Hoxe sería o aniversario de Xosé Neira Vilas, o noso padriño. Naceu en Gres (Vila de Cruces, Pontevedra), o 3 de novembro de 1928.

O 17 de setembro de 2013  recibimos no colexio ao noso padriño Xosé Neira Vilas con motivo da inauguración da exposición da súa obra e maila da súa dona, Anisia Miranda.

O acto tivo lugar no vestíbulo do colexio, a carón dos andeis que recompilan toda a súa obra, un lugar preferente para unha persoa tan especial.

Xosé Neira Vilas naceu en Gres (Vila de Cruces, Pontevedra), o 3 de novembro de 1928.

Fillo de campesiños pasou a súa nenez e adolescencia na súa aldea natal, compaxinando a escola cos labores agrícolas. Aos catorce anos estudaba comercio por correspondencia e con 16 traballaba á vez nas oficinas dun serradoiro local, mentres, moi afeccionado á lectura, lía canto caía nas súas mans. Creou un grupo de teatro que representou obras en galego.

En 1949 emigrou a Buenos Aires, onde desempeñou traballos diversos. Realiza estudos de comercio, música, xornalismo, literatura. Tomou conciencia da identidade de Galicia en contacto cos intelectuais do exilio: Seoane, Suárez Picallo, Lorenzo Varela, etc. Foi Secretario Xeral das Mocidades Galeguistas e participou na comisión organizadora do Primeiro Congreso da Emigración Galega.

Casa en 1957 con Anisia Miranda, nacida en Cuba. Xuntos fundaron a organización libreiro-editorial Follas Novas para difundir o libro galego en América.

En 1961 Neira e Anisia foron residir a Cuba.

Traballou na Administración e fixo xornalismo literario. En 1969 fundou a Sección Galega do Instituto de Literatura e Lingüística, que dirixiu durante vinte e dous anos. Na Arxentina e en Cuba fixo investigacións sobre a presenza da emigración galega en América. Volveu a Galicia, á súa aldea natal de Gres onde preside a Fundación cultural Xosé Neira Vilas. (accede a esta páxina pinchando neste enlace).

Durante toda a súa vida escribiu unicamente en galego. É membro numerario da Real Academia Galega, Doutor Honoris Causa polas Universidades da Coruña e da Habana, Premio da Crítica Española (narrativa), Premio da Crítica Galega (ensaio) e Premio da Federación de Libreiros de Galicia. Fóronlle outorgadas as medallas Castelao, Pedrón de Honra e Celanova Casa dos Poetas.

Desde a súa volta desde Cuba a terras galegas, colaborou en diversos medios de comunicación. Froito dese impulso foron as series "Memoria da emigración" e "Crónicas galegas de América", aparecidas inicialmente no Faro de Vigo (1992-1995, os domingos) e despois en O Correo Galego (1995-1999) e logo recollidas en varios volumes por Edicións do Castro.

Actualmente ten unha sección fixa en El Correo Gallego ("Arredor do mundo", columna dominical) e publica puntualmente artigos culturais e de tema literario en Galicia Hoxe. En definitiva, estamos ante unha das figuras máis importantes das letras galegas actuais.

Xosé Neira Vilas morre na súa casa de Gres (Vila de Cruces, Pontevedra), o venres 27 de novembro do 2015.Trasladaron o seu corpo a Santiago de Compostela, ó Panteón de Galegos Ilustres, onde foi homenaxeado polos amigos e polas máximas autoridades de Galicia. O sábado pola tarde soterrárono no cemiterio de Gres, a carón da súa muller Anisia, falecida hai agora seis anos. A ANPA e o colexio deixamos uns ramos como testemuñas do noso cariño e admiración. A bandeira galega do colexio tamén lle rende homenaxe. Pepe Neira Vilas estivo con nós en moitas ocasións. El era o noso padriño, e nós os seus afillados. Sempre que llo pediamos achegábase ata o centro para participar nalgunha das actividades que organizabamos ou visitarnos e pasar un día con nós. É unha perda irreparable para todos. Galicia perde a un dos seus escritores máis destacados e tamén, sen ningunha dúbida,  ó maior cronista da emigración galega. O noso colexio conserva, por decisión súa, a práctica totalidade dos libros de Anisia e de Pepe Neira, todos os que se puideron recuperar dunha gran obra literaria. Tócanos conservala e dala a coñecer, arrimar o ombreiro, para que eles e a súa obra formen parte sempre da vida da nosa comunidade educativa. Moitas grazas por todo, mestre.             SEMPRE ESTARÁS NA NOSA                                      LEMBRANZA

