XIII Certame Escolar de Regueifas do Concello de Vigo (26/4/24)

No día de onte, venres 26/4/24, unha delegación do IES Politécnico Vigo participou no XIII Certame Escolar de Regueifas do Concello de Vigo, nun acto celebrado no Centro Cultural de Valadares, nun auditorio ateigado dunha rapazada entusiasmada. O alumnado representante do noso centro (1º ESO A + B) chegou a este Certame final despois de clasificarse, tras recibir dous obradoiros sobre esta arte improvisatoria galega. Neste evento final, o equipo do Politécnico realizou unha participación moi destacada, pois todos e todas  as nosas representantes subiron ao escenario para botar e improvisar as súas coplas en galego, diante dun auditorio cheo de xente. Desta volta non conseguiron o pase a semifinais, pero non pasa nada; pois, o realmente importante, coma sempre, foi participar e pasar unha xornada de coñecemento e diversión arredor do verso improvisado da regueifa, expresándose na nosa lingua e vencendo os medos de saír a cantar e improvisar diante de 500 persoas.

Desde o EDLG queremos dar especiais parabéns a todo o alumnado participante no Certame e tamén ao resto de compañeiras e compañeiros, que apoiaron desde a bancada en todo momento e que tiveron un comportamento exemplar. Medre a regueifa no IES Politécnico Vigo!

Deixamos en adxuntos un vídeo resumo da xornada de onte.