O martes 9 de maio, o alumnado de 1º da ESO realizou unha saída ao Castro de Viladonga onde estiveron toda a mañá. Alí dividíronse en dous grupos para realizar diferentes actividades: mentres un grupo realizaba un taller de numismática, o outro grupo visitaba o museo. A media mañá, que saíu o sol, fixeron un descanso ao aire libre, para, posteriormente, visitar a croa do castro. Seguidamente cambiaron os papeis e o grupo que visitou o museo, realizou o taller, e viceversa. Unha mañá estupenda, moi práctica e educativa.

Preme para ver o vídeo

Co gallo do Día de Europa, o alumnado de francés de 3° ESO fixo unhas pescudas na rede para preparar unha exposición informativa que foi instalada na biblioteca.  Como se pode comprobar, unhas sinxelas mesas poden ter usos variados, xa que hoxe fan a función de paneis informativos verticais. En Castroverde non temos petróleo pero temos ideas!

O venres 5 de maio, o grupo de 1º da ESO visitou á Cova da Valiña, en Bolaño. Esta actividade foi posible grazas á amabilidade do grupo arqueólogos e unha arqueóloga que estiveron traballando nela durante unha semana. O doutor da Universidade de Santiago de Compostela, Arturo de Lombera, facilitounos a visita e explicoulle ao alumnado os principais achados descubertos na cova. Están buscando evidencias da presencia humana na cova, na que se atopan moitos restos de animais que viviron nela durante o paleolítico superior (hienas sobre todo, pero tamén ósos, raposos, corzos...) pero poucas evidencias humanas (instrumentos líticos) e ningún óso humano, o que impide saber con certeza de si se trataba de neandertais (como se indica no cartel) ou, o que parece máis probable, se trata de homo sapiens sapiens. Outros arqueólogos ensináronnos, no antigo colexio de Bolaño, os ósos e a industria lítica atopada.
Grazas a todo o equipo pola súa amabilidade, polo seu tempo e pola experiencia tan interesante que nos permitiron vivir.