Premendo no nome do documento no que estea interesado/a procederase á súa descarga:

Actualización datos alumnado Infantil e Primaria

Autorizacións EI, 1º, 2º, 3º e 4º EP

Autorizacións 5º e 6º EP

O pasado día 18 de maio os nenos e nenas de 2º de primaria fixemos unha saída á Casa das Ciencias e ao Planetario. Collimos o autobús, vimos unha proxección coa que aprendimos moitas cousas e despois estivemos na exposición probando moitas experiencias. Cando acabou a visita merendamos e ao rematar puidemos xogar un ratiño no parque de Santa Margarida. Pasámolo xenial!

Aquí quedan unhas fotiños.

Aberto o prazo para a solicitude do fondo solidario de libros e axudas para a adquisión de libros e de material. 

Poden consultar a información premendo aquí.

O pasado día 5 de maio o alumnado de 2ºA e de 4ºA que participamos no Proxecto e-Twinning Europeo, fixemos unha andaina polo Camiño de Santiago que pasa pola nosa vila. Esta andaina foi simultánea xunto cos nosos socios portugueses das Escolas Regio de Portalegre. Cando chegamos a Ponte do Porco fixemos unha videochamada con eles, e cando regresabamos pola Senda dos Sentidos, puidemos conectar outra vez. Foi un día de moitas emocións! 

A continuación tedes unhas fotos.

O venres celebramos o día das Letras Galegas. Tivemos a sorte de que Pedro e Andrea da ACDR O´Castro de Miño viñeran a darnos un concerto de música tradicional. Bailamos unha muiñeira, fixemos unha roda, cantamos e puidemos desfrutar da súa arte coa gaita e coa percusión tradicional.

Ademais, como cada ano, cada clase creo os seus "Poemiños polas letras" que xa están nos comercios da nosa vila para ser repartidos. Cando rematou o concerto, cada clase compartiu un dos seus Poemiños. Cantos poeta temos polo cole!  

Aquí queda unha pequena mostra do ben que o pasamos.

Publicadas as listas definitivas de admisión do alumnado para o curso 2022/23 que poden ser consultadas no interior do centro educativo.

Non hai variacións respecto das provisionais.

O pasado mércores día 4 celebramos "Os maios". Os alumnos e alumnas de 4º de primaria, o alumnado da aula específica e os mestres encargados, fixeron un gran traballo que puidemos desfrutar todo o cole.

Moitas grazas a todas as familias polas súas aportacións de flores e de verde.

E un agradecemento especial á nosa Carmen Sánchez, que pese a estar xa desfrutando da súa xubilación, achegouse a axudarnos. Grazas Carmen! 

Aquí tedes un video resumo da actividade "Ler o aire libro", organizada para conmemorar o Día do libro.

A publicación da Orde do 25 de xaneiro de 2022 pola que se actualiza a normativa de avaliación nas ensinanzas de educación primaria, de educación secundaria obrigatoria e de bacharelato no sistema educativo de Galicia fai necesaria a actualización da concreción curricular nos aspectos de promoción e titulación. Pode consultar o documento aprobado polo claustro de profesores premendo no enlace:

ACTUALIZACIÓN CONCRECIÓN CURRICULAR

Pola outra banda, ao non existir a avaliación extraordinaria, foi necesaria unha modificación das programacións didácticas que poden consultar premendo no enlace:

MODIFICACIÓN DAS PROGRAMACIÓNS DIDÁCTICAS

O día 22 de abril publicamos as listaxes provisionais de admitidas/os e non admitidas/os para o vindeiro curso 2022/2023. 

Nos niveis con vacantes admitíronse todas as solicitudes.

As listaxes provisionais poderán consultarse na aplicación admisionalumnado (empregando Chave 365 ou certificado dixital da FNMT) ou no taboleiro de anuncios do propio centro. A información non pode ser facilitada por teléfono.

No prazo de 5 días hábiles contados a partir do seguinte ao da súa publicación poderá formular reclamacións ante o Consello Escolar. (Ata 29 de abril).