E por fin chegou o esperado día do desfile do ENTROIDO no cole. 

STOP CAMBIO CLIMÁTICO FOI O TEMA ELEXIDO

POIS COA COIDADO DA NATUREZA ESTAMOS COMPROMETIDOS!!

PI, PI, COMO CONTAMINAMOS! - Unha das primeiras causas do quecemento global é a contaminación polas emisións de dióxido de carbono que danan a capa de ozono que protexe a Terra.  Os medios de transporte son un dos grandes emisores destes gases…

OS DE PRIMEIRO COS SEUS COCHES ESPECTACULARES

VAN CONTAMINANDO CIDADES, ALDEAS E LUGARES

POR TODAS PARTES, RUÍDOS E POLUCIÓN,

ISO XA NON QUEREMOS, NON, NON.  

CO QUECEMENTO GLOBAL, MÁIS GRANDE O VENDAVAL - Como consecuencia da expulsión de gases por parte de coches, industrias, barcos, avións… estase producindo un quentamento global da Terra que provoca que cada día en algún lugar do mundo se produzan catástofres naturais...

COMO VEÑEN OS DE SEXTO DESPOIS DO GRAN VENDAVAL,

ONDAS DE METROS, VENTOS FURACANADOS, VAIA TEMPORAL!

BORRASCAS, TREBOADAS, CICLOXÉNESES E “DANAS”,

CAUSAN PERDAS DE VIDAS E ESTRAGOS TODAS AS SEMANAS.!!

NO VERÁN VAI FRÍO, NO INVERNO VAI CALOR - As estacións tamén están cambiando,  todo vai ao revés, os Polos estanse derretendo, cae sarabia ao lado do mar, nos invernos xa non xea, as sequías son terribles…

A RAPAZADA DE QUINTO NON SABE QUE ROUPA PÓR,

NO INVERNO VAI FRÍO, NO VERÁN VAI CALOR,

MIÑA NAI, QUE POÑO HOXE, CHOVERÁ OU SAIRÁ O SOL?

ABRIGO, BUFANDA, SANDALIAS, PARAUGAS OU PARASOL?? 

AUGAS CONTAMINADAS - Outro dos grandes problemas é a eliminación dos residuos, sobre todos dos plásticos, e a contaminación das augas. Plásticos e lixo enchen mares, ríos, lagos, regatos… provocando a súa contaminación e a morte dos animais que viven neles on nas súas ribeiras…  

OS CATIVOS DE CATRO ANOS, POBRIÑOS COMO VAN,

AS AUGAS CONTAMINADAS QUE MÁGOA DAN!!

OS PESCADORES PESCAN LIXO NAS SÚAS CANAS E REDES

PLÁSTICOS E PORCALLADA NAS AUGAS VEREDES!!

ANIMAIS EN PERIGO DE EXTINCIÓN - Ademais dos seres humanos quenes sofren as consecuencias deste cambio climático son os animais, estamos destruíndo o seu hábitat e provocando a extinción de moitas especies...

PEQUENOS E PEQUENAS DE 5 E 3 ANOS, VEÑEN COA SÚA REINVIDICACIÓN:

QUE SE PROTEXAN AOS ANIMAIS E SE PARE A SÚA EXTINCIÓN!!

OS ICEBERGS DERRÉTESEN NOS POLOS E OS PINGÜÍNS DESAPARECEN, 

OS KOALAS NAS SELVAS DE AUSTRALIA COA FORTE SEQUÍA ESMORECEN...

Paremos xa este cambio, aínda estamos a tempo de rectificar.

Na escola, na casa, na aldea e na cidade temos que empezar,

Busquemos entre todos solucións, o noso planeta hai que salvar.

Reducir, reutilizar, recuperar e reciclar xa sen tardar!!

MÁIS ENERXÍAS RENOVABLES - Estamos esgotando os recursos da Terra, temos

que utilizar outras enerxías alternativas que ademais non contaminen…

NENOS E NENAS DE TERCEIRO XA ATOPARON SOLUCIÓN,

ENERXÍAS RENOVABLES PARARÁN A POLUCIÓN!!

A ENERXÍA LIMPA DA AUGA, DO SOL E DO VENTO

UTILIZAREMOS PARA PARAR ESTE QUECEMENTO!!

DAMAS E CABALEIROS RECICLADOS - Nas nosas mans tamén están actuacións

que axuden ao noso planeta: menos consumismo, utilizar transporte público, mercar

coches eléctricos, consumir máis froitas e verduras e sobre todo reutilizar…

CABALEIROS E DAMAS DE CUARTO VAN MOI AXEITADIÑOS,

CON ROUPA REUSADA, PAPEIS E CDS, QUE BEN VESTIDIÑOS!!

MERCAR E MERCAR, TEN QUE ACABAR

REUTILIZAR E RECUPERAR, CANTO PODE AXUDAR!!!

COMANDO RECICLAXE - Outra das solucións é a da reciclaxe, darlle outra vida aos

refugallos e cousas que xa non utilizamos, con iso aforramos materias e enerxías…

QUE SOLUCIÓN NOS TRAEN OS DE SEGUNDO!!

