Lexislación

Summary: 

Román Rodríguez destaca as distintas accións impulsadas pola Xunta neste eido como a certificación de competencias lingüísticas ou a mobilidade internacional

Tamén participa na xornada sobre intelixencia artificial de CECE-Galicia

Idioma Gallego

Arredor de 200 docentes participan hoxe nunha xornada de formación en linguas estranxeiras organizada pola Xunta de Galicia, a través do Centro Autonómico de Formación e Recursos, para afondar en novas metodoloxías e estratexias para a dinamización nas aulas así como sobre o uso de novos recursos didácticos e sobre os retos e as posibilidades que abre o emprego da intelixencia artificial entre outros.

O conselleiro de Educación, Ciencia, Universidades e FP, Román Rodríguez, subliñou a importancia da competencia plurilingüe no contexto actual e puxo en valor o conxunto de iniciativas que está reforzando a Xunta de Galicia a través da Estratexia de Linguas Estranxeiras Edulingüe 2030 “coa continuidade e a consolidación dos programas levados a cabo na última década e nos que  se inclúen novos retos de calidade vencellados non só á internacionalización, senón tamén á inclusión e á innovación”.

O conselleiro referiuse, en concreto, ao reforzo da certificación das competencias lingüísticas tanto para o profesorado como para o alumnado como “unha das apostas” dos próximos anos co desenvolvemento, xa en marcha, “dun programa intensivo” de certificación e acreditación no marco europeo. 

A intelixencia artificial ao servizo da educación

O titular de Educación participou tamén nas xornadas sobre intelixencia artificial organizadas por CECE-Galicia, onde puxo de manifesto o compromiso do Goberno galego por “actualizar e reorientar” o uso das novas tecnoloxías e as “inmensas posibilidades” que abren no eido formativo.

Neste senso, a través da Estratexia de Educación Dixital, Edudixital 2030, a Consellería de Educación pon á disposición da comunidade educativa distintas ferramentas tanto no que atinxe á formación académica como a aspectos relativos ao uso seguro das novas tecnoloxías.

Tamén neste eido, estase implantando un procedemento de Acreditación da Competencia Dixital para alumnado, profesorado e persoas adultas, co fin de reforzar a capacitación no uso das novas tecnoloxías.

Finalmente, o conselleiro referiuse ao proxecto EdugaIA, de aplicación das vantaxes da intelixencia artificial á administración educativa dixital, para mellorar a toma de decisións de cara ao éxito escolar, crear un expediente académico centralizado e habilitar unha ventanilla única de comunicación da comunidade educativa.

Información xeral Consellería de Educación, Ciencia, Universidades e Formación Profesional

Summary: 

Destina 200.000 euros a fomentar a elaboración e publicación de recursos didácticos curriculares en galego e favorecer o tecido da industria editorial galega

As editoriais poderán solicitar estas subvencións a través da sede electrónica da Administración autonómica ata o 7 de xuño

Idioma Gallego

O Diario Oficial de Galicia (DOG) publicou as subvencións para a edición en lingua galega de recursos didácticos curriculares para niveis non universitarios. Trátase dunha liña de axudas destinada á edición de materiais en formato impreso ou dixital á que a Consellería de Cultura, Lingua e Xuventude achega durante este ano 200.000 euros.

O obxectivo da convocatoria, dirixida ás empresas do sector editorial, é fomentar a elaboración e publicación de recursos didácticos curriculares en galego no ensino regrado e favorecer o tecido da industria editorial galega. Aquelas que cumpran os requisitos deberán solicitar as axudas obrigatoriamente por medios electrónicos a través do formulario da sede electrónica da Xunta ata o 7 de xuño.Será subvencionable a elaboración e edición en lingua galega dos recursos didácticos curriculares e complementarios destes para niveis non universitarios realizados en soportes impresos ou dixitais. Quedan excluídos destas subvencións libros de creación literaria, dicionarios, enciclopedias, libros de bibliófila, volumes de difusión gratuíta, publicacións de clubs de lectura ou similares, obras que non sexan primeira edición ou proxectos con contidos idénticos aos xa subvencionados nalgunha das tres últimas convocatorias, con independencia do soporte ou formato no que se presenten. 

Os materiais editados en soporte impreso deberán ter unha tiraxe mínima de 1.000 exemplares e os editados en soporte dixital ou audiovisual, de 500. En calquera caso, as publicacións electrónicas, pola súa natureza, non están suxeitas a este requisito e, de se editar nalgún soporte tanxible (memoria USB, CD, DVD ou outros), a tiraxe mínima será de 50 exemplares.

Os proxectos presentados serán valorados por unha comisión en función da súa orixinalidade -primando as obras de creación propia sobre as adaptacións ou refundicións- e da súa calidade, que se medirá en función da adaptación dos materiais ao currículo oficial, do tipo de actividades propostas, da relación dos contidos cos intereses e coñecemento do alumnado destinatario, do tratamento dos valores democráticos, da adecuación á realidade cultural e social de Galicia e, por suposto, da calidade lingüística. 

Ademais, os materiais destinados á formación profesional específica ou ao alumnado con necesidades específicas de apoio educativo obterán un incremento final da puntuación global dun 20 %. 

Información xeral Consellería de Educación, Ciencia, Universidades e Formación Profesional

Summary: 

Román Rodríguez fixa que as primeiras medidas estean operativas no inicio do vindeiro curso, dando cumprimento ao acordo asinado coas organización sindicais

A dixitalización de procesos administrativos ou a elaboración de guías que poidan orientar dun xeito áxil a xestión, entre as accións a desenvolver

Idioma Gallego

O conselleiro de Educación, Ciencia, Universidades e FP, Román Rodríguez, reuniuse hoxe cos grupos de traballo para a simplificación administrativa no ensino. Son catro grupos, divididos por ensinanzas e etapas, compostos por unha vintena de directores de centros educativos e inspectores. “Eles son os que mellor coñecen que procesos cómpre simplificar e como facelo, co obxectivo de liberar de parte da carga burocrática ao conxunto de profesorado”, explicou.

O titular do departamento educativo da Xunta lembrou que a redución da burocracia é un dos puntos incluídos no Acordo de Mellora Estrutural do Sistema Educativo en Galicia asinado coas organizacións sindicais este curso. Deste xeito, aténdese unha das demandas actuais do profesorado, que poderá dedicar ese tempo a outras tarefas.

No seu encontro, o conselleiro fixou como unha prioridade poñer en marcha as primeiras medidas xa en setembro, coincidindo con inicio do vindeiro curso. Entre elas, prevense accións para a dixitalización dos procesos administrativos como –por exemplo– a solicitude de permisos por parte do profesorado para asistir a cursos de formación en entidades diferentes da Consellería, de maneira que todo o procedemento, desde a solicitude ata a resolución, poida facerse en liña.

Nesa mesma liña estaría a elaboración de guías e manuais que simplifiquen e axuden de xeito rápido e fiable a proporcionar solucións a determinados dúbidas que poidan xurdir na xestión diaria ou ante cuestións puntuais. Dous exemplos serían unha guía de actuación para os equipos directivos ou un manual que instrucións sobre o mantemento preventivo dos centros educativos.

