CEIP de Arzúa

Este venres, 26 de abril as alumnas e alumnos de 2º e 3º E.Primaria participaron nun obradoiro de poesía impartido por Claudia Castro, autora do libro de poemas "Galicia, o país das marabillas".

Este é o segundo ano que nos visita a escritora e, unha vez máis, o alumnado quedou encantado co seu taller.

Moitísimas grazas Claudia por compartir esta mañá connosco!!

Estas fotografías corresponden ao obradoiro impartido ás nenas e nenos de 2º EP. 

Ao rematar, leváronse un mural para a súa clase moi fermoso, onde colocaron os collages que elas e eles fixeron durante o obradoiro. 

Estas fotografías son do obradoiro de 3º A:

Estas fotos son do obradoiro de 3ºB:

Para recibir á primavera, este mes de abril na Biblioteca escolar realizamos un taller de estampado con flores en camisetas cos nenos e nenas de Educación Infantil, dentro do programa de Bibliotecas Creativas.

Esmagando flores e follas coa man dun morteiro, tintamos de forma natural a tela, e todo quedou impregnado do aroma das flores! 

Moitas gracias ás mestras de Infantil pola colaboración neste taller! Podedes ver a publicación no blogue da biblioteca, PREME AQUÍ

No taboleiro de anuncios do centro están publicadas as listaxes de admisión para o curso 24-25.

O alumnado do ciclo de Educación Infantil da EFA Piñeiral estarán contando e lendo contos para os máis cativos na Biblioteca municipal Rosalía de Castro, os días 22,23,24 e 25 de abril (de luns a xoves) de 16:00 a 17:00 h. 

Animádevos a participar nesta actividade!!

O alumnado de Educación Pimaria tivo a sorte de recibir no salón de actos ao dianteiro centro do SD Compostela, Manu.

Tiveron a oportunidade de coñecer máis cousas sobre o deporte profesional da man deste xogador ademáis de falar dos beneficios que ten o deporte.

Entre outras, fixéronlle as seguintes cuestións: desde cando xoga profesionalmente, cantos anos leva neste club, cal recorda que foi o seu mellor e peor partido desde que xoga profesionalmente...

Para rematar, a cada neno e nena entregáronlles unhas entradas para o vindeiro partido do SD Compostela máis unha pulsera como agasallo.

Moitas grazas a Manu e Miguel!

Este luns 15 de abril o alumnado de 3º e 4º de Educación Primaria visitou o museo do Castro de Viladonga situado en Castro de Rei (Lugo). Alí, organizamos por grupos, fixemos catro actividades: 

Visualizamos un vídeo sobre a historia do castro e dos materiais atopados nas excavacións. 

Tamén, participamos nun obradoiro de cerámica. Cada neno e nena tivo que modelar un anaco de barro e decoralo con cenefas semellantes ás atopadas nas vasillas do castro. 

Visitamos cunha guía a croa do castro de Viladonga, así como as súas murallas e fosos. Puidemos ver as diferentes construcións de pedra atopadas ata agora, como vivendas, almacéns... Grazas a esta visita coñecimos como vivían as persoas nos castros.

Ademais, visitamos o museo do castro e coñecimos máis sobre el a través dun xogo de preguntas. Por parellas, tivemos que buscar a resposta a unha serie de preguntas dun cuestionario. 

Este mércores, 20 de marzo, o alumnado de 4º EP visitou o Museo do Pobo Galego.

Despois de escoitar as indicacións da nosa guía, repartímonos en seis grupos e, mediante un xogo de pistas, fomos percorrendo as distintas salas do Museo para buscar a resposta ás preguntas que aparecían no formulario que se nos entregou. Logo de facer a busca, reunímonos no punto de encontro e fixemos unha posta en común.

Máis tarde, achegámonos ata a escaleira helicoidal deseñada por Domingo de Andrade e puidemos admirar a súa beleza. Comprobamos que moita xente quere vela porque é unha escaleira que conta cuns trescentos anos de antigüidade e que sorprende polas súas tres ramplas entrelazadas.

Ao rematar a nosa visita ao Museo, entramos na igrexa do convento de San Domingos de Bonaval para visitar o Panteón de Galegos Ilustres. Alí fixémonos unhas fotos diante do sepulcro de Rosalía de Castro e do sepulcro de Alfonso Daniel Rodríguez Castelao e puidemos comprobar que hai máis persoeiros destacados de Galicia alí enterrados. 

Cando saímos do Museo, fixemos un percorrido polo casco antigo de Santiago e desfrutamos observando as gárgolas que coroan o alto de moitos edificios antigos da cidade, como o Hostal dos Reis Católicos ou a Igrexa de San Martiño Pinario, entre outros.

Foi unha mañá que nos cundiu moito e na que aprendemos unha morea de cousas novas. 

Este venres, 15 de marzo, María Canosa achegouse ata o noso centro para ter un encontro coas nenas e cos nenos de E.Primaria. Co alumnado de 1º e 2º falou do seu libro "Unha fábrica de bicos"; co de 3º, de "Lobo Ramón"; co de 4º, de "Rubicundo"; e, co de 5º e 6º, de "Muriel". 

Durante cada sesión, puido contestar as súas preguntas e desvelar algúns misterios como: en quen se inspirou para escribir o libro, de onde sacou o nome do personaxe principal, cantos libros leva publicados, o motivo polo que escolleu un oficio tan estrano para o protagonista... Ao final tivo un momento para asinar os exemplares de cadaquén. 

Moitas grazas María por compartir esta mañá con nós!!

Na semana do 4 ao 8 de marzo conmemoramos a Semana da Prensa na escola, uns días para recordar na aula a importancia do periodismo.

Desta vez, no mural colectivo, simulamos o formato dun xornal dixital, con noticias de diferentes partes do mundo que foron buscadas en diferentes plataformas dixitais.

Cada aula tivo que construir un puzle para formar a imaxe da noticia e traballar co titular.

Ademais, traballouse nas aulas con diferentes xornais en papel e en soporte dixital, realizáronse actividades relacionadas coa prensa, elaboráronse noticias… que amosamos a continuación.

O 8M como día internacional da muller foi adoptado pola Asemblea Xeral da ONU en 1977. A súa orixe está nas manifestacións das mulleres que, especialmente en Europa, reclamaban a comezos do século XX o dereito ao voto, mellores condicións de traballo e a igualdade entre homes e mulleres. 

Aínda que se conseguiron moitos dereitos, temos que seguir loitando pola súa consolidación e avanzando cara unha sociedade cada vez máis igualitaria.

Nesta semana, no noso colexio fixéronse moitas actividades que se foron plasmando en diferentes murais e traballos de aula. 

Deixámosvos aquí unha pequena mostra deles:

Todo o alumnado de E.Infantil realizou este mural:

O alumnado de 6º EP, da sección bilingüe de Plástica, fixeron este traballo: