Animación á lectura

Unha historia máis sobre libros. Neste vídeo eles mesmo contan a que xogan polas noites, cando ninguén os ve:

A historia recorda algo ao que se conta no título A expedición dos libros, obra escrita por Vicente Muñoz Puelles e ilustrada por Fernando Vicente, obra que tedes na biblioteca. Nela cóntase como uns ladróns levaron da biblioteca familiar o primeiro tomo das Obras completas de Jules Verne, aproveitando que os donos da casa se mudaron á Gran Cidade. Que poden facer o resto dos libros? Organízanse e unha expedición sae na súa axuda para rescatalo.

Lembrade que sempre hai un libro agardando por vós. Dádelle unha oportunidade!

Hoxe recomendamos dúas historias que son noticia e que van dar moito que falar: A casa da luz de Xabier P. Docampo e La invención de Hugo Cabret de Brian Selznick.

A primeira é unha novela galega escrita por Docampo e ilustrada por Xosé Cobas. Baseándose na novela, o director de cine Carlos Amil fixo unha película que xa chega ás salas de exhibición. Se vos gustan as aventuras, o misterio e o debuxo, pode que este libro vos encante e tamén a película. Podedes ler a ficha técnica da película aquí.

A segunda é unha novela do escritor estadounidense Brian Selznick, traducida ao castelán. Esta novela, que combina a narración máis tradicional coa novela gráfica, é unha lectura que atrapa a quen se deixa levar pola imaxinación. Aínda que a protagonista é un neno, resulta interesante para calquera tipo de lector. A súa versión cinematográfica dirixiuna Martin Scorsese e acaba de pasar polos premios Oscar con 11 nominacións e un Globo de Ouro.

Hoxe queremos compartir con vós unha historia emocionante: estamos colaborando cos nenos e nenas saharauís, regalándolles libros para que poidan ter unha biblioteca (O Niño do Bubisher)na que, coma vós, gocen coa lectura, deixen voar a súa imaxinación, aprendan miles de cousas. Axudalos a que poidan formarse, a evadirse dunha realidade tan dura como a que viven cada día nos campos de refuxiados. Se queredes máis información sobre o tema, pinchade aquí.

Temos na biblioteca varios títulos que vos poden interesar para coñecer mellor o tema: Smara, de Paula Carballeira; El beso del Sáhara, de Gonzalo Moure; algunha das Cartas de amor, de Fran Alonso... e moitos outros.

Na segunda semana de novembro dedicamos varios recreos a ler historias de medo na biblioteca. Contamos coa participación de algúns alumnos e alumnas pero tamén con algúns profesores e profesoras do centro. Graciñas a todos por participar, así como ao público asistente.

Algunhas das historias que se leron podedes atopalas nos seguintes libros:

Cando petan na porta pola noite de Xabier P. Docampo

Drácula de Bram Stroker

Historias que ninguén cre  e Á lus do candil de Ánxel Fole

Aparicións e Santa Compaña de Xosé Mariño Ferro

... e moitos outros títulos de morte,  medo e terror que podedes atopar na biblioteca.

Se vos interesa o tema, vide, explorade, levade, lede!

O 11 de xuño morreu Xoán Farias deixando a literatura infantil e xuvenil un chisco máis orfa. Aínda que era ferrolán escribiu maioritariamente en castelán e logo traduciu algunhas das súas obras ao galego. Moitos de vós coñecedes a súa marabillosa obra Á sombra do mestre, esa delicia de narrativa poética que tanto nos gusta.

Se queredes coñecer mellor o autor, recomendámosvos que leades este artigo publicado no xornal Público tras a súa morte. Tamén podedes achegarvos á biblioteca e ler estes títulos seus.