Acción coordinada

Cada grupo está liderado por un inspector, correspondentes aos distintos tipos de centros: un para colexios de Educación Infantil e Primaria, outro para institutos de Educación Secundaria, un terceiro para centros integrados de FP e o último para os centros que imparten ensinanzas de réxime especial (conservatorios, escolas oficiais de idiomas, escolas de arte e superiores de deseño...). Ademais do inspector, componse por catro persoas que ocupan a dirección dun centro da categoría correspondente.

O obxectivo destes grupos é elevar propostas de mellora co obxectivo de que se poidan implantar no inicio do curso 2024-25. A maiores, existe una comisión xeral de coordinación formada por representantes da Xunta autonómica de directores, tres representantes dos sindicatos que asinaron o acordo coa Xunta de Galicia e persoal das direccións xerais que teñen competencias neste campo.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Román Rodríguez, visita o centro, onde tamén se reformará o ximnasio e se ampliará o comedor

“Flexibilizamos espazos, dándolles máis amplitude, luz natural e versatilidade, de acordo co Plan de Nova Arquitectura Pedagóxica”, destaca 

Idioma Gallego

O conselleiro de Educación, Ciencia, Universidades e FP, Román Rodríguez, anunciou a próxima licitación da obra de reforma do Colexio CEIP de Ortigueira, en Vedra, que contará cun investimento de máis de 400.000€. “Trátase dunha actuación moi ambiciosa que vai permitir mellorar o ximnasio do centro, ao tempo que se crean novos espazos exteriores para o lecer e o deporte resgardados da choiva e do frío”, explicou o conselleiro.  

Segundo sinalou, a previsión é licitar a actuación no prazo aproximado dun mes. Unha vez se adxudique, ten un prazo de execución de seis meses. Así mesmo, lembrou que a Administración autonómica leva investidos máis de 1,1M€ na última década nos dous colexios do municipio, dos que cómpre destacar a do Centro Público Integrado (CPI) Plurilingüe de Vedra, que en 2020 foi obxecto dunha importante ampliación coa dotación dun novo aulario para Secundaria.

Nova cuberta exterior

A actuación no CEIP de Ortigueira consistirá na construción dunha nova cuberta exterior na fachada oeste do edificio de Primaria, creando unha terraza practicable desde o comedor que tamén conectará co patio orientado a sur. Este espazo dará a oportunidade de trasladar ou comedor ao exterior, entre outras actividades posibles.

A nova cubrición permitirá tamén crear un patio en continuidade co ximnasio, que estará iluminado con luz natural a través de lucernarios e contará con bancadas, xardineiras e unha pérgola vexetal. Ademais, mellorarase a accesibilidade mediante camiños de terra compactada.

No que atinxe ao ximnasio, dotarase de novos aseos, un deles adaptado, e almacén. Así mesmo, demolerase o peche actual, substituíndoo por carpinterías practicables e transparentes que melloren a entrada da luz natural e permitan abrir o espazo ao patio cuberto. A actuación suporá a reforma dunha superficie de 397m² e a construción doutros 220m² de espazo útil.

“En definitiva, imos flexibilizar espazos, dándolles máis amplitude, luz natural e versatilidade, de acordo cos principios fundamentais do Plan de Nova Arquitectura Pedagóxica”, destacou Román Rodríguez.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación destaca a importancia desta actuación, que “satisface as demandas existentes debidas ao incremento de alumnos que está a vivir o centro”

O proxecto enmárcase no Plan de Nova Arquitectura Pedagóxica, para dar resposta ás necesidades actuais da comunidade educativa

Idioma Gallego

O conselleiro de Educación, Ciencia, Universidades e FP, Román Rodríguez, acompañado polo delegado territorial da Xunta en Ourense, Manuel Pardo, inaugurou as obras de ampliación do Instituto IES Ferro Couselo. “Nesta actuación, na que investimos 2,7 M€, buscamos incrementar o número de aulas e de diversos espazos para satisfacer as demandas existentes”, dixo Román Rodríguez.

Enmarcada no Plan de Nova Arquitectura Pedagóxica, a folla de ruta da Xunta para modernizar os centros educativos dando resposta ás necesidades do século XXI, esta obra dotou ao centro dunha planta adicional de máis de 1.000 metros cadrados e outra de baixo cuberta de 270 metros cadrados destinada a almacenaxe e instalacións. Con esta ampliación, dispuxéronse cinco novas aulas e creouse un espazo multiusos, unha aula de desdobre, un almacén e dous corredores diferenciados para reforzar a seguridade en caso de incendios.

O titular da Consellería de Educación, Ciencia, Universidades e FP remarcou que con esta actuación tamén “se lle dá cumprimento á normativa antiincendios, pois a ampliación do edifico implica un aumento considerable da súa ocupación, polo que foi preciso executar dúas novas escaleiras de emerxencia exteriores”.

Entre os obxectivos atopábase a ampliación da zona de comedor e cafetería, o que posibilita satisfacer as demandas dos usuarios. Tamén se realizou a redistribución parcial da planta semisoto para albergar dous aseos adaptados, mellorando “as condicións do vestiario non docente”, engadiu Román Rodríguez.

Deste xeito, o Goberno galego dá “resposta ás necesidades actuais da comunidade educativa e, concretamente, ao incremento continuado de alumnos que está a vivir este instituto, sostido no tempo e que prevemos que se manteña para os próximos cursos”, destacou o conselleiro de Educación.

Outras obras

O IES Ferro Couselo tamén conta, desde o 2022, cunha pista cuberta, na que se destinaron case 500.000 euros. Así, o Goberno galego leva investido neste centro educativo 4 M€ desde o ano 2009.

Con esta actuación logrouse o obxectivo de ampliar a zona de uso exterior creando un espazo que se pode empregar en todo tipo de condicións meteorolóxicas, pois conta cunha superficie de case 800 metros cadrados e un acceso de 161 metros cadrados.

Información xeral Consellería de Educación, Ciencia, Universidades e Formación Profesional

Summary: 

Lembra que xa están en vigor os complementos por función directiva, por titorías e por formación permanente e se está avanzando nos grupos de traballo para a redución da burocracia nos centros

Idioma Gallego

O conselleiro de Educación, Ciencia, Universidades e Formación Profesional, Román Rodríguez, gaba o papel “esencial” que exercen os equipos directivos dos centros escolares na boa marcha do sistema, unha función que a Xunta de Galicia vén de reforzar no vixente Acordo para a Mellora do Sistema Educativo de Galicia acadado coas organizacións sindicais.

O titular de Educación do Goberno galego participou hoxe na apertura das XXXI Xornadas de equipos directivos de Educación de Infantil e Primaria organizadas pola Asociación de Directores de Colexios Públicos da Coruña para debater e intercambiar experiencias en ámbitos como o dereito de familia, a xestión dos centros, o absentismo ou a protección de datos, entre outros.

Ferramentas para a mellor xestión

Na súa intervención, Román Rodríguez puxo en valor a función directiva como unha das claves para “acadar un modelo educativo onde prime a igualdade de oportunidades e a calidade”, e aludiu tamén á “responsabilidade” da Administración para poñer á disposición dos directores todas as ferramentas neste eido, como as que se recollen no Acordo de Mellora Estrutural do Sistema Educativo en Galicia xa en marcha.

Exemplo disto é que, desde xaneiro, o profesorado galego xa está percibindo as melloras de complementos específicos por funcións directivas, por titorías e por formación permanente do profesorado. Así mesmo, tal e como sinalou o conselleiro, tamén se está avanzando nos grupos de traballo para a simplificación administrativa e a redución da burocracia nos centros, que era unha das reivindicacións máis demandadas.

