Lexislación

Summary: 

Román Rodríguez e Mariano Jabonero asinan un acordo en Madrid para impulsar actividades para a promoción de programas de innovación educativa

O acordo contempla tamén a celebración dun foro de alto nivel sobre PISA e un seminario para fortalecer a gobernanza e o liderado educativo pedagóxico e inclusivo

Idioma Gallego

O conselleiro de Cultura, Educación, FP e Universidades en funcións, Román Rodríguez, e o secretario xeral da Organización de Estados Iberoamericanos (OEI), Mariano Jabonero, asinaron esta mañá en Madrid un acordo de colaboración para planificar accións conxuntas na promoción de programas de innovación educativa.

Ao abeiro desta cooperación, a Xunta e a OEI organizarán en Santiago de Compostela neste 2024 un seminario iberoamericano sobre transformación dixital e Intelixencia Artificial na educación, con expertos e personalidades destacadas do ámbito educativo e empresarial. O obxectivo é a mellora das competencias dixitais de toda a comunidade educativa para responder axeitadamente ao contexto dixitalizado global.

Román Rodríguez destacou a importancia deste evento internacional “para continuar fortalecendo as competencias profesionais docentes en todo o relativo ao imparable proceso de transformación dixital que estamos a vivir”. “A Xunta de Galicia ten en marcha a Estratexia de Educación Dixital 2030 para, precisamente, mellorar as capacidades dixitais da comunidade educativa, con actuacións para alumnos, profesores, familias e centros, que inclúen desde a dotación de equipamentos ata a formación, imprescindible neste contexto no que cada día xorden novos desafíos”, explicou.

“Agardamos que este encontro marque un novo fito no traballo que desde os centros se está a facer para integrar na práctica educativa a Intelixencia Artificial e as novas ferramentas dixitais”, afirmou o conselleiro en funcións.

Previamente, unha delegación do Goberno galego visitará a sede da Organización para a Cooperación e o Desenvolvemento Económicos en París, co obxectivo de manter unha reunión co equipo de educación e definir cuestións de importancia no proceso de traballo a favor da transformación dixital en educación. Ademais, froito da celebración do seminario, elaborarase un informe sobre Intelixencia Artificial en educación, o seu desenvolvemento e posibles aplicacións.

Avanza na educación de calidade

No marco deste convenio tamén se organizará un foro de alto nivel sobre avaliación educativa. Nel farase unha análise exhaustiva do informe PISA, da súa metodoloxía e procedementos, e de como esta ferramenta de avaliación pode empregarse para mellorar a evolución de alumnado, profesorado, directores e centros.

Esta actividade enmárcase no papel da OEI dentro do Comité Directivo de Alto Nivel do Obxectivo de Desenvolvemento Sostible 4 que promove a UNESCO, que pasa por garantir unha educación inclusiva, equitativa e de calidade e promover oportunidades de aprendizaxe durante toda a vida. En concreto, a Organización de Estados Iberoamericanos  ocúpase de dar voz aos avances e retos de América Latina e Caribe na consecución deste obxectivo, ao tempo que proporciona orientación estratéxica para lograr a consecución destas metas.

Mellora da gobernanza

O acordo inclúe, así mesmo, a celebración dun seminario Galicia-Portugal para fortalecer a gobernanza e promover un modelo de liderado escolar pedagóxico e inclusivo entre todos os integrantes da comunidade educativa, unha das cuestións consideradas fundamentais para a mellora da calidade da educación en Iberoamérica.

Este evento, dirixido a directores de centros educativos de Galicia e Portugal técnicos da Consellería de Educación e do Ministerio portugués, celebrarase de xeito compartido entre Tui e Valença do Minho.

Información xeral Consellería de Cultura, Educación, Formación Profesional e Universidades

Summary: 

A directora xeral de Ordenación e Innovación Educativa, Judith Fernández, participa na entrega dos premios en homenaxe á que foi alumna do centro

Idioma Gallego

A Xunta de Galicia destaca o labor do Instituto IES Eusebio da Guarda polo fomento da lectura e da escritura a través do XIX certame literario Rita Suárez Amado en memoria da que foi alumna do centro.

A directora xeral de Ordenación e Innovación Educativa, Judith Fernández, participou hoxe na entrega dos galardóns, unha cita anual que é posible grazas á implicación do equipo directivo encabezado por Isabel Ruso e do conxunto do alumnado e do profesorado do instituto “e que hoxe é un referente para a comunidade educativa”, salientou. 

A representante da Consellería de Cultura, Educación, FP e Universidades gabou tamén a importancia deste tipo de certames como “aliciente e revulsivo” para que a mocidadede ESO e Bacharelato se inicie na escritura a través de propostas de relatos curtos e de poesía. Así mesmo, amosou o seu agradecemento á familia de Rita, que doa parte dos premios e á anpa, encargada de organizar o taller de escritura creativa para os gañadores.

Información xeral Consellería de Cultura, Educación, Formación Profesional e Universidades

Summary: 

Educación traballa na configuración deste espazo que se publicará na primeira quincena de abril e funcionará como punto de encontro de estratexias, ideas e recursos á disposición do profesorado

Os profesionais educativos terán acceso libre e gratuíto a recursos innovadores creados por profesorado con experiencia e testados en contextos reais de aula

Os próximos días procederase ao seu lanzamento público con 90 publicacións de diversa índole coa previsión de acadar as 150 antes de que remate o curso

Incluirá un espazo sobre a implementación da Intelixencia Artificial a nivel docente

Trátase dunha ferramenta de apoio ao proceso de aprendizaxe do sistema educativo galego onde o analóxico e o dixital se complementan entre si

Idioma Gallego

A Xunta está ultimando a posta en marcha de Ágora Dixital, unha plataforma especializada en recursos tecnolóxicos e dixitais ao servizo da docencia en Galicia, da cal deu conta hoxe a Consellería de Cultura, Educación, FP e Universidades a través dun informe elevado ao Consello.

Este novo espazo educativo, no que actualmente está traballando o Centro de Innovación Educativa e Dixital, publicarase á volta das vacacións de Semana Santa e concíbese como unha praza aberta da comunidade educativa na que, á semellanza da ágora da Antiga Grecia, os docentes poden achegarse aos últimos recursos sobre temática STEM e dixital creados por profesorado de diversas materias de niveis non universitarios da educación obrigatoria.

Trátase, por tanto, dun espazo de creación, de coñecemento e de diálogo colaborativo entre o profesorado con máis experiencia docente nestas temáticas cunha proposta de traballo en equipo no que se podan achegar ideas, estratexias e recursos de calidade e fiables previamente testados en contextos reais na aula.

Esta nova acción está concibida como unha ferramenta máis de apoio ao proceso de aprendizaxe dentro do sistema educativo galego, que se caracteriza pola convivencia dos métodos analóxico e dixital, que se complementan entre si.

Nos próximos días está previsto o seu lanzamento público a través do web do Centro de Innovación Educativa e Dixital. Inicialmente a plataforma incluirá 90 publicacións de diversa índole que se verán incrementadas ata 150 antes de que remate o curso.

Así pois, logo da súa posta en funcionamento, a dinámica de funcionamento de Ágora Dixital centrarase na colaboración e creación de redes de docentes que poidan enriquecer o ecosistema educativo e dixital galego e a visibilización de boas prácticas de calidade do profesorado do sistema educativo autonómico.

