído por idades, levou a cabo as seguintes visitas: casa Manuel Antonio, Museo do Mar, roteiro de Castelao e Biblioteca Municipal. Para rematar,  na Rúa do Medio, diante do bar Feliciano cantamos a Rianxeira na súa versión orixinal, traída de Arxentina. En todo momento contamos cun equipo de guías que nos acompañaron e nos explicaron moitísimas curiosidades dos lugares visitados.

PARABÉNS E MOITÍSMAS GRAZAS AO CONCELLO DE RIANXO POR ENSINARNOS MOITAS COUSAS DESTA FERMOSÍSIMA VILA!

Aquí vos deixamos un petisco de fotos. Se queredes ver máis, vistade a páxina web do centro.

LISTAXE DEFINITIVO DE ADMITIDOS PARA O CURSO 2016/2017

Adxuntamos lista definitiva de admitidos para o vindeiro curso.

A dirección

Listaxes provisionais de admitidos/as para o curso 2016-17

Adxuntamos lista provisional de admitidos.

XA ESTÁN DE VOLTA: OS VERMES DE SEDA!!!!!!

E  a familia do CEIP Cespón medra. Como vén sendo costume, e ano tras ano, a nosa compañeira Ana xa ten todo disposto para que todas e todos nós poidamos ir observando as distintas fases da bolboreta de seda. Xa temos no colexio estes diminutos ovos, que Ana gardou do curso pasado nun sitio seco e escuro. Se vos apasiona este fermoso tema e as marabillosas imaxes deste proceso, atentas e atentos a esta páxina, porque seguiremos informando e ilustrando as distintas fases co paso dos días. Gracias, Ana, por esta didáctica e visual lección de naturais!

Por certo, onde están? No lugar habitual: corredor primeiro, nunha enorme caixa de cristal... Xa comezan a comer! Agora, que os brotes de moreira medren axiña porque estes diminutos seres vivos precisan alimentarse.

O ALUMNADO DE 1º REMÁNGASE: TOCA TRABALLAR DE XARDINEIROS/AS!

As nenas e nenos de primeiro plantaron cenorias. Antes realizaron un traballo de reciclaxe para confeccionar uns coloridos tarros, a partires de botellas de plástico. Logo, puxéronse en plena faena, gozando de todos os pasos para levar a cabo a plantación de cenorias. O traballo non rematou aquí: limparon ademais de malas herbas as súas plantas do curso pasado. E como podedes comprobar nas imaxes, o traballo quedou relamente espectacular. Esta actividade uniu o proxecto da biblioteca (a cociña) e o proxecto de voz natura (horto ecolóxico). ASÍ SE TRABALLA!

O ALUMNADO DE INFANTIL COA SÚA PLANTACIÓN

E os/as máis peques do cole tamén aportaron ao Proxecto Voz Natura e ao Proxecto da Biblioteca outra actividade máis nesta última semana. Podedes comprobar as estupendas patacas que xa teñen enormes. Veredes tamén, os diferentes pasos que realizaron, guiados das súas titoras, para plantar calas, petunias e liliums. Estes bulbos xa os plantaran o curso pasado, tendo unhas fermosísimas e coloridas plantas que decoraban o patio de infantil. Pois ben, estes bulbos ao final da tempada, foron desenterrados e gardados nun lugar seco. É agora, cando de novo repiten o proceso, á espera de ir observando as distintas fases de crecemento, ata que eses pequenos bulbos se transformen nunhas espectaculares e fermosas plantas que volvan a alegrarnos a vista, o olfacto... GRACIÑAS TRABALLADORES/AS!

O ALUMNADO DE 1º E 2º VISITA BOIRO


O alumnado de 1º e 2º visitou Boiro para completar a programación de aula sobre a contorna. As nenas e nenos percorreron as rúas peonís, o mercado, a piscina municipal,  a biblioteca municipal, o parque de A Cachada, as instalacións da Policía Local,...e a Casa do Concello onde foron recibidos polo Alcalde a a Concelleira de educación. TODA UNHA EXPERIENCIA!!!!!

 
 
 

PLANTACIÓN ÁRBORES AUTÓCTONAS

Para conmemorar o Día da Árbore que se celebrou o día 21 de marzo, o alumnado de 1º e 2º colaborou na plantación de árbores autóctonos: carballos e castiñeiros. Tivo lugar nun monte próximo a Galea. Primeiro,  os axentes forestais explicáronlles varias características desas especies: alimentación, crecemento...Logo, pasaron a plantar. Foi un traballo duro pero moi divertido!!!!!!!
Distribuir contido