Outro dos aspectos nos que fixo fincapé o conselleiro foi o da “continua actualización e mellora competencial” das persoas que exercen as funcións directivas e do conxunto profesorado para a mellora do proceso de ensino-aprendizaxe e afrontar retos como a atención á diversidade ou a xestión tecnolóxica.

Neste senso, a Consellería pon á disposición dos centros o Plan Anual de Formación do Profesorado, que este curso se concreta en 5.800 accións formativas enfocadas a liñas prioritarias como a dixitalización, a innovación e a convivencia.

Román Rodríguez pechou a súa intervención agradecendo a “motivación” do profesorado por formarse e apelando a seguir traballando “de xeito colaborativo e coordinado” a prol “dun modelo inclusivo, innovador, flexible, cooperativo e axustado ás necesidades dos alumnos”.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Román Rodríguez, acompañado pola delegada da Xunta en Ferrol, Martina Aneiros, visita o centro para supervisar os primeiros traballos

Construirase un novo edificio para as aulas de Infantil e psicomotricidade, que permitirá reordenar os espazos no edificio existente

Tamén se aplicará illamento térmico no edificio de Primaria e ESO e mudaranse as fiestras

Idioma Gallego

O conselleiro de Educación, Ciencia, Universidades e FP, Román Rodríguez, acompañado pola delegada territorial da Xunta en Ferrol, Martina Aneiros, visitou hoxe o Centro Público Integrado As Mirandas, en Ares, co gallo do inicio da ampliación  e reforma que o seu departamento está a realizar neste colexio. “Esta semana iniciamos os traballos, unhas obras nas que investimos máis de 3 M€ que van redundar nunha mellora significativa do servizo educativo do concello de Ares, que só conta con este centro”, destacou o conselleiro.

Enmarcada no Plan de Nova Arquitectura Pedagóxica, a folla de ruta da Xunta para modernizar os centros educativos dando resposta ás necesidades do século XXI, esta actuación supón dotar o centro con espazos máis axeitados para Infantil, incluíndo unha aula especializada de psicomotricidade, así como actuacións na zona de Primaria.

Para iso construirase unha nova edificación que acollerá as seis aulas de infantil –ata o momento distribuídas en diferentes espazos– e a de psicomotricidade, cunha superficie total de 850 m². Este novo volume estará conectado co andar baixo do edificio existente.

O programa de necesidades inclúe a reforma do inmoble xa existente, tanto no que atinxe á eficiencia enerxética como na reordenación de espazos. Deste xeito, mellorarase a envolvente térmica do edificio coa instalación dun sistema de illamento e novas fiestras.

Ademais, situaranse no andar baixo do edificio (agora ocupado por aulas de Infantil) os espazos administrativos, a aula de usos múltiples e a biblioteca, aproveitando para ampliar este último espazo. O resto do volume continuará acollendo as aulas de Primaria e ESO. A obra ten un prazo de execución de un ano.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación agradece o apoio da compañía a estas ensinanzas, tanto a través da formación en empresa como de iniciativas coma esta

Así mesmo, colabora con dous proxectos de FP Dual, en Mecatrónica Industrial e en Química Industrial

Idioma Gallego

O conselleiro de Educación, Ciencia, Universidades e FP, Román Rodríguez, asistiu hoxe ao V Certame de Servizo de Cervexa Estrella Galicia Escolas de Hostalaría de Galicia, onde felicitou o alumnado participante pola alta cualificación acadada nos seus estudos de FP e demostrada neste concurso.

Cómpre destacar que, froito da calidade desta formación, unha alumna do Centro Integrado de FP Paseo das Pontes, Maite Carreira, proclamouse gañadora X Campionato de Tiraxe de Cervexa Estrella Galicia celebrado no Fórum Gastronómico o pasado mes de abril e competirá na final nacional deste certame.

O titular do departamento educativo da Xunta quixo agradecer tamén o apoio de Estrella Galicia ás ensinanzas de FP, non só a través da formación que ofertan nos seus centros de traballo, senón tamén colaborando de xeito directo en dous proxectos de FP Dual, un en Mecatrónica Industrial (co CIFP Universidade Laboral, de Culleredo) e outro de Química Industrial (do IES A Sardiñeira, da Coruña). Ademais, a compañía vén de confirmar que asumirá o custo e a xestión da alta na Seguridade Social do alumnado de FP que incorpore a partir de agora a empresa.

Centros de toda Galicia

A empresa galega tamén impartiu nos últimos meses en varios centros un curso para fomentar o coñecemento e as dinámicas do servizo de cervexa entre o alumnado dos ciclos da familia profesional da Hostalaría. Precisamente os participantes no certame foron seleccionados entre os que realizaron este curso.

Son, en total, 17 rapazas e rapaces dos Centros Integrados de FP Paseo das Pontes (A Coruña), Fraga do Eume (Pontedeume), Compostela (Santiago), Manuel Antonio (Vigo), Carlos Oroza (Pontevedra) e de Vilamarín (Vilamarín), do Instituto de Foz, do Centro Belarmino Fernández Iglesias (Sober) e da Escola de Especialidades da Estación Naval da Graña (ESENGRA).

O xurado avalía tanto o coñecemento teórico como o servizo de cervexa, tanto de barril como de botella, entre outros aspectos, e está constituído por destacados profesionais vencellados aos servizos de restauración.

Información xeral Consellería de Educación, Ciencia, Universidades e Formación Profesional

Summary: 

Recibe a esta autora galega, a máis lida nas bibliotecas escolares durante este curso, e agradece o seu papel a prol de incentivar a lectura entre os máis novos

Idioma Gallego

O conselleiro de Educación, Ciencia, Universidades e Formación Profesional, Román Rodríguez, recibiu á escritora Arantza Portabales, que vén de alzarse co Premio Clubs de Lectura 2024 por ser a autora galega máis lida nas bibliotecas escolares durante este curso.

Román Rodríguez felicitou persoalmente á escritora, que a través deste galardón recibe o beneplácito “dun público tan esixente como son os nenos e os adolescentes” e animouna a continuar “sementando historias” que contribúen a “enriquecernos como lectores”.  O departamento de Educación do Goberno galego creou este premio no ano 2015 co obxectivo de recoñecer o labor dos autores con obra en lingua galega que facilitan cos seus libros a función do profesorado como mediadores de lectura e que concitan o interese dos lectores que participan nos clubs.

Arantza Portabales é unha das autoras máis seguidas polo lectorado xuvenil galego. Comezou a escribir en 2013 no xénero do microrrelato. No 20215 publica o seu primeiro libro en galego e colleita case unha decena de galardóns, como o premio á mellor novela europea traducida do Casino de Santiago de Compostela con Deixe a súa mensaxe despois do sinal ou o premio Manuel Murguía de relato con Xanelas, entre outros.

Información xeral Consellería de Educación, Ciencia, Universidades e Formación Profesional

Summary: 

Ofértanse 15 prazas e o alumnado beneficiario compaxinará a súa formación académica nesta Escola de Arte e Superior de Deseño coa práctica en distintas firmas de xoiería e ourivería colaboradoras a partir do 3º curso

Idioma Gallego

A Xunta de Galicia vai reforzar, de cara ao vindeiro curso, a oferta académica formativa na Escola de Arte e Superior de Deseño EASD Mestre Mateo de Santiago, coa incorporación dunha nova promoción de alumnado da modalidade dual para o itinerario Xoiaría e Complementos da especialidade de Produto, dentro das Ensinanzas Artísticas Superiores de Deseño.

