"Modo galego, actívao!" no CEIP Os Casais (Fene)
Día 0 - En que consiste o programa de compromiso lingüístico?
O proxecto Modo galego, actívao! contemplou dende o principio facer unha experiencia de
inmersión ao estilo dos 21 días co galego e +. A Real Academia Galega, o Concello de Ames e os
centros educativos de educación infantil e primaria decidiron facer colaborativamente unha versión
adaptada.
O elemento central da experiencia consiste en establecer o compromiso entre o alumnado, o
profesorado, o monitorado dos servizos complementarios e outros traballadores e traballadoras
dos centros educativos de empregar o galego durante tres semanas.
Como no programa de referencia, a experiencia artellarase mediante un blog que orientará
diariamente o seu funcionamento. Cada entrada tratará dun asunto particular e poderá incluír
distintos materiais e propostas. As e os titores, participando, adquiren o compromiso de revisar o
blog todos os días co alumnado.
Funcionamento xeral do programa:
Na Educación Primaria:
• O alumnado adquirirá o compromiso de empregar o galego durante todo o día, asinando
un Acordo de compromiso lingüístico. O titor ou titora exercerá de “representante” da Real
Academia Galega, ofrecéndolles un premio da súa elección de cumpriren o acordo.
Ademais, cada neno ou nena terá unha folla titulada E hoxe, activaches o modo galego?
no que ao final de cada xornada deberán valorar o seu grao de cumprimento do acordo.
• Os venres publicarase no blog un documento cunha proposta de actividades para a
semana seguinte. Cada titor ou titora escollerá aquela que considere máis interesante ou
factible na súa aula para desenvolvela durante eses días.
• Na entrada deste día, proporase un tema para que o alumnado grave en audio unha breve
reflexión persoal durante a fin de semana. Nos primeiros días da semana seguinte, estas
serán recollidas polo profesorado. Con estes testemuños prepararase un programa para a
Radio de Fene.
Na Educación Infantil:
• Baseándonos nas propostas achegadas polas escolas, o programa nestas idades
centrarase no traballo da oralidade e o léxico de maneira adaptada. Cada día da semana
proporcionarase no blog un campo semántico para escoller coas nenas e nenos “a palabra
do día”. Unha vez escollida, as titoras ou titores decidirán a maneira máis axeitada de
traballala
• Ademais, todos os días haberá no blog algunha pequena actividade a maiores: responder
unha adiviña, ver un vídeo, escoitar unha canción...
• En calquera caso, isto non quita que se poida tamén facer adaptacións das
actividades formuladas para a Educación Primaria se así se desexa. Aquí podedes
atopar unha versión modificada do documento E hoxe, activaches o modo galego?
para imprimir en A4 se credes que é interesante para o voso alumnado.
Que supón a participación para as titoras e titores?
Na Educación Primaria comprométense a:
1. Empregar o galego en todas as comunicacións, co alumnado e entre eles.
2. Visitar cada día o blog e ler co alumnado a entrada correspondente (15-20 minutos).
3. Escoller e desenvolver polo menos unha das actividades da proposta semanal.
4. Completar o Acordo de compromiso lingüístico, establecendo un incentivo que considere
axeitado ao seu alumnado e posibilidades.
5. Deixar 5 minutos ao final do día para que o alumnado complete a folla E hoxe, activaches
o Modo galego?, así como recollelas todas ao final da experiencia.
6. Recoller as gravacións da reflexión semanal do alumnado, seleccionar unha e remitila á
radio de Fene antes dos xoves.
Na Educación Infantil comprométense a:
1. Empregar o galego en todas as comunicacións, co alumnado e entre eles.
2. Traballar unha palabra do día dentro do campo semántico proposto no blog.
3. Visitar cada día o blog co alumnado e facer a actividade proposta.
Proposta de cronograma:
Do 25 de abril ao 17 de maio.
Convite a Paula Carballeira como madriña para esta primeira edición
Máis información:
http://modogalego.academia.gal/