Un libro para todes...coa nosa Feira da expurga!

Este curso tocaba facer unha expurga de libros na nosa biblioteca escolar, e aproveitamos este evento para organizar unha Feira do libro coincidindo coa semana do libro.

Con esta feira, quixemos asegurarnos de que todos os nenos e nenas do cole, dende EI ate EP, poidesen escoller un libro que levarían como agasallo para a súa casa, atendendo aos ODS (Obxectivos de Desenvolvemento Sostible) da Axenda 2033, e así darlles acceso a diversos materiais de lectura como contos, libros didácticos, libros con pictogramas...

 

 

 

 

 

Agardamos poder realizar unha nova Feira do libro o próximo ano e que recibades con tanta ilusión outro libro para darlle unha segunda vida.

Mural coas fotografías do concurso "Dentro das paisaxes"

Xa temos exposto o mural coas fotografías tan preciosas que entregaron os nenos e nenas que participaron no concurso de fotografía. 

A fotografía do gañador queda enmarcada e ao seu lado podemos ver a pintura orixinal na que se inspirou o participante; toda unha paisaxe galega que representa o especial que é o noso fogar.

 

 

Podedes ver todas máis fotografías do mural no blogue, PREME AQUÍ

 

Moitas grazas pola participación, e lembrade que mañá, xoves, no recreo, entregaremos os premios e o detalle a todos os participantes.

 

VICKY VISITA O NOSO CENTRO PARA TRABALLAR CON NÓS O LIBRO "NUBE DE NEVE"

O alumnado de 1º e 2º E.Primaria leu este curso o libro de Xabier P. Docampo, que leva por título "Nube de neve". 

Este venres, 2 de xuño, a contacontos e actriz Victoria Pérez Varela, achegouse ao noso centro para traballar con estes nenos e nenas dito libro. Para iso botou man dalgúns voluntarios e voluntarias que se converteron por uns intres en actores e actrices que representaron dous dos contos do libro.

Foi unha mañá moi divertida!!

         

                     

Resolución do concurso de fotografía "Dentro das paisaxes"

 Bo día!

 

Xa temos a resolución do concurso de fotografía da Biblioteca escolar: "Dentro das paisaxes". A continuación expoñemos os gañadores e gañadoras do primeiro premio e dos segundos premios, que entegaremos na Biblioteca no recreo o Xoves 8 de xuño. 

Precisamos que asistan no recreo todos/as participantes do concurso xa que temos un certificado e un detalle para todos e todas os que vos animastes a participar, grazas polo voso esforzo e creatividade!

 

1º PREMIO:

 Raúl García, 2ºA

 

2ºs PREMIOS:

Sara Villar, 1ºB

Carme Rendo, 5º

Pablo Soutullo, 3ºB

 

A verdade é que foi moi difícil escoller porque quedamos moi sorprendidas coa vosa creatividade! Lembrade, o Xoves 8 tedes que vir TODOS OS PARTICIPANTES na hora do recreo á biblioteca.

Ademais, o mércores quedarán expostas todas as vosas fotografías no mural que hai na zona exterior da biblioteca, o recuncho "chill out", para que todo o centro admire o voso traballo tan fermoso. Subiremos unha fotografía da exposición para que a poidades ver dende as vosas casas tamén.

 

Noraboa!!

 

 

NAVEGA CON RUMBO

Navega con rumbo é un programa encamiñado a guiar ao alumnado cara unha navegación segura. 

O alumnado de 5º e 6º de primaria tivo a oportunidade de asistir a unha charla deste programa o día 26 de maio.

Nela tratáronse aspectos como:

- Perigos de Internet: a perda da intimidade e da confidencialidade, a información falsa, o illamento social, o ciberbullying e o ciberacoso.

- Como protexer o noso ordenador: información cifrada, buscar contrasinais seguros...

Xuntos chegamos á seguinte conclusión: Internet en si non é perigoso, pero pode ser perigoso o que esconde detrás.

 

 

CHARLA SOBRE O ACOSO ESCOLAR

Con motivo do Día Internacional contra o Acoso Escolar, o 3 de maio o alumnado de 5º e 6º EP participou nunha charla enmarcada dentro do Plan Director. Nela tratáronse diferentes temas como:

- Tipos de bullying: físico, verbal, psicolóxico e social.

- Comportamentos típicos do bullying.

- Ciberbullying.

- Consecuencias penais e civís.

Coma sempre, Óscar empregou vídeos ilustrativos que facilitaron que o alumnado comprendese mellor esta realidade.

 

VISITA AO MUNCYT NA CORUÑA (3º A, 3º B, e 4º de EP)

O alumnado de 3º A, 3º B e 4º de Educación Primaria visitou o MUNCYT (Museo Nacional de Ciencia e Tecnoloxía) na cidade da Coruña.

Este museo conta cun programa de actividades deseñadas para achegar aos escolares algúns aspectos das diferentes disciplinas científicas e tecnolóxicas a través da colección do museo.

Realizamos unha visita guiada polas diferentes salas do museo, onde puidemos ver expostos diversos obxectos e instrumentos que nos permitiron descubrir e comprender o progreso científico e tecnolóxico ao longo destes anos.

Ademais, tivemos a sorte de poder ver a parte dianteira e tren de aterrizaxe do Boeing 747 que trouxo a España “El Guernica” de Picasso.

Logo, realizamos un taller de electricidade onde fomos capaces de construir o noso propio circuito eléctrico para conseguir acender unha bombilla.

Xantamos no comedor das propias instalación do museo, e tivemos un tempo de ocio con vistas á Praia do Orzán e a Torre de Hércules.

Unha xornada moi divertida!

AS LETRAS GALEGAS NO CEIP DE ARZÚA_CURSO 22-23

Con motivo da conmemoración das Letras Galegas, son moitas as actividades que se están a levar a cabo nas diferentes titorías do colexio. 

Neste mural colectivo, que se colocou na entrada do centro, puxemos unha mostra das caricaturas de Francisco Fernández del Riego que fixo o alumnado de 1º, 2º e 4º EP, acompañadas dun traballo aportado por cada titoría do centro,  que recolle un elemento da nosa cultura ao que o escritor lle dedicou unhas palabras, que reproducimos ao lado do debuxo correspondente (o hórreo de Carnota, a torre de Hércules, a gaita galega...). En quinto e sexto de EP reproduciron as portadas dalgúns dos libros máis famosos do autor homenaxeado.

Deixámosvos aquí algúns dos traballos realizados polo noso alumnado. 

  

    

     

 

TEATRO GHAZAFELHOS PRESENTA A SÚA OBRA H2...OH!

Trátase dunha peza teatral baseada no libro do mesmo título de María Canosa. Nela, unha divulgadora científica e dous doutores, Marie Curie e Pierre Curie, achégannos ás curiosidades científicas que experimentamos no noso día a día.

Sabías que os cascos protectores inventáronos os paxaros? Ou por que a auga e o aceite non se mesturan? Ou por que a Torre Eiffel é máis alta no verán? Estas son algunhas das curiosidades ás que deron resposta! A loucura destes científicos e a extravagancia dos seus experimentos fixeron as ledicias das nenas e nenos de E. Primaria que asistiron ao espectáculo; potenciando o alicerce de toda ciencia: a curiosidade.

  

  

  

  

 Esta actividade foi financiada polo Concello de Arzúa.

Powered by Drupal - Design by artinet