O conselleiro de Educación, Ciencia, Universidades e Formación Profesional, Román Rodríguez, asinou hoxe dous convenios de colaboración co Colexio Oficial de Xoiaría de Galicia e coa Asociación de Artesáns e Comerciantes Ourives de Compostela para a nova promoción de alumnado que cursará esta modalidade formativa que xa comezou a impartirse por primeira vez este curso.

Non en balde, a Escola de Arte e Superior de Deseño Mestre Mateo foi a primeira, e a única de Galicia, en ofertar o itinerario desagregado de Xoiaría e complementos na especialidade de Produto, cunha moi boa acollida por parte do alumnado xa que se cubriron por completo as 15 prazas ofertadas.

Atender a demanda

A partir de agora, e grazas aos convenios asinados hoxe, os estudantes matriculados neste itinerario poderán compaxinar a súa formación académica na Escola Mestre Mateo coa formación práctica en distintas firmas de xoiaría e ourivería integradas nas entidades antes mencionadas.

Esta formación de carácter dual realizarase de xeito compartido entre as empresas e o centro educativo en 3º e 4º curso, durante os cales os alumnos estarán incorporados ao réxime da Seguridade Social e percibirán o salario correspondente de acordo co marco normativo vixente.  

O titular de Educación, Román Rodríguez, puxo en valor a “firme aposta” da Xunta por seguir impulsando opcións académicas de calidade e aliñadas coas demandas socioeconómicas.  Precisamente, este itinerario formativo que agora se reforza coa opción dual, busca “atender a demanda dun sector moi arraigado en Compostela como é a xoiaría e a ourivería artesá”, abondou.

A Escola de Arte e Superior de Deseño Mestre Mateo é un referente tanto nas Superiores de Deseño (con especialidades en Deseño de Moda e Deseño de Produto) e nas Ensinanzas Profesionais de Artes Plásticas (Fotografía, Técnicas Escultóricas, Xoiaría Artística, taller de Dourado e Prateado e taller de Policromía), con máis de 400 alumnos matriculados.

Información xeral Consellería de Educación, Ciencia, Universidades e Formación Profesional

Summary: 

Poderán matricularse máis de 70 alumnos, que realizarán arredor do 40% da súa formación en empresas, coa remuneración correspondente

Román Rodríguez supervisa as obras que se están a desenvolver no centro, cun investimento de máis de 365.000€

“Trátase da primeira fase dunha reforma mais ambiciosa que xa se está proxectando para a remodelación de todos os talleres e cociñas de Hostalaría”, explica

Idioma Gallego

O conselleiro de Educación, Ciencia, Universidades e FP, Román Rodríguez, visitou hoxe o Centro Integrado de FP Fraga do Eume, “no que o vindeiro curso implantaremos tres novos proxectos de FP Dual, nos que poderán matricularse algo máis de 70 alumnos”, anunciou.

O titular do departamento educativo da Xunta, que estivo acompañado pola delegada da Xunta en Ferrol, Martina Aneiros: destacou a gran acollida destes ciclos entre o tecido empresarial. “Non en balde, contamos xa coa participación de 40  empresas e agardamos seguir sumando colaboracións nas vindeiras semanas, que abranguen desde pequenas firmas a grandes grupos”, sinalou.

“Con esta iniciativa continuamos impulsando a FP Dual en Galicia, unha modalidade que conta cunha inserción laboral de prácticamente o 100% e que, ademais, xa cumpre todos os estándares do que se vai denominar a partir de agora FP Dual Intensiva”, explicou o conselleiro. Ao longo dos dous cursos que dura cada proxecto, o alumnado vai realizar entre o 38% e o 44% da súa formación en empresas, toda ela remunerada e, polo tanto, cumprindo todos os requisitos.

Os tres novos proxectos de Dual afondan na especialización deste centro na familia profesional de Hostalaría e turismo, de tal forma que se ofertan nos ciclos de grao medio en Cociña e gastronomía (24 prazas), en Servizos de Restauración (22 prazas) e no ciclo de grao superior en Xestión de Aloxamentos Turísticos (máis de 24 prazas). Este último foi o primeiro en funcionar no CIFP Fraga do Eume e chegará así á súa terceira edición.  

Primeira fase da reforma

No marco desta visita ao centro eumés, o conselleiro supervisou as obras que o seu departamento está a acometer para a mellora da accesibilidade e da eficiencia enerxética. Unha actuación que, tal e como detallou, vai redundar tanto no benestar e confort da comunidade educativa do centro como no desenvolvemento dos ciclos formativos que nel se imparten.

“Trátase da primeira fase dunha reforma mais ambiciosa que xa se está proxectando para a remodelación de todos os talleres e cociñas de Hostalaría, que son as principais ensinanzas deste centro”, afirmou o conselleiro.

Estamos a falar dun centro de referencia, no que acaba de entrar en funcionamento un viveiro de empresas para impulsar o emprendemento entre o alumnado e que conta coas instalacións máis punteiras coas que a Xunta dota aos centros de FP, como son as aulas de emprendemento ou aula tecnolóxica.

Neste sentido, lembrou que o Goberno galego investiu máis de 1M€ en melloras neste centro nos últimos anos e que prevé intensificar estas accións no marco do Plan de Nova Arquitectura Pedagóxica, a folla de ruta da Xunta para modernizar os centros galegos e adaptalos ás necesidades do ensino do século XXI.

Ampliación da aula comedor

Cun investimento de máis de 365.000€, a intervención inclúe a reforma da actual biblioteca para convertela nunha aula-comedor. Este novo espazo conectarase directamente co patio exterior do centro para poder trasladar ao exterior a actividade docente cando o tempo o permita. Isto é preciso para seguir impulsando a especialización do centro en Hostalaría e turismo.

No referido á mellora da accesibilidade, instálase un ascensor con capacidade para oito persoas, que comunicará o acceso principal cos andares primeiro e segundo, onde se sitúan as aulas do centro.

No que atinxe á eficiencia enerxética, substitúese as ventás e instálase illamento térmico SATE en todas as fachadas do espazo ata agora ocupado pola biblioteca, onde tamén se reforman as instalacións de electricidade, iluminación e as instalacións térmicas e de ventilación. Tamén se coloca un panel metálico ondulado sobre a cuberta das pérgolas exteriores para eliminar as filtracións.

Información xeral Consellería de Educación, Ciencia, Universidades e Formación Profesional

Summary: 

A directora xeral de Ordenación e Innovación Educativa, Judith Fernández, entrega este galardón por un proxecto que percorre a traxectoria persoal e profesional de Luísa Villalta a través do metaverso

Idioma Gallego

A directora xeral de Ordenación e Innovación Educativa, Judith Fernández, entregou hoxe ao Centro Integrado de FP CIFP A Carballeira-Marcos Valcárcel o premio do Concurso-Exposición Letras Galegas 2024 sobre a figura da homenaxeada Luísa Villalta este 17 de maio, na modalidade de Educación Secundaria Obrigatoria, Bacharelato, Formación Profesional e Ensinanzas de Réxime Especial. 