Estrutura en seis laboratorios

As publicacións estarán estruturadas en seis apartados ou laboratorios, denominados LAB: LAB-Microsecuencias, LAB-Espazos, LAB-Estratexias, LAB-Expert, LAB-Ideas e LAB-IA. Estes LAB están configurados como axudas metodolóxicas de distintos tipos (experimentos, propostas de boas prácticas...) de apoio aos docentes para enriquecer o seu labor na aula a través dunha clase guiada. Todos eles presentan unhas características comúns, con etiquetas para clasificar, organizar e facer buscas entre todas as publicacións que se recollen.

O primeiro apartado, LAB-Microsecuencias, consiste en pílulas en aberto e reutilizables, tanto para aprender de maneira flexible como para levar á aula. Están baseadas na micro-aprendizaxe experimental e caracterízanse polo seu formato curto e pluridisciplinar, están categorizadas por nivel educativo e relacionadas co currículo con correspondencia coas competencias clave e son facilmente replicables na aula. Poden ser presentadas como unha pregunta, un reto ou unha afirmación. A modo de exemplo, pódese partir da afirmación O poder desoxidante da vitamina C. A partir de aí, ofértase ao docente unha pequena introdución do experimento, unha cesta de materiais (laranxa, exprimidor, auga, pinceis...), recomendacións técnicas e guía para que o experimento se poda levar a cabo con toda a seguridade e cumpra coa súa función didáctica.

No apartado LAB-Espazos, o profesorado atopará consellos para a transformación de espazos educativos innovadores, así como para a creación de novos espazos de aprendizaxe explorando propostas novidosas de experimentación dentro e fóra da aula. Por exemplo, pódese acceder ao proxecto Espazo de lecer no instituto xerado por un instituto concreto onde se describa a orixe da idea, as necesidades do alumnado e a mellora da contorna. O resto do profesorado ten acceso a esta proposta que pode servir de guía para replicar no seu centro educativo.

O LAB-Estratexias configúrase como pequenas achegas, moi resumidas, para coñecer e implementar diversas estratexias de aprendizaxe na aula. O seu formato é comprimido e está composto dun plan sinxelo cun vídeo curto explicativo con puntos clave e elementos descargables para unha aplicación doada na aula. Trátase de estratexias docentes con ideas e recursos para captar a atención do alumnado e manter o seu interese.

LAB-Expert abrangue entrevistas e pequenas achegas sobre tendencias emerxentes na educación en formato vídeo curto onde persoas expertas dan a súa opinión e aportan a súa experiencia en diversos campos temáticos relacionados co mundo dixital e STEM e a educación. Son propostas específicas complementarias sobre temáticas innovadoras e emerxentes que poden resultar de interese para o alumnado. Por exemplo, unha proposta pode ser Que é a intelixencia artificial verde. Neste apartado, os docentes teñen acceso a documentación de expertos así como a unha guía metodolóxica para abordar o tema na aula sacándolle o máximo proveito.

O apartado de LAB-Ideas está concibido como punto de reunión e participación para compartir e recomendar información valiosa para o profesorado en forma de recursos, convocatorias, premios, formacións e proxectos entre outros. Aquí inclúese a posibilidade de acceder a laboratorios virtuais ou de participar en feiras científicas tamén en modo virtual.

Por último, LAB-IA é un espazo que amosa pequenas achegas sobre a implementación da Intelixencia Artificial a nivel educativo para persoas que desexen iniciarse nesta temática. A integración da IA na educación supón un reto, pero tamén un novo mundo de oportunidades de soporte das tecnoloxías intelixentes no labor docente. Isto é, que o profesorado disporá dun espazo virtual no que, a través deste LAB, teña a oportuniddae de atopar, acceder e explorar información actualizada sobre este tema e que lle resulte de interese para a súa aplicación na aula.

 

Información xeral Consellería de Cultura, Educación, Formación Profesional e Universidades

Summary: 

O proxecto da Xunta inclúe a renovación de case 1.500m² de cubertas, a mellora do illamento térmico e a instalación de novos falsos teitos, luminarias, alicatado e portas

A maiores, renóvanse as instalacións de electricidade, fontanería, calefacción e protección contra incendios en toda a área de actuación desta terceira fase

Idioma Gallego

Un total de catro empresas de construción presentaron as súas ofertas para realizar a terceira fase da rehabilitación integral do Colexio CEIP Froebel de Pontevedra. Cómpre lembrar que a Consellería de Cultura, Educación, FP e Universidades licitou esta obra en febreiro, por un importe de 1.170.948,58€ e, para axilizar os trámites, remitiu xa ao Concello de Pontevedra o proxecto básico e de execución para que conceda a licenza de obras no prazo máis breve posible.

Na sesión celebrada hoxe da mesa de contratación, os técnicos constataron a presentación de ofertas por parte das empresas Construcciones Castro Figuero S.L., Construcciones Jesús Naray S.L., Construcciones y Obras Taboada Ramos S.L.U. e Obras y Servicios Gómez Crespo S.L. A partir de agora, revisarase a documentación presentada para proceder a realizar a proposta de adxudicación e que a obra, que ten un prazo de execución de seis meses, poida comezar no verán, sempre e cando o Concello teña outorgado a licenza de obras.

Melloras en cubertas e aulario

O programa de necesidades inclúe tanto as necesidades iniciais detectadas pola Unidade Técnica como melloras suxeridas polo propio centro e ocúpase da parte do colexio que aínda non foi reformado, que se corresponde coa parte do volume central que dá á rúa Xeral Martitegui, incluíndo as aulas de Primaria e a zona cuberta do patio central, así como o distribuidor que rodea todo o patio central.

Deste xeito, o proxecto contempla a renovación das cubertas que aínda non foron mudadas, cunha superficie total de case 1.500m², unha actuación que se completará co reforzo estrutural das cerchas e a renovación dos correspondentes canlóns e baixantes. Incorporarase, ademais, illamento térmico nas novas cubertas, de xeito que se reduzan as perdas de calor e colocarase un pararraios.

Así mesmo, colocarase trasdosado de xeso interiores en fachadas exteriores para incrementar o illamento térmico e melloraranse os acabados interiores, co cambio de falsos teitos, alicatados, luminarias e portas, tanto en zonas comúns como en aulas. No que atinxe aos aseos, acometerase a remodelación dos situados na torre central.

A maiores, renovaranse as instalacións de electricidade, fontanería, calefacción e protección contra incendios en toda a área de actuación desta terceira fase.

Información xeral Consellería de Cultura, Educación, Formación Profesional e Universidades

Summary: 

Esta nova dotación enmárcase nas expansión que o Goberno galego está a facer dos Polos Creativos ao 100% dos centros galegos de Educación Infantil, Primaria e ESO

Román Rodríguez explica que o obxectivo “é facer fincapé na importancia do papel das mulleres en diferentes ámbitos profesionais e estimular as vocacións científicas entre as nenas”

Idioma Gallego

O conselleiro de Cultura, Educación, FP e Universidades en funcións, Román Rodríguez, visitou hoxe o Colexio CPI Plurilingüe de Vedra, onde comprobou como o alumnado traballa co kit de Polos Creativos elaborado polo seu departamento para a celebración do 8-M. Tal e como explicou o representante da Xunta, o obxectivo deste equipamento especial é poñer en valor figuras históricas femininas das artes e das ciencias desde unha reivindicación lúdica.

