Aquí tendes ao noso alumnado de 4º da ESO falando da curtrametaxe que realizaron durante o curso escolar 2011/2012. A partires do minuto 33:40 na Revista da TVG.
Este ano, en clase de informática, os alumnos de cuarto crearon un blogue propio. Podedes ver os seus comentarios, fotos e incluso algunha que outra despedida...
Este ano, os alumnos de terceiro de ESO participaron nun concurso fotográfico na asignatura de Tecnoloxía. O lema do concurso foi "Camiño ou vertedoiro", e consistiu en fotografiar lixo en camiños ou campos, principalmente composto por materiais plásticos. Ademais, os alumnos tiveron que identificar o tipo de plástico e tratar de averiguar o tempo de descomposición. O que averiguamos é que todos eses residuos estará "decorando" e contaminando eses espazos públicos por centos de anos, se ninguén os retira.....
Esta é a información enviada ás familias sobre a documentación e requisitos necesarios para solicitar axudas para libros. Aquí tendes o anexo que hai que cubrir.
A partires de agora queremos compartir tamén con todos vós a información do comedor do centro. No menú da esquerda podedes consultar directamente a sección de comedor e mantervos informados sobre os menús mensuais e útiles consellos sobre alimentación infantil. Agardamos sexa da vosa utilidade. Lembrade que os documentos publicados en issuu pódense ler na pantalla e tamén imprimir.
Remata o mes de maio e queremos compartir con vós esta gravación de coplas. A tradición dos maios ten moito arraigo na nosa provincia, e consiste na elaboración dunha construcción, artística ou tradicional, con madeira, tela de saco e todo tipo de ornamentos naturais, como flores, carrabouxos, toxos, carqueixa, xesta, etc. Ao redor dela, e ás veces no seu interior, nenos e maiores cantan unhas coplas que sempre levan a mesma melodía e teñen letras que fan referencia a acontecementos do ano. A TVG contactou connosco para gravar en vídeo aos nenos cantando e emitilo nun especial o 25 de xullo de 2012, adicado ás letras galegas. As coplas están escritas no curso 2011/2012 polo alumnado de 4º de primaria: Mª José, Mª Jesús, Abraham, Yoel, Saleta, Tania, Rubén e Hugo.
Os intérpretes e cursos son: 1º: Nuria, María e Aitiana, 2º: Óscar, Nerea e Valeria, 3º: Sara, Alicia e Rocío, 4º: Andrea, Carla e Alejandro, 5º: Celia, Mª José e Yoel e 6º: Alejandro, Nieves, Carlota e Andrea.
A nosa biblioteca vai recuperando aos poucos a mesma cor e a mesma vida que tiña antes do incendio. Convencidos de que é un espazo para o lecer, para o ler, para imaxinar e viaxar cos libros, as mestras de infantil decoraron o seu recuncho cun mural que ten a Silvestre e Piolín como protagonistas e a moitos personaxes de contos como convidados. A que lles quedou ben chulo?
Os pasados días 10 e 12 de abril os alumnos e alumnas de secundaria asistimos durante dúas tardes a unhas charlas de orientación académica e profesional, nas que participaron 10 convidados e cada un deles foinos relatando a súa experiencia profesional. As xornadas foron .organizadas polo Departamento de Orientación e a dirección do noso centro coa colaboración dos concellos de Cea e Piñor. Na primeira tarde abordouse a formación profesional e o mundo laboral, do que dentro duns anos formaremos parte. Houbo dous relatos que me chamaron máis a atención. Un deles foi o dunha muller emigrante galega que se fora a México, pero xunto co seu marido e fillos voltou para a súa terra e decidiu abrir unha floraría. Comezou sen saber case nada, entón decidiu aprender indo a cursos. Esta muller comezou sabendo o imprescindible e agora é ela a que imparte cursos, aparte de atender a súa floraría. Iso si, nin ela nin o seu home teñen vacacións dende hai 22 anos. Aparte coas coroas dos defuntos nunca se sabe, como ben dixo ela: un nunca decide cando morrer. O outro relato que tamén me gustou foi o de outra muller, que nos contou como a súa avoa comezara co restaurante, do que máis tarde se farían cargo a súa filla e no que na actualidade traballan os seus netos. Este é un dos negocios que tamén require moito traballo e responsabilidade. Ter un negocio é algo moi difícil, xa que tes que ter un bo trato co cliente e darlle un bo servizo. O segundo día participaron persoas con carreira e algunhas ademais con oposición. Estas persoas faláronos dos seus estudos como: profesores, tradutora, psicóloga, enxeñeira agrónoma e funcionaria nun xulgado. Para facer a carreira que ti queiras antes hai que pasar por unha difícil e temida proba: o selectivo. Ese será o exame que determinará o que poderás estudar. Os relatores convidados coincidiron en que cando tiñan a nosa idade non sabían con claridade que querían estudar e algúns recoñeceron ir facer a carreira sen saber moi ben a que ían, pero todos nos recomendaron a experiencia da universidade. Tamén se falou algo sobre as oposición: algúns din que é coma outra carreira, pois compites a nivel nacional ou autónomo por ser o mellor e iso require moitas horas de estudo e sacrificio. Os convidados dos dous días recomendáronnos facer o que nós quixésemos, pois é algo para toda a vida. Somos xoves é estamos indecisos ante o noso futuro, pero ano a ano iremos decidindo pouco a pouco que camiño elixir . Tomaremos boas decisións e noutras equivocarémonos, pero contaremos co apoio incondicional dos nosos pais , que nos deron a vida e nos proporcionarán un futuro. A miña conclusión sobre estas charlas é que todo se consegue con esforzo, traballo e constancia. Estes son os ingredientes clave para que o día de mañá cada un consiga o que queira. Estanos chegando o momento de pelexar e alcanzar todas as metas que nos propoñamos.
