Enviado por admin o Sáb, 30/03/2024 - 22:44
Cada 8 de marzo celebramos o Día internacional da Muller. Este ano as celebracións mudáronse para o 11 de marzo xa que o propio 8 de marzo había folga estudantil convocada nesa data. Con todas as actividades programadas dende o grupo de igualdade preténdese reivindicar os dereitos de todas as mulleres, sensibilizar ao alumnado e persoal do centro ademais de potenciar a igualdade real entre homes e mulleres. Este ano, para celebrar o 8M leváronse a cabo as actividades mencionadas a continuación coa colaboración de diferentes departamentos:
• Creación do póster do 8M para este ano por un alumno de ciclo superior de 1º ASIR, que ademais presentamos a un concurso e estaba exposto tanto na entrada do IES, como no punto lila, como no salón de actos.
• Decoración da entrada do instituto e do patio cuberto con abanicos en cores moradas que colgaban do teito. Ademais este ano representouse a unha muller empregando un manequín e poñendo fotos de mulleres senlleiras. Para a creación da mesma contamos coa colaboración do departamento de inglés para a creación dos textos co seu alumnado de 4º ESO, texto que empregamos para facer a saia e coa colaboración do departamento de Imaxe Persoal, en concreto o ciclo medio de segundo de PCC que se encargou da coloración, do corte e do peiteado e ao ciclo medio de primeiro de EB que se encargou da maquillaxe e de facer as uñas con motivos do 8M para a ocasión.
• Decoración do Punto Lila con imaxes e información de mulleres senlleiras, especialmente das que dan nome ás nosas aulas. Coma sempre no punto lila contamos tamén con agasallos para o noso alumnado cedido polo concello, ministerio e outras institucións (folletos, pulseiras, chapas) e tamén contamos con libros da temática propia da data cedidos pola nosa biblioteca.
• Decoración do salón de actos con símbolos feministas e o póster deste ano.
• Actos conmemorativos aos que estaban convocados todos os cursos, tanto da mañá como da tarde. Creáronse diferentes versións para os diferentes grupos con diferentes visionados dependendo dos grupos. Ademais dúas alumnas voluntarias do grupo de igualdade (Camila de 2º BACH e Carmen de 1ºESO) crearon dous poemas moi emotivos que tamén puideron ler durante os actos. Os actos estiveron presentados por outras alumnas voluntarias do grupo de igualdade que fixeron un traballo estupendo nas distintas quendas. Pola mañá presentaron Sara, Águeda, Yasmín e Leyla de 4º ESO. Na quenda vespertina as presentadoras foron Cristina, Mónica e Raquel e contamos con Camila para ler o seu poema. Podedes ler o manifesto e todo o acto nos seguintes enlaces:
ACTO DA MAÑÁ DE CICLOS SUPERIORES
ACTO DA MAÑÁ DE CICLOS BÁSICOS, MEDIOS, ESO E BACHARELATO
• Nomeamento da sala do profesorado co nome de Emilia Pardo Bazán para seguir co nomeamento das aulas do centro cos nomes de mulleres senlleiras.
Dende o grupo de Igualdade e Diversidade do centro queremos agradecer a toda a comunidade educativa a súa colaboración e implicación nas diferentes actividades e actos.
