Skip to Content

Novas

RECOÑECEMENTOS AO ALUMNADO DO IES PLURILINGÜE ELVIÑA

HOMENAXE A JORGE E PAULA

   Aínda que, por moitas razóns, todo o alumnado do IES Elviña ben merecería galardón de cotío sexa pola súa calidade humana ou pola académica, tamén sucede, de cando en vez, que caia en alumnado do noso centro esa sorte de recoñecemento singular que, saído da esfera do esforzo persoal, premia o xenio, os talentos particulares dalgún dos nosos rapaces e rapazas.

Imaxe

Jorge01Jorge 02Jorge 03


     Hai dúas semanas, asistimos a unha desas venturosas ocasións, recoñecemento no eido das belas letras, cando o alumno de 2º de Bacharelato do noso centro Jorge Unzaga recibiu o I Premio de Poesía no Certame Rita Suárez Amado, convocado polo IES Plurilingüe Eusebio da Guarda.
     Ben é certo que para Jorge era esta a segunda vez que recibía un galardón polo seu talento coa expresión máis verdadeira das palabras: hai dous anos recibira xa un accésit polas súas composicións nesta mesma prestixiosa competición coruñesa. O paso do tempo colocouno desta vez no máis alto, amosando o xeito en que a experiencia e o coñecemento de un mesmo aprofondizan e decantan no poeta a exacta natureza do seu arte. 
Así o sinalaron os membros do xurado, que subliñaron a extraordinaria matureza e o talento único do noso xoven autor, que fan sospeitar un futuro destacado no eido das letras, se non decae o seu compromiso con elas.

    Alumno discreto e comedido, benquerido de toda a comunidade do IES, Jorge ben merecía polo seu labor e pola súa persoalidade este premio, que non será, a bo seguro, o último.

Noraboa, poeta!

*     *     *

 

Paula01Paula02
Fotografías tomadas do instagram do Club Ximnasia Tempo

   Pasamos agora desde o mundo das letras ao eido da formación física, pois falamos dunha alumna que foi noticia entre nós por converterse hai uns días en ximnasta profesional, máis que meritoria culminación -polo momento- do seu constante traballo por despuntar no difícil mundo da competición deportiva de alto nivel.

   Trátase de Paula López Villar, intrépida estudante de 2º de Bacharelato, que a maiores dos esforzos por resolver integrais e por desentrañar os misterios arcanos da bioquímica, é tamén experta nas non menos complexas artes da barra de equilibrios, das asimétricas, dos flip-flaps e dos mortais adiante e atrás...
    Que a súa condición e os seus talentos a leven lonxe neste competitivo mundo.
Desde o IES, ficamos atentos a atopar o seu nome nas competicións...

 

Recorte de prensa
Recorte do diario La Opinión e enlace coa noticia

BOAS NOVAS PARA O ALUMNADO DO IESP ELVIÑA

O Delegado Territorial da Xunta de Galicia na Coruña, D. Gonzalo Trenor, visitou hoxe o IES Plurilingüe Elviña para compartir coa comunidade educativa a próxima dotación dunha pista polideportiva cuberta no espacio do patio.

As novas instalacións contribuirán moi positivamente á actividade do centro desde o vindeiro curso, poñendo en valor todo o potencial do maior espazo do centro, e arranxando as áreas desgastadas polo paso do tempo. O alumnado desfrutará de mellores medios para a práctica deportiva e outras actividades de exterior e de vida saudable, e de áreas de acollemento máis seguras e confortables en todas condicións meteorolóxicas durante o lecer.

A iniciativa enmárcase dentro das actuacións contempladas no Plan de Nova Arquitectura Pedagóxica, e conta co apoio do Fondo Europeo de Desenvolvemento Rexional, no programa operativo FEDER Galicia 2014–2020. Engádese a outras iniciativas en curso da Xefatura Territorial da Coruña contribuintes á modernización das instalacións do centro.

Podese ler máis información nas canles oficiais de comunicación e nos medios de prensa que se fixeron eco no mesmo día, como a La Voz de Galicia, El Ideal Gallego e Cadena Cope.

Patio IESP Elviña

GRADUACIÓN. Promoción 2020-22

A PROMOCIÓN 2020-22 GRADÚASE
ACTO DE DESPEDIDA NO CENTRO ÁGORA

E agora, viaxeiro,
navega lonxe, busca, atopa... (W.W.)

081012
141618


   
Despois de dous anos limitados pola pandemia (que malhaxa!), o alumnado de 2º de Bacharelato do noso centro pode voltar á celebración por todo o alto do seu egreso. Motivo de felicidade sempre, todas as persoas que compoñen o IES Plurilingüe Elviña poñen o mellor de seu nesta feliz despedida que ten o seu aquel de maina morriña polo alumnado que, tras longos anos de afondamento nos saberes humanos, rompe a codia xa para emprender voos máis audaces nos estudos e na vida. Como é lei estudiantil, hai que miralo co seu aquel de alegre malenconía, mistura entre a tristura da despedida (pois profes e alumnos fomos familia por un tempo) e a ledicia polos deberes cumpridos.

Orla20-22

 

     Esta promoción, de rapaces e rapazas de xeneroso e nobre espírito, despediuse no centro Ágora en compaña de familiares, amigos e docentes (que tamén o son). Coa contribución do ben coñecido xornalista Pablo Portabales, quen aceptou adicarlles unhas verbas de alento para o futuro, o noso alumnado fecha o seu segundo curso de bacharelato (sempre o máis difícil) con honores.

