Anxo Lorenzo animou os responsables dos Centros de Estudos Galegos de Brasil a continuar co labor de proxección do idioma
O secretario xeral de Política Lingüística gabou as iniciativas que se están a levar a cabo desde as universidades deste país nas que está presente a lingua galega
O secretario xeral de Política Lingüística, Anxo Lorenzo, animou os responsables das cátedras e centros de estudos galegos (CEG) de Brasil “a continuar co labor que veñen impulsando a prol da proxección exterior da lingua e da literatura galegas”. Fíxoo no marco do primeiro Encontro de Cátedras e Centros de Estudos do Brasil, que tivo lugar estes días na Universidade Federal Fluminense de Niterói.
Anxo Lorenzo tivo ocasión de coñecer da man dos directores das cátedras e dos CEG de Brasil as liñas de traballo que están a desenvolver as universidades do país nas que ten presenza a lingua galega. Entre as iniciativas levadas a cabo atópanse a realización de exposicións, a publicación de diversos materiais lingüísticos e literarios, a organización de conferencias e recitais de poesía, así como outras actividades para dar a coñecer o patrimonio material e inmaterial de Galicia.
Por outra banda, Anxo Lorenzo xa transmitira durante o encontro a intención da Secretaría Xeral de Política Lingüística de impulsar en 2011 unha nova estratexia de acción exterior desde os centros de estudos galegos. Neste sentido, unha das prioridades será a creación dun programa de acción cultural, que complemente a formación académica e a investigación nas universidades.
Actualmente, a Secretaría Xeral de Política Lingüística está a impulsar a proxección internacional do galego en Brasil a través da Universidade de São Paulo, da Universidade Federal de Bahia, da Universidade Federal Fluminense de Niterói e da Universidade do Estado do Rio de Janeiro. Co obxectivo principal de mellorar os mecanismos de coordinación da acción exterior nestas universidades e de valorar novas canles de difusión da lingua, da literatura e da cultura galegas en Brasil, a Secretaría Xeral de Política Lingüística promoveu o primeiro Encontro de Cátedras e Centros de Estudos deste país, no que tamén participou o Consello da Cultura Galega.