Skip to Content

                              

biblioteca

REUNIÓN CLUB DE LECTURA DE FAMILIAS E PROFESORADO

Ven, 03/05/2024 - 01:29 — Leo

 

O pasado xoves 25 de abril reuniuse o club de Lectura de familias e profesorado para falar da nosa última lectura: "Memoria do Silencio" de Eva Mejuto ( autora tamén da nosa anterior lectura)

 

Xa que a data coincidía cos 50 anos da “Revolución dos Cravos” adicamos o inicio a falar da mesma, da importancia da memoria histórica e do simbolismo dun pobo unido. ( Si tamén escoitamos un anaco de “Grándola”  

 

 Esta historia está ambientada en Ribadavia e conta a historia ficcionada do que fixeron as  irmás Touza . Pero como ven comentou algunha das integrantes, recollendo distintos puntos de vista.

 

Foi un libro que xerou comentarios sobre a represión, as inxustizas, a empatía, o medo e especialmente quedámonos con esas mulleres afoutas, e valentes que moitas veces non obteñen o recoñecemento merecido. 

 

 

Tamén falamos de que quizais se nos fixo un pouco “curta” e quedamos coa curiosidade de saber que pasaría cunha das protagonistas, e tamén de que decisións tomou coa súa vida certo integrante do exército alemán..

 

 

Decidimos xa a seguinte lectura, sabendo que acababa de sair a última novela de Ledicia Costas: “Pel de cordeiro” e que somos grandes fans dela, xa que o primeiro libro que lemos no club ao comezo foi “Golpes de Luz” e gardámoslle un cariño especial.

(Desta autora tamén lemos Infamia e Ultraluz) 

 

Dúas nais prepararon unhas sobremesas moi gorentosas que compartiron con nós, Belén fíxonos un biscoito e Paz un flan de queixo que estaba espectacular ( aínda que non puido asistir á reunión mandounos a sobremesa igualmente!!!)

Moitísimas grazas ás dúas.

 

 

 

 

E coma en todas as reunións rematamos "merendando" e falando dun xeito máis distendido para finalizar...

 

DÍA DO LIBRO 2024: APADRIÑAMENTO LECTOR

Dom, 28/04/2024 - 15:35 — Leo

Este ano centramos as nosas actividades polo día do libro en 2:

Por unha banda estamos elaborando unha historia en B.D na que o protagonista é Xuve, de xeito colaborativo todo o alumnado do centro. 

( Estamos en proceso de finalización para presentalo á toda a comunidade educativa)

 

E para conmemorar no propio día do libro, voltamos ás orixes: facendo un apadriñamento lector  no patio, na "hora de ler" despois do recreo.

Cada aula dos "maiores" recolleu a unha aula dos máis pequenos para contarlles/dramatizarlles un conto ou lerllo.

O alumnado do 6ºde EP. fixo unha lectura conxunta para a clase de 4º/5º de ED. Infantil.

O alumnado de 5º dramatizou varios contos para o alumnado de 2º EP.

As aulas de 4º e 3º fixeron unha lectura individualizada para as aulas de 1º de EP e 5 anos.

Finalizada a lectura , o alumnado de 6º de EP.  fixo unha dramatización de 4 historias con monicreques (que eles mesmos inventaron) para o alumnado de ED. Infantil e 1º Ciclo de EP.

Agradecemos a colaboración de todo o alumnado , en especialmente ao de 6º E.P e ás titoras pola organización previa da actividade (escollendo as lecturas axeitadas e practicando previamente nas aulas) 

Boa lectura!!!!

 

 

HÁBITOS SAUDABLES E SAÚDE MENTAL CON IRIA VEIGA

Sáb, 20/04/2024 - 07:34 — Leo

 

Dentro do programa LECTURA E FAMILIAS ao que nos incorporamos este curso e partindo de propostas de diversas familias (especialmente as pertencentes ao Club de Lectura de Familias e profesorado) organizamos unha segunda charla informativa impartida pola experta na materia Iria Veiga (médica psiquiátra no CHUS e divulgadora científica).

 

Desta volta, e directamente relacionado co noso PDI de centro deste curso "XUVE SAUDABLE" a charla informativa tratará a importancia  dos hábitos saudables e a saúde mental.


O vindeiro luns día 29 de abril, ás 18:30.