Tal e como explicou Román Rodríguez, “esta nova dotación enmárcase nas expansión que o Goberno galego está a facer dos Polos Creativos ao 100% dos centros galegos que imparten Educación Infantil, Primaria e ESO, o que supón a instalación deste espazos en máis de 1.200 centros, cun investimento próximo aos 19M€”. 

“Este novo kit ten como obxectivo facer fincapé na importancia do papel das mulleres en diferentes ámbitos profesionais e seguir avanzando no estímulo das vocacións científicas entre as nenas, amosándolles exemplos de mulleres relevantes neste eido”, salientou o conselleiro en funcións. “Ademais, búscase que os estudantes descubran que a creatividade non só se ampara na tecnoloxía, senón tamén no coñecemento artístico e na capacidade inventiva, que tamén incentivan a matemática, a xeometría, a cooperación”, puntualizou.

Materiais do ‘kit’

Deste xeito, o novo kit inclúe un xogo de cartas con imaxes de ilustradoras científicas elaboradas por mulleres artistas que serve para que os estudantes descubran as figuras históricas, e que o fagan dunha maneira desenfadada. 

A maiores, contén ilustracións inspiradas en autoras históricas para recrear con materiais dixitais, así como un vídeo documental sobre o traballo das redeiras, e indicacións para realizar redes similares empregando materiais impresos en 3D. 

Información xeral Consellería de Cultura, Educación, Formación Profesional e Universidades

Summary: 

Salienta o labor dos centros integrados de FP cos que conta a comunidade para estas familias profesionais, entre os que se atopa o CIFP Carlos Oroza de Pontevedra e no cal a Xunta vén de investir 2,8 M€ para a súa ampliación

Indica que esta actuación serve para aproveitar o dobre boom que está a vivir tanto o turismo como a FP galega en xeral con esa “revolución silenciosa” que cada vez é máis certa

Idioma Gallego

O presidente da Xunta en funcións, Alfonso Rueda, destacou hoxe a Formación Profesional especializada nas ramas de hostalería, gastronomía e turismo como un dos factores que xustifican o récord de visitantes que está a recibir Galicia. “O ano pasado foron sete millóns de visitantes e todas as previsións apuntan a unha consolidación, que é case máis importante que o crecemento, polo que hai que estar preparados para atendelos como merecen”, asegurou.

Neste sentido, Rueda puxo en valor os oito centros integrados de FP de Hostalería e Turismo cos que conta Galicia, entre os que se atopa o CIFP Carlos Oroza de Pontevedra, o cal vén de rematar un proceso de ampliación gracias a un investimento da Xunta de 2,8 M€. O titular do Goberno en funcións, acompañado do conselleiro de Cultura, Educación FP e Universidades en funcións, Román Rodríguez, participou esta mañá na inauguración dos novos espazos, baseados nun novo edificio de tres plantas para aulas, un viveiro de empresas, unha zona administrativa e vestiarios.

Así, as obras permitiron crear dúas novas clases de FP Básica de Cociña e Restauración, novas aulas do ciclo superior de Xestión de Aloxamentos Turísticos e outra de catas, así como mellorar a eficiencia enerxética do centro e a súa accesibilidade.

Centro de referencia para un sector referente

Alfonso Rueda enxalzou a posición de referencia da que goza o CIFP Carlos Oroza, ao mesmo tempo que asegurou que a intención do Goberno galego con esta mellora pasa por consolidar o seu papel como un espazo fundamental a nivel internacional.

Non en balde, é o mellor centro de FP de España, segundo se confirmou ao acadar a máxima puntuación por parte do Ministerio entre todas as comunidades autónomas.

“Esta ampliación, a terceira que se fixo en moi pouco tempo, serve para aproveitar este dobre boom que estamos vivindo, tanto no turismo como na FP galega en xeral con esa revolución silenciosa que cada vez é máis certa”, indicou, facendo referencia a que o número de persoas matriculadas neste tipo de formación duplicouse en apenas 10 anos.

Así mesmo, salientou que o labor que deste centro contribúe a dar resposta á demanda do mercado de profesionais cualificados nun sector como é o turismo, “a industria da felicidade” que, tal e como apuntou supón xa o 12% do PIB galego.

Información xeral Consellería de Cultura, Educación, Formación Profesional e Universidades

Summary: 

O conselleiro de Cultura, Educación, FP e Universidades en funcións participa no Consello de Administración do Consorcio de Santiago

Lembra que a Xunta vai actuar de urxencia no Panteón de Galegas e Galegos Ilustres á espera dun plan integral de rehabilitación liderado polo Consorcio

Idioma Gallego

O conselleiro de Cultura, Educación, FP e Universidades en funcións, Román Rodríguez, participou hoxe na sesión ordinaria do Consello de Administración do Consorcio da cidade de Santiago, que se celebrou na Casa Vaamonde.

O representante da Xunta de Galicia aproveitou para pedir axilidade na elaboración do Plan Especial de Conxo, un plan que posibilitará a futura construción dun Centro Integrado de FP especializado en ciencias da saúde en Conxo. “A creación deste centro busca mellorar a oferta educativa vinculada ao campo sanitario e ás necesidades profesionais neste ámbito”, explicou Román Rodríguez sobre a repercusión deste proxecto e a importancia de desbloquealo a nivel urbanístico, así como a creación de prazas educativas no sur da cidade.

Así mesmo, durante a reunión, o conselleiro de Cultura en funcións lembrou que a Xunta de Galicia está a actuar de urxencia na Igrexa de Bonaval debido as humidades provocadas pola entrada de auga das últimas choivas, á espera dun plan integral de rehabilitación da igrexa que acolle o Panteón de Galegas e Galegos Ilustres liderado polo Consorcio de Santiago.

Neste senso, Román Rodríguez avanzou que os técnicos da Dirección Xeral de Patrimonio Cultural xa se desprazaron á igrexa para avaliar a intervención de urxencia e poder acometela canto antes.

Información xeral Consellería de Cultura, Educación, Formación Profesional e Universidades

Idioma Gallego

Unha vintena de alumnos de 4º, 5º e 6º de Primaria do colexio CEIP Terra Chá, de Vilalba, visitaron esta mañá a Xunta de Galicia no marco do programa Coñece as túas institucións. A través desta iniciativa, o Goberno galego e o Parlamento de Galicia ofrecen visitas guiadas ás súas sedes para promover o achegamento e dos escolares sobre os poderes lexislativo e executivo de Galicia. De feito, o grupo de escolares visitou tamén esta mañá o Pazo do Hórreo. 

A directora xeral de Ordenación e Innovación Educativa, Judith Fernández, acompañou os nenos nesta visita, na que se lles explicou o funcionamento da Xunta e as súas principais funcións e se lles proporcionou material didáctico específico. A representante da Consellería de Cultura, Educación, FP e Universidades destacou o valor deste programa para fomentar unha cidadanía democrática e responsable entre o alumnado e respondeu ás dúbidas dos escolares sobre a actividade diaria dunha persoa que traballa na sede do Goberno galego.

Información xeral Consellería de Cultura, Educación, Formación Profesional e Universidades

Summary: 

O secretario xeral de Política Lingüística participa nas XVI Xornadas Martín Sarmiento, nas que se entrega a IV edición do Premio Morales

A celebración está dirixida fundamentalmente á comunidade educativa do Programa de Promoción da Lingua Galega no Bierzo e Sanabria

Idioma Gallego

O secretario xeral de Política Lingüística, Valentín García, participou hoxe na localidade leonesa de Cacabelos na XVI edición das Xornadas Martín Sarmiento, organizadas no marco das celebracións do Día do Galego no Bierzo pola Comisión Cultural Martín Sarmiento co apoio da Xunta de Galicia e da Junta de Castilla y León, entre outras entidades.

