Inspección do río Barranqueira de Ponte Nova

O 3 de outubro o alumnado de bioloxía, xeoloxía e ciencias ambientais de 1º de bacharelato participou na inspección do estado do río Barranqueira da Ponte Nova, situado preto do instituto. Con esta actividade o noso centro colabora no Proxecto Ríos, unha iniciativa que pretende concienciar e educar na defensa dos nosos ríos. 

Os alumnos e alumnas analizaron parámetros físico-químicos e fixeron unha recollida e identificación de macroinvertebrados, animais bioindicadores que se empregan para determinar a calidade ecolóxica do río.