O traballo gañador, Viaxe polo metaverso con Luísa Villalta, destaca polo seu carácter innovador ao amosar a protagonista das Letras Galegas como un avatar que convida a percorrer a súa traxectoria persoal e profesional a través do metaverso, unha realidade virtual na que se dispoñen imaxes, recursos e actividades interactivas.

A representante da Consellería de Educación, Ciencia, Universidades e FP destacou o valor deste proxecto pois “trátase dunha excelente exposición e guía para traballar co alumnado na sociedade actual, na que as tecnoloxías da comunicación están moi presentes no eido educativo, laboral e cotián”. 

A exposición vai acompañada, ademais, dunha guía didáctica que orienta o percorrido polos carteis e contribúe ao coñecemento e divulgación de Luísa Villalta e da súa época, na que “colaboraron alumnos de oito ciclos formativos diferentes, ademais dun grupo de profesores de distintas especialidades”, remarcou Judith Fernández.

O certame

O Concurso das Letras Galegas está organizado pola Consellería de Cultura, Lingua e Xuventude co fin de divulgar a figura e o legado da homenaxeada nas Letras Galegas deste ano. O certame, que se realiza todos os anos, conta con dúas modalidades: a correspondente a Educación Infantil e Primaria e a de Educación Secundaria, Bacharelato, FP e Ensinanzas de Réxime Especial.

Na modalidade de Infantil e Primaria fíxose este ano co galardón o Colexio CEIP Raquel Camacho da Coruña polo seu traballo Luísa Villalta, tatuada na pétrea pel do mar. Nel destacan a creatividade, a beleza estética, a cooperación de todo o alumnado, o carácter integrador e inclusivo e o emprego de técnicas e recurso diversos.

As exposicións e guías dos dous traballos gañadores nesta edición do concurso chegarán a case 2.000 puntos de destino e están dispoñibles en versión dixital no Portal da Lingua Galega.

Información xeral Consellería de Educación, Ciencia, Universidades e Formación Profesional

Summary: 

Catro alumnos poderán participar nun programa educativo na Fundación Sozzani de Milán durante os meses de setembro a decembro deste ano

A directora xeral de Formación Profesional, Eugenia Pérez, coñece aos bolseiros do curso pasado na EASD Pablo Picasso da Coruña

Idioma Gallego

A Xunta de Galicia apoia a formación do alumnado de fotografía das escolas de arte e superior de deseño de Galicia con estadías de formación no estranxeiro para que completen os seus estudos. Concretamente, estas bolsas están dirixidas a estudantes que finalizaran o segundo curso do ciclo formativo de grao superior correspondente ao título de técnico superior de Artes Plásticas e Deseño en Fotografía nalgunha das catro escolas de Galicia.

Esta convocatoria, que se realiza en colaboración coa Fundación MOP, outorgará catro bolsas de estudo -unha por cada escola- na Fundación Sozzani de Milán, incluíndo viaxe, aloxamento, programa educativo e manutención entre setembro e decembro deste ano. As persoas seleccionadas desenvolverán un proxecto fotográfico baixo a supervisión de titores, tendo posibilidade de acceder a clases maxistrais con fotógrafos relevantes, participar en eventos e actividades da propia fundación, así como asistir ao festival PhotoVoque.

Así mesmo, os bolseiros realizarán unha viaxe académica e cultural a cidades como París ou Roma, desenvolvendo actividades en colaboración con escolas de arte, imaxe e fotografía francesas e italianas.

Segundo ano da iniciativa

Con este motivo, a directora xeral de Formación Profesional, Eugenia Pérez, e as representantes da Fundación MOP, Raquel Delgado e Leticia Castromil, visitaron a Escola EASD Pablo Picasso da Coruña onde mantiveron un encontro con todos os alumnos do último curso de Artes Plásticas e Deseño en Fotografía das catro escolas para dar a coñecer este programa.

A representante da Consellería de Educación, Ciencia, Universidades e FP aproveitou para coñecer aos tres bolseiros que gozaron da estadía o curso pasado, ano no que se estreou esta convocatoria. Esta é unha das bolsas que integran o amplo programada do que dispón a Xunta de Galicia en materia de mobilidade para que o alumnado galego complete os seus estudos fóra do país.

Solicitudes do 1 ao 22 de xullo

Os estudantes que queiran optar a estas bolsas poden consultar as bases no Portal Educativo e solicitalas no prazo do 1 ao 22 de xullo. Para poder acceder a elas, deben estar matriculados este curso 2023/24 no segundo curso do ciclo de Artes Plásticas e Deseño en Fotografía nalgunha das catro escolas de arte galegas -Pablo Picasso da Coruña, Mestre Mateo de Santiago, Antonio Failde de Ourense e Ramón Falcón de Lugo- e  ter superado integramente o primeiro e o segundo curso.

Ademais, teñen que aportar certificación dun nivel de competencia lingüística B2 ou superior en lingua inglesa e o currículum vítae acompañado de documentación gráfica relativa a un proxecto de fotografía.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP participa na inauguración das XXI Xornadas ‘Internacionalización e Cooperación’ da CRUE

Pon en valor a participación dos centros de investigación galegos en proxectos europeos, así como a organización da Conferencia sobre Intelixencia artificial

Idioma Gallego

O conselleiro de Educación, Ciencia, Universidades e FP, Román Rodríguez, destacou hoxe o avance das universidades galegas no eido da internacionalización e a necesidade de seguir “concretando fórmulas que xeren un maior atractivo tanto para a confluencia de axentes internacionais como incluso de investimentos foráneos”.

 

Na inauguración das XXI Xornadas Internacionalización e Cooperación da Conferencia de Reitores das Universidades Españolas (CRUE), o titular do departamento educativo da Xunta explicou que Galicia “traballa de xeito incansable para fortalecer o desenvolvemento das súas universidades e por multiplicar as oportunidades da súa actividade cara ao resto da sociedade, con medidas como o establecemento dun plan de financiamento plurianual estable que incentiva os resultados e a rendición de contas”.

 

“A partir do próximo curso implantaremos a gratuidade da matrícula e, ademais, queremos ser a primeira Comunidade en alcadar unha inversión do 1% do noso PIB nas universidades”, salientou.

 

Mellora da visibilidade

“Os resultados destas dinámicas no plano internacional non son menores”, sinalou o conselleiro, poñendo como exemplo a participación do Centro de Investigación en Tecnoloxías da Información e as Comunicacións (CITIC) no proxecto EDINAF da Fundación Naval Dixital Europea.

 

Así mesmo, lembrou os 12 proxectos europeos de investigación acadados polo Centro Singular de Investigación en Química Biolóxica e Materiais Moleculares (CiQUS), ou o feito de que o Centro Singular de Investigación en Tecnoloxías Intelixentes (CiTIUS) sexa o encargado de organizar a 24º Conferencia Europea sobre Intelixencia Artificial, o maior e máis prestixioso encontro continental sobre la materia.

 

“Así as cousas, podemos afirmar que en Galicia medramos moito nos últimos anos no que atinxe ao impacto internacional e na aplicación directa de resultados sobre o tecido produtivo e no desenvolvemento social”, incidiu Román Rodríguez. “Aínda podemos mellorar máis a nosa visibilidade internacional e téndolles a man para seguir traballando para consolidar as nosas universidades como polos de tracción internacional para estudantes e investigadores”, rematou.

