Achegamos a seguinte información relativa ao fin de curso para 2º de Bacharelato:

- Calendario de exames finais.

- Calendario fin de curso 2º de Bacharelato.

- Circular 2/2012 sobre proceso reclamacións.

Tardamos tanto en escribir esta entrada, que xa non creo que se lembren do tute que levaron. O pasado 21 de marzo trinta e catro valentes alumnas e alumnos, acompañados de dous esforzados profesores, embarcáronse nunha viaxe de quince horas de autobús con destino a París. Mirando de non quedaren entalados pararon en Poitiers a desfrutar do Parque Futuroscope. E seguiron camiño cara a Cidade da Luz (ou, se preferides, do Amor). Velaí os turistas todos, posando no Hard Rock Café (dese da camiseta negra que está arrimado a árbore non respondemos):
Falar non sei se falarían moito francés, mais en París non deixaron ningún monumento por visitar, nin se atenderían moito ás explicacións: foron á Torre Eiffel, á Defense, ao Sacre Coeur, o Louvre, o Concello de París (na foto de abaixo), o Palacio de Versalles...  Na segunda noite deron un paseo en bateau-mouche, que vós vén sendo un barco que fai un cruceiro nocturno polo río Sena, que romántico!  Na véspera da saída, o martes 26 despediron a viaxe en Eurodisney: ao día seguinte tocaban outras tantas horas de viaxe de volta. Con razón había o xoves 28 moitas caras de sono polo instituto adiante.

Tamén por eses días, o luns 26 de marzo, o alumnado de Latín de 1º de Bacharelato e os de Ciencias Sociais de 2º de ESO foron a Lugo para ver a exposición Romanorum Vita. Esta exposición trata de recrear a vida cotiá nunha cidade dos tempos do Imperio Romano. Para completar a actividade, visitaron algúns dos restos romanos que se conservan na cidade de Lugo, como a muralla. O alumnado de 1º Bacharelato, xa pola tarde, foi á Escola de Artes Ramón Falcó, onde recrearon en cerámica dúas obras do pintor galego Luís Seoane. Por certo que prometeron que nolas regalarían para decorar o instituto!

Axudas para participar nun programa de inmersión lingüística en colonias de vacacións.

Informamos da convocatoria por parte do MINISTERIO DE EDUCACIÓN, CULTURA Y DEPORTE de 2.200 axudas para participar nun programade inmersión lingüística en colonias de vacacións para o verano de 2012.

Estas estancias terán unha duración de dúas semanas durante o mes de agosto de 2012.

Estas axudas distribúense a súa vez en dous grupos: primeiro e segundo, de acordo cos requisitos que para cada un deles se establecen no apartado seguinte:

– 1.320 axudas de ata 476 € para o grupo primeiro.

– 880 axudas de ata 326 € para o grupo segundo.

1. Requisitos xerais que deberán cumprir todos as/os solicitantes:

a) Poderá optar a estas axudas o alumnado matriculado no centro no presente curso 2011/2012 en 1º da ESO.

b) A idade das/os participantes non poderá superar os 13 anos a data 31 de decembro de 2012.

2. As/os solicitantes que a data 31 de decembro de 2011 se atopen nalgunha das seguintes circunstancias, integrarán o denominado grupo primeiro:

a) Orfandade absoluta da/o solicitante.

b) Pertencer a familias nas que algún membro este afectado de minusvalía legalmente cualificada (en grado superior ao 65% para pai/nai/irmáns do solicitante e superior ao 33% no caso de que a padeza o propio solicitante).

c) Pertencer a familias cuxo sustentador principal se atope en situación legal de desemprego ou teña recoñecida a incapacidade permanente absoluta.

d) Pertencer a familia numerosa.

e) Pertencer a familia monoparental, cuxo sustentador principal sexa viúvo/a, pai ou nai en estado solteiro ou de divorcio, separación legal ou de feito.

3. As/os solicitantes que, reunindo os requisitos xerais, non se atopen en ningunha das circunstancias do apartado anterior formarán parte do denominado grupo segundo da convocatoria.

A contía das axudas abonarase directamente ás empresas que resulten adxudicatarias do concurso público.

Non obstante o anterior, para completar o prezo total do programa, os beneficiarios pertencentes ao primeiro grupo abonarán50 euros á empresa que resulte adxudicataria. No caso de que pertenzan ao segundo grupo a cantidade a abonar será de 200 euros.