A celebración, que xira arredor do aniversario do ilustre berciano Frei Martín Sarmiento o 9 de marzo, reuniu como cada ano arredor dun milleiro de estudantes de lingua galega do Bierzo, que se deron cita no Cine Faba para comezar a xornada festiva. Alí, o representante da Consellería de Cultura, Educación, FP e Universidades, acompañado de varios representantes locais e autonómicos, expresou a súa satisfacción “polo interese que a lingua galega esperta máis aló das nosas fronteiras, especialmente na xente nova, que aposta por formarse nela e garantir o seu futuro nestas terras”.

Programa da xornada

A primeira parte da xornada estivo orientada ao estudantado de secundaria e da Escola Oficial de Idiomas de Ponferrada adscrito ao Programa de promoción do galego no Bierzo e Sanabria, que reforza os vencellos históricos entre as dúas comunidades autónomas.

Os asistentes empezaron a traballar nunha proposta didáctica arredor do Dicionario do Galego do Bierzo, da autoría de Sara Rodríguez Fernández, co obxectivo de difundir os contidos do volume e ampliar o número de entradas desta primeira edición.

De seguido, uniuse a rapazada dos centros de Primaria para asistir á entrega da IV edición do Premio Morales, que conta co patrocinio da Consellería da Cultura, Educación, FP e Universidades. Este certame promove a creatividade artística e literaria en lingua galega dos escolares ao tempo que homenaxea ao autor berciano Antonio Fernández Morales, precursor da escrita en galego en Castela e León.

O acto, que estivo amenizado pola actuación musical de Paco Nogueiras co espectáculo C@nto contigo, continuou coa presentación das novas seccións da páxina web ogalegonobierzo.org, impulsada co apoio da Xunta, e o anuncio da convocatoria da V edición do Premio Morales.

A xornada pechouse cunha mesa de debate na que se reuniron autoridades, docentes e diferentes entidades culturais para realizar un seguimento das actividades levadas a cabo e concretar novos compromisos coa lingua galega no Bierzo.

A celebración do Día do Galego no Bierzo está dirixida fundamentalmente á comunidade educativa dos 19 centros -18 en León e un en Zamora- adscritos ao Programa de promoción da lingua galega neste territorio galegofalante do exterior, xurdido da colaboración entre a Xunta de Galicia e a Junta de Castilla y León, iniciada no ano 2001. Deles, 14 son colexios e catro son institutos, ademais da Escola Oficial de Idiomas de Ponferrada.

Información xeral Consellería de Cultura, Educación, Formación Profesional e Universidades

Summary: 

O conselleiro de Educación en funcións visita os 12 alumnos do ciclo de FP Básica en Cociña e restauración do Instituto IES Ramón Caamaño de Muxía

O conselleiro de Educación en funcións visita os 12 alumnos do ciclo de FP Básica en Cociña e restauración do Instituto IES Ramón Caamaño de Muxía

Idioma Gallego

O conselleiro de Cultura, Educación, FP e Universidades en funcións, Román Rodríguez, comprobou hoxe o funcionamento da nova FP Básica na modalidade dual en Cociña e restauración que se imparte desde este curso no Instituto IES Ramón Caamaño de Muxía. “Trátase da primeira iniciativa deste tipo na familia profesional de Hostalaría e turismo na zona e responde á demanda detectada e transmitida polos empresarios do sector da Costa da Morte desde hai un tempo”, destacou o representante da Xunta.

Neste sentido, Román Rodríguez salientou a gran resposta do tecido produtivo a esta oferta. “Son unha decena de empresas as que van colaborar na formación destes 12 alumnos que inauguran o ciclo, todas elas de recoñecido prestixio”, explicou. “Estamos seguros de que esta primeira edición vai ser todo un éxito e de que o sector vai seguir demandando esta formación para nutrirse de profesionais cualificados para seguir medrando”, afirmou o conselleiro en funcións.

En concreto, a partir deste mesmo mes os alumnos co ciclo realizarán a actividade formativa profesional no Parador Costa da Morte e nos restaurantes A Casa do Peixe, Son de Mar, A Lonxa D'Álvaro, A Furna, A Marina e As Baleas, todos eles de Muxía; en O Semáforo, de Fisterra; no Hotel Insua, de Cee, e en Villa de Oro, de Camariñas. 

No transcurso da visita, o conselleiro interesouse pola experiencia persoal do alumnado nestes primeiros meses na FP e animounos a continuar mellorando a súa formación ao remate do mesmo na oferta de ciclos de grao medio. A visita completouse cun petisco ofrecido polos estudantes para amosar o aprendido no que vai de curso.

Saídas profesionais

O ciclo de FP Básica en Cociña e restauración ensina ás persoas que o cursan a desenvolver con autonomía as operacións básicas de preparación, conservación e presentación de elaboracións culinarias, alimentos e bebidas, así como a asistir nos procesos de servizo e atención á clientela. Deste xeito, os titulados poderán traballar como axudantes de cociña, de camareiro, de bar ou de economato de unidades de produción e servizo de alimentos e bebidas, entre outras actividades.

Información xeral Consellería de Cultura, Educación, Formación Profesional e Universidades

Summary: 

O conselleiro de Cultura en funcións e a presidenta da entidade asinan senllos convenios para gastos de xestión e obras de mellora

Román Rodríguez pon en valor o papel desta entidade na salvagarda da herdanza do pasado educativo único do rural galego

Idioma Gallego

O conselleiro de Cultura, Educación, FP e Universidades en funcións, Román Rodríguez, e a presidenta da Fundación Fernando Blanco de Lema, Eva García Caamaño, asinaron hoxe senllos convenios de colaboración para mellorar e manter as instalacións do Museo Fernando Blanco, sito na localidade coruñesa de Cee. Á sinatura asistiu tamén o director xeral de Cultura, Anxo M. Lorenzo.

Cunha achega próxima aos 50.000€, o departamento de Cultura da Xunta de Galicia colaborará cos gastos de xestión desta institución cultural e sufragará as obras de mantemento necesarias. En concreto, a actuación inclúe limpeza de cuberta, substitución de pezas rotas e selado de patio de luces, impermeabilización interior, limpeza de canlóns, vernizado exterior, fachadas interiores e parámetros interiores.

A Fundación centra os seus esforzos na posta en valor da figura de Fernando Blanco de Lema e a promoción educativa e cultural da vila de Cee e da súa bisbarra, a través dos dous edificios que posúe na vila: o actual Instituto IES Fernando Blanco de Lema e a antiga Escola de Nenas, actualmente Museo Fernando Blanco.

Un pasado educativo único

Tal e como destacou Román Rodríguez, “este museo pon en valor o pobo de Cee como herdeiro dun pasado educativo único no rural, cunha etapa de esplendor a finais do século XIX e primeira metade do século XX, coincidindo precisamente coa fundación do Instituto Fernando Blanco”. “Neste sentido, a colaboración que hoxe subscribimos ten como obxectivo salvagardar non só o antigo edificio da Escola de Nenas, senón un valiosísimo patrimonio educativo”, salientou.

A colección que alberga o Museo está formada na súa maior parte polo instrumental científico e o material didáctico das antigas cátedras, laboratorio e gabinetes do vello Instituto-Escola de Cee, de finais do século XIX, entre os que se atopan medidores de diversas magnitudes, aparellos de mecánica, acústica, óptica, etc. Cabe salientar tamén as coleccións de animais, minerais e fósiles.

