Este ano, dende a nosa escola, quixemos celebrar o Día do Libro dunha maneira especial, chea de creatividade e encontros enriquecedores. As iniciativas que levamos a cabo non só promoven o amor pola lectura e os libros, senón que tamén fomentan a colaboración e o intercambio de experiencias entre diferentes grupos da nosa comunidade educativa.

Unha das actividades destacadas foi o noso concurso de elaboración de marcapáxinas. Cada neno e nena deixou voar a súa imaxinación, creando marcapáxinas únicos e cheos de cor. Pero sen dúbida, o máis especial destes marcapáxinas é que contiñan un código QR que nos abría as portas a contacontos elaborados polos nosos propios alumnos e alumnas de 3º e 4º. Unha fermosa maneira de compartir historias!

Ademais, repartimos os nosos marcapáxinas polo concello, permitindo que calquera poida gozar destas creacións cheas de maxia!

Outra das actividades que nos encheu de ledicia foi “Lemos xuntos”. Aquí, todo o alumnado do centro tivo a oportunidade de mergullarse nunha experiencia de lectura compartida.

Os cativos de cole, recibiron unha visita moi especial do alumnado do instituto, os cales compartiron as súas lecturas favoritas, creando lazos entre diferentes niveles educativos.

Pola súa parte, os alumnos e alumnas do segundo ciclo xuntáronse cos usuarios da asociación AFAGA nunha marabillosa sesión de lectura, onde as idades se mesturaron e as historias os uniron.

E para pechar esta actividade, os nosos nenos e nenas do terceiro ciclo levaron a maxia dos contos ás escolas infantís da nosa zona, facendo representacións cheas de creatividade e emoción.

Estas actividades non só promoven o gusto pola lectura e a creatividade, senón que tamén nos recorda a importancia de compartir experiencias, de unirnos en torno ás historias e de enriquecernos mutuamente.

Grazas a todos os que participaron nestas marabillosas iniciativas e que viva a LECTURA!

Hoxe, o alumnado de 3º de EP tivo a oportunidade única de participar nun obradoiro de escritura de rap, impartido por Pedro Iglesias. Foi unha experiencia que non só lles permitiu explorar a súa creatividade, senón tamén aprender sobre a importancia e o poder da palabra.

Durante o obradoiro, os alumnos e alumnas foron guiados por Pedro para explorar diferentes temas e técnicas de escritura de rap. Con este obradoiro queremos animar aos nosos alumnos e alumnas a explorar diversas formas de expresión artística, e este obradoiro foi un exemplo perfecto. A través da música e a poesía, os estudantes puideron expresar as súas ideas, sentimentos e pensamentos. 

Agradecemos a Pedro por compartir o seu talento e inspiración con nós, e esperamos seguir ofrecendo experiencias enriquecedoras como esta no futuro.

Equipo de biblioteca.

Na nosa biblioteca escolar estamos entusiasmados con celebrar o Día do Cómic, este ano dunha maneira especial. Os nosos voluntarios e voluntarias prepararon unhas caixiñas cheas de emocionantes cómics para que todo o alumnado explore e descubra este xénero literario.

Os cómics non só son unha forma de divertimento e entretemento, senón que tamén axudan a desenvolver a comprensión lectora, estimulan a creatividade, a imaxinación….

Queremos inspirar aos nosos alumnos e alumnas a mergullarse no marabilloso universo da banda deseñada  e a gozar da maxia da lectura.

Non perdades a oportunidade de descubrir os tesouros que agardan nas nosas caixiñas de cómics!

Recordade que todos estes títulos e máis están na nosa biblioteca! Achegádevos a ler!

Para celebrar o Día de Rosalía de Castro, en colaboración co EDLG, creamos unha xornada chea de actividades que honran o profundo amor de Rosalía polas flores e como este amor se reflicte nos seus fermosos poemas.

Rosalía de Castro atopou na natureza unha fonte inesgotable de inspiración. Nos seus versos, as flores non son só simples elementos decorativos, senón símbolos cargados de significado, reflectindo emocións, estados de ánimo e a propia esencia da autora.

Por iso, para conmemorar unha data tan especial, levamos a cabo as seguintes actividades:

O Herbario de Rosalía: O noso mural "O Herbario de Rosalía" foi unha oda á conexión da poetisa coa natureza. Nel, recolléronse algunhas das plantas mencionadas nos seus poemas máis emblemáticos, creando un mural que ilustra a sensibilidade botánica de Rosalía.

O Xardín de Rosalía: Tivemos a honra e a sorte de contar coa presenza da autora mesma! Rosalía de Castro acompañounos na creación do "Xardín de Rosalía". Cada clase plantou a flor que lle correspondía, mentres recitaba pequenos versos dos poemas de Rosalía, enchendo o noso xardín coa maxia das súas palabras.

Queremos expresar a nosa máis profunda gratitude a todos os voluntarios e voluntarias que fixeron posible esta marabillosa xornada. Desde aqueles que contribuíron coa organización ata os que se uniron para plantar cada flor con coidado e dedicación, o seu compromiso fixo que este día sexa verdadeiramente inesquecíbel.

Hoxe, ao celebrar o legado de Rosalía de Castro, aprendemos non só sobre o seu profundo amor polas flores, senón tamén sobre a importancia de conectar coa natureza a través da poesía. Que este día nos inspire a seguir explorando o mundo que nos rodea con ollos poéticos e corazóns cheos de gratitude.

Grazas a todos por facer deste día un verdadeiro homenaxe á beleza e á poesía!

Así foi a súa visita:

Pica na imaxe e descobre más sobre Rosalía!