Segundo trimestre

O alumnado de 3º  ESO realizou unha saída a Bastavales e Padrón o día 25 de abril para facer parte da ruta rosaliana e para encontrarse co alumnado do IES Cosme López Rodríguez co que mantivo unha relación por correspondencia durante todo o curso.

Chegaron a Bastavales xusto ás dez, cando comezaban a tocar as campás e, aínda que xa non son as mesmas que escoitara  Rosalía, o grupo recitou alí, no balcón da Mahía, o célebre poema da autora "Campanas de Bastavales". Logo de que Lara recordara ós seus compañeiros algunhas particularidades da igrexa e do conxunto arquitectónico que a rodea, o grupo dirixiuse á Casa Museo de Rosalía onde, por fin, se atopou co alumnado da Rúa de Valdeorras. Con el compartiu  unha visita guiada pola casa na que a poetisa pasou os seus últimos anos e tamén compartiu algúns momentos de conversa mentres se resgardaba da chuvia baixo o balcón. Cando escampou, os dous grupos dirixíronse ó Parque Botánico para participar noutra visita guiada que sería máis longa de non ser pola chuvia. 

Xa no centro monumental, na praza na que se atopaba antigamente o Alfolí do Sal, o alumnado dos dous centros recitou poemas de Rosalía. A continuación dirixiuse pola rúa de Juan Rodríguez del Padrón á Igrexa de Santiago para ver o "Pedrón", o Sar e as estatuas de Rosalía e Cela no Espolón. E alí, ó final do Espolón, chegou o momento da despedida, do intercambio de números de teléfono, de contas de Instagram e das propostas de continuar co intercambio o próximo curso.

Ver álbum de fotos.

Antes de poñernos coa lectura de Noite de temporal escoitamos dúas noticias que nos sorprenderon e que espertaron a nosa curiosidade. A primeira era que Josefa Parada, unha das heroínas de Sálvora, era bisavoa de Laura de 2º A; a segunda era que Paula Cons ía rodar unha película sobre o naufraxio do Santa Isabel. Moitos nunca oiramos falar deste suceso que na época foi coñecido como "o naufraxio do Titánic galego". O libro enganchounos pero aínda nos enganchou moito máis a exposición que Núñez Singala preparou para explicarnos os detalles técnicos de como se producira o accidente. A charla foi moi emotiva, especialmente cando nos contou algúns detalles biográficos sobre os superviventes, as vítimas, as heroínas e os heroes.

Ver álbum de fotos.

O martes 19 de febreiro na Biblioteca do noso Centro, o alumnado de 2º ESO asistimos á primeira sesión dos obradoiros didácticos ofrecidos pola Asociación Oral de Galiza. Canto rimos con Pinto de Herbón! Foi unha hora e media intensa pero moi produtiva. Despois dun divertido achegamento teórico-práctico ó que son as regueifas puxémonos mans á obra e compuxemos as nosas propias creacións con axilidade e moita habilidade. Desta sesión saíu unha selección de dezaseis rapaces e rapazas que participaron o 28 de febreiro na segunda quenda. Xa non se trataba só de escribilas, tamén había que cantalas. Ó principio custou un pouquiño pero unha vez vencida a timidez inicial todo foi sobre rodas.

 Podedes ver as imaxes nesta ligazón e no blog da biblioteca.