APRENDIZAXE BASEADO EN PROXECTOS

O alumnado de 4º tivo a honra de entrevistarse de primeira man

co naturalista Rafael López Loureiro, máis coñecido como Calel.

Un naturalista que emana coidado, respecto e re/coñecemento

pola natureza. El é o autor das fotografías que leva o Álbum de Flora e

Fauna da nosa contorna. Esta rapazada tivo o pracer de saciar tódalas

curiosidades que tiñan de cada unha das fotografías, animais, plantas...

forma de traballo do naturalista...  Pero antes tiveron que pasar unha proba.

Estamos moi orgullosos da rapazada pois a superaron sen dificultade

e conseguiron saber todo o que era do seu interese.

Se queredes profundizar no estudo da natureza, Calel, ten un blog chamado

"Ao noroeste, do Noroeste", onde fai publicacións de gran interese naturalista.

Pequenas e pequenos naturalistas, vos tamén podedes ser como Rafael López Loureiro,

só hai que desexalo, esforzarse, estudar e seguir amando e coidando de tódolos seres vivos.

Este álbum é un enredo, para seguir aprendendo. Aquí temos as nenas e nenos de 1ºA.

 Agradecer a colaboración do Concello de Cedeira e das persoas que fixeron posible este soño!

O alumnado de 1º planta na horta acelgas, espinacas

e leitugas brancas e moradas. Teñen de axudante a un dos mellores,

Chema de Couzadoiro, que lles explica como manter sá a coilleita

e a eliminar os caracois da horta, sen matalos, por suposto.

Pode parecer curioso vivindo nunha vila, pero moita desta

rapazada xamais tocou un pitiño e incluso algúns só os viron

en fotos e os ovos chegan ás súas casas xa envasados.

Por iso, a avoa de David, Pura, acompañada da súa neta Sheila

trouxo á biblioteca pitiños de paspallás e de pita. Para ofrecer a

oportunidade de tocar, escoitar, observar de pretiño estas aves.

Despois de saciar a primeira curiosidade veu unha fermosa rolda

de preguntas, das que a avoa Pura resolveu tódalas incognitas.

Gracias familias por vir e achegar á escola a vida!

O Green Club (un club para a defensa e proteción da natureza)

sae buscar un novo fogar para os caracois. Gústalles moito a nosa horta,

pero alí comen todos os nosos cultivos. Nos tarais da praia teñen moitas

plantiñas que de seguro lles gustarán.

Aproveitan para observar cunchas e recoller lixo.

O alumnado de 3º recibe o álbum de cromos,

despois de realizar unha actividade do proxecto.

Así de ilusionados os vemos!

Agradecer a colaboración de Rafael López Loureiro,

o Concello de Cedeira e de todos e cada un dos axentes sociais implicados.

Un soño cumprido! O proxecto documental sobre a flora e fauna

da nosa contorna merecía un produto final divertido, pero á

mesma vez rigoroso. Contamos coa colaboración de Rafael López Loureiro,

naturalista e mestre xubilado da nosa escola, que aportou as fotografías e

documentación sempre que o necesitamos. O Concello de Cedeira subvencionou

as impresións do álbum. A equipa da biblioteca "Carlos Labraña" xunto con

Carmen Lorenzo, parouse na escolla das especies, nos textos... E Akelarre

deulle forma e deseño baixo as pautas acordadas. Un traballo intenso e inmenso,

froito da colaboración de varios axentes sociais, para obter ilusión por aprender.

Esta é unha das reaccións dunha aula ao atoparse con inmellorable sorpresa.

Durante estes días iredes vendo moitas máis.

Agradecer a colaboración de todos e cada un dos participantes.

Esta rapazada leva un curso somerxido no estudo da fauna e da flora.

Coñece, sabe describir e identificar a meirande parte das especies que saen no álbum.

Rematado o proxecto levará este álbum para compartir coa súa familia

e transmitir, compartir o aprendido. Poderá espallar cultura naturalista!!

Unha actividade de observación da paisaxe realizada polo alumnado de 1º.

A ver tamén se aprende, este é un ollar detido, mirar, reparar no que ves, achar,

ver cambios dun día ao seguinte, pois a natureza cambia, hai acción humana...

Por exemplo, un dos días apareceu un tractor a tocar na area, ao seguinte o

alumnado reparou nos cambios. As árbores dos tarais están nese cambio

primaveral, herbas e flores comezando a medrar...

O andar rápido, a rutina crea grandes problemas de observación,

hoxe máis ca nunca temos que ensinar a ver.

Estes pequenos e pequenas naturalistas están aprendendo a observar.

A través da Asociación Arce, recibimos a visita de Victorina Rey Quintiana,

Mari Carmen Rodríguez Tizón e María José Leira Ambrós biólogas coas que contactou

Camilo. Elas aportaron unha inmensa documentación ao proxecto, sobre a

flora e a fauna da nosa contorna, no que estamos inmersos.

Biólogas, alumnado e mestras conversaron sobre: cadeas tróficas, o paseo do Condomiñas,

o bosque de galería, a flora autóctona, as invasoras...

Adobiaron a conversa cunha presentación e un vídeo que quedou

para uso do alumnado e que consideramos de gran valor documental.

Agora con esa documentación e o tríptico realizado por elas e enviado polo

Concello de Cedeira, poderán realizar un percorrido para atopar as especies estudadas.

Agradecer a todos os implicados a súa colaboración!

Iniciamos Abril coa II Ruta Interxeneracional,

enmarcada no proxecto "Aprendendo, naturalmente!".

Convocamos a toda a comunidade educativa e calquera

outra persoa que desexou unirse. O tempo estaba algo nuboso

e caían unhas pequenas gotas de choiva. Pero tíñamos diante a

dous naturalistas, unhas eminencias, Antonio Martínez Pernas

e Rafael López Loureiro, votamos comezar a andaina,

non se podía desaproveitar a ocasión. Incluso comentouse que con

ese tempo, veríamos cousas que igual non se ollan nun día de sol.

Eles fixeran esa ruta unha semana antes e dixeran

que aínda reinaba a invernía na Fraga dos Casás.

Con paraugas e chuvasqueiros adentrámonos por unha senda de eucaliptos,

pasamos un pinar, para descobrer despois dun pedazo o que detrás se agochaba,

unha fermosa Fraga, que en tan só unha semana comezou a florecer.

Observamos a mapoula das fragas, Anemone,  súa saída indica o inicio da primavera.

Ollamos espárragos, castiñeiros... unha fraga limpa e verde.

Conversamos do uso que tivo noutros tempos, dos carboeiros

que recollían a madeira e a enterraban para queimar e converter en carbón natural,

a fraga non estaba soa naqueles tempos, senón que a xente realizaba moitas labores nela.

Hoxe eses coidados teñen que basearse en non intervir nela,

non levar nin traer especies, usar as sendas, mirar onde pisamos e ollar con atención.

Facer que permanezan. Esta é unha pequena mostra da Ruta da Fraga dos Casás.

Antonio Martínez Pernas identificou correctamente unha orquidea galega:

Ophrys kallaikia que era confundida por outra.

Podedes consultar o estudo con profundidade, clicando no nome científico.

Foi unha oportunidade marabillosa para conversar e resolver dúbidas,

in situ, con dous naturalistas estupendos!

Moitas gracias por espallar a vosa sabiduría!

O alumnado de  sexto está deseñando, coa aplicación Canva,

un caderno de campo para empregar nas saídas, para investigar a flora

ou fauna  da contorna. En parella ou en pequenos grupos no ordenador

están deseñando normas, plantillas de observación e o que a rapazada

considera máis relevante. Un mini proxecto no que se ven implicadas

a meirande parte das competencias básicas.

A rapazada de primeiro fai uns sementeiros para a horta.

Nestes días observarán o crecemento da semente e as súas

fases ata converterse nunha plantula que xa poidan transplantar.

Dentro do proxecto documental o alumnado de 4 anos realizou un obradoiro

sobre paleontoloxía, tallaron pegadas e ósos con pasta branca, as mestras

crearon un mundo que semellara o espazo de traballo dun ou dunha paleontóloga

e por suposto, eles se fixeron cos materiais axeitados para ser, pois así aprendemos.

Atoparon as pezas e as identificaron.

Un traballo de creación, recreación e observación calmada que enriquece á rapazada!

O alumnado de 4º de primaria leva investigando nos fondos da biblioteca

e recollendo información oral das familias e xentes do pobo para elaborar

un caderno sobre os animais da nosa contorna.

Aquí podemos velos realizando a montaxe.

A mestra tivo a sorte de ver un niño con ovos de Píllara,

que fotografiou e levou á escola para compartir e concienciar ao alumnado

da necesidade de protexer esta especie, en perigo de extinción, que xusto

agora está na posta. Hai que ter moito coidado que os cans non se acheguen,

pois van ulir os ovos e incluso poden comelos. Como bos naturalistas, 

esta rapazada concienciada difundirá a mensaxe.

Chema de Couzadoiro explícalle ao alumnado de 5º a variedade inmensa

de flora que podemos ter na horta, como combinar a súa plantación,

cal é a estación recomendable. Pero non só queda na teoría, senón que

enchen o bancal de produtos deste tempo. Agora toca coidalos, hai que regar

e manter á fauna afastada, pero de xeito natural!

Chema tamén é o home do tempo

da comarca, podedes seguilo no Facebook co nome de Meteo Ortegal.

Esta actividade está enmarcada no proxecto "Aprendendo, naturalmente!"

