Lexislación

Summary: 

O conselleiro en funcións de Educación visita o alumnado do ciclo de fútbol e balonmán do Instituto Sánchez Cantón que completa a súa formación no Centro Galego de Tecnificación Deportiva en Pontevedra

Idioma Gallego

O conselleiro en funcións de Cultura, Educación, FP e Universidades, Román Rodríguez, amosa o compromiso da Xunta co impulso das ensinanzas deportivas en Galicia “como unha opción académica e de saída profesional de calidade”.

Así o manifestou esta mañá no Centro Galego de Tecnificación Deportiva de Pontevedra durante unha visita ao alumnado que cursa o ciclo de Ensinanzas técnicas deportivas de fútbol e balonmán, que realizan os seus estudos no Instituto IES Sánchez Cantón e nas instalacións deste centro de alto rendemento.

Precisamente o Sánchez Cantón é un dos institutos de referencia no eido deportivo coa oferta da titulación oficial de grao medio e de grao superior de Técnico Deportivo en Fútbol e Balonmán, que actualmente estudan 101 alumnos.

Información xeral Consellería de Cultura, Educación, Formación Profesional e Universidades

Summary: 

O investimento total nesta formación específica ascende a 5,83M€

Tamén se autoriza aos centros educativos dependentes da Consellería de Promoción do Emprego e Igualdade a impartir varios módulos formativos de ciclos de FP

Román Rodríguez e Elena Rivo subliñan a importancia de implementar unha formación de calidade adecuada ás demandas socio-económicas

Idioma Gallego

Os conselleiros de Cultura, Educación, FP e Universidades, Román Rodríguez, e de Promoción do Emprego e Igualdade, Elena Rivo, asinaron hoxe no Centro Galego de Innovación da FP, Eduardo Barreiros, en Ourense, un acordo para a coordinación das accións formativas para persoas desempregadas que se imparten en centros de FP.

Ao abeiro de dito acordo, entre o presente curso 2023-24 e o vindeiro 2024-25 impartiranse un total de 141 accións formativas deste tipo en 48 concellos de toda Galicia, cun investimento que acada os 5,83M€. Cada acción está constituída polo contido das especialidades formativas para obter certificados de profesionalidade. Ademais, en todas elas impartirase o módulo transversal de Inserción laboral, sensibilización ambiental e na igualdade de xénero e o curso básico de prevención de riscos laborais.

O obxecto destas accións formativas nas que teñen preferencia as persoas desempregadas enmárcase no impulso da cualificación profesional ao longo da vida ao tempo que se dá unha resposta axeitada ás necesidades e ás demandas do tecido produtivo.

O conselleiro de Cultura, Educación, FP e Universidades, Román Rodríguez, salientou “o importante papel” que xogan neste eido as ensinanzas de FP, xa que a través delas “as persoas acadan un futuro de éxito laboral e persoal e as empresas contan con profesionais altamente cualificados e con coñecementos axustados ás súas demandas”.

Tamén puxo en valor o traballo que se está a desenvolver desde o Centro Galego de Innovación da FP, en Ourense, un espazo de innovación aplicada e de cooperación con distintos sectores produtivos de Galicia no que, grazas á implicación empresarial, xa están en marcha distintos proxectos vinculados cos eidos da enerxía, forestal, téxtil, auga, enerxía, medioambiente ou social, entre outros.

A conselleira de Promoción do Emprego e Igualdade, Elena Rivo, pola súa banda, destacou o compromiso transversal que a Xunta de Galicia está a realizar para coordinar a oferta de Formación Profesional e adecuala ás necesidades do tecido produtivo, do que  é exemplo o acordo hoxe asinado.

Rivo destacou que a Consellería de Promoción do Emprego e Igualdade está a centrar a súa acción de goberno na busca de máis traballo e de maior calidade. En 2024, este departamento está a destinar máis de 117 millóns de euros ao Plan Galego de formación para o emprego 2024 con accións destinadas a traballadores ocupados ou non. 

A conselleira lembrou que Galicia é referente por apostar polo novo modelo de formación para o emprego e os certificados de profesionalidade da man dos clústeres e entidades representativas de sectores estratéxicos. Tamén por implantar as microcredenciais, un modelo innovador que espertou o interese en Bruxelas, e que ofrece solucións de formación a sectores en continuo cambio, para apoiar aos traballadores no desempeño das súas funcións ou durante transicións profesionais.

Novidades da oferta

Na oferta formativa deste ano están representadas 20 das 26 familias profesionais actualmente existentes con 20 accións formativas novas que non se ofertaron no ano anterior en algún dos centros 73 autorizados, cinco máis que o ano 2023.