Alba Nóvoa Gil ( 3º de ESO)
Os alumnos e alumnas de Secundaria que asistiron ás xornadas opinan:
“ Todo o que nos contaron os relatores foi moi interesante e provocou o noso interese e sobre todo unha reflexión: debemos loitar polo que soñamos aínda que ás veces nos pareza duro e nos sintamos incapaces de logralo. Penso que grazas a estas xornadas temos unha pequena axuda para poder ter unha idea de como pode ser o noso futuro, tanto referido ao mundo laboral como ao paso pola universidade. Ademais debemos ter claro que persoas maiores ca nós, como son os nosos pais, seguramente non tiveron o privilexio de recibir estas charlas nin toda esa información. Coido que somos moi afortunados”. ( Mª José, alumna de 4º de ESO). “ As charlas servíronnos de gran axuda para ver as diferentes caras do mundo laboral e concienciarnos do que nos deparará o futuro ao rematar os estudos de Secundaria. Todos debemos saber que a vida non é fácil, por iso temos que loitar para chegar ao cume máis alto, porque con esforzo non existen límites. (Alba , alumna de 4º de ESO) “Estas xornadas espertaron o meu afán de superación e o sentimento de querer estudar o que de verdade me gusta e acabarei agradecéndoo, aínda que ás veces sinta ganas de deixalo. Considero que somos moi afortunados por ter a oportunidade de coñecer a experiencia das persoas que participaron como relatores, para así poder orientarnos e saber algo máis dos traballos e carreiras nos que estamos interesados” (Lorena, alumna de 4º de ESO).
“ As persoas que viñeron a estas xornadas dixéronnos que estudaramos o que nos gustara e que aproveitaramos moito estes anos, porque todo o que aprendamos agora faranos falta despois. Estou de acordo con iso e penso que as xornadas estiveron ben, xa que coñecemos de primeira man as características de oficios dos que oiramos falar pero dos que nos sabiamos moito. Ademais tamén puidemos resolver preguntas e inquietudes que tiñamos sobre esas profesións” ( Lucía, alumna de 4º de ESO) “ Todos os rapaces e rapazas que oímos as experiencias e historias que nos ontaron os relatores aprendemos que non podemos perder o tempo, xa que o estudar ou non vai decidir o noso futuro. Os estudos que fagamos ninguén nolos pode sacar, sempre estarán aí. Se podemos e temos oportunidades, por que non aproveitalas?. (…) Creo que estas charlas deberían darse en todos os institutos. Son moi interesantes e pódennos abrir camiños” (Loli, alumna de 3º de ESO) “ O tempo que dedicamos ás xornadas foi realmente proveitoso para nós. Mergullámonos na experiencia e o traballo desas persoas e observamos posibles opcións para un futuro noso. (…) Todos nos transmitiron a mesma mensaxe: o máis importante para ser o mellor en calquera oficio é ter afán de superación e estudar moito” (Antía, alumna de 3º de ESO) “ As charlas foron interesantes e aprendemos moito de sobre como son os estudos que se poden realizar para ter unha profesión” (Jonathan, alumno de 3º de ESO). “ A min pareceume unha boa idea facer estas xornadas e quero que se repitan para o próximo curso” ( Christian , alumno de 3º de ESO). “Os Participantes dixéronnos que hai que intentar estudar algo que che guste, xa que vas traballar niso toda a vida e será máis fácil de levar. Tamén nos animaron a estudar moito xa que diso depende o noso futuro”. (Mauro, alumno de 4º de ESO) “Penso que as xornadas foron entretidas, divertidas e puidemos aprender nelas. Gustoume que asistisen os de 1º e 2º de ESO porque así xa van sabendo o esforzo que hai que facer e son aconsellados para poder ter un futuro mellor” (Roberto, alumno de 4º de ESO)