Estades convidados e convidadas!!! 

 

 

 

 

 

 

 

PASANDO A BOLA: XOGANDO PARA CAMBIAR

Ven, 19/04/2024 - 03:29 — Leo

 

Onte tivemos a Celtia Figueiras no seu centro, para desenvovler esta actividade baseada no seu libro "A banda dos insectos"  grazas ao Consorcio Editorial Galego e á  compañía de teatro  "A Xanela do Maxín" da que Celtia fai parte.  

 

 

Contou coa colaboración de 10 alumnos e alumnas voluntarias de 3º ciclo de ED. Primaria para desenvolver esta representación interactiva ( na que coa axuda do público)  mediante preguntas sobre as situacións plantexadas foron resolvendo as mesmas.

 

Foi unha actividade moi interesante, que nos fixo ver e reflexionar sobre os distintos tipos de "bullying" que podemos atopar no contexto escolar.

Buscando entre todos e todas atopar as solucións e parar a pensar no que sinten os demais. Promovendo un ambiente escolar máis seguro e respectuoso.

 

Aquí quedan unhas poucas fotos do momento:

 

 

REUNIÓN CLUB DE LECTURA DE ALUMNADO: SOBREMESAS SOBRE VERSOS

Mér, 10/04/2024 - 14:20 — Leo

O pasado xoves día 4, reuniuse o Club de Lectura de alumnado para falar da última lectura: "Sobremesas sobre versos" de Raquel Castro

 

Comezamos falando sobre o libro, que lles pareceu, que foi o que máis lles gustou, que foi o que menos e a maioría comentaron que fixeron algunha das receitas.

Un formato de lectura distinto ao que están habituados e habituadas.

Tamén falamos sobre os seus coñecementos sobre o alzheimer e como lle explicarían que é ao alumando de ED. Infantil

Posteriormente fixemos 2 grupos para ir á Radio Xuve e gravar as preguntas que lle queren facer á autora sobre o libro, para que cando teña un momento , as resposte e escoitalas na seguinte reunión.

Mentres uns gravaban os outros estiveron xogando a algúns dos xogos de mesa que temos na biblio.

 

E coma sempre rematamos coa "merendiña" que este curso pretende ser "saudable".

 

Aquí quedan unhas poucas fotos .

 

 

DÍAS DA ÁRBORE, AUGA E POESÍA

Mér, 27/03/2024 - 13:51 — Leo

O pasado venres día 22 e para facer unha conmemoración conxunta dos días da Árbore, da Auga e da Poesía desenvolvimos 2 actividades:

 

En primeiro lugar, o profesorado especialista preparou experimentos nos que a protagonista principal era a AUGA, e os distintos grupos fomos rotando polos mesmos, a modo de "estacións".

Foi unha actividade moi interesante para o alumnado, que desfrutou e ao mesmo tempo aprendeu sobre as cualidades da auga.

Queda aquí un pequeno vídeo cunhas poucas fotos do momento:

 

 

 

 

Ao finalizar esta actividade, dirixímonos ao noso patio e démoslle unha aperta as árbores do noso cole.

Así baixo o lema "abraza unha árbore" sentimos o contacto coas mesmas e pasamos un rato divertido.

                          

 

Por último e isto xa a nivel aula, traballamos os CALIGRAMAS e elaboramos caligramas con formas naturais ( árbores, elementos da natureza) xa fose de xeito individual ou en equipo.

 

Por último engadir, que o xoves día 21 o alumando do 3º ciclo achegouse á Insua dos Poetas para participar con outros centros na celebración conxunta dos días da Árbore, Auga e Poesía. (Se premedes no enlace levaravos a información máis completa sobre o evento)

 

REUNIÓN CLUB DE LECTURA DE FAMILIAS E PROFESORADO: A LAVANDEIRA DE SAN SIMÓN

Mér, 27/03/2024 - 10:21 — Leo

o pasado luns 18 de marzo reuniuse o Club de Lectura de Familias e Profesorado para falar da nosa lectura: 

"A lavandeira de San Simón" de Eva Mejuto e ilustrado por Bea Gregores.

Esta lectura foi "patrocinada" polo equipo de Biblioteca do CEIP Petelos (Mos)  , xa que nos deixaron os exemplares para a lectura, ademais de propoñernos unha actividade conxunta de ambos clubs no mes de xuño. Moitas grazas, especialmente a Ángeles.