Ademais, como novidade, inclúense dez accións formativas que serán impartidas por primeira vez en Galicia no marco deste convenio, en concreto os cursos de Instalación de elementos de carpintaría no CIFP Politécnico de Santiago (Santiago de Compostela), Operacións auxiliares de servizos administrativos e xerais no CIFP Porta da Auga (Ribadeo) e no IES Francisco Asorey (Cambados), Acondicionamento físico na sala de adestramento polivalente no CIFP A Farixa (Ourense), Actividades de xestión administrativa no CIFP Portovello (Ourense), Manexo e mantemento de maquinaria agraria no CIFP A Granxa (Ponteareas), Operacións básicas de pisos en aloxamentos e Pastelaría e confeitaría no CIFP Carlos Oroza (Pontevedra), Actividades auxiliares de almacén no IES Ribeira do Louro (O Porriño) e Montaxe e posprodución de audiovisuais no CIFP Audiovisual de Vigo (Vigo).

Ensinanzas de FP

A través do acordo asinado hoxe tamén se autoriza aos centros educativos dependentes da Consellería de Promoción do Emprego e Igualdade a impartir varios módulos de ciclos de FP. Así, o CIFP Santiago inclúe na súa oferta parte do ciclo superior en Xestión Forestal e do Medio Natural, e o de Coia (Vigo), dos ciclos superiores en Mecatrónica industrial e en Automatización e Robótica Industrial e do ciclo medio en Mantemento electromecánico. Pola súa banda, o CIFP Santa María de Europa (Ourense) oferta módulos do ciclo medio en Carpintería e moble.

Ademais, autorízase a impartición na Escola de FP Marítimo- Pesqueira de Bueu de módulos profesionais específicos correspondentes á FP Básica en Actividades marítimo pesqueiras.

Información xeral Consellería de Cultura, Educación, Formación Profesional e Universidades

Summary: 

A súa inclusión na Rede Estatal de Centros de Excelencia de Formación Profesional supón un impulso da innovación e a investigación aplicada ao servizo do alumnado

Idioma Gallego

A directora xeral de FP, Eugenia Pérez, visitou esta mañá o Centro Integrado de FP CIFP Ánxel Casal-Monte Alto para comprobar de primeira man o resultado das reformas e reorganización de espazos acometidos logo de que fora seleccionado para formar parte da Rede Estatal de Centros de Excelencia de Formación Profesional. A representante da Consellería de Cultura, Educación, FP e Universidades destacou que o Ánxel Casal-Monte Alto, que forma cada ano a máis de 2.000 alumnos, é un referente no eido sanitario, cunha ampla oferta que inclúe ciclos formativos e cursos de especialización das familias de Sanidade, Servizos á Comunidade, Seguridade e medioambiente e Química.

A súa inclusión na Rede Estatal de Excelencia supón unha dotación extra de 850.000€ para desenvolver proxectos de innovación e investigación aplicada ligada a á realidade virtual en campos como Radioterapia, impresión 3D no campo Protésico ou investigación en cultivos celulares e reprodución asistida entre outros.

Ademais, tamén foi seleccionado para participar na convocatoria de Espazos de Tecnoloxía Aplicada da Xunta, o que lle permitiu transformar unha aula tradicional nunha tecnolóxica que conta cos últimos avances á disposición do alumnado que cursa o ciclo de Servizos socioculturais e á comunidade. Precisamente, na súa visita, Eugenia Pérez puido coñecer o Espazo Edulab: aprendizaxe 4.0 habilitado na aula de Educación Infantil, que incorpora os últimos avances tecnolóxicos para que ao alumnos de dito ciclo completen a súa formación.

Así mesmo, visitou as aulas de Anatomía Patolóxica e Citodiagnóstico, que foron dotadas cun escáner de uso profesional que permite a dixitalización de mostras para pasalas a datos de alta resolución que permiten o traballo en rede; a aula de Farmacia e Parafarmacia, na que se está desenvolvendo un proxecto que recrea as diferentes fases da elaboración de formas farmacéuticas que abrangue a formulación maxistral, fabricación tecnolóxica, área de calidade e envasado e zona de atención e dispensación farmacéutica, e o viveiro de empresas.

Información xeral Consellería de Cultura, Educación, Formación Profesional e Universidades

Summary: 

A modalidade A inclúe 48 prazas para estudar programas vencellados á FP Básica, con bolsas de 6.500€

A modalidade B conta con 60 prazas para cursar ciclos de FP Dual con axudas de 10.800€, podendo facer unha parte da formación a distancia

O orzamento da Consellería de Cultura, Educación, FP e Universidades para esta convocatoria, que se enmarca na Estratexia Galicia Retorna, é de case 1M€

Idioma Gallego

O Consello da Xunta deu hoxe luz verde á convocatoria do programa Retorna Talento FP para o curso 2024/25. O obxectivo é que 108 rapaces galegos do exterior poidan mellorar a súa cualificación e volver á súa terra de orixe, co apoio de axudas de entre 6.500 e 10.800€.