 CARTEL HOMENAXE DE TODO O COLEXIO AO NOSO PADRIÑO NO CABO DE ANO DO SEU FALECEMENTO

ACTOS 25º ANIVERSARIO

Celebrouse o XXV Aniversario do Colexio coa representación, por parte do grupo de teatro Bertorella, da obra "O can de San Roque", conto adaptado de Victoriano Taibo.

Puidemos gozar ademais da presenza do noso padriño Xosé Neira Vilas e da escritora e pedagoga Antía Cal, nunha emotiva charla-coloquio, seguida da actuación do grupo folclórico de Pinzás.

Descubriuse unha placa conmemorativa no que queda reflectida esta data tan significativa.

Como colofón desta conmemoración, realizouse un xantar ao que asistiron alumnado e profesorado do colexio, así como ex-alumn@s e ex-profesor@s e Anpas.

Pola tarde tivo lugar a festa de fin de curso e a visualización de fotografías da vida no colexio durante estes 25 anos.

Grazas a todos e todas por acompañarnos neste día tan especial

E... chegou o gran día da inauguración

O 17 de setembro de 2013  recibimos no colexio ao noso padriño Xosé Neira Vilas con motivo da inauguración da exposición da súa obra e maila da súa dona, Anisia Miranda.

O acto tivo lugar no vestíbulo do colexio, a carón dos andeis que recompilan toda a súa obra, un lugar preferente para unha persoa tan especial.

Gozamos moito da súa presenza e agasallou cunha dedicatoria a todas e todos os que quixeron traer un libro. 

O RECUNCHO DO NOSO PADRIÑO

 Se xa tiña un oquiño no noso corazón, desde agora Xosé Neira Vilas ten un recuncho no noso colexio, un espazo que recompila toda a súa produción literaria e que comparte coa súa dona Anisia Miranda, madriña da biblioteca do centro. 

A súa presenza cólmanos de  ledicia.

Agardamos siga enchendo os andeis deste recuncho cos seus libros e as mentes de todos e todas coas súas palabras.

SEMPRE É UN PRIVILEXIO CONTAR CO

NOSO PADRIÑO

Na sección galerías da web do colexio podedes ollar algunhas fotografías deste evento.

Deixámosvos unha pequena mostra

Inaugurado o recuncho coas obras dos "padriños"

Dentro dos actos da celebración das Letras Galegas, o mércores 22 de maio, inaugurouse o recuncho coas obras dos nosos "padriños". Dáse a casualidade de que o 21 de maio cumpríronse 20 anos da inauguración do Colexio co nome de "Xosé Neira Vilas" e a Biblioteca "Anisia Miranda". Daquela viñeron os dous escritores para celebrar o acto da inauguración. Desta volta agardamos que veña para o final de curso o noso padriño Xosé Neira Vilas para "re-inaugurar" este fermoso recuncho.

Tamén aproveitamos para entregarlle un agasallo a Silvia Pereira Figueroa, que foi a gañadora do concurso de mascotas para representar os VIGAS (Vixiantes do Galego)

 Visitounos o padriño!!!

 O pasado xoves, 8 de marzo (Día internacional da muller) recibimos a visita de Xosé Neira Vilas, o noso "padriño". Estivo vendo os traballos que fixemos sobre "Memorias dun neno labrego" (o ano pasado cumpriuse o 50 aniversario da súa publicación), e logo mantivo un encontro con todos (alumnado e profesorado) no salón de usos múltiples. Uns alumnos de 6º expuxéronlle un traballo que fixeron en Power Point e outros de 5º recitáronlle unha poesía que fixeron para el. Logo contestou a todas as preguntas que lle fixeron e contou moitas anécdotas relacionadas coa súa vida e as súas obras. Ao remate asinou libros a todos aqueles que llo pediron. Foi unha visita moi agradable! Grazas padriño!!