RECUPERAR E RECICLAR PODEMOS TODO O MUNDO!!

PAPEL E CARTÓN, VIDRO E MEDICAMENTOS , 

ROUPA, PLÁSTICOS E PILAS, RECICLAREMOS A CENTOS!! 

Ao rematar o noso desfile cantamos e bailamos a canción de MACACO titulada MOVING que é unha chamada para sensibilizarnos sobre o coidado do planeta Terra no que vivimos. E que di que todos xuntos podemos acadar o soño, que pequenos movementos e accións individuais ao unirse poden provocar reaccións e repercusións globais, a unión de todos pode axudar a salvar á Nai Terra. 

Rematado o Entroido, deixámosvos as imaxes da semana coas ORDES DO MECO. Coma todos os anos os nenos e as nenas foron moi obedientes e seguiron ao pé da letra os mandados do MECO, enchendo de cor e alegría aulas e corredores. Aquí tedes as imaxes maís representativas:

1- O luns no cole, vaia invasión tivemos de deportistas...

ximnastas, tenistas, corredores, atletas e moreas de futbolistas!!

2- O martes preguntamos... que vos gustaría ser de maiores?

Bombeiros, policías, cociñeiros, panadeiros...  ou pintores?

3- O mércores os pacifistas "hippies" encheron todo de cores...

gafas, cintas, pantalóns e camisas cheas de flores!

4- O venres como  temos que deixar de malgastar 

un disfrace antigo todos tivemos que volver a usar!!

E comezamos a semana do entroido coas tradicionais ORDES DO MECO, atentos, comezamos o LUNS vestidos dalgún DEPORTE  e remataremos o venres co noso desfile STOP CAMBIO CLIMÁTICO!!!

O pasado 7 de febreiro os alumnos e alumnas de 5º curso de Educación Primaria acudiron ao Liceo de Ourense para participar na actividade ENCONTROS CO/A AUTOR/A, encontros promovidos polo Concello de Ourense e que forman parte do seu programa de ANIMACIÓN Á LECTURA.

A finalidade destes encontros é a de poñer en contacto aos nenos e nenas cos escritores e escritoras para que coñezan de preto o seu traballo e poden dialogar con eles  sobre todas aquelas cuestións que lles interesen relativas a ese autor e a súa obra. 

Este ano o encontro foi co escritor HÉCTOR CAJARAVILLE e os rapaces e rapazas leron previamente nas aulas o seu libro KUSUMA. 

No blog da biblioteca podedes ler como se desenvolveu o encontro e ver as fotografías do mesmo, para iso premede nas seguintes imaxes:

O 3 de febreiro os nenos e nenas de 1º e 2º de Educación Primaria acudiron ao  Auditorio Municipal para presenciar a obra teatral (que combina actores con monicreques) titulada SAFARI e que representou a compañía LA BALDUFA COMPANYIA DE COMEDIANTS. 

Piñote e Calabacín son dous exploradores que se trasladan á sabana para investigar sobre a misteriosa desaparición do león. Na súa tarefa de investigación interrogan á xirafa, ao mono, ao elefante, ao crocodilo... e acaban atopando ao pobre león, decaído, pensativo e que non sabe ruxir. Piñote e Calabacín intentarán botarlle unha man e averiguar cales son os motivos do seu pesar. Por que todos os animais se empeñan en molestalo?..  Esta é a historia da que parte a obra e que trata de facer reflexionar aos nenos e ás nenas sobre o problema do acoso escolar. 

"Os nenos e as nenas poden entender as súas ameazas a partir do comportamento do crocodilo, do león, e tamén do da xirafa, do mono e do elefante. A preocupación de Piñote e Calabacín é similar a de pais e mestres. Os pequenos tamén poden ser feroces e crueles cos seus compañeiros. En cambio, temos o convencemento de que, a través da educación e do traballo, pódense potenciar actitudes e comportamentos en positivo que permitan unha convivencia harmónica, respectando a todos os demais. " (sinopse extraída da páxina web de LA BALDUFA COMPANYIA DE COMEDIANTS).

Os pequenos e pequenas disfrutaron coa obra que contaba cunha estupenda posta en escena e tamén lles fixo pensar, reflexionar e conversar sobre os comportamentos que ás veces temos cara os demais. 

E como complemento a esta saída e dada a proximidade da nova biblioteca ao edificio do Auditorio Municipal, os nenos e nenas foron tamén visitar as novas instalacións da BIBLIOTECA PÚBLICA DE OURENSE. Alí, ademais de ensinarlles as instalacións, explicáronlles o seu funcionamento e animáronnos a acudir á mesma. 

Un ano máis, o pasado 30 de xaneiro celebramos no colexio O DÍA ESCOLAR DA NON-VIOLENCIA E DA PAZ, como xa sabedes, data que se conmemora dende 1964 nos centros escolares por iniciativa do profesor Llorenç Vidal e que coincide co aniversario da morte do líder espiritual Mahatma Gandhi. Con este día preténdese reinvindicar a necesidade dunha educación para a paz, que promova valores coma o respecto, a igualdade, a tolerancia, a solidariedade, a cooperación e a non-violencia. 