Xunto a este material, a colección complétase co material didáctico doutras materias incorporadas ao centro ao longo da súa historia, coa documentación histórico-educativa e con fondos artísticos e pictóricos, entre os que se atopan as obras pictóricas de Federico Madrazo, gravados da Calcografía Nacional e unha colección de ourivería relixiosa.

O Museo Fernando Blanco tamén destaca o labor deste concello no aproveitamento integral do seu patrimonio histórico e como centro de dinamización cultural da comarca.

Información xeral Consellería de Cultura, Educación, Formación Profesional e Universidades

Summary: 

Educación dota  con 66.000€ esta liña que sufraga tamén gastos de xestión, administración, adquisición de material e mantemento das súas instalacións

Idioma Gallego

A Xunta vén de publicar no Diario Oficial de Galicia a convocatoria das axudas para financiar actividades das confederacións e federacións de nais e pais do alumnado e das asociacións de nais e pais do alumnado de centros de Educación Especial para este ano.

A Consellería de Cultura, Educación, FP e Universidades habilita unha partida de 66.298€, un 10% máis que o ano pasado, a esta liña que ten como obxectivo contribuír ao financiamento destas entidades. 

As axudas van destinadas tanto para a realización de actividades como para sufragar gastos derivados da xestión, administración, adquisición de material non inventariable e mantemento ordinario das instalacións que se orixinen no período subvencionado. A subvención é compatible con outras subvencións ou axudas outorgadas por outras administracións públicas ou entes públicos ou privados, nacionais ou internacionais.

Solicitudes ata o 4 de abril

As entidades interesadas dispoñen de prazo ata o vindeiro 4 de abril para facer a correspondente solicitude, que deberá presentarse por medios electrónicos a través do formulario normalizado dispoñible na sede electrónica da Xunta de Galicia. Para a presentación das solicitudes poderase empregar calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365.

Información xeral Consellería de Cultura, Educación, Formación Profesional e Universidades

Summary: 

O conselleiro de Educación en funcións e o presidente da Deputación de Pontevedra participan na clausura da X edición do concurso, liderado polo CIFP Carlos Oroza

Idioma Gallego

O conselleiro de Cultura, Educación, FP e Universidades en funcións, Román Rodríguez, e o presidente da Deputación de Pontevedra, Luis López, participaron hoxe na clausura do X Campionato de Sumillería Suso Domínguez. O titular de Educación quixo destacar o valor “deste certame de referencia, organizado por un dos centros de excelencia a nivel estatal e autonómico na FP de Hostalería”. “O feito de estar dedicado a un docente moi querido neste Centro Integrado de FP Carlos Oroza, o profesor Suso Domínguez, dálle aínda máis valor a este concurso”, declarou o representante da Xunta.

Román Rodríguez recordou que esta edición é especial porque rende homenaxe tamén ao poeta que dá nome ao centro, Carlos Oroza, no seu centenario. "Unha conmemoración que vai unir membros da comunidade educativa deste centros, autoridades e figuras destacadas da cultura e que dá boa conta do relevante papel que este Centro Integrado de FP ten no tecido social e cultural da cidade do Lérez", salientou.

24 centros de España e Portugal

A competición ten carácter anual e reúne a 24 centros de FP de Hostalería e Turismo de Galicia, outras comunidades autónomas e de Portugal. Trátase, así, dunha cita moi consolidada, que funciona como punto de encontro de centros de referencias destas ensinanzas, establecendo sinerxías e creando oportunidades de emprego e de profesionalización.

As probas inclúen un test sobre viños, unha carta errónea para que corrixan a información incorrecta, unha proba de olores, unha cata a cegas, unha proba de maridaxe, un Pasapalabra sobre enoloxía, e unha proba de servizo que mide velocidade, técnica, estilo e profesionalidade.

Información xeral Consellería de Cultura, Educación, Formación Profesional e Universidades

Summary: 

Desde a posta en marcha desta liña de actuación en 2016 o noso sistema universitario desenvolveu 5.584 iniciativas e captou case 10,6M€ en fondos

O Consello da Xunta aproba incrementar un 11% a colaboración con FEUGA en catro liñas: fomento e captación de proxectos europeos, apoio aos centros de investigación, programas formativos e identificación de novos perfís profesionais

Idioma Gallego

As accións da Xunta para o posicionamento internacional das universidades públicas galegas acadaron un retorno de máis de 4€ por euro investido desde a posta en marcha desta liña de acción en 2016. Un retorno que se foi incrementando progresivamente ata acadar os 5,7€ por euro investido no ano 2023.

En concreto, no período 2016-2023 desenvolvéronse 5.584 accións de promoción do Sistema Universitario de Galicia (SUG), coa asistencia a mais de 1.000 eventos. Isto redundou na captación de case 10,6M€ en fondos para as universidades galegas, o que supón unha rendibilidade do 318%.

En canto ao número de proxectos europeos aprobados para o SUG desde que empezaron a desenvolverse estas accións de posicionamento, foron un total de 37. Neste momento hai outras 15 propostas coa participación das universidades galegas en proceso de tramitación.

Para seguir avanzando nesta política de éxito, o Consello da Xunta aprobou hoxe a renovación do convenio entre a Consellería de Cultura, Educación, Formación Profesional e Universidades e a Fundación Empresa Universidade Galega (FEUGA) para este fin, cun incremento do 11,38% no orzamento. A través del, a Xunta investirá case 2,4M€ ata 2026 en accións destinadas a impulsar e consolidar un programa conxunto de posicionamento da I+D+i universitaria e novas accións de apoio ao SUG.

Tendo en conta os excelentes resultados obtidos tanto en termos de rendibilidade económica como de posicionamento estratéxico internacional dos grupos de investigación universitarios, o obxectivo é consolidar, ampliar e instrumentalizar esta colaboración, xa que a presencia e dinamización continua a nivel europeo é imprescindible para manter e mellorar a visibilidade e captación de fondos en Europa.

As accións do novo convenio estrutúranse en catro liñas: posicionamento, promoción, divulgación e captación de proxectos europeos; soporte á Rede de Centros de Investigación, programas formativos GESCI e GOSCI e identificación dos perfís profesionais que se demandarán no futuro.

Amplo paquete de medidas

O primeiro paquete de accións vai dirixido a fortalecer o posicionamento, promoción, divulgación e captación de proxectos europeos do SUG para promover a participación de grupos de investigación en proxectos europeos. Neste sentido, búscase manter e mellorar a visibilidade das universidades galegas diante da oportunidade de captación de fondos que supón o programa da Unión Europea Horizon Europe (HE) 2021-2027.

A segunda liña de acción diríxese directamente a financiar a actividade da Rede de Centros de Investigación das universidades públicas galegas e a súa xestión. En concreto, busca fortalecer as súas capacidades e consolidar a excelencia; potenciar a formación, atracción e incorporación de talento investigador; incrementar o liderado internacional da súa investigación, e impulsar a colaboración con novos axentes académicos e industriais para aumentar o impacto económico e social da súa actividade.

A terceira liña do convenio contempla a celebración dunha nova edición dos programas formativos GESCI e GOSCI para formar aos equipos dos novos centros susceptibles de obter o recoñecemento como centro de excelencia e ao novo persoal de dirección e xestión dos centros pertencentes á Rede.