 

A Cidade da Cultura de Galicia acolle hoxe e mañá estas xornadas, que teñen como anfitrioas ás tres universidades públicas galegas, cun amplo programa de talleres, paneis de discusión e conferencias plenarias nas que se abordan os desafíos actuais no eido da internacionalización da Educación Superior, o impacto académico das  Alianzas de Universidades Europeas ou a mobilidade inclusiva, entre outros temas.

 

Información xeral Consellería de Educación, Ciencia, Universidades e Formación Profesional

Summary: 

Os centros poden solicitar ata o 10 de xuño sumarse a este programa, que se realiza fóra do horario lectivo en catro niveis de inglés, francés, alemán e portugués 

Esta iniciativa súmase ás axudas de 100€ por alumno para sufragar probas de idiomas de institucións ou empresas certificadoras oficialmente recoñecidas

Idioma Gallego

A Xunta de Galicia ten aberta a convocatoria para que os centros educativos soliciten organizar cursos dirixidos á preparación das probas de escolas oficiais de idiomas. Son os chamados cursos para a formación complementaria en linguas estranxeiras do alumnado (Cuale), que se imparten en inglés, francés. alemán e portugués. Neles poden participar estudantes de  centros públicos integrados, institutos de Secundaria e centros integrados de FP.

A actividade é totalmente gratuíta para as familias e é impartida por profesores do propio centro. Existen catro modalidades en cada unha das linguas, correspondentes aos niveis A1, A2, B1 e B2 do Marco Común Europeo de Referencia para as Linguas. 

Os centros que desexen ofertar os cursos deberán facer a correspondente solicitude en liña completando o formulario electrónico dispoñible na aplicación á que se accede desde o Portal Educativo. Poderán solicitar a súa participación ata o 10 de xuño. Os detalles poden consultarse no Diario Oficial de Galicia.

ESO, Bacharelato e FP

A modalidade Cuale A1 vai dirixida aos estudantes que superasen todas as materias de 2º da ESO e que estean matriculados en 3º, mentres que Cuale A2 está destinada ao alumnado que superase todas as materias de 3º da ESO e estea matriculado en 4º curso, así como aos inscritos en ciclos de FP de grao medio de menos de 2.000 horas. 

Cuale B1 é para alumnado de Bacharelato, de grao medio de FP de 2.000 horas e de grao superior de menos de 2.000 horas. Pola súa parte, Cuale B2 está dispoñible para Bacharelato, ciclos de FP de grao superior de 2.000 horas e para quen teña o certificado del nivel intermedio das escolas oficiais de idiomas ou outros certificados do nivel B1.

A superación das probas ao remate do curso supón a expedición por parte do centro dun certificado, no caso do nivel básico do Cuale A1, e dun certificado de aproveitamento do curso preparatorio para as probas de certificación que se realizarán nas escolas oficiais de idiomas, no resto das modalidades. Para a obtención dos certificados oficiais é necesario que os estudantes superen as probas específicas que as escolas oficiais de idiomas realizan cada ano.

Axudas para a acreditación

Este programa, que se enmarca na Estratexia Galega de Linguas Estranxeiras, Edulingüe 2030, ten como obxectivo que o alumnado mellore as súas competencias en outros idiomas desde o seu propio centro educativo. 

Súmase ao Programa de Acreditación en Linguas Estranxeiras que ten en marcha a Consellería de Educación, Ciencia, Universidades e FP, a través do que de 5.500 alumnos de 205 centros de toda Galicia poderán certificar as súas competencias lingüísticas en diferentes idiomas a través de probas de específicas financiadas pola Xunta.

Ao seu abeiro, a Consellería de Educación habilita unha partida de 550.000€ para o financiamento destas probas, cunha contía de 100€ por alumno, que vai destinada a sufragar o custo das probas das destrezas orais e escritas que realicen estudantes de 4º de ESO, Bacharelato ou FP para certificar os niveis B1, B2 ou C1 do Marco Común Europeo de Referencia para as Linguas, correspondentes cos niveis intermedio e avanzado. Poden empregarse para as probas de institucións ou empresas certificadoras oficialmente recoñecidas.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación destaca que se trata dun compromiso cumprido ca cidade do Lérez, ademais dunha actuación moi agardada pola comunidade educativa

Intentarase realizar o groso das obras no centro, no que atinxe ás aulas, no verán para interferir o mínimo posible na actividade lectiva

O Goberno galego leva investidos máis de 25M€ na modernización e mellora das infraestruturas educativas da cidade de Pontevedra nos últimos anos

Idioma Gallego

O conselleiro de Educación, Ciencia, Universidades e FP, Román Rodríguez, presentou esta mañá o proxecto de reforma do Colexio CEIP Froebel, que supón un investimento de 1,1M€ por parte da Xunta na mellora das infraestruturas educativas da cidade do Lérez.

O titular do departamento educativo do Goberno galego explicou que esta actuación está próxima á súa adxudicación, de cara a poder comezar as obras no verán. “Estamos a falar dunha intervención moi agardada pola comunidade educativa, que vai redundar no benestar dos docentes e alumnos do centro”, destacou o conselleiro.

“Trátase, ademais, dun compromiso cumprido. A finais de 2023 anunciamos catro novas obras de centros escolares nesta cidade, unha delas esta e outra a ampliación da Escola de Educación Infantil Concepción Crespo Rivas, que tamén está próxima á súa adxudicación”, explico ou conselleiro.

No referido ás outras dúas actuacións, tamén está moi avanzado o expediente de instalación dun ascensor e renovación e adaptación de aseos no Instituto IES A Xunqueira II, cun investimento de 190.000€, e xa está en redacción o proxecto para as melloras de accesibilidade no Instituto IES Frei Martín Sarmiento. “Polo tanto, estamos a dar un exemplo de axilidade administrativa, cumprindo os nosos compromisos en tempo e forma”, salientou.

Alto volume de intervencións

Estas intervencións súmanse á rehabilitación integral do Instituto IES Valle-Inclán, que avanza a bo ritmo e conta cun investimento de 4,7M€, e a outras dúas rematadas recentemente en Pontevedra como son a ampliación do Centro Integrado de FP Carlos Oroza (case 2,3M€) e a reforma do Instituto IES Luís Seoane (922.000€). Ademais, están a piques de rematar as melloras de accesibilidade no Colexio CEIP A Xunqueira I (173.000€).

Cómpre destacar que o Goberno galego leva investidos máis de 25M€ na modernización e mellora das infraestruturas educativas da cidade de Pontevedra nos últimos anos.

Melloras en cubertas e aulario

No caso do Colexio CEIP Froebel, o conselleiro transmitiu, ademais, unha mensaxe de tranquilidade, explicando que a prioridade é facer as obras na zona das aulas durante os meses de verán, de tal forma que non faría falta reordenar ao alumnado en módulos móbiles. “O noso obxectivo é que esta actuación interfira o mínimo posible na normalidade da actividade lectiva”, declarou

A obra do Colexio CEIP Froebel conta cun investimento de 1,1M€ e un prazo de execución de obras de seis meses. O proxecto inclúe a renovación das cubertas que aínda non foron mudadas, cunha superficie total de case 1.500m², unha actuación que se completará co reforzo estrutural das cerchas e a renovación dos correspondentes canlóns e baixantes. Incorporarase, ademais, illamento térmico nas novas cubertas, de xeito que se reduzan as perdas de calor e colocarase un pararraios.

