A asociación de nais e pais (Anpa) do CEIP de Roxos é unha asociación sen ánimo de lucro que ten como fins fundamentais a defensa do dereito dos nenos e nenas a unha educación integral, o impulso á participación das familias na educación do seus fillos e fillas e a realización de actividades educativas, deportivas e culturais que contribuan á formación dos pequenos/as.
Esta asociación entende o seu labor desde a cooperación e o traballo colectivo co centro educativo e co resto da comunidade na que se integra. Pretende servir de canle para facer chegar á dirección do centro e á administración as posibles suxestións das familias, demandando a administración as melloras que se consideran necesarias en canto a dotación de recursos humanos, adecuación e ampliación das instalación, provisión de medios e materiais, formación, etc. A defensa dun ensino público galego, inclusivo e de calidade é o noso piar.
A Anpa do CEIP de Roxos, por acordo da súa asamblea, está integrada na Federación de Anpas Compostela, que reúne a máis de 40 anpas de centros públicos de educación infantil, primaria e secundaria da comarca. A través dela comparte e defende intereses e proxectos comúns que levan a promover:
- Actividades formativas para as familias.
- Actividades de conciliación en periodos vacacionais
- Seguimento do servizo matinal e de comedor, de xestión municipal no CEIP de Roxos e noutros nove centros do concello.
- Accións para a promoción dunha educación inclusiva e en igualdade
- Seguimento do estado dos edificios escolares
Ademáis a Anpa do CEIP de Roxos entanto a administración non o faga, planifica e xestiona no periodo escolar as actividades extraescolares, dirixidas ao alumnado do centro. Son actividades fundamentalmente de carácter deportivo e cultural, dirixidas non só a facilitar a conciliación, senón e ao tempo a despertar o interese por certas áreas, promover a igualdade entre xéneros, o desenvolvemento de hábitos saudables, a deportividade e o compañerismo.
A asociación tamén promove a relación entre comunidade escolar e o centro colaborando na organización de actividades lúdicas en distintos momentos do ano dirixidas ao alumnado pero en moitas ocasións tamén ás familias. Algunhas datas habituais para estas actividades son o Entroido, o Nadal, ou fin de curso.
Todas as familias de nenos e nenas do centro poden ser membros da asociación, formalizando a súa inscrición a comenzos de curso ou no momento en que o desexen ao longo do ano.
Para contactar coa anpa: anpa.roxos@hotmail.com
Tamén podes seguirnos en Facebook: anpa do ceip de roxos
A directiva actual da asociación está formada por:
Presidenta: Esther Martinez Piñeiro
Vicepresidenta: Ana Rodriguez Rodriguez
Secretaria: Trinidad de Miguel Bouzas
Tesoureiro: José Dominguez Otero
Vogais: María Jesús Luces, Sonia Luces, Natalia Outeiro, Alicia Quintáns, Immaculada Rúa