O obxectivo é seguir tendo formadas ás novas remesas de directores e xestores nos estándares de calidade que exixe a xestión actual dos centros de investigación de excelencia e aliñalas cos requirimentos asociados á avaliación que da acceso á financiación, así como á Rede e aos seus servizos.

Continuidade do proxecto Galicia 2030

A través da cuarta liña de acción analizarase a avaliarase, a través dun estudo, o impacto global do proxecto Galicia 2030: Perfís profesionais de futuro e novas titulacións e especialidades universitarias, posto en marcha en 2018 con vistas a determinar as competencias e perfís profesionais que necesitará o tecido empresarial nos vindeiros anos e adaptar a oferta universitaria a estas novas demandas.

Con este novo estudo revisarase a implementación efectiva das titulacións emanadas do proxecto na oferta académica do SUG, achegando suxestións de mellora. O estudo desenvolverase en 2026 para poder realizar a análise das máximas titulacións posibles, xa que algunhas delas implantaranse con posterioridade ao curso académico 2023-2024.

Información xeral Consellería de Cultura, Educación, Formación Profesional e Universidades

Summary: 

Román Rodríguez subliña a importancia da formación en competencias  como a programación ou as novas tecnoloxías enfocada para a cualificación do alumnado

Asegura que formar a futuros profesionais nun maior desempeño tecnolóxico “aumenta as súas oportunidades laborais”

Idioma Gallego

O conselleiro de Cultura, Educación, FP e Universidades en funcións, Román Rodríguez, abriu esta mañá a xornada de formación para os 23 equipos galegos participantes na fase rexional de CanSat 2024, a competición promovida pola Axencia Espacial Europea e que conta co apoio da Xunta de Galicia, na que se reta ao alumnado de Secundaria a realizar unha simulación dun satélite desde a súa concepción ata o lanzamento ao espazo e posterior recollida de datos.

O titular de Educación do Goberno galego asegurou que este desafío ao que se van enfrontar os equipos galegos “supón moito máis ca unha demostración do seu entendemento no campo da aeronáutica, xa que tamén representa unha oportunidade para levar ao terreo práctico o que pode ser unha carreira de futuro para moitos deles”, abondou dirixíndose aos 140 participantes entre alumnado e profesorado da vintena de centros educativos adheridos ao proxecto.

Román Rodríguez salientou que encontros coma este axudan, desde as aulas, a xerar innovación aplicada, ao desenvolvemento colectivo, á resolución de retos tecnolóxicos e ao fortalecemento da capacidade dixital. “Ademais, formar a futuros profesionais nun maior desempeño tecnolóxico aumenta as súas oportunidades de obter un traballo en calquera sector”, afirmou.

Lanzamento o 23 de abril

O encontro de hoxe, no decurso do cal se desenvolven catro relatorios vinculados á temática de satélites, serviu para a presentación dos equipos, que están formados por un máximo de seis alumnos baixo a coordinación dun docente.

A xornada de lanzamento de satélites terá lugar o 23 de abril no aeródromo das Gaivotas  en Cerceda e posteriormente, o día 26, haberá un evento para a defensa dos resultados dos proxectos, nos que se valorará a parte de programación e de construción de hardware, así como a parte de comunicación e difusión das propostas. O equipo gañador da fase rexional representará a Galicia na fase nacional.

Un CanSat é unha simulación satélite integrada dentro dunha lata de refrescos. O desafío para o alumnado consiste en introducir nun espazo reducido os principais elementos dun satélite real, como a alimentación eléctrica, os sensores e o sistema de comunicacións. A continuación, lánzase o CanSat a unha altura aproximada dun quilómetro e déixase caer desde unha plataforma mediante un dron, un globo cativo, un foguete ou calquera outro método. O experimento científico consiste en lograr unha aterraxe sen danos e a análise dos datos durante o descenso.

Os centros participantes, algún deles con más dun equipo, son os seguintes:

Provincia

Concello

Centro

A Coruña

Arteixo

IES Manuel Murguía

A Coruña

Betanzos

CPR Plurilingüe Nuestra Señora Carmen

A Coruña

Cariño

IES Cabo Ortegal

A Coruña

A Coruña

CPR Compañía de María

A Coruña

Ferrol

CPR Ayala

A Coruña

Muxía

IES Ramón Caamaño

A Coruña

Noia

IES Virxe do Mar

A Coruña

Ortigueira

IES de Ortigueira

A Coruña

As Pontes

IES Castro da Uz

Lugo

Burela

IES Perdouro

Lugo

Lugo

IES Lucus Augusti

Lugo

Lugo

IES Leiras Pulpeiro

Lugo

Mondoñedo

IES Plurilingüe San Rosendo

Ourense

A Gudiña

CPI Laureano Prieto

Ourense

Ourense

IES O Couto

Ourense

Ourense

CPR Santa María Maristas

Pontevedra

Caldas

IES Aquis Celenis

Pontevedra

Vigo

IES Álvaro Cunqueiro

Pontevedra

Vigo

IES República Oriental do Uruguai

Pontevedra

Vigo

CPR Plurilingüe Montecastelo

Pontevedra

Vigo

CPR Plurilingüe Las Acacias

Información xeral Consellería de Cultura, Educación, Formación Profesional e Universidades

Summary: 

O conselleiro de Educación en funcións, Román Rodríguez, comproba o resultado da rehabilitación integral do Instituto IES Nosa Señora dos Ollos Grandes (1,6M€)

Tamén veñen de recibirse as obras da central de biomasa da nova mazá educativa (2,2M€), do colexio CEIP de Paradai (932.655€) e do instituto IES Ánxel Fole (1,4M€)

Anuncia o reinicio inmediato das obras na Escola de Arte e Superior de Deseño Ramón Falcón e a previsión de adxudicar en abril as do IES Lucus Augusti

O investimento en obras en centros educativos da cidade da Muralla acadou os 15M€ nos últimos catro anos

Idioma Gallego

O conselleiro de Cultura, Educación, FP e Universidades en funcións, Román Rodríguez, comprobou hoxe o resultado das obras de rehabilitación integral do Instituto IES Nosa Señora dos Ollos Grandes, en Lugo, nas que o seu departamento investiu máis de 1,6M€. “Unha das catro grandes obras en centros educativos que a Xunta vén de recepcionar nas últimas semanas por un importe de 6 M€, xunto coa central de biomasa da nova mazá educativa de Lugo (2,2M€) e as rehabilitacións do colexio CEIP de Paradai (932.655€) e do instituto IES Ánxel Fole (1,4M€)”, destacou.

O representante da Xunta de Galicia anunciou, ademais, o reinicio inmediato das obras de rehabilitación integral na Escola de Arte e Superior de Deseño Ramón Falcón (1M€), que tiveron problemas de subministro de materiais. Así mesmo, está previsto que a reforma do Instituto IES Lucus Augusti (3,4M€) se adxudique no mes de abril, con inicio das obras cando remate o curso.

“A de Lugo é unha das cidades con maior esforzo inversor por parte da Xunta de Galicia en materia de obras educativas”, explicou o conselleiro en funcións, salientando que nos últimos catro anos, o investimento en obras en centros educativos acadou os 15M€, “con actuacións tan salientables como estas que vimos de recepcionar ou o novo edificio de cociñas do Instituto IES Sanxillao, entre outras”.