O orzamento da Consellería de Cultura, Educación, FP e Universidades para esta convocatoria, que se enmarca na Estratexia Galicia Retorna, é de case 1M€. Neste curso 2023/24 son un total de 34 os rapaces que están a cursar estudos de FP ao abeiro deste programa nos centros integrados de FP Someso (A Coruña), Universidade Laboral (Culleredo), Ferrolterra (Ferrol), Vilamarín (Vilamarín) e no Instituto IES Chapela (Redondela).

Formación básica

A convocatoria divídese en dúas categorías, en función do tipo de estudos que se ofertan. Así, a modalidade A contempla 48 bolsas para estudar programas específicos básicos de FP durante o curso 2024/25. Neste caso a bolsa é de 6.500€ por alumno e a relación de programas formativos ofertados, a razón de 16 prazas cada un, é a seguinte:

 

Concello

Centro

Programa formativo de formación específica básica

A Coruña

CIFP Someso

Albanelaría e fontanería

Culleredo

CIFP Universidade Laboral

Fontanería, calefacción, electricidade e telecomunicacións en edificios

Ferrol

CIFP Ferrolterra

Fontanería, calefacción, electricidade e telecomunicacións en edificios

 

60 prazas na FP Dual

No caso da modalidade B, inclúe un total de 60 prazas para cursar cinco ciclos de Formación Profesional Dual nos cursos 2024/25 e 2025/26, cunha bolsa de 10.800€ por estudante. Neste caso, durante o primeiro curso poderán realizar unha parte da formación a distancia, pero a formación práctica nas empresas será sempre presencial, ao igual que todo o segundo curso.
 

Os ciclos ofertados, con 12 prazas cada un, son os reflectidos na seguinte táboa:

Concello

Centro

Ciclo de FP Dual

Ferrol

CIFP Ferrolterra

Ciclo superior de Deseño e amoblamento

A Coruña

CIFP Someso

Ciclo superior de Proxectos de edificación

Culleredo

CIFP Universidade Laboral

Ciclo superior de Desenvolvemento de proxectos de instalacións térmicas e de fluídos

Vilamarín

CIFP de Vilamarín

Ciclo superior de Xestión de aloxamentos turísticos

Redondela

IES de Chapela

Ciclo medio de Atención a persoas en situación de dependencia

 

A Consellería de Cultura, Educación, FP e Universidades asinará convenios con empresas de referencia das zonas de influencia de cada un dos centros educativos para o período de formación en centros de traballo deste alumnado.

Información xeral Consellería de Cultura, Educación, Formación Profesional e Universidades

Summary: 

Cúmprense así os prazos previstos e, para axilizar os trámites, solicitouse xa ao Concello de Pontevedra a licenza de obra

O xefe territorial da Consellería de Educación en Pontevedra, César Pérez, desprázase ao centro para informar a comunidade educativa da licitación

O proxecto inclúe a renovación de case 1.500m² de cubertas, a mellora do illamento térmico e a instalación de novos falsos teitos, luminarias, alicatado e portas

A maiores, renóvanse as instalacións de electricidade, fontanería, calefacción e protección contra incendios en toda a área de actuación desta terceira fase

Idioma Gallego

A Xunta de Galicia acaba de licitar a terceira fase da rehabilitación integral do Colexio CEIP Froebel, cumprindo os prazos previstos e unha vez completados todos os trámites administrativos. O orzamento de licitación ascende a 1.170.948,58€ e o prazo de execución das obras é de seis meses. Para axilizar os trámites e a obra, a Consellería de Cultura, Educación, FP e Universidades remitiu xa ao Concello de Pontevedra o proxecto básico e de execución para que se tramite e conceda a licenza de obras no prazo máis breve posible.

Con motivo desta licitación, o xefe territorial da consellería de Cultura, Educación FP e Universidades na provincia de Pontevedra, César Pérez Ares, desprázase hoxe ao centro para informar á comunidade educativa sobre a licitación e os detalles do proxecto, que xa foran avanzados polo conselleiro, Román Rodríguez, ao director do centro nunha xuntanza mantida o pasado mes de decembro.

Melloras en cubertas e aulario

O programa de necesidades inclúe tanto as necesidades iniciais detectadas pola Unidade Técnica como melloras suxeridas polo propio centro e ocúpase da parte do colexio que aínda non foi reformado, que se corresponde coa parte do volume central que dá á rúa Xeral Martitegui, incluíndo as aulas de Primaria e a zona cuberta do patio central, así como o distribuidor que rodea todo o patio central.

