Quen ten que presentar a solicitude de admisión?

Todo o alumnado procedente doutros centros educativos que desexe estudar o próximo curso no IES Manuel García Barros, excepto os que veñan do CEIP Pérez Viondi, CEIP do Foxo ou CEIP Cabada Vázquez e fixeran a reserva de praza no seu momento.

O alumnado dos CEIP nomeados anteriormente, ao estaren adscritos ao noso, ten asegurada a praza e só deberá realizar a matrícula nas datas indicadas no calendario que publicaremos no mes de xuño.

Cal é o prazo de presentación? 

Do 1 ao 20 de marzo ambos incluídos.

Que deberán presentar na secretaría do centro?

• A solicitude cuberta e asinada, dispoñible no centro educativo e nas seguintes ligazóns:
• Modelo de solicitude (anexo II).
• Na aplicación admision alumnado, onde se pode cubrir online ou descargar e encher manualmente.
• Na Sede Electrónica da Xunta de Galicia.

• Copia do DNI ou NIE do/a alumno/a
• Copia do libro de familia ou documento que acredite o nº de membros da familia
• Se é o caso, copia da sentencia de separación ou divorcio

Calendario de publicación da listaxe de admitidos/as e prazos de reclamación:

• Publicarase a listaxe provisional de admitidos e excluídos o 25 de abril.
• O prazo de reclamacións será de 5 días hábiles posteriores á data de publicación da listaxe.
• Publicarase a listaxe definitiva de admitidos o 15 de maio.

Prazo de formalización da matrícula ordinaria:

Do 23 de xuño ao 7 de xullo (o centro publicará en xuño o calendario detallado).

Xa temos na nosa galería Flickr as fotos do pasado venres 23 de febreiro, Día de Rosalía.

Os alumnos de 2º Bacharelato-A do noso centro: Alejandro Cobas Correa, Fernando Sanmartín Sangiao, Pablo Brey Arca e Xulián Brey Couto  participarán o venres 1 de marzo na MASTERCLASS EUROPEA de FÍSICA (“Física de Partículas coas Mans”), organizada polo Instituto Galego de Física de Altas Enerxías. É unha xornada na que profesores do Dpto. de Física de Partículas da Facultade de Física da USC, en colaboración co CERN, tentarán achegar o mundo das partículas elementais a estudantes de último curso de Bacharelato

Os detalles da xornada poden consultarse na seguinte ligazón do IGFAE.

O mércores 6 de Marzo, a partir das 16:30, as familias que o desexen poderán achegarse ao noso instituto para coñecelo máis de preto. O equipo directivo informaralle das características do centro e da oferta educativa (ofrecemos catro modalidades de bacharelato); poderán ver as instalacións e plantexar todas aquelas dúbidas que poidan ter de cara a unha posible solicitude de praza (o prazo está aberto ata o 20 de marzo).

Parabéns ao noso alumno Pablo López Sánchez de 1º Bacharelato A que, xunto co santiagués Miguel del Castillo, se proclamou campión galego de tenis en dobres masculino.

Máis información en La Voz de Galicia.

O martes 20 de febreiro, os grupos de 4º ESO e 1º de Bacharelato de Economía asistiron dentro do programa A Ponte á charla “Para que serve a Economía?” impartida polo profesor Xosé Antón Rodríguez González catedrático do Dpto. De Economia Cuantitativa da Facultade de C.C. Económicas de Santiago. O alumnado recibíu formación para tratar de responder ás seguintes cuestións: Por que existen as crises económicas? Por que as crises orixinan tantos sufrimentos ás mesmas clases sociais? Teñen culpa das crises os economistas?....
A charla foi organizada polo Departamento de Economía.

Parabéns ao noso alumno de 3º ESO B Andrés Carballeda Abeijón que vén de acadar tres medallas no campionato autonómico de natación.

Máis información en El Correo Gallego.

Comunicamos que todo o alumnado dos centros adscritos ao noso (CEIP Pérez Viondi, CEIP do Foxo e CEIP Cabada Vázquez) que fixo a reserva de praza dentro do prazo habilitado ten adxudicado o seu posto para o curso 2024/25.

Se algún alumnado coa praza xa adxudicada quere cambiar para outro centro deberá renunciar á reserva de praza, ata o 28 de febreiro incluído, entregando a solicitude na secretaría do IES.

Este venres, durante os dous recreos, o EDLG organiza unha actividade dirixida a alumnado e profesorado para poñer en valor a figura de Rosalía de Castro. A actividade consiste en escoller entre tres diferentes deseños: Rosalía ecoloxista, Rosalía feminista e Rosalía galeguista e fabricar unha chapa coa que locer orgullosas. Realizarase na entrada ao centro.

Os deseños foron feitos por alumnado colaborador e a propia actividade tamén contará coa súa axuda!

Os nosos alumnos de 3º ESO Sergio Cao Iglesias e Manuel Verde Andújar acadaron o 4º posto nas 3H Resistencia de BTT na modalidade de relevos disputada a pasada fin de sermana en Vilagarcía.

Parabéns!!!

Parabéns ao noso alumno Nico Lorenzo Castro de 2º ESO B que acadou o 2º posto no Campionato Galego de Trail disputado en Muros o pasado domingo.

Xa temos na nosa galería Flickr algunhas fotos da viaxe a Grecia. Pódense consultar nesta ligazón.

O pasado xoves 15 de febreiro conmemoramos no centro o Día Internacional do Cancro Infantil. Alumnado de 1º e 4º ESO realizou diversas actividades (lazos dourados, tatuaxes, lectura de manifesto) co fin de mostrar a nosa empatía e solidariedade con aqueles menores que viven ou viviron a enfermidade.

Agradecemos á Asociación de Apoio a Nenos Oncolóxicos de Galicia (ASANOG) e á Federación Española de Padres de Niños con Cáncer (FEPNC) a oportunidade de participar nesta iniciativa.

Parabéns á nosa alumna de 2º ESO Carla Pintor Vinseiro, medalla de bronce na final de 300 metros lisos no campionato galego de pista cuberta.