   Compartimos con vós o contento, e tamén, cómpre dicilo, as inquedanzas e esperanzas cara ao porvir. Pero tede confianza. O mesmo esforzo que vos trouxo aquí, levaravos onde desexedes, e todo irá ben. Para nós, formades parte do mellor que pode recibir a sociedade da xuventude e do ensino: sodes e seredes sempre parte deste centro, este IES Elviña, que vos acolleu con cariño e que vos despide hoxe con orgulloVale!

*     *     *

LV Reseña
La Voz de Galicia
publicou hoxe na súa versión dixital unha entradiña
coa
información sobre a graduación do IES Elviña.
Deixamos o enlace de consulta clicando na imaxe.

 

PREMIO PARA UN PROXECTO E-TWINING DO CENTRO

Selo de calidade eTwinning
para Pablo Cobas


2

    Que ninguén se sorprenda: de cando en vez chegan boas novas. Desta vez veulle un premio europeo ao noso excompañeiro e sempre amigo Pablo Cobas polo proxecto E-Twinning que desenvolveu o curso pasado. O seu excelente labor no deseño, desenvolvemento e posta en práctica do seu proxecto educativo titulado "O Camiño de Santiago: O camiño da tolerancia", fíxolle merecedor do Selo de Calidade eTwinning en recoñecemento á excelencia educativa. Desde o IES Plurilingüe Elviña sentímonos moi felices de compartir con toda a comunidade educativa o galardón recibido por Pablo.
     Como a filosofía dos proxectos eTwinning é a colaboración intercentros dentro da Unión Europea, o noso instituto aproveitou para facer as migas co IES Virxe do Mar de Noia, coa Escola Secondária Eça de Queirós de Varzim (Portugal), co IES León Felipe de Benavente, co Collège Robert Doisneau de Dammarie-lles-lys (Francia), co Collège Marcel Pagnol de Montpellier (Francia) e co Instituto Gustawa Morcinka de Tychy (Polonia). Boa mostra do interese alcanzado polo proxecto, e exemplo do esforzo na pescuda do noso obxectivo de colaborar coa comunidade educativa europea e de internacionalizar o labor de ensino no centro.
   O proxecto desenvolveuse no IES Elviña na segunda parte do curso 20-21 durante varias semanas, e supuxo para todos nós un punto de partida no noso propósito de sacar progresivamente o ensino das aulas e de derrubar todo muro.
   Este ano Pablo desenvolve o seu labor profesional noutro centro (e que sorte teñen!), pero atopou un espazo na súa apretada axenda para facernos unha visita. Foi o 24 de marzo de 2022, que aproveitou para repartir entre o alumnado de 4º de ESO, que o ano pasado cursou 3º e que participou no proxecto, unha serie de agasallos remitidos polo servizo nacional de eTwinning (unhas prácticas bolsas ecolóxicas de tea e unhas caixiñas portamáscaras). Unha alegría para todos a súa presenza outra vez connosco, aínda que fose só por unha breve xornada.

    Parabéns, Pablo, e unha forte aperta
desde a IES Elviña!

134

LINGUA GALEGA COAS TANXUGUEIRAS

FUSIÓN EDUCATIVA:
"TANXUGUEIRAS" NAS AULAS DE GALEGO

Tanxugueiras

     Este sábado moitos acordaron coa noticia educativa do finde nos xornais: un xoven profesor de lingua galega do IES Elviña espertaba a admiración dos docentes da comunidade galega pola súa unidade didáctica "veñen para quedar" sobre as Tanxugueiras, coa que está a traballar desde hai uns días co noso entusiasta alumnado cousas tan peregrinas coma a fonética da lingua galega, a gramática, a sociolingüística e demais asuntos de lingua. 

Veñen para quedar

 O xoven profesor, de prácticas no noso centro (fermoso presente e futuro venturoso), escritor de novelas nos ratos libres (de seguro non moitos), leva por nome Cándido Paniagua, e xunta talento, discreción, compromiso co traballo e xenerosidade a partes iguais. É de xustiza ese aplauso colectivo que recibe Cándido estes días. Entre as cousas que merecen eloxio, non semella a menor o traballo ben feito, o desexo de educar aos xóvenes na lingua galega e o amor pola propria cultura.

 A cousa está, pois, en que a Cándido deulle por acercar a reflexión sobre a lingua galega co orixinal método de recurrir ás novas tecnoloxías e á música das Tanxugueiras, das que moito se fala nestes días por esta súa Terra, canción coa que loitan na Benidorm Fest por representar a España na Eurovisión. E do mesmo xeito que estas tres potentes rapazas levan o son electrónico da música máis moderna á poderosa tradición das cantareiras e das pandereteiras, así o noso Cándido fai bandeira da fusión de música e gramática nas aulas. Disque os rapaces e rapazas están encantados co intento, e que os alalás das Tanxugueiras lles encenderon o aquel da curiosidade pola cultura galega. Diso se trataba. Ben feito!

     Por todos os esforzos semellantes que de cote hai nas aulas de Galiza, cómpre tamén un aplauso. Desta vez tocoulle a Cándido, que ben o merece. Sorte para nós, a comunidade do IES Elviña, que podemos contar con el. Grazas, Cándido!  

Distribuir contido


by Dr. Radut