Así mesmo, colocarase trasdosado de xeso interiores en fachadas exteriores para incrementar o illamento térmico e melloraranse os acabados interiores, co cambio de falsos teitos, alicatados, luminarias e portas, tanto en zonas comúns como en aulas. No que atinxe aos aseos, acometerase a remodelación dos situados na torre central.

A maiores, renovaranse as instalacións de electricidade, fontanería, calefacción e protección contra incendios en toda a área de actuación desta terceira fase, ademais de repoñerse as fiestras do patio interior.

Adecuación á oferta docente

No que atinxe á Escola de Educación Infantil Concepción Crespo Rivas, a actuación está orzamentada en case 750.000€. O prazo de execución das obras é de cinco meses. A superficie ampliada será de 245m², distribuídos en sala de usos múltiples, aula desdobre, sala de profesores, cuartos de instalacións. A finalidade é adecuar espazos educativos á oferta docente.

Estas actuacións enmárcase no Plan de Nova Arquitectura Pedagóxica, a folla de ruta para renovar os 1.600 edificios que forman os máis de 1.000 centros educativos galegos e adaptalos ás necesidades do ensino do século XXI, ao tempo que se mellora a súa eficiencia enerxética e o confort da comunidade escolar.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP inaugura os primeiros obradoiros de Mellora da Competencia Comunicativa na aula

Idioma Gallego

O conselleiro de Educación, Ciencia, Universidades e Formación Profesional, Román Rodríguez, gabou esta mañá a aposta e o “esforzo” do profesorado galego pola súa permanente actualización formativa e de competencias docentes, o que “redunda nun modelo de ensino de calidade”. 

Así o salientou con motivo da inauguración dos primeiros Obradoiros de mellora da competencia comunicativa do profesorado, que forman parte do Plan de Formación do Profesorado da Consellería para este curso e a través do cal se ofertan máis de 5.800 accións formativas enfocadas á dixitalización, a innovación e a convivencia como liñas prioritarias. 

O titular de Educación puxo en valor a aposta do seu departamento por ofrecer aos docentes unha formación “adaptada aos retos de futuro que temos por diante”, xa que “a calidade e a excelencia dos sistemas educativos garda unha relación directa cos niveis de desenvolvemento e formación competencial dos seus docentes”, abondou. Neste senso, subliñou que xornadas coma a de hoxe axudan “a afianzar o traballo en equipo, a creatividade, a detección e atención das necesidades de apoio educativo nas aulas e, por suposto, as habilidades comunicativas do profesorado e do alumnado”. 

Nas xornadas de hoxe, as primeiras deste tipo que se organizan, os participantes afondan nas estratexias e metodoloxías comunicativas tanto verbais coma non verbais dentro da aula e no conxunto da comunidade educativa a través de relatorios, debates e obradoiros específicos.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP participa no II Congreso Nacional da Escola Rural en Ribadavia

Na cita, a que acuden 300 profesionais de toda España, pon en valor este tipo de educación polo seu “modelo de proximidade, innovación e cooperación”

Destaca que Galicia funciona como un “distrito único”, o que garante “igualdade de resultados” independentemente de que un neno viva nunha contorna rural ou urbana

Un total de 40 centros educativos dan a coñecer exemplos de boas prácticas para facer do congreso “unha ocasión para ampliar horizontes e seguir mellorando”

Idioma Gallego

O conselleiro de Educación, Ciencia, Universidades e FP, Román Rodríguez, destacou esta mañá o “gran logro” da escola rural como “un modelo educativo de vangarda que é exemplo de cohesión social e capaz de xerar igualdade de oportunidades”. Así o salientou durante a inauguración do II Congreso Nacional de Escola Rural, que congrega en Ribadavia a 300 persoas e que conta coa participación dun total de 40 centros educativos de toda España.

O titular de Educación do Goberno galego, que estivo acompañado polo director xeral de Centros e Recursos Humanos, Jesús Álvarez, destacou que Galicia “é un banco de probas” sobre a importancia e a evolución do modelo de ensino rural. Non en balde, a Comunidade, con 5% do territorio de toda España concentra o 50% das entidades singulares de poboación. Así pois, deu a coñecer aos representantes doutras comunidades de España o modelo educativo galego, amosando o seu compromiso coa educación rural como “un elemento de cohesión e un punto clave para o desenvolvemento da poboación”.

Precisamente un dos maiores logros é que Galicia funciona “como un distrito único” a nivel educativo, o que na práctica se traduce nun sobreesforzo económico por parte da Administración para garantir o acceso á educación e a todos os programas educativos en igualdade de condicións para o conxunto dos cidadáns, independentemente de onde vivan.

E isto, lembrou o conselleiro, tradúcese tamén “nunha igualade de resultados académicos dos nosos alumnos, con independencia de que o centro onde estudan estea nunha aldea, nun pobo, nunha vila ou nunha cidade”, o que representa unha fortaleza de Galicia.

Reto demográfico

Con todo, Román Rodríguez recoñeceu o “estrés de xestión” que implica combinar a proximidade do servizo educativo coa merma do número de alumnos. Neste senso, apuntou que o desafío de futuro máis importante e inmediato sexa o reto de “adaptar o noso sistema educativo rural a unha demografía cada vez máis decrecente e escasa” e comprometeuse a seguir traballando arreo, da mán da comunidade educativa, para que o futuro das aulas “sexa o futuro de Galicia”.

Na súa intervención tamén se referiu ao esforzo e o “orgullo” que o profesorado do rural sente polos seus centros educativos con equipos “implicados en proxectos de innovación e seminarios, que traballan de forma coordinada e cooperativa” e que son “o piar dos bos resultados académicos” obtidos.

Os asistentes a esta cita de hoxe en Ribadavia, organizada pola Xunta en colaboración coa Fundación Princesa de Girona e a Asociación de Mestres de Colexios Rurais Agrupados de Galicia, poderán descubrir o funcionamento deste modelo galego a través da feira na que participan 15 centros de toda a Comunidade. Trátase do Colexio CEIP Francisco López Estrada de Mañón, o Instituto IES Cabo Ortegal de Cariño, o Instituto IES Maximino Romero de Lema de Zas, o IES Pedra da Aguia de Camariñas, o Colexio CEIP Eduardo Cela Vila de Triacastela, o Colexio CEIP de Samos, o Colexio CPI Plurilingüe de Navia de Suarna, o Colexio CRA Plurilingüe de Monterrei en Verín, o Colexio CEIP Xoaquín Lourenzo Xocas de Bande, o Colexio CEIP A Lama, o Instituto IES Plurilingüe de Valga, o Colexio CEIP Plurilingüe de Tebra en Tomiño, o Colexio CEIP Plurilingüe Feliciano Barrera de Ponteareas, o Colexio CEIP Plurilingüe de Louro e o Colexio CEIP Plurilingüe de Toques.

“Esta e todas as actividades do Congreso son unha oportunidade para ampliar horizontes e seguir mellorando no modelo da educación rural”, puntualizou Román Rodríguez, quen concluiu animando aos presentes a seguir traballando no modelo da escola rural “do presente e do futuro, a que se debe construir sobre mimbres firmes que incluyan a inclusión, a equidade, a innovación e a calidade educativa”.

