CORRELINGUA 2012

CORRELINGUA 2012. Chegou o día de movernos pola NOSA LINGUA. Este ano o lema é "GALEGO, TODO O QUE BUSCAS". Celebrouse no Pazo da Cultura de Narón. Alí estabamos ás dez da mañá os nenos e nenas de 2º e 3º ciclos. 
Despois de facer un pequeno percorrido polo frente do Pazo, participamos nalgúns xogos populares como a corda, o brilé, a mariola e outro de arrastre. 
A continuación entramos. A actriz Iria Sobrado fíxonos un xogo de palabras sobre o noso idioma e cantou unha canción que acompañamos con xestos. Despois o Grupo Pirilampo interpretou varias pezas que tamén acompañamos con palmas e outros movementos. O cantante do grupo explicounos o significado de “pirilampo”. É unha palabra portuguesa que significa vagalume. Pasámolo moi ben, pero chegamos ao colexio “mortos de fame” ás 13,15 horas. 

A través da Asociación de Ciclistas Profesionais contaremos cunha actividade de aproximación á bicicleta.

Hoxe os de segundo e terceiro ciclos aprendemos a coñecer mellor a bicicleta e a conducila con responsabilidade, grazas a Juan, que está na Asociación de Ciclistas Profesionais e sabe moito deste vehículo.
Primeiro estivemos na sala de audiovisuais. Alí explicounos as normas básicas que debemos ter en conta cando usamos a bicicleta: uso do casco, circular polo carril axeitado ou cara á dereita, repectar os sinais de tráfico, sinalizar as manobras co brazo esquerdo, etc.
Pero o que máis nos gustou foi facer a práctica no patio. Cada un, coa súa bicicleta e casco, fixemos diferentes percorridos con obstáculos... Tamén competimos cunha carreira moi especial, gaña o que menos avance.
Díxonos que no mes de Agosto vai pasar a volta ciclista a España por Ferrol e que, por este motivo, vaise organizar unha volta para nenos e nenas, na que podemos participar. Se queres máis información entra en www.lavueltajuniorcofidis.com

Pasámolo xenial.
¡ Juan, grazas e cando queiras volve!