O conselleiro de Cultura e Educación reúnese cun grupo de docentes que realizarán estadías no Canadá para mellorar os seus coñecementos de linguas estranxeiras
Os profesores obtiveron unha licenza por estudos, no marco da convocatoria realizada pola Consellería, á que se dedicou preto de 1’5 millóns de euros
O conselleiro de Cultura, Educación e Ordenación Universitaria, Xesús Vázquez Abad, reuniuse esta mañá cun grupo de profesores e profesoras seleccionados para participar na actividade de integración en Canadá durante o mes de outubro froito do acordo bilateral co goberno de educación de Alberta e o departamento educativo en materia de linguas estranxeiras da Xunta de Galicia.
A actividade forma parte da convocatoria de licenzas por formación para o curso 2013-2014 destinadas a funcionarios docentes non universitarios e da Resolución da Dirección Xeral de Educación, Formación Profesional e Innovación Educativa pola que se realiza a oferta pública de formación permanente do profesorado en linguas estranxeiras no exterior.
Cómpre lembrar que, froito do compromiso da Consellería coa formación do profesorado como garantía para a mellora da calidade do ensino e da excelencia, este ano convocáronse ata 361 prazas para licenzas por estudos neste curso 2013-2014, dirixidas ao persoal docente de carreira, o que supuxo un investimento de arredor de 1,5 millóns de euros.
A estadía
O obxectivo deste programa é á integración plena do profesorado seleccionado na vida diaria do centro educativo adxudicado, nas diferentes clases e nas celebracións e festividades que realice dito centro. Os docentes proceden dos IES Xulián Magariños (Negreira), IES de Mugardos, CEIP O Couto (Ourense), CEIP de San Roque de Darbo (Cangas), CEIP Magaláns-Dorrón (Sanxenxo), CEIP da Carrasqueira (Vigo), IES A Guía (Vigo), IES Ramón Mª Aller Ulloa (Lalín), CEIP de Meaño-As Covas (Meaño), e CEIP Xulio Camba Pontevedra (Vilanova de Arousa).
A estadía en centros de educación primaria e de educación secundaria obrigatoria comezará o 7 de outubro e rematará o 2 de novembro. As cidades onde se levará esta actividade de integración son Calgary e Edmonton na rexión de Alberta en Canadá.
Os docentes seleccionados son 6 profesores e profesoras de educación primaria especialistas en lingua inglesa e non especialistas que contan coa acreditación do nivel B2 do MCERL así como 4 profesores e profesoras de ensino secundario que tamén contan coa correspondente acreditación.