O xoves 19 de abril o Departamento de Debuxo organizou unha saída a Santiago de Compostela para visitar os tellados da catedral e o museo Granell. Este ano o tema das esculturas de area é “Seres mitolóxicos” e tomando isto como referencia, organizouse esta saída a Santiago de Compostela para ver e realizar in situ un traballo de observación sobre as gárgolas da catedral, subindo aos tellados e, desde alí, estudar a súa finalidade. No museo Granell asistiuse á exposición de pintura e escultura surrealista baseada no mundo animal.

O xoves 30 de abril o departamento de Física e Química organizou unha saída a Allariz para visitar unha empresa de enerxía renovable chamada BIOALLARLUZ S.A., de iniciativa municipal. O alumnado de 2º da ESO e tres profesores foron recibidos polo concelleiro de Madioambiente de Allariz que, entre outras cousas, explicou o aproveitamento da broza do monte para producir enerxía eléctrica, a utilización da cinza como abono e a preparación do monte para evitar os incendios. A valoración desta actividade foi cualificada como moi positiva por parte dos acompañantes do alumnado.

O martes 24 de abril recibimos a visita no centro de tres actores e mais o director do filme galego “Vilamor”, realizado no 2012 e baseado nun feito real acontecido na Galicia dos anos 70. A esta presentación asistiu alumnado de 1º de Bacharelato e nela tanto o director como os tres actores explicaron de xeito moi divertido as súas experiencias na rodaxe, as anécdotas e, por riba de todo, o compromiso adquirido coa cultura e coa lingua galega. Ao final houbo un coloquio onde os mozos e mozas participaron activamente con preguntas sobre o filme e a propia profesión dos invitados.

O xoves 12 de abril achegouse ata o noso centro o Ángel Calle Collado, licenciado en Ciencias Matemáticas –Estatística e investigación Operativa (1992)- pola Facultade de Ciencias Matemáticas da Universidade Complutense de Madrid. Tendo como auditorio ao alumnado de 1º e 2º de Bacharelato, falou dos tempos de descontento e autoritarismos que vive a sociedade actual, dos novos movementos globais, do poder de convocatoria das redes sociais de internet , dos límites que impón o actual contexto político e financeiro da fin da era do petróleo, do papel do estado, dos partidos, dos sindicatos…. O resultado foi moi satisfactorio pois o alumnado participou de xeito activo e reflexivo ás cuestión presentadas polo profesor universitario.

O venres 30 de marzo ao longo da mañá asistiron ao centro dúas persoas pertencentes á “Protectora de animais de Cambados” para concienciar ao alumnado do trato que se lle debe dar aos animais. Para iso valéronse de exemplos reais onde diversos animais eran maltratados e recollidos pola “Protectora” onde eran curados e alimentados, e adestrados como animais terapéuticos en determinados casos de persoas enfermas. Tamén se valeron da presenza de dous cans recollidos perfectamente educados para desempeñar diversas funcións como vixilancia, compañía…