Novas

O xoves 12 de abril achegouse ata o noso centro o Ángel Calle Collado, licenciado en Ciencias Matemáticas –Estatística e investigación Operativa (1992)- pola Facultade de Ciencias Matemáticas da Universidade Complutense de Madrid. Tendo como auditorio ao alumnado de 1º e 2º de Bacharelato, falou dos tempos de descontento e autoritarismos que vive a sociedade actual, dos novos movementos globais, do poder de convocatoria das redes sociais de internet , dos límites que impón o actual contexto político e financeiro da fin da era do petróleo, do papel do estado, dos partidos, dos sindicatos…. O resultado foi moi satisfactorio pois o alumnado participou de xeito activo e reflexivo ás cuestión presentadas polo profesor universitario.

O venres 30 de marzo ao longo da mañá asistiron ao centro dúas persoas pertencentes á “Protectora de animais de Cambados” para concienciar ao alumnado do trato que se lle debe dar aos animais. Para iso valéronse de exemplos reais onde diversos animais eran maltratados e recollidos pola “Protectora” onde eran curados e alimentados, e adestrados como animais terapéuticos en determinados casos de persoas enfermas. Tamén se valeron da presenza de dous cans recollidos perfectamente educados para desempeñar diversas funcións como vixilancia, compañía…

Ao longo da semana do 16 ao 20 de abril asistiu á casa da Cultura do Grove o alumnado da ESO para presenciar unha exposición guiada sobre os paxaros e os seus hábitats en Galicia. A exposición estaba estruturada en 10 paneis onde se informaba do tipo de hábitat (costa, fraga, montaña…) e as especies que nel habitan. Toda esta información estaba complementada por un guía que lles ía comentando cada un dos paneis. Ao final facíalles un xogo de preguntas que os mantivo moi activos buscando nos paneis as respostas correctas. A valoración do profesorado acompañante e do propio guía foi moi positiva.

CONCEPTOS BÁSICOS SOBRE DROGODEPENDENCIAS: USO/ABUSO DE SUBSTANCIAS

O que se pretendeu cos talleres realizados foi transmitir conceptos básicos sobre o tabaco, alcohol, cannabis, cocaína e drogas de síntese, desmitificando os “aspectos positivos” que as rodean. Ademais fomentouse, en base a información recibida, que os/as alumnos/as se autorresponsabilicen da súa propia saúde e sexan capaces de tomar decisións ao respecto. 

Concretamente os talleres realizados no 1º ciclo da ESO centráronse no tabaco e alcohol e os realizados no 2º ciclo no cannabis, cocaína e drogas de síntese.

A duración de cada taller foi de 50 minutos por curso académico.

O xoves 15 de marzo o alumnado de 2º da ESO fixo unha saída a Pontevedra coa finalidade de visitar unha exposición fotográfica onde se expoñen as fotografías seleccionadas dun concurso sobre a natureza titulado “Wildlife Photographer of the Year”. Na mesma mañá o alumnado tamén asistiu á representación teatral “Pelos na lingua” da compañía Talía Teatro no Pazo da Cultura. A obra, en ton de comedia, pretende concienciar ao público da importancia de recoñecer o galego como lingua propia e censurar a súa consideración como lingua familiar.

O pasado 23 de marzo catro equipos (14 alumnos/as) do centro desprazáronse ata Madrid para participar na Final do torneo Young Business Talents. O obxectivo desta competición e que o alumnado poida practicar a xestión empresarial a través dun simulador online.

Felicitacións para estos participantes que se clasificaron finalmente nos lugares 11, 12, 15 e 40 de toda España, dentro dun total de case 700 equipos participantes.

O mércores 14 de marzo 39 alumnos/as do centro desprazáronse ata Lugo para asistir a unha exposición titulada ROMANORUM VITA, UNHA HISTORIA DE ROMA e a unha obra de teatro chamada MILES GLORIOSUS. Pola mañá visitouse a exposición que se trata dun paseo por unha cidade romana reconstruída a partir de descricións literarias e testemuñas arqueolóxicas. De seguido o alumnado puido admirar a muralla romana de Lugo percorrendo parte dela. Pola tarde os estudantes asistiron á obra de teatro titulada MILES GLORIOSUS de Plauto, no auditorio “Gustavo Freire” e representada polo grupo Parrocha da Coruña.

O luns 12 de marzo o Departamento de Economía organizou unha saída a Arteixo (A Coruña) para visitar as instalacións de Inditex. Comezouse pola Fundación, onde se visitaron varios departamentos: deseño, country managers, escaparatismo e tenda piloto. A continuación a visita discorreu por unha das fábricas da empresa e, finalmente, o obxectivo foi o centro loxístico de Inditex. Esta visita espertou gran interese no alumnado visitante.

Despois dun tempo de lecer, á tarde o grupo visitou o centro comercial Marineda City.

O Departamento de Lingua Galega organizou unha saída a Trasalba e Ourense para coñecer o contorno dos escritores do Grupo Nós. Xunto con alumnado de 4º da ESO e 3º PDC do noso centro, asistiron tamén alumnos/as do instituto das Bizocas de 4º da ESO. O programa da saída estivo centrado, pola mañá, nunha visita á Casa Grande de Otero Pedrayo en Trasalba (Fundación Otero Pedrayo) e un roteiro literario pola mesma aldea descrita polo escritor na súa obra. Pola tarde continuamos cunha visita ao centro histórico de Ourense cun percorrido polas rúas onde se atopaban as vivendas dos escritores da Xeración Nós. O tempo de lecer ocupámolo cunha visita ás termas públicas onde gran parte do alumnado se relaxou cun baño nas súas cálidas augas.

O centro IES Monte da Vila, seguindo a tradición, celebrou a “Festa de Entroido” do ano 2012 nas instalacións do centro. A afluencia e participación do alumnado foi masiva e nela organizáronse diferentes concursos: sobremesas típicas de Entroido, disfraces, comparsas e karaoke. Destes, o máis exitoso foi o de “Comparsas” formadas por alumnado de diferentes grupos. Nelas, as súas letras e as súas escenificacións foron moi enxeñosas e o profesorado e o persoal do centro, como era de agardar, foi o branco das súas críticas.