Coordinados polo profesor Manuel Igrexas, os alumnos de Bacharelato do IES Laxeiro Yolanda Gordedo, Marcos Vilas, Lucía Riádigos, Fátima Mosteiro e Roi Gallego, resultaron gañadores da primeira edición do Parlamento Xove, anteriormente denominado Liga de Debate, tras superar na final ao centro SEK Atlántico de Pontevedra.

Un premio que ven ser a culminación dunha traxectoria de dous anos na que o IES Laxeiro ten tido xa unha actuación destacada.

Dende a Dirección do Centro sentímonos orgullosos tanto do profesorado como do grupo de alumnos/as que amosaron as súas calidades nun proxecto que ten por finalidade potenciar o diálogo como ferramenta de intercambio de opinións entre a xuventude.

Centros de ensino de toda Galicia, formando equipos de seis alumnos/as e un profesor, competiron ao longo de varias semanas, investigando, escribindo e finalmente debatendo sobre as redes sociais. Tras unha fase inicial, oito equipos acadaron a final que se desenvolveu o pasado sábado, dia 24, na sede do Parlamento de Galicia, con eliminatorias de dous en dous centros.

Seis mil euros para unha fantástica viaxe e un "notebook" para cada un deles é o premio que gozarán, ben merecido, polo éxito acadado.

Un éxito máis do IES Laxeiro que ven a certificar a labor silenciosa, sacrificada e moitas veces pouco considerada que se leva a cabo nas aulas dos Centros Educativos.

En hora boa e a gozar do premio, de momento aínda non se coñece o lugar de destino elixido para a viaxe, pero estarán oportunamente informados a través desta páxina web.

O IES Laxeiro segue recollendo premios, que a fábrica non pare.