Convidamos a toda a veciñanza e á comunidade educativa á II Ruta Interxeneracional

(calquera persoa de calquera idade) pola Fraga dos Casás.

Nela, Toñito do Barqueiro - Antonio Martínez Pernas, ofertará

unha documentación sobre especies da nosa contorna.

Recoméndase traer cámara fotográfica e prismáticos

(en caso de ter) e a rapazada un caderno de campo.

Podedes visitar o seu blog: Cousas do Norte

Nesta ocasión o lugar de encontro será a Pizzeria "O Tropezón",

pero logo iremos un pedaciño en coche ata preto da Fraga,

onde aparcaremos e xa visitaremos andando.

Este roteiro pertence ao proxecto "Aprendendo, naturalmente!",

esta é unha das actividades voluntarias fóra do horario escolar.

Chema de Couzadoiro volve visitar ao alumnado de 5º de primaria,

para observar o crecemento das sementes, asesoralos sobre os productos

da horta e facer un obradoiro práctico. Chema tamén é o home do tempo

da comarca, podedes seguilo no Facebook co nome de Meteo Ortegal.

Esta actividade está enmarcada no proxecto "Aprendendo, naturalmente!"

As familias realizan un obradoiro de fósiles de dinosaurios co alumnado de 4 anos.

Esta actividade está enmarcada no proxecto "Aprendendo, naturalmente!"

Para quen lle apeteza profundizar temos, entre outros, un libro de realidade

aumentada na biblioteca "Carlos Labraña", IDINOSAURIO.

Ven buscalo!

Este 4 de febreiro, convocada a comunidade educativa e a veciñanza,

tivemos o pracer de aprender paseando e escoitando nun entorno fermoso,

o da praia da Madalena e cun día que nos ofreceu a súa mellor luz.

Rafael López Loureiro e Álvaro Pérez Pérez amosáronnos moito máis do que contábamos ver.

Non era que esas plantas, aves, cunchas ou pisadas non estivesen antes,

é que moitas veces a nosa actitude non nos permite ollar como

se merece o mundo natural que nos arrodea.

Durante o percorrido, Álvaro e Calel foron sementando a ansia por facer medrar

o noso espírito naturalista e medio ambiental. Unha abundante rapazada cos seus

cadernos de campo (ferramenta básica) recolleu nomes científicos

e datos que ilustrou con debuxiños. Un orgullo de pequenas e pequenos naturalistas! 

Observamos e fotografamos plantas invasoras, falamos do vendabal e do noroeste, da paisaxe dunar,

dos loureiros, ollamos as dúas primeiras flores do inverno, saudounos unha garza, un bilurico bailón

aledounos co seu incesante movemento e vimos o susto dunha águia peixeira

ás  gaivotas que descansaban na ría. Puidemos admirar o eider común  que dende

hai cinco anos vén pasar o inverno a Cedeira, unha das marabillas da ría e ollamos

felgos que levan sobrevivindo 33 millóns de anos…falamos da Macaronesia.

De certo aprendemos!

Pero os nosos expertos incidiron en que o máis importante é o respecto e o coidado. 

Nun espazo no que convivimos todos habemos permitir que cada un teña o seu lugar

e o seu dereito a vivir, ollando e respectando sempre, sen coller as floriñas que teñen o seu

dereito a vivir ou sen espantar aos animais que descansan na nosa ría durante as súas longas viaxes.

Rafael Lòpez Loureiro, dende o seu blogue “Ao noroeste do noroeste” ten aberta a proposta de adicar

o día 9 de marzo (data do natalicio do Padre Martín Sarmiento) ao naturalismo galego,

proposta á que nos  adherimos nós tamén e que habemos celebrar como se merece:

APRENDENDO, NATURALMENTE!

A nosa escola atópase mergullada nunha contorna natural chea de cousiñas por descubrir.

Son moitas as especies de animais e plantas que podemos ver nun simple paseo e que

ás veces non somos quen de ollar ou de percibir sexa por descoñecemento,

por non darlle importancia ao ser cousa habitual ou polo simple ir e vir da vida de

hoxe que cada día se fai máis rápida e non nos deixa pararnos a pensar, observar ou apampar.

Temos multitude de fauna miúda, paxariños que cantan ao noso paso, flores únicas, unha reserva

mariña ou simples felgos, que por non ser tan simples sobreviven dende a Era Terciaria.

 Co obxectivo de reconectar e de tecer redes interxeracionais queremos fomentar o encontro e o

intercambio de coñecementos e valores cun proxecto de traballo que vén da man da nosa biblioteca.

Trataremos de tomar tempo e observar a natureza: ulila, escoitala, explorala, prestarlle

atención e descubrir un mundo cheo de vida.

https://www.facebook.com/bibliotecacarloslabranha/
@beCarlosLabrana
biblio.nicolas.del.rio@gmail.com