A visita a esta actividade, desenvolta na Casa da Cultura de Becerreá,  foi organizada dende as titorías destes cursos e o Departamento de Orientación do centro, en colaboración con Servizos Sociais do Concello de Becerreá. O documental está protagonizado por veciñas do concello de diferentes xeracións que contan a súa historia persoal sobre a conciliación da súa vida persoal coa laboral: facerse cargo do coidado de fillas/os e maiores, afrontar á vez traballos en diferentes sectores como a gandería ou a hostelería, e sen esquecer a xestión e organización da casa. O documental pon de manifesto os cambios sociais acontecidos nos últimos anos, ao tempo que resalta a necesidade de desenvolver avances aínda pendentes cara a unha igualdade real no referenta ás responsabilidades cotiás e a conciliación.  Con anterioridade á asistencia ao documental, o alumnado coñeceu o concepto de "conciliación" e algunhas alumnas prepararon preguntas e comentarios sobre o tema para participar activamente nun foro-conversa coas mulleres participantes e as traballadoras sociais do concello despois do visionado. Sen dúbida unha experiencia formativa para  todos e todas, baseada na realidade da nosa contorna.

Como vén sendo habitual, o departamento de Física e Química organizou unha nova visita a esta empresa lucense (www.ams-lab.com), laboratorios punteiros que se atopa no Polígono do Cea (Lugo) e que representa unha firma punteira dentro das análises física, química e biolóxica para unha ampla variedade de sectores industriais e comercias (moda, alimentación, industria farmacéutica, ...), con clientes de renome como Inditex, Loewe, Carolina Herrera ...

AQUÍ podes ver algunhas fotos, tanto do grupo ao completo como dun dos grupos nos que se dividiu ao total de asistentes para facer a visita máis didáctica e práctica nos distintos laboratorios da instalación. E, coma sempre, reiteramos o noso agradecemento ao persoal do laboratorio pola cálida acollida, polo esforzo informativo e a disposición en atendernos.

Este ano foi parte do alumnado de 3º e 4º da ESO o que participou neste evento ao que tradicionalmente acode o IES de Becerreá. Como os non participantes tiñamos vetada a entrada á zona de competición, non puidemos recoller fotos dos nosos alumnos e alumnas durante a proba, pero AQUÍ quedan alguhas fotos de grupo para a posteridade. E aínda que o máis importante de todo é a vivencia da experiencia en si mesma, AQUÍ podes consultar o nome dos/as participantes do noso centro e o tempo invertido en completar o circuíto. Parabéns a todos/as pola actitude coa que afrontaron e desenvolveron esta actividade.

PREME AQUÍ para informarte sobre o traballo de investigación desenvolto polo profesor de Xeografía e Historia do IES de Becerreá, Ignacio Cabarcos Fernández, sobre este desaparecido mosteiro cervantego medieval, que ofrece información inédita sobre o cenobio, destacando tamén a influencia da Vía Romana XIX na súa aparición e desenvolvemento.

PREME AQUÍ para coñecer a iniciativa desenvolta e coordinada desde a Biblioteca do IES de Becerreá para conmemorar, o 21 de marzo, o "Día Internacional da Poesía".

Os catro exalumnos/as do noso  centro que se poden ver na foto participaron o sábado 18 de marzo na fase clasificatoria deste torneo de debate (https://xuventude.xunta.es/parlamento-xove), dentro da modalidade que acolle ao alumnado universitario. Repártense en dous equipos distintos. Así, Lucía García, Marcela Miñambres e Alba Busto forman parte do mesmo equipo, que comparten con outro antigo participante neste torneo como estudante de Secundaria e Bac doutro centro lucense. Pola súa parte, Xoel forma parte dun equipo ao que se suman outras tres compañeiras súas da Facultade de Xornalismo. Este último equipo acadou o primeiro lugar nesta fase clasificatoria, na que se seleccionan os equipos que acudirán á fase final (a desenvolver no Parlamento de Galicia). Pola súa parte, o equipo das tres exalumnas acadou o terceiro posto, polo que teremos oportunidade de ver aos catro na fase final de Santiago.

Nos meses de xaneiro, febreiro e marzo desenvolveuse este curso de formación no que participaron voluntariamente 10 alumnas e alumnos do noso centro, que agora pasarán a engrosar o grupo de mediación en conflitos escolares do instituto, sumándose aos tres mediadores e mediadoras que aínda permanecen en activo desde a renovación anterior. Estas novas incorporacións garanten o funcionamento deste grupo durante os próximos cursos, o que resulta fundamental para manter un ambiente de convivencia que nos permita a todos e todas desenvolvernos satisfactoriamente no centro. Aínda que na foto hai dúas ausencias, aquí podedes ver ao grupo coa súa formadora, Berta, quen xa tiña colaborado con nós na formación do primeiro grupo de mediadores/as, no ano 2015. O noso agradecemento a Jimena, Iván, Cristina, Laura Núñez, Laura Montaña, David Montaña, Robert, Mito, David Alonso e Álex, polo traballo desenvolto nestas 6 sesións de formación e pola vontade amosada de axudar desinteresadamente aos compañeiros e compañeiras do centro cando sexa preciso ese apoio.

Parte do alumnado desta materia de 2º de Bac visitou o luns 13 de marzo a Abadía de Samos, acompañados por Margarita, a súa profesora, e Melissa, a auxiliar de conversa destinada no centro este curso. E unha vez en Monforte de Lemos, acudiron ao Mosteiro das Clarisas, Escolapios, á Torre do Homenaxe do castelo (actual Parador) e ao Barrio da Xudería, así como ao Museo de Interpretación do Viño da Ribeira Sacra. AQUÍ podes ver imaxes desta actividade.

Como podes ver na imaxe, o equipo do IES de Becerreá acadou o primeiro posto na fase clasificatoria do Parlamento Xove 2023 na categoría da ESO, despois de vencer nos tres debates realizados. Nesta primeira fase participaron un total de 24 equipos e 96 alumnas e alumnos. No primeiro encontro debatiron contra o equipo do "Colexio Internacional SEK-Atlántico". No segundo impuxéronse ao "Colexio San José", tamén lucense. No último, tiveron como contrincantes aos rapaces e rapazas do "Colexio Plurilingüe Santa María". Os máis sinceiros parabéns para Laura Montaña, Laura Núñez, David, Samuel e Xulio, que terán que acudir agora á fase final do torneo que, coma sempre, se desenvolverá no Parlamento de Galicia en Compostela.