CHARLA DE PREVENCIÓN DE ADICIÓNS NA XUVENTUDE

 

A asociación AGALURE de persoas afectadas pola ludopatía ofreceu unha charla sobre as diferentes formas de adicións  sen substancias coma o xogo virtual e as apostas. Presentaron ao alumnado as diferentes problemáticas que se desencadean a nivel persoal , familiar e social debido a estas condutas nocivas.   Esta charla ten un carácter preventivo e de difusión dunha realidade cada vez  máis frecuente entre os mozos e mozas describindo as consecuencias que pode ter o xogo descontrolado.

 

PREMIOS EMPRENDE XOVE-MINIMARKET

 

O alumnado de 4º de Educación Secundaria que cursa a materia de Economía e emprendemento vai participar no proxecto Emprende Xove, organizado pola Asociación de Jóvenes Empresarios de Ferrolterra. Os Premios Emprende Xove - Minimarket buscan fomentar o espírito emprendedor entre o estudantado e axudar a reforzar a acción formadora no ámbito empresarial que lles brindamos dende os centros. 

 O programa consiste en que unha/un alumna/o ou un grupo dun máximo de 5 desenvolva unha idea de negocio ficticia que estea caracterizada pola innovación e a orixinalidade. Este proceso irá acompañado duns obradoiros impartidos dende AJE Ferrolterra en horario lectivo co obxectivo de que o alumnado lle saque o maior partido ao seu proxecto. Finalmente, os participantes presentarano nun formato feira, onde un xurado elixirá aos gañadores das distintas categorías.

AGRADECEMENTO Á ANPA BRIXEO

 

Dende o IES Moncho Valcarce queremos agradecer ás representantes da ANPA BRIXEO a súa participación e colaboración na celebración do Samaín 2023.

Grazas!!!

SAMAÍN 2023

 

 

Un ano máis celebramos a festa do Samaín. Espíritos, bruxos e bruxas, cabazas, esqueletos e seres da nocturnidade deambularon polo noso centro para recordarnos que están entre nós, aínda que ás veces non os vexamos con claridade... Feliz Samaín 2023 a tod@s!!!

 

VISITA A GAIRESA

 

 

O alumnado de 2º curso do Ciclo Superior de Laboratorio de Análise e Control de calidade visita a empresa GAIRESA con obxecto de achegarse ao ámbito industrial da contorna en relación á formación que están a recibir. Na visita puideron coñecer os inicios, evolución temporal, investigacións, deseños de novos produtos e aplicacións de GAIRESA e ademais visitaron os laboratorios de Control de Calidade, Investigación Química e Ensaios Físicos que lles permitiron poñer en práctica gran parte dos contidos teóricos traballados no centro.

CLUB DE LECTURA 2024

 Como todos os anos, o club de lectura de adultos concede a oportunidade de participar da lectura compartida a pais, nais, profesores e persoal non docente. A dinámica é sinxela: escollemos unha ou dúas novelas por trimestre, que lemos na casa, e fixamos unha reunión trimestral para poñer en común as nosas percepcións da obra. Nesta convocatoria a reunión vai ser un venres de 12:10 a 12:30. 

Se precisas máis información ou queres anotarte, contacta con Diana Aradas (coordinadora da actividade) chamando ao centro os xoves de 10:30 a 11:20. 

 

VISITA A SOLOGAS E SOGARISA

 

O mércores 18 de outubro as/os alumnas/os de Tecnoloxía de 4º ESO e os de Tecnoloxía e Enxeñaría de 1º e 2ºBAC realizaron unha visita ás plantas de Sologas e Sogarisa nas Somozas. Na primeira puideron comprobar como a partir de refugallos procedentes de supermercados, excedentes da industria cosmética, restos de matadeiros... pódense obter materiais con valor engadido como compost, fertilizantes ou mesmo biogás, que coa próxima ampliación da planta, comezarase a comercializar como combustible para vehículos. En Sogarisa coñeceron o tratamento que se lles dá aos residuos industriais, na súa maioría procedentes das industrias farmacéutica e química, que deben ser transformados en residuos inertes antes de almacenalos nos vertedoiros cos que conta a empresa, que tamén puideron visitar, dous deles xa selados e o terceiro en proceso. Sen dúbida unha visita que nos serviu para concienciarnos da importancia de reducir o noso consumo e facelo de xeito máis responsable.

 

BO CURSO 2023-2024

A Comunidade educativa do I.E.S. MONCHO VALCARCE desexa un bo e proveitoso curso!!!

 

MOBILIDADE AOS PAÍSES BÁLTICOS (ERASMUS+)

                     

                                        

Durante os días 4 e 9 de xuño do curso 2022-23, un profesor do Departamento de Bioloxía e Xeoloxía e participante no Club de Ciencia do IES Moncho Valcarce, realizou unha mobilidade aos países bálticos (Lituania e Estonia) dentro do programa Erasmus+ da Xunta de Galicia, a cal foi organizada polo CFR de Ferrol.

Esta actividade formativa de profesorado tivo como principais obxectivos a formación nun país estranxeiro no uso da robótica e outras actividades STEM no ámbito educativo, así como o coñecemento doutros sistemas educativos dentro do ámbito europeo. Secundariamente foi unha oportunidade excepcional para mellorar a competencia lingüística do profesorado, así como unha forma de establecer contactos no ámbito educativo non só no estranxeiro senón tamén entre as persoas participantes.

A primeira actividade formativa realizada o día 5 de xuño, o profesorado participante tivo a oportunidade de visitar e reunirse con representantes do Ministerio de Educación, Ciencia e Deporte de Lituania, na cidade de Vilna, onde se plantexaron dúbidas, ideas e experiencias do noso sistema educativo e do propio de Lituania. Ese mesmo día realizouse unha visita a un centro educativo de secundaria de referencia na mesma cidade, o Vilnius Pilaite Gymnasium.

Nos días seguintes, os asistentes estiveron na cidade de Tallin (Estonia), onde recibiron formación na Universidade de Tallin sobre o sistema educativo estoniano, así como un taller sobre o uso de robots no eido educativo, practicando e recoñecendo diferentes modelos que poden empregarse en diferentes etapas educativas dentro e fóra das aulas. Tamén foi nesta cidade, onde se visitou o parque temático de divulgación sobre inventos e ciencia PROTO invention factory, onde se fan talleres con grupos escolares no ámbito STEM.

En resumo, esta actividade foi unha excelente oportunidade para a formación do profesorado no ámbito STEM que seguro será de proveito na realización de novos proxectos co alumnado dentro e fóra da aula, como no caso do Club de Ciencia do instituto.

                                    

 

FESTIVAL FIN DE CURSO 2022-2023

 

 

Se queredes ver un vídeo resumo do festival tedes que premer na foto. 

Un ano máis despedimos o curso cun festival no que participou alumnado de todos os niveis da ESO. Resultou unha mañá diferente, onde o noso alumnado demostrou as súas habilidades artíticas. Felicitacións para todo o alumnado e profesorado  participante.

Boas vacacións para toda a Comunidade Educativa!!!

  

Distribuir contido