Estas foron algunhas das actividades que realizamos ao longo da semana do 27 ao 31 de xaneiro:  

TODOS UNIDOS NUN MUNDO EN PAZ

Este ano eleximos o lema "TODOS UNIDOS NUN MUNDO EN PAZ". Realizamos un mural que colocamos na entrada do colexio e tamén realizamos unha cadea de nenos unidos pola paz, a fraternidade, a solidariedade, a amistade, o compañeirismo, a cooperación, a axuda...  Os alumnos e alumnas plasmaron plasticamente a nenos e nenas de todas as razas, países, culturas ...  Con eles realizamos unha cadea, que colocamos polos diferentes pasillos, para reinvidicar a igualdade, dentro das diferenzas propias de cada un, de todos os nenos e nenas do mundo.

MENSAXES POLA PAZ

Os alumnos e alumnas  de 2º de primaria realizaron un gran mural con mensaxes pedindo a paz, a solidariedade e  a cooperación no mundo.

XUNTOS FACEMOS A MESTURA PERFECTA

Nas clases de inglés os alumnos e alumnas tamén realizaron actividades conmemorativas desta data, traballando vocabulario e expresións axeitadas á mesma para entre todos acadar a mestura perfecta que nos axude a vivir en paz e harmonía.

ATRAPASOÑOS E GLOBOS POLA PAZ

Confeccionáronse "atrapasoños" co símbolo da paz, e decoráronse globos de papel (non se lanzaron globos ao aire para evitar o uso de plásticos) con mensaxes relativos á paz, tamén se confeccionaron outros adornos e manualidades alusivas.

CANTAMOS E BAILAMOS POLA PAZ

O día 30 realizamos un acto conxunto no pista cuberta do colexio. Primeiramente dous alumnos de 6º de primaria leron un manifesto  "DECÁLOGO PARA MEDRAR EN PAZ" coas pequenas accións que todos podemos realizar para contribuír á paz e á concordia ao noso arredor. Logo cantamos e bailamos tres cancións: "PAZ, PAZ" de JUANES;  "O BAILE DA PAZ", de MAMÁ CABRA e "POLCA DA PAZ".

O 22 de xaneiro unha nova sobre o centro volveu a aparecer no xornal LA REGIÓN, concretamente na súa sección XORNAL ESCOLAR. Un equipo da canle de televisión local TELEMIÑO achegouse ao colexio para observar as actividades que realizan os máis pequenos dentro do programa SI (SAÚDE iNTEGRAL) que, como xa sabedes, levamos a cabo dende a súa posta en marcha polo Concello de Ourense en colaboración coa fundación SHE do doctor Valentín Fuster.

Cada semana os nenos e nenas realizan actividades sobre hábitos saudables, centrados sobre todo no coidado da saúde cardiovascular, e que se basa en tres principios: alimentación saudable, exercico físico e control das emocións.  

Os nenos e nenas pasárono estupendamente mentres os filmaban realizando as actividades, tamén respostaron ás preguntas que lles fixeron e cos seus comentarios explicaron como debemos coidar o noso corazón. 

Moitas das actividades que realizan os máis pequenos fanse en colaboración coas súas familias. Aproveitamos para dar as grazas a todas as familias que colaboran e se implican nesta e noutras tarefas, a colaboración entre casa e colexio xa saben que é fundamental.  

Nuns recunchos do colexio temos a exposición sobre almorzos e merendas saudables que realizaron os pequenos nas súas casas. Na seguinte presentación podedes velas e tamén momentos da gravación do programa XORNAL ESCOLAR. 

Tamén podedes ver o vídeo do programa que se emitiu na canle de televisión local TELEMIÑO:

O pasado luns, 21 de xaneiro, os alumnos e alumnas de 6º de Educación Primaria acudiron ao Auditorio Municipal para presenciar a obra de teatro en inglés, patrocinada por AFUNDACIÓN, titulada "UNBOXING ALICE", baseada na  historia de  "ALICIA NO PAÍS DAS MARABILLAS".

 A obra é unha adaptación do popular conto realizada pola compañía teatral ON STAGE COMPANY que, partindo da obra clásica e incorporando as novas tecnoloxías, personaxes de video-xogos... levanos outra vez ao mundo de Alicia, pero da man de Tweedle Dee e Tweedle Dum, dous xemelgos que amantes das novas tecnoloxías e "influencers" crean a súa propia "plataforma de vídeo Wonderland": O Tweedletube! A partir de aí coñeceremos, nunha viaxe disparatada,  o que lle aconteceu ás máis famosas personaxes da historia e cal é a verdadeira natureza de Alicia. 

"Esta obra de teatro articúlase a partir da participación dos espectadores. A inmortal historia de Lewis Carroll cobra vida e actualízase nesta disparatada parodia interactiva 100 % en inglés, onde a imaxinación e a fantasía son as leis que rexen a realidade. Unha viaxe alucinante con personaxes estrafalarias, xuntanzas desatinadas e deportes inverosímiles! Unha experiencia práctica e divertida para asimilar novos coñecementos e aprender a expresarse en inglés" (sinopse extraída da páxina web de AFUNDACIÓN).