Solicitudes: Quen cumpra os requisitos dos apartados anteriores e desexen obter unha das axudas convocadas deberán cumprimentar en todos os seus apartados o modelo de solicitude cos datos da/oalumna/o solicitante, que figura na seguinte ligazón:

-Máis información e solicitude.

-Texto da convocatoria.

O prazo de presentación de solicitudes finalizará o día 25 de abril de 2012

Si, é certo, quedamos de últimos... E que? Coñecemos xente doutros institutos, convidáronnos a unha opípara comida e aprendemos a falar en público e a defender as nosas posturas con argumentos. Ademais, hai que recoñecer que os do Monte Caxado foron xustos gañadores.

O sábado celebrouse a sesión comarcal da Liga de Debates que organizan os Servizos de Normalización Lingüística dos concellos galegos. Pola mañá tocounos defender diante do Saturnino Montojo de Ferrol por que a democracia actual non permite a participación cidadá. Os nosos argumentos xiraron arredor das listas abertas, das novas formas de democracia e da necesidade de que as persoas que participen na política o fagan de forma voluntaria e atendan a medrar
Pola tarde, tocounos defender a posición contraria. Desta volta falamos de que a democracia é un sistema político polo que as sociedades levan pelexando moito tempo (e aínda seguen), que é o sistema que garante unha mellor calidade de vida e de que en ámbito como o municipal a participación cidadá é unha realidade desde hai tempo, por medio dos presupostos participativos ou das asociacións veciñais.
Non foi suficiente. Os nervios, os exames dos últimos días que nos impediron preparar o debate tanto como teríamos querido, os imprevistos de última hora... Outro ano será!

Había quen parecía laiarse por non ter apurado máis:

De todas maneiras, as nosas rapazas e rapaces correron con ansia no Cross de Iniciación ao Atletismo que se celebrou a mañá do venres 9 de marzo na Fraga. A organización correu do Club de Atletismo Olympo, a asociación de ANPAS Abrente e o Concello e nos puxemos algúns dos gañadores. Velaí os do noso centro:

• Alba Antúnez (na foto de arriba): 3ª en Infantil Feminino.
• Martín García: 2º en Infantil Masculino.
• Andrea Pichel: 2ª en Cadete Feminino.
• David Tonislavov: 1º en Cadete Masculino.
• Ángel Caínzos: 2º en Cadete Masculino.

A todas e todos os que non gañastes, non vos preocupedes: bótase a ver na foto que polo menos escorrentastes o frío! Se quedastes con ganas de máis, lembrade que a mañá do domingo 19 de marzo, terá lugar no mesmo escenario a XII Carreira de San Xosé.

Ademais disto, o 8 de marzo celebrouse o Día Internacional da Muller Traballadora. No centro lembramos esta data cunha exposición de libros de temática feminina. Ademais, durante as vindeiras semanas o persoal de Servizos Sociais do Concello traballará nas aulas co alumnado da ESO para achegarlles todo o que aínda queda por facer para conseguir a igualdade entre homes e mulleres.

Informamos da convocatoria por parte da Consellería de Educación de axudas para realizar estadías de formación en Inglés ou Francés para o alumnado durante o ano 2012.

Poderá solicitar a participación nas actividades convocadas e ser beneficiario destas axudas o alumnado do centro que cumpra os seguintes requisitos:

* Ter superadas todas as materias no curso 2010-2011.

* Ter acadado no curso 2010-2011 unha cualificación mínima de 6 na materia de lingua estranxeira que se vai perfec­cionar na estadía.

* Non ter concedida, no presente curso académico, outra axuda coa mesma finalidade.

* Non estar incursos nas prohibicións para obter a condición de beneficiario, recollidas no artigo 10 da Lei 9/2007, do 13 de xuño, de subvencións de Galicia.

* Ter DNI, NIE, pasaporte, visado ou tarxeta de residencia en vigor, segundo corresponda.

 O prazo para a presentación de solicitudes será ata o 7 de abril.

 Para máis información sobre a convocatoria ou para tramitar a solicitude ver os seguintes enlaces:

Web da convocatoria: http://www.edu.xunta.es/axudasle

Documento coa convocatoria completa

Cartel informativo

Enderezo electrónico: axudasle@edu.xunta.es

Xa estamos na Coresma e aínda non falamos do Entroido.