Deste xeito, o proxecto contempla a renovación das cubertas que aínda non foron mudadas, cunha superficie total de case 1.500m², unha actuación que se completará co reforzo estrutural das cerchas e a renovación dos correspondentes canlóns e baixantes. Incorporarase, ademais, illamento térmico nas novas cubertas, de xeito que se reduzan as perdas de calor e colocarase un pararraios.

Así mesmo, colocarase trasdosado de xeso interiores en fachadas exteriores para incrementar o illamento térmico e melloraranse os acabados interiores, co cambio de falsos teitos, alicatados, luminarias e portas, tanto en zonas comúns como en aulas. No que atinxe aos aseos, acometerase a remodelación dos situados na torre central.

A maiores, renovaranse as instalacións de electricidade, fontanería, calefacción e protección contra incendios en toda a área de actuación desta terceira fase.

Información xeral Consellería de Cultura, Educación, Formación Profesional e Universidades

Summary: 

O prazo de presentación de solicitudes, que deberá facerse por medios electrónicos, está aberto desde mañá, 15 de febreiro

As probas desenvolveranse a partir do 22 de xuño en diferentes localidades, que se concretarán nas vindeiras semanas

Os requirimentos de titulación para cada un dos corpos, a documentación necesaria, o baremo e todo o procedemento relativo á presentación de solicitudes e posterior desenvolvemento do proceso pode consultarse nas bases da convocatoria

Idioma Gallego

A Xunta publica hoxe no Diario Oficial de Galicia a convocatoria das oposicións de educación para este ano 2024, cuxas probas se desenvolverán a partir do 22 de xuño, e que contan con 1.743 prazas.

A convocatoria das oposicións de educación para este ano 2024, cuxas probas se desenvolverán a partir do 22 de xuño, e que contan con 1.743 prazas.

As persoas interesadas deberán presentar as súas solicitudes na sede electrónica da Xunta de Galicia. Poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365. Así mesmo, deberá procederse ao pagamento da taxa vixente no momento da presentación electrónica da solicitude. O prazo está aberto ata o 6 de marzo. 

Como é habitual, o persoal interino e substituto, que presta servizos no ensino público galego, deberá participar no procedemento selectivo, sempre que se convoquen prazas da súa especialidade, para manter os seus dereitos nas listas.

As probas desenvolveranse a partir do 22 de xuño en diferentes localidades, que se concretarán nas vindeiras semanas e que se publicarán no Portal Educativo. Os requirimentos de titulación para cada un dos corpos, a documentación necesaria, o baremo e todo o procedemento relativo á presentación de solicitudes e posterior desenvolvemento do proceso pode consultarse na convocatoria.

Estabilidade e carreira docente

O obxectivo é consolidar a estabilidade do que é o piar do sistema educativo público, os docentes. Das 1.743 prazas, un total de 1.512, o 86%, son de novo ingreso. Delas, 520 son para o corpo de mestres, 875 para o de profesores de ensino secundario, 84 do novo corpo de profesores especialistas en sectores singulares da FP e 33 de escolas oficiais de idiomas. 

A maiores, as oposicións permiten ao profesorado avanzar na súa carreira docente. Deste xeito, as 231 prazas restante son para que funcionarios docentes poidan acceder ao corpo de profesores de ensino secundario (220) ou ao de inspectores de educación (11).

A distribución das prazas por especialidades é a reflectida nas seguintes táboas:

Corpo de mestres

520 prazas, oito especialidades

Especialidades

Prazas

Educación Infantil

50

Lingua Estranxeira: Inglés

65

Lingua Estranxeira: Francés

50

Educación Física

40

Música

20

Pedagoxía Terapéutica

110

Audición e Linguaxe

80

Educación Primaria

105

Corpo de profesores de ensino secundario

875 prazas, 34 especialidades

Especialidades

Prazas

Filosofía

24

Latín

10

Lingua Castelá e Literatura

36

Xeografía e Historia

29

Matemáticas

24

Física e Química

20

Bioloxía e Xeoloxía

10

Debuxo

15

Francés

10

Inglés

80

 Música

10

Educación Física

46

Orientación Educativa

21

Tecnoloxía

60

Lingua Galega e Literatura

80

Economía

22

Administracións de Empresas

15

Formación e Orientación Laboral

20

Informática

50

Intervención sociocomunitaria

22

Organización e Xestión Comercial

17

Organización e Procesos de Mantemento de Vehículos

19

Organización e Proxectos de Fabricación Mecánica

20

Procesos de produción agraria

11

Sistemas Electrotécnicos e Automáticos

16

Instalacións e mantemento de equipos térmicos e de fluídos

10

Instalacións electrotécnicas

18

Operacións e equipamentos de produción agraria

10

Procedementos de diagnóstico clínico e ortoprotésico

13

Procedementos sanitarios e asistenciais

18

Procesos comerciais

11

Procesos de xestión administrativa

25

Sistemas e aplicacións informáticas

65

Equipos electrónicos

18

Corpo de profesores especialistas en sectores singulares da FP

84 prazas en cinco especialidades

Especialidades

Prazas

Cociña e pastelería

10

Fabricación e instalación de carpintería e moble

11

Mantemento de vehículos

25

Mecanizado e mantemento de máquinas

28

Soldadura

10

 