 

 

 

Comezamos a reunión, dando a benvida a unha nova integrante do noso club que nos falou sobre as súas lecturas favoritas e sobre si mesma.

 

Despois as que non puideron asistir á anterior reunión, déronnos a súa opinión sobre "Senlleiras" de Antía Yáñez, que foi a nosa anterior lectura.

 

E posteriormente pasamos á falar da lectura, motivo desta reunión.

 

 

 

O libro gustounos, e gustounos moito. Pareceunos un xeito moi accesible e sinxelo para falar dunha parte da nosa historia dun xeito moi tenro ( relatando unha dura realidade e o tempo da "postguerra")

Varias persoas comentaron , que en tempos tan duros, a solidariedade, o compartir o pouco que se ten, da moito que pensar.

Tamén reflexionamos sobre a importancia de coñecer o pasado para non cometer os mesmos erros.

En xeral, gustounos tamén moito como acompañaba  maxistralmente a ilustración ao texto. E pequenos detalles que se repetían ao longo do libro.

Concluímos que quizais o libro espertaba un sentimento de querer saber máis do acontecido, como un "abrir unha xanela" para seguir investigando. A maioría non estiveron nunca na illa.

 

 

Investigamos un pouco nas redes para atopar máis información sobre a illa, a súa historia e finalizamos accedendo á páxina que aparece no propio libro mediante un código QR:

A LAVANDEIRA DE SAN SIMÓN 

 

Na reunión tamén decidimos cal ía ser a seguinte lectura ( a idea é que cada quen trouxese unha proposta e decidir entre todas), e seguimos con Eva Mejuto, xa que a lectura escollida foi: "Memoria do Silencio" seguindo na liña de ler sobre o noso pasado...  

 

E para rematar, "unha merendiña" para falar dun xeito máis distendido. E desta volta queremos agradecer ás dúas Vanesas que temos no club, xa que nos deleitaron cunha gorentosa  "quiche" de verduras e un riquísimo biscoito caseiro.

Moitas grazas ás dúas!!!!

 

REDES SOCIAIS E SAÚDE MENTAL NA ADOLESCENCIA

Ven, 22/03/2024 - 06:51 — Leo

 

Dentro do programa LECTURA E FAMILIAS ao que nos incorporamos este curso e partindo de propostas de diversas familias (especialmente as pertencentes ao Club de Lectura de Familias e profesorado) organizamos unha charla informativa impartida pola experta na materia Iria Veiga (médica psiquiátra no CHUS e divulgadora científica).

 

 

 

O vindeiro día 3 DE ABRIL ÁS 18:30, terá lugar no centro, co título : "REDES SOCIAIS E SAÚDE MENTAL NA ADOLESCENCIA".

Convidámosvos a asistir, xa que cremos que pode ser do voso interese. 

DÍA DE ROSALÍA NA CLASE DE 1º de ED. Primaria

Ven, 22/03/2024 - 03:47 — Leo

No día de Rosalía de Castro,  o alumnado de 1° de Primaria do CEIP Xuvencos de Boborás, queremos facer unha homenaxe a esta  grande escritora.

 

Ensaiaron, prepararon os seus textos e baixaron a Radio Xuve a facer a gravación, acompañados pola súa titora, a profe M Luz.

Editado polo profe Javi, aquí tedes o resultado:

 

 

8M: AS NOSAS SUPER HEROÍNAS

Dom, 10/03/2024 - 15:16 — Leo

Este ano para conmmeorar o 8M decidimos relacionalo coa temática das Bibliotecas Escolares deste curso: a banda deseñada.

Así elaboramos 2 plantillas para que o noso alumnado debuxase á súa "super heroína" particular, e describise os seus "super poderes", porque non todas as superheroínas levan "capa".

 

 

Tamén fixemos unha pequena escolma de libros relacionados coa temática para expoñer na entrada do centro.

 

 

Unha vez debuxadas e descritas as superheroínas do noso alumnado , fixemos unha pequena exposición coas creacións para que todo o alumnado do centro puidese velas.

No terceiro ciclo ademais, fixeron cartaces con nubes de palabras con nomes de mulleres importantes para eles e elas...

 

 

Distribuir contido


by Dr. Radut