O día antes das vacacións de Entroido, o venres 17, foi un continuo ir e vir de disfraces. Ás doce chegaron os freixós que reparte o Concello. Algún quedou sen eles, porque foron devorados por un alumnado famélico en cuestión de media hora.

Ás doce e media comezou o desfile de comparsas. O acto estivo presentado por Emilio e Iago, de 2º de Bacharelato, que se inventaron para a ocasión un novo superheroe: Musulman! Un disfraz moi orixinal, como vedes na foto.

As gañadoras do desfile foron Sara e Patricia, de 2º de Bacharelato, que fixeron un playback moi logrado de Marta Sánchez e Carlos Baute. Os segundos premios foron para os Froitos Secos (1º ESO), os Gardacostas (1º Bacharelato), os Pataqueiros (1º Bacharelato) e as Damas de Época (2º Bacharelato, na foto). Aproveitamos tamén para entregar os premios ao concurso de Declaracións de Amor que organizou o EDLG con ocasión do día dos Namorados.

Ao remate do desfile, mostramos nun karaoke as mellores voces do centro (xa van quince días e aínda non choveu).  

Agradecémosvos a todos a vosa participación, moi en especial aos presentadores, Diana, Rubén, Andrea e Ana, que controlaron o son do evento, e Cristina e Salomé que gravaron e tomaron fotografías da actividade.

Ah! Case me esquezo... Antes do desfile as seleccións femenina e masculina de fútbol sala do centro foron ao centro veciño, o Castro de Uz, a desputar un partido intergaláctico. Menos mal que as rapazas gañaron con solvencia, porque dos rapaces mellor nin falamos...

 RESERVA DE PRAZA E ADMISIÓN CURSO 2012-2013

 A solicitude de reserva para o alumnado dos cenrtos adscritos formalizarase nas seguintes datas:

• Reserva para cursar 1º de ESO: Do 1 ao 15 de febreiro de cada ano, presentando o anexo I da Orde do 17 de marzo de 2007.

A solicitude de admisión para o alumnado procedente doutros centros  formalizarase nas seguintes datas:

• Reserva para cursar 2º, 3º e 4º de ESO e Bacharelato:(só os alumnos que veñen doutro centro) Do 1 de marzo ao 10 de abril , presentando o anexo II da Orde do 17 de marzo. Para o alumnado do centro, a reserva de praza farase automaticamente.

MATRÍCULA

A matrícula farase do 25 de xuño ao 10 de xullo para o alumnado que teña todo aprobado na convocatoria de xuño. Para o alumnado que teña exames de recuperación en setembro será do 1 ao 10 de setembro (despois da avaliación).

Toda a información relativa a estes procesos, incluídos os distintos prazos e calendarios, pode consultarse no taboleiro de información do centro e nos seguintes arquivos:

Información xeral

Información proceso de reserva

Información proceso de admisión

Se a semana de volta ás clases foi de calma, esta estivo chea de actividades:

Nos tres primeiros días, Teresa, da Asociación Acivros, impartiu ao alumnado de 2º, 3º e 4º da ESO uns obradoiros sobre marxinalidade. Estes obradoiros quedaron encadrados dentro das materias de Ciencias Sociais e Ética, posto que tratábamos de transmitirlle ao alumnado cales son os sentimentos e preocupacións das persoas que carecen de recursos económicos, que perspectivas teñen de saír desa situación e cales son as causas que as levan a caer na pobreza extrema.

O tema interesoulles moito aos nosos estudantes. Moitos deles descoñecían a situación destas persoas e tiñan moita curiosidade en coñecer como afrontan as súas vidas as persoas que carecen de cousas (casa, cartos, traballo...) que todos consideramos fundamentais para levar unha vida digna.

O martes 17 o alumnado de 2º ESO e 4º C desprazouse ao Auditorio de Galicia, en Santiago de Compostela. A Real Filharmonía de Galicia andaba a ensaiar a 8º Sinfonía de Beethoven e os nosos rapaces foron comprobar que tal o facían.

O mércores tocou patinaxe sobre xeo. Trinta e un rapaces de 1º ESO foron ao Coliseum da Coruña: mellor ou peor parece que conseguiron manterse en pé, copiando o magnífico estilo das súas profesoras.

Supoñemos que a idea era ir practicando para cando lles toque a viaxe ao Pireneo: este domingo un grupo de rapaces de 3º e 4º da ESO e 1º de Bacharelato marchan en bus para esquiar toda a semana.