Corpo de profesores de escolas oficiais de idiomas

33 prazas en tres especialidades

Especialidades

Prazas

Francés

9

Galego

7

Inglés

13

Portugués

4

Acceso ao corpo de Inspectores de Educación

Especialidade

Prazas

Inspección Educativa

11

Acceso do Subgrupo A2 ao Subgrupo A1 ao corpo de profesores de ensino secundario

220 prazas en 34 especialidades

Especialidades

Prazas

Filosofía

6

Latín

2

Lingua Castelá e Literatura

9

Xeografía e Historia

7

Matemáticas

6

Física e Química

5

Bioloxía e Xeoloxía

2

Debuxo

4

Francés

2

Inglés

20

Música

2

Educación Física

12

Orientación Educativa

5

Tecnoloxía

15

Lingua Galega e Literatura

20

Economía

6

Administracións de Empresas

4

Formación e Orientación Laboral

5

Informática

13

 

Información xeral Consellería de Cultura, Educación, Formación Profesional e Universidades

Summary: 

O Diario oficial de Galicia vén de publicar a convocatoria, que ten como obxectivo que os estudantes galegos melloren as súas competencias idiomáticas

Poderán facerse en Canadá, Reino Unido, Francia, Portugal e Alemaña, en réxime residencial ou familiar, e o prazo de solicitude estará aberto ata o 12 de marzo

O Goberno galego destina preto de 2M€ a esta actividade, de tal xeito que se subvenciona ata o 92% da mesma

Idioma Gallego

A Xunta de Galicia vén de convocar un total de 648 prazas dirixidas ao alumnado de Bacharelato para realizar durante este verán estadías lingüísticas no estranxeiro co fin de mellorar as súas competencias nos idiomas inglés, francés, portugués e alemán, tal e como pode consultarse no Diario Oficial de Galicia.

O alumnado que resulte seleccionado disporá de tres semanas en réxime residencial ou familiar en Reino Unido, Francia, Portugal, Canadá e Alemaña no período estival, entre xullo e agosto. A relación de prazas é a reflectida na seguinte táboa:

 

 

Curso

Modalidade

Prazas

2º Bacharelato

Inglés en Canadá

90

2º Bacharelato

Inglés no Reino Unido

120

2º Bacharelato

Francés en Francia

20

2º Bacharelato

Portugués en Portugal

3

2º Bacharelato

Alemán en Alemaña

5

1º Bacharelato

Inglés en Canadá

140

1º Bacharelato

Inglés no Reino Unido

219

1º Bacharelato

Francés en Francia

40

1º Bacharelato

Portugués en Portugal

3

1º Bacharelato

Alemán en Alemaña

5

 

O Goberno galego destina preto de 2M€ a esta actividade, de tal xeito que se subvenciona entre o 92% e o 62% do custo das estancias dos estudantes en Canadá, Reino Unido, Francia, Portugal e Alemaña. Con cargo a esta partida, a Xunta sufraga parte dos gastos de contratación dos monitores que acompañan a cada grupo, mantemento e aloxamento, traslados para actividades, docencia e material escolar, actividades culturais, deportivas e complementarias dos cursos, seguros de accidentes e certificado de realización do curso.

O prazo para tramitar as solicitudes permanecerá aberto ata o 12 de marzo, e poderán formalizarse a través da sede electrónica da Xunta de Galicia.

Requisitos e baremación

Para obter as bolsas os candidatos terán que estar cursando, no réxime xeral, 1º ou 2º de Bacharelato, en centros de Galicia sostidos con fondos públicos, durante o curso 2023-2024; ter acadado unha nota mínima na área ou materia de lingua estranxeira que se vai perfeccionar na estadía de 6 no curso 2022/23, así como ter superadas todas as materias nese mesmo ano académico.

Os criterios para o baremo, puntuación e determinación das achegas familiares serán a nota media do expediente académico no curso 2022/23 (ata dez puntos) e a renda per cápita da unidade familiar (ata 20 puntos). Ademais, terase en conta o feito de pertencer a unha familia numerosa (dous puntos), contar cun membro cunha discapacidade igual ou superior ao 33% ou pensionista de grande invalidez (dous puntos), ou non ter sido beneficiario dunha axuda destas características na convocatoria do ano pasado (un punto).