“Todas elas enmárcanse no Plan de Nova Arquitectura Pedagóxica, a folla de ruta do Goberno galego para a modernización dos centros educativos, que fai fincapé precisamente na súa adecuación ás esixencias de sostibilidade e respecto polo medio ambiente, con obras que contribúen tamén a mellorar o día a día de alumnos e docentes, como a destes centros”, explicou o Román Rodríguez.

O representante do Goberno galego lembrou, así mesmo, que en 2024 se iniciarán os trámites de novas obras no CIFP As Mercedes, no Centro de Educación Especial Santa María e no Colexio CEIP Plurilingüe de Nadela, con importes aínda por concretar.

Mellora da eficiencia e a funcionalidade

No que atinxe á obra realizada no Instituto IES Nosa Señora dos Ollos Grandes, o conselleiro en funcións explicou que se enfocou na mellora do confort térmico da comunidade educativa e na eficiencia enerxética, o que redundou nun aforro do 37% de enerxía primaria non renovable.

A actuación abrangueu a colocación de illamento térmico en toda a fachada do edificio e a substitución das carpintarías exteriores de aluminio por outras de madeira. Así mesmo, cambiouse o falso teito por outro de placa de xeso laminada e instaláronse luminarias tipo LED.

Dentro das melloras funcionais solicitadas pola dirección do centro educativo, e para adaptalo ás actuais necesidades docentes, fixéronse varias intervencións. Ampliáronse varias aulas e construíuse unha zona de aseos novos na segunda planta do edificio. Así mesmo, reestruturáronse os espazos das salas de xuntas e da de profesores para gañar máis espazo para a biblioteca escolar. Por último, para de evitar humidades e acadar un maior confort, creouse un circuíto de ventilación na zona do ximnasio e dos departamentos anexos e pintaranse os paramentos interiores e exteriores.

En complemento á actuación, nestes momentos o INEGA está realizando unha instalación de luminarias ornamentais na fachada do edificio.

Información xeral Consellería de Cultura, Educación, Formación Profesional e Universidades

Summary: 

O conselleiro de Educación en funcións recibe aos dous galegos, elixidos entre os ‘10 jóvenes españoles con más talento’ do programa científico Celera

Idioma Gallego

O conselleiro de Cultura, Educación, FP e Universidades en funcións, Román Rodríguez, recibiu esta mañá a Ana Simoneta Rubido Loureiro e Manuel Rico Fernández San Silvestre, que veñen de ser seleccionados entre os 10 jóvenes españoles con más talento ao abeiro do programa científico Celera, nacido hai unha década co obxectivo de identificar a mozos con talento de España para dotalos das ferramentas axeitadas que lles permita potenciar as súas capacidades persoais e profesionais.

Román Rodríguez salientou o “tesón e esforzo” destes dous estudantes cunha “brillante traxectoria académica que, de seguro, será o pasaporte a un prometedor futuro profesional”. “Representan, ademais, o mellor exemplo da calidade das nosas universidades públicas”, abondou o conselleiro, quen agradeceu a ambos que “nos representen a Galicia e ao noso sistema educativo aló onde vaian”.

Ana Simoneta Rubido, que participou de xeito telemático, é graduada en Dereito pola Universidade de Santiago de Compostela, e impulsora do Pacto Interxeracional polo Futuro, un proxecto de intelixencia colectiva coa participación de máis de 2.000 mozos, e do innovador Espazo da Opositora. Entre os seus obxectivos está o desenvolvemento de proxectos especializados en áreas de goberno aberto, innovación pública e avaliación de políticas co obxectivo de contribuír a axilizar as estruturas administrativas.

Manuel Rico Fernández San Silvestre é estudante de 5º curso de Medicina na USC, e está centrado nas enfermidades neurodexenerativas e desordes, particularmente o Párkinson. O seu obxectivo é afondar no estudo desta enfermidade compaxinando o contacto co paciente e co estudo biotecnolóxico e sanitario. Así mesmo, tamén ten como obxectivo avanzar na exploración de sectores do emprendemento e da divulgación científica para xerar un impacto real. Neste senso, Manuel Rico colabora coa Fundación Degén contra as docencias neurodexenerativas. E tamén ten no seu haber ser o único estudante europeo seleccionado polo Harvard Stem Cell Institute Internship Program en 2022.

Información xeral Consellería de Cultura, Educación, Formación Profesional e Universidades

Summary: 

O conselleiro de Educación en funcións visita o centro, no que se substituíron un total de 220 fiestras e se instalou illamento térmico nas fachadas

Idioma Gallego

O conselleiro de Cultura, Educación, FP e Universidades en funcións, Román Rodríguez, visitou esta mañá o Colexio Público Integrado CPI Plurilingüe Cernadas de Castro, en Lousame, para comprobar o resultado das obras levadas a cabo pola Xunta de Galicia cun investimento de preto de 600.000 euros.

Román Rodríguez salientou que estas melloras, que supuxeron a renovación das fiestras e o illamento térmico do edificio principal e do de Infantil, teñen “unha repercusión directa tanto no confort dos alumnos e dos docentes que usan estas instalacións día a día, así como no eido da sostibilidade enerxética e ambiental”.

En total substituíronse 220 ventás e instalouse illamento térmico con SATE nunha superficie de algo máis de 1.000m², o que, segundo o conselleiro, “dá boa conta da envergadura desta actuación” enmarcada no Plan de Nova Arquitectura Pedagóxica, a folla de ruta coa que o Goberno galego está a modernizar os centros de ensino e converténdoos en instalacións máis eficientes e sustentables, así como axustadas ás necesidades da educación do século XXI, máis dixitalizadas e con espazos funcionais, amplos e flexibles.

Durante a visita, Román Rodríguez reiterou a aposta do Goberno galego coa mellora educativa no ámbito do rural, o que garante que os alumnos galegos “teñan exactamente as mesmas oportunidades independentemente de onde vivan”.

Nesta liña destacou a implicación do centro educativo cos distintos programas da Consellería de Educación “grazas ao traballo e ao compromiso do seu profesorado co equipo directivo á cabeza”. Non en balde, o Cernadas de Castro é centro plurilingüe desde 2016 para a etapa de ESO, está incorporado ao proxecto E-Dixgal da Xunta e participa nos Contratos-Programa con distintos proxectos en marcha tanto das liñas de reforzo educativo como de innovación e de inclusión e convivencia.

Información xeral Consellería de Cultura, Educación, Formación Profesional e Universidades

Summary: 

O certame ten como obxectivo potenciar a realización de proxectos empresariais polo alumnado das ensinanzas de FP, deportivas ou de artes plásticas e deseño

Ademais dun premio en metálico, os gañadores poden incorporarse a un viveiro de empresa da Consellería de Educación e recibir asesoramento a través da Rede de polos de emprendemento e apoio ao emprego

As ideas gañadoras abarcan unha ampla gama de temáticas, desde a arte urbana e a sustentabilidade ambiental ata a inclusión e a moda personalizada

Idioma Gallego

Un total de seis institutos e centros integrados de FP veñen de alzarse cos premios do concurso Eduemprende Idea 2023, un certame impulsado polas Consellerías de Cultura, Educación, FP e Universidade e de Promoción do Emprego e Igualdade co obxectivo de incentivar a realización de proxectos empresariais entre o alumnado das ensinanzas de FP, deportivas ou de artes plásticas e deseño.

As persoas participantes debían presentar ideas de negocio orixinais que puideran dar lugar ao desenvolvemento de novas empresas, promovendo, deste xeito, a cultura emprendedora entre o alumnado. Os seis proxectos premiados, tres na modalidade de ciclos de grao medio e tres na modalidade de ciclos de grao superior, recibirán un total de 12.000 euros a razón de 3.000€ para o 1º premio, 2.000€ para o 2º e 1.000€ para o 3º.

Así mesmo, os gañadores poderán incorporarse a un viveiro de empresa da Consellería de Educación e recibir asesoramento técnico a través da Rede de polos de emprendemento e apoio ao emprego.

Os seis proxectos premiados nesta edición foron os seguintes:

 

Modalidade A (Ciclos grao superior)

Centro

Concello

Proxecto

1º Premio

IES Rosalía Mera

A Coruña

Street Art Galicia

2º Premio

CIFP Politécnico

Santiago

Mam Madeira

3º Premio

CIFP Montecelo

Pontevedra

Mía Creativa

 

 

Modalidade B (Ciclos grao medio)

Centro

Concello

Proxecto

1º Premio

CIFP Fontecarmoa

Vilagarcía de Arousa

Green Paws

2º Premio

IES A Pinguela

Monforte de lemos

 

StyleClo

3º Premio

CIFP Compostela

Santiago de Compostela

Laetus

 

As ideas gañadoras abarcan unha ampla gama de temáticas, desde a arte urbana e a sustentabilidade ambiental ata a inclusión e a moda personalizada, demostrando a capacidade de xerar solucións innovadoras para satisfacer as necesidades e desexos da sociedade contemporánea. O seu enfoque na inclusión, a sustentabilidade e a experiencia do cliente marca un estándar elevado para a innovación empresarial cun impacto positivo na sociedade.

Proxectos da modalidade de ciclos superiores

A proposta Street Art Galicia, do Instituto IES Rosalía Mera (A Coruña), que se alzou co primeiro premio na modalidade de ciclos superiores, busca converterse nunha plataforma de referencia para a arte urbana galego, ofrecendo un catálogo dixital e físico de obras, entrevistas con artistas e actividades relacionadas.

O segundo premio desta modalidade foi para o Centro Integrado de FP Politécnico, de Santiago de Compostela con Mam Madeira, un proxecto de carpintería sostible, utilizando principalmente madeira reciclada para crear produtos únicos que contribúan á creación de espazos acolledores.

O terceiro premio, Miña Creativa do Centro Integrado de FP Montecelo de Pontevedra, céntrase no deseño gráfico e a xestión web cun forte compromiso coa inclusión, ofrecendo medidas para garantir a accesibilidade dos contidos en liña para persoas con diversas condicións.

Proxectos da modalidade de ciclos de grao medio

Na modalidade de ciclos de grao medio, o primeiro premio recaeu no Centro Integrado de FP Fontecarmoa (Vilagarcía de Arousa) coa proposta Green Paws, que aborda o benestar animal e a sustentabilidade mediante a construción de casetas para animais rueiros utilizando materiais reciclados e unha aplicación para localizar e rexistrar a estes animais.

O segundo premio foi para o Instituto IES A Pinguela (Monforte de Lemos) con StyleClo, unha aplicación móbil de moda que permite aos usuarios crear combinacións de roupa de maneira rápida e sinxela, con suxestións personalizadas baseadas no clima, a ocasión e as preferencias individuais.

Por último, o terceiro premio desta modalidade recaeu no Centro Integrado de FP Compostela con Laetus, que aspira a converterse nunha cadea de gastrobares de luxo en Santiago de Compostela, fusionando a tradición culinaria galega con influencias de América e Asia para ofrecer unha experiencia gastronómica única.

Información xeral Consellería de Cultura, Educación, Formación Profesional e Universidades

Summary: 

Van dirixidos ao alumnado de grao que obtivese as mellores cualificacións no ano académico 2022/23 nas universidades galegas, agás no último curso, no que se outorgan os Premios Fin de Carreira

A contía dos premios é de 1.100€ por cada unha das persoas beneficiarias

Desde o pasado curso, estes galardóns levan o nome da mestra ferrolá, referente da innovación no ensino, que en 1949 inventou e rexistrou a patente do antecedente do libro electrónico

Idioma Gallego

O Diario Oficial de Galicia vén de publicar a convocatoria da sexta edición dos Premios Ángela Ruíz Robles á excelencia académica. Van dirixidos ao alumnado de grao que obtivese as mellores cualificacións no ano académico 2022/23 nas universidades galegas. Concederase un premio por cada un dos cursos en que se estruturan os plans de estudos das titulacións oficiais de grao e en cada un dos centros en que se impartan, agás no derradeiro curso, no que se outorgan os Premios Fin de Carreira.

A Consellería de Cultura, Educación, Formación Profesional e Universidades destina un orzamento de 613.800€ a esta convocatoria outorgando 1.100 euros a cada unha das persoas beneficiarias.

Para poder ser premiado, o alumnado deberá ter no curso académico 2022/23 unha nota media igual ou superior a oito puntos e ter superado a totalidade dos créditos matriculados, que como mínimo serán 60. Tamén estar matriculado da mesma titulación no  presente curso 2023/24.

Os premios outórganse de oficio por proposta das universidades do Sistema universitario de Galicia, que publicarán nas súas respectivas páxinas web a relación do alumnado seleccionado de acordo cos requisitos establecidos na convocatoria.

Referente no ensino innovador

Este é o segundo ano no que estes galardóns reciben o nome de Ángela Ruíz Robles, mestra ferrolá de adopción, que foi un exemplo de valores como o esforzo, o tesón, a excelencia, a continua aprendizaxe, a vocación de servizo á sociedade, idóneos para vencellalos a esta convocatoria de galardóns. Ademais, en 1949 inventou e rexistrou a patente do que é o antecedente do libro electrónico.

Nada no ano 1895 en Villamanín (León), Ángela Ruiz Robles trasladouse en 1918 a Ferrol logo de gañar por oposición unha praza de mestra nacional, onde se estableceu para o resto da súa vida. Foi docente e directora de varias escolas, como a de nenas no Hospicio de Ferrol ou o Instituto Ibáñez Martín. Así mesmo, fundou a Academia Elmaca na que desenvolveu un labor pedagóxico e social que lle valeu a concesión en 1947 da Cruz de Alfonso X o Sabio, por accións como impartir clases nocturnas gratuítas ás persoas con poucos recursos.

Foi unha pioneira no eido do ensino e, en especial, na invención dunha enciclopedia mecánica, cuxa patente rexistrou en 1949, e que está considerada o antecedente do libro electrónico. O primeiro prototipo, construído en 1962, deu como resultado un artefacto que permitía, entre outras funcións, formar palabras, oracións e textos a partir da interacción de teclas e dispositivos distribuídos nunha especie de caixa. Ademais de leccións de gramática, cálculo, inglés e francés, era posible a lectura en horizontal e vertical e a inclusión de máis temas.

Ademais deste carácter innovador, na súa traxectoria docente, Ángela Ruiz Robles caracterizouse por unha vocación de servicio desinteresado e compromiso cos seus alumnos e a súa comunidade. Deu moita importancia ao ensino de idiomas, a aprendizaxe intuitiva, o uso de ilustracións e outros recursos docentes novidosos para o seu tempo. Ademais do seu labor como docente e como inventora, escribiu 16 libros dedicados á educación e a pedagoxía centrados no obxectivo de facer o ensino máis áxil e interactivo.

Información xeral Consellería de Cultura, Educación, Formación Profesional e Universidades