Debates, feira, obradoiros...

O programa, que inclúe conferencias, paneis, exposicion de proxectos educativos e a difusión de boas prácticas, comeza coa conferencia Patróns e compromiso coa escola rural a cargo da profesora da Universidade de Zaragoza Pilar Abós.

Ao longo da mañá, os participantes no Congreso Nacional da Escola Rural teñen a oportunidade de asistir á presentación Urbano vs rural. Galicia, distrito educativo único da man do secretario xeral técnico da Consellería de Educación, Manuel Vila. Tamén está programada a mesa redonda Presente e futuro da escola rural, elementos de sustentabilidade coa presenza da coordinadora do programa Generación Docentes da Fundación Princesa de Girona, María del Carmen Salcedo; a profesora da Facultade de Ciencias da Educación da Universidade da Coruña e vicedecana da mesma, Nuria Rebollo; o director xeral de Persoal, Formación e Innovación do Goberno de Aragón, José María Cabello; a secretaria xeral de Educación e Formación Profesional de Extremadura, María Pilar Pérez; o director xeral de Innovación e Ordenación Educativa da Rioxa, Fabián Martín, e o director xeral de Innovación e Formación do Profesorado de Castela e León, Luis Domingo González.

A xornada matinal remata cun panel de expertos sobre a escola rural en Galicia con directores de centros galegos de diferentes etapas e tipoloxías para achegar aos asistentes as metodoloxías, programas e desenvolvemento da escola rural en Galicia. Nel participarán docentes da Escola Infantil EEI de Donramiro de Lalín, do Colexio Rural Agrupado CRA Nosa Señora do Faro de Ponteceso, do Colexio CEIP Eduardo Cela Vila de Triacastela, do Colexio CPI Plurilingüe Virxe da Cela de Monfero e do Instituto IES O Ribeiro de Ribadavia.

A xornada continuará pola tarde con talleres e proxectos de boas prácticas e experiencias. Os asistentes ao congreso poderán coñecer obradoiros de espazos de centros e aprendizaxe, coidado do benestar, atención á diversidade, innovación e internacionalización, entre outros. Ademais, daranse a coñecer proxectos de aulas multigrado, de metodoloxías activas, inclusión, dixitalización, internacionalización e o Programa Xeración Docente, entre outros.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP pon en valor “a constante e continua” aposta da Xunta pola mellora das infraestruturas educativas

No caso do CEIP Marquesa Pazo da Mercé haberá unha primeira actuación de renovación de ventás e, posteriormente, acometerase unha rehabilitación integral

No IES procederase á substitución do sistema de calefacción actual por un de biomasa

Idioma Gallego

A Xunta de Galicia vai inxectar máis de un millón de euros na mellora do Colexio CEIP Marquesa Pazo da Mercé e do Instituto IES Pazo da Mercé nas Neves. O conselleiro de Educación, Ciencia, Universidades e Formación Profesional, Román Rodríguez, visitou esta mañá ambos centros para dar conta das actuacións que o seu departamento vai levar a cabo no que cualificou como “a constate e continua aposta deste Goberno” pola mellora das infraestruturas educativas en Galicia nos últimos anos ao abeiro  do Plan de Nova Arquitectura Pedagóxica.

Ventás de aluminio

No caso do Colexio Marquesa Pazo da Mercé, a Consellería vai proceder á substitución das ventás do centro, para o cal destina un orzamento de 444.000 euros. Nestes momentos, tal e como explicou o titular de Educación, o proxecto atópase en fase de licitación. As novas carpinterías que se instalarán serán de aluminio natural con rotura de ponte térmica e apertura oscilobatente e con caixas de persiana compactas. No caso daquelas que se atopen a unha altura que non permita a súa fácil apertura, as xanelas que se instalen serán motorizadas.

A maiores desta obra, Román Rodríguez tamén avanzou que se está redactando un proxecto de rehabilitación integral do colexio con actuacións na cuberta e na envolvente do edificio que suporá completar “a mellora de confort térmico” desta infraestrutura. Á falta de coñecer o proxecto definitivo onde se concretarán todos os detalles, o titular de Educación adiantou que esta outra actuación ten un orzamento estimado previsto de 450.000 euros.

Biomasa

Logo de visitar o colexio das Neves, Román Rodríguez desprazouse ao Instituto IES Pazo da Mercé, onde tamén deu conta dunha actuación por un importe de 302.000 euros, en licitación nestes momentos, para cambiar o sistema de calefacción actual por outro de biomasa.

Neste caso procederase a adecuar un espazo do semisoto do instituto para instalar nel a sala de caldeiras, o silo de pellets e un almacén. Así mesmo, acometeranse novas redes hidráulicas para conectar as redes xerais de calefacción dos edificios coa nova sala de caldeiras.

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación e Ciencia reúnese cos profesores que están a colaborar na elaboración da nova normativa para regular a FP e adaptala á nova lei estatal

“En Galicia traballamos para conservar a esencia e os principios da nosa FP, que ten xerado un modelo propio que funciona”, di o conselleiro

Idioma Gallego

Video: 

O conselleiro de Educación, Ciencia, Universidades e FP, Román Rodríguez, agradeceu hoxe o labor dos 300 docentes que participan nos grupos de traballo para a nova ordenación da FP. Fíxoo no marco dunha reunión con estes profesores para analizar os novos retos que supón a adaptación á lei estatal, tendo en conta que o Ministerio aínda non ten publicada a normativa básica pola que se terán que guiar as administracións autonómicas. 

Este primeiro encontro permitirá analizar como desenvolver tres áreas clave da FP, en concreto o reparto de horas de módulos profesionais que garantan o maior rendemento posible, a actualización dos contidos para que respondan ás necesidades do tecido produtivo e a revisión dos itinerarios formativos segundo o actual escenario profesional.

O responsable do departamento educativo da Xunta lembrou que o baleiro normativo do Ministerio non afecta só á ordenación da FP, senón tamén aos cambios que será preciso introducir en cada unha das titulacións. “Hoxe avanzamos nunha reflexión colectiva que buscará potenciar e reforzar canto levamos feito até o de agora e implementalo no vindeiro curso e facémolo da man de docentes que contan con sobrada experiencia tanto no eido académico como no desempeño estritamente profesional”, destacou.

Entre as novidades principais da nova lei estatal está a introdución de novos módulos, algúns de nova creación, outros en substitución dos xa existentes, o que vai demandar cambios en todos os ciclos. Ademais, increméntase ata un máximo de 700 as horas de formación en empresa, mantendo tamén a formación en centros e, polo tanto, as funcións e horarios do profesorado. Así mesmo, a Xunta vai duplicar a formación en inglés respecto do mínimo establecido polo Ministerio, co fin de que o alumnado da FP galega acaba os seus estudos sendo plurilingüe. 

“O noso obxectivo é que aplicación da lei posibilite manter a calidade do noso sistema de FP, lamentando as incertezas que está xerando a inacción do Goberno central co calendario que eles mesmo se marcaron”, sinalou Román Rodríguez. “En Galicia levamos tempo traballando para conservar a esencia e os principios da nosa FP, unha formación cunha altísima empregabilidade e que ten xerado nos últimos anos un modelo propio que funciona”, recalcou.

Audio: 

Información xeral Consellería de Educación, Ciencia, Universidades e Formación Profesional