Contacto idiomático e cultural

O propósito desta iniciativa, enmarcada na Estratexia Galega de Linguas Estranxeiras Edulingüe 2030, non é só que o alumnado asistente aprenda un idioma estranxeiro, senón tamén entrar en contacto con outras linguas, persoas, culturas e realidades nun contexto de inmersión ou integración nun país estranxeiro. Deste modo, favorécese o acceso a un mercado laboral cambiante e contribúese de xeito moi significativo ao desenvolvemento académico e persoal do alumnado.

O coñecemento dun idioma estranxeiro converteuse nun dos obxectivos básicos do sistema educativo, porque contribúe, por unha banda, á formación integral do alumnado e, por outro, porque é un valioso medio para o achegamento aos diferentes ambientes culturais-sociais. A estadía no país correspondente é un complemento perfecto ao estudo realizado durante o curso académico.

Información xeral Consellería de Cultura, Educación, Formación Profesional e Universidades

Summary: 

O conselleiro de Cultura, Educación, FP e Universidades, Román Rodríguez, e o alcalde, José Manuel Rey, subscriben un acordo de colaboración administrativa

A Consellería destinará 500.000 euros a financiar a metade do custo das actuacións

Idioma Gallego

A Xunta de Galicia e o Concello de Ferrol acordan unha folla de ruta para a mellora das instalacións deportivas de dez colexios da cidade, tal e como queda reflectido no acordo de colaboración administrativa asinado hoxe entre o conselleiro de Cultura, Educación, FP e Universidades, Román Rodríguez, e o alcalde, José Manuel Rey Varela.

Así pois, ao abeiro deste acordo, está previsto que se leven a cabo intervencións de mellora nos colexios CEIP de Pazos, CEIP Plurilingüe A Laxe, CEIP Plurilingüe San Xoán de Filgueira, CEIP Almirante Juan de Lángara y Huarte, CEIP Cruceiro de Canido, CEIP Plurilingüe Ángela Ruiz Robles, CEIP de Ponzos, CEIP de Esteiro, CEIP Isaac Peral e CEIP Ledicia.

No caso da Xunta de Galicia, a Consellería achegará un total de 500.000 euros a financiar a metade do custo das actuacións. Pola súa banda, o Concello de Ferrol encargarase de redactar e aprobar os proxectos de obra e tramitar os permisos, licenzas e autorizacións pertinentes para levalas a cabo. Ademais, unha vez realizadas, tamén se encargará do mantemento e conservación das infraestruturas obxecto deste acordo.

Información xeral Consellería de Cultura, Educación, Formación Profesional e Universidades

Summary: 

A dotación económica asignada a cada beneficiario será de 1.200€ para estadías realizadas en países de Europa e de 1.500€ para estadías no resto do mundo

O prazo de presentación de solicitudes estará aberto ata o 15 de marzo

Idioma Gallego

A Xunta de Galicia ten aberta  a convocatoria das axudas para que o alumnado das universidades públicas galegas realicen estadías noutros países durante o verán de 2024, tal e como pode consultarse no Diario Oficial de Galicia. O obxectivo é que os estudantes melloren as súas competencias en linguas estranxeiras e, como consecuencia, a súa cualificación.

As persoas solicitantes deberán acreditar que van realizar un curso de idiomas presencialmente no período comprendido entre o 15 de xuño e o 31 de agosto de 2024, ambos inclusive, cun mínimo de 45 horas lectivas. O idioma que se desexe cursar deberá corresponderse co oficial do país elixido e ser diferente do español.

O orzamento total da convocatoria é de 228.000€ e a dotación económica asignada a cada persoa beneficiaria será de 1.200€ para estadías realizadas en países de Europa e de 1.500€ para estadías no resto do mundo.

O prazo de presentación de solicitudes estará aberto ata o 15 de marzo e deberán facerse obrigatoriamente por medios telemáticos a través do formulario normalizado dispoñible na sede electrónica da Xunta de Galicia.

As persoas solicitantes deben estar matriculadas no curso 2023/24 en como mínimo 50 créditos (excluídos os recoñecidos, convalidados ou adaptados) de estudos de grao nas universidades públicas galegas. Ademais, deben ter superado 60 créditos a data do 30 de setembro de 2023, excluídos tamén, os recoñecidos, convalidados ou adaptados.

Información xeral Consellería de Cultura, Educación, Formación Profesional e Universidades

Summary: 

Dividido en tres liñas de actuación e 12 programas, diríxese ao alumnado das diferentes etapas educativas

Organízanse actividades prácticas como visitas a empresas e centros tecnolóxicos, concursos de ideas, iniciativas de mentorización ou relatorios

Os centros poden presentar as súas solicitudes ata o 21 de febreiro

Idioma Gallego

A Xunta de Galicia vén de publicar a convocatoria de programas do Plan de Emprendemento do Sistema Educativo de Galicia, Eduemprende, que ten como obxectivo principal promover a cultura do emprendemento entre o alumnado, proporcionándolles ferramentas que permitan avanzar neste sentido e facilitarlles a transición da vida académica á laboral

Os distintos programas do Plan Eduemprende están dirixidos a alumnado de diferentes ensinanzas, etapas e niveis educativos, co obxectivo de traballar e potenciar as súas habilidades emprendedoras. Para isto, establécense unha serie de programas de carácter práctico, como visitas a empresas e centros tecnolóxicos, relatorios, formacións, concursos de ideas, actividades de orientación e mentorización, etc.

Unha ducia de iniciativas

O plan divídese en tres liñas de actuación, cunha ducia de programas. A primeira delas, de fomento da cultura emprendedora, busca motivar ao alumnado para desenvolver habilidades como a creatividade, a innovación e a iniciativa para xerar ideas e proxectos. Nela enmárcanse os programas Actúa, Eduinspira e Eduindustria.

A segunda liña de actuación, de desenvolvemento de habilidades empresariais, céntrase en ensinar conceptos fundamentais de negocios, xestión, márketing, finanzas e outras áreas clave para emprender con éxito. Desenvólvese a través dos programas Finanzas para mortais, Grand Prix Financeiro, Prepárate para o salto, Seguramente, A tola aventura do aforro e Simula.

Finalmente, a terceira liña está centrada na conexión co mundo empresarial e busca establecer vínculos co mundo empresarial, ofrecendo oportunidades de mentorización e colaboracións con empresas para brindar ao alumnado unha visión máis realista e práctica da contorna empresarial. Forman parte dela os programas Atrévete, EduTecEmprende e Mentoring FP.

Os centros poden consultar o detalle de cada un dos programas no anexo da convocatoria.

A través destas iniciativas sensibilízase á comunidade educativa sobre a importancia de fomentar unha cultura emprendedora dinámica e fomentar o seu desenvolvemento, integrando estes valores nos centros. Desta forma incúlcase esta mentalidade e habilidades ao alumnado, facilitando a súa transición desde a contorna educativa cara ao ámbito laboral, preparándoo para a súa inserción profesional.

Ademais, resáltase e valórase a contribución das persoas emprendedoras en Galicia e divúlganse as boas prácticas e iniciativas neste sentido. Así mesmo, recoñécese a importancia crucial da innovación e a creatividade no proceso emprendedor.

O prazo de presentación de solicitudes está aberto ata o 21 de febreiro de 2024. Os centros interesados deberán presentala na Sede Electrónica da Xunta de Galicia a través do formulario correspondente.

Información xeral Consellería de Cultura, Educación, Formación Profesional e Universidades

Idioma Gallego

O conselleiro de Cultura, Educación, FP e Universidades, Román Rodríguez, asistiu hoxe ás actividades escolares do Entroido en Xinzo de Limia que nesta edición, debido ás condicións climatolóxicas, desenvolvéronse no Colexio CEIP Carlos Casares da localidade.

O representante da Xunta animou aos escolares a gozar ao máximo destes días de lecer cunha celebración da que salientou que é “unha das maiores riquezas culturais que temos en Galicia”. Non en balde, o Goberno galego vén de iniciar a tramitación desta esta tradición como Ben de Interese Cultural (BIC).

Información xeral Consellería de Cultura, Educación, Formación Profesional e Universidades

Summary: 

A directora xeral de FP visita o centro con motivo da cesión dun aeroxerador por parte da empresa Invenergy Service Huso ao servizo do ciclo dual de Mecatrónica industrial

Idioma Gallego

A directora xeral de FP, Eugenia Pérez, visitou hoxe o Instituto IES Plurilingüe Castro da Uz, onde salientou a diversificada oferta de Formación Profesional deste centro nas familias de Administración e finanzas, Fabricación Mecánica, Informática e comunicacións, Instalación e mantemento e por último Transporte e mantemento de vehículos, que dá cobertura ás demandas tanto do alumnado como das empresas da contorna.

Ademais, tal e como avanzou a representante da Consellería de Cultura, Educación, FP e Universidades, este ano o centro vai ofertar dous cursos de accións formativas para desempregados, Soldadura oxigás e soldadura MIG/MAG e Operacións auxiliares de mantemento en electromecánica de vehículos, contribuíndo, deste xeito, á inserción laboral e actualización dos traballadores da zona. Neste senso, quixo subliñar o importante compromiso do equipo directivo e do profesorado do centro polo reforzo da súa oferta.

Eugenia Pérez visitou o instituto con motivo da cesión dun aeroxerador por parte da empresa Invenergy Service Huso no marco da colaboración para o desenvolvemento do ciclo superior de Mecatrónica industrial en modalidade dual. Este equipamento permitirá a que o alumando teña unha formación máis especializada e axustada as necesidades do sector produtivo.

Precisamente no ámbito dual, este curso iniciou novos proxectos como o mencionado ciclo superior de Mecatrónica industrial, un ciclo de grao medio de Soldadura e caldeiraría e continúa co ciclo superior de Desenvolvemento de aplicacións web. Todo isto é posible “grazas a implicación activa dunha vintena de empresas da contorna á que temos que agradecer o seu interese”, subliñou a directora xeral de FP.

Información xeral Consellería de Cultura, Educación, Formación Profesional e Universidades

Summary: 

O secretario xeral técnico da Consellería de Educación comproba no Colexio O Cruce, de Cerceda, o funcionamento deste material

O kit está composto por cinco actividades distintas nas que se pon en valor o papel de grandes mulleres relevantes no eido científico

Idioma Gallego

A Xunta de Galicia vén de dotar os Polos Creativos dos centros educativos cun kit didáctico encadrado no Día Internacional da muller e a nena na Ciencia, que se celebra oficialmente o vindeiro domingo, día 11.

O secretario xeral técnico da Consellería de Cultura, Educación, FP e Universidades, Manuel Vila, achegouse esta mañá ao Centro Público Integrado CPI O Cruce, de Cerceda, para ver in situ este material que ten como finalidade poñer en valor o papel de mulleres relevantes no eido científico. O representante do departamento educativo da Xunta salientou a importancia deste tipo de actividades “que, de seguro, axudan a incentivar as vocacións científico-técnicas entre as nenas”. Neste obxectivo tamén se enmarca a xornada de hoxe organizada polo colexio de Cerceda, onde os alumnos tiveron un encontro por videoconferencia coa astrofísica Evanthia Hatzminaoglou, que traballa como investigadora no Observatorio Europeo Austral en Múnic (Alemaña).

Canto ao material didáctico enviado aos Polos Creativos, cómpre sinalar que o kit está composto por cinco actividades distintas para uso do alumnado. Trátase dun xogo, un taboleiro clásico en cartón e outro en DM, todos eles con referencia a mulleres relevantes na ciencia, un cubo máxico de 12 astrónomas destacadas e un caleidociclo con catro mulleres representativas no mundo da óptica. Este material está deseñado de xeito que os rapaces teñan que empregar material do Polo Creativo para a súa manipulación e montaxe, como impresoras ou cortadoras, entre outros.

Cómpre lembrar que os Polos Creativos son espazos educativos innovadores postos en marcha no curso 2022/23 en todos os centros de Infantil, Primaria e ESO sostidos con fondos públicos, e que están dotados de equipamento especializado, para fomentar as competencias STEM e as vocacións científico matemáticas entre os máis novos. Neles trabállase a creatividade a través da superación de retos tecnolóxicos e dixitais, a resolución de problemas ou a construción de prototipos, entre outros.

Información xeral Consellería de Cultura, Educación, Formación Profesional e Universidades

Summary: 

O director xeral de Centros e Recursos Humanos acompaña ao grupo, que na xornada de hoxe tamén visitou o CRA de Vilaboa, en Pontevedra

Idioma Gallego

A delegación do Goberno de Canarias desprazada estes días a Galicia para coñecer o modelo de ensino rural pechou hoxe a súa estancia na nosa comunidade cunha visita ao Colexio Rural Agrupado CRA Amencer, de Ribadavia, onde estivo acompañada polo director xeral de Centros e Recursos Humanos da Consellería de Cultura, Educación, FP e Universidades, Jesús Álvarez. Previamente, tamén visitaron o CRA de Vilaboa en Pontevedra.

A delegación canaria, encabezada pola directora xeral de Administración de Centros, Escolarización e Servizos Complementarios, Carolina León, recabou información de primeira man sobre o funcionamento deste tipo de centros, tanto a través das súas directoras e profesoras coma dos propios alumnos.

No CRA Amencer de Ribadavia efectuaron un percorrido pola Escola de Francelos así como pola de San Paio, mentres que no de Vilaboa-Consuelo González Martínez, visitaron a Escola de Pousada e a Escola de Vilaboa, que exerce como sede principal. En ambos casos, as representantes do departamento de Educación do Goberno canario tiveron a oportunidade de coñecer instalacións, as unidades escolares, a organización das mesmas e a súa biblioteca.

Ademais, en Vilaboa puideron gozar dunha exhibición por parte dos nenos de Madama e Galán do Entroido de Cobres, un dos nove entroidos que están recoñecidos como festas de interese turístico de Galicia.

Información xeral Consellería de Cultura, Educación, Formación Profesional e Universidades

Summary: 

O obxectivo é estimular a práctica oral do alumnado de 6º de Primaria a 4º de ESO en lingua inglesa, co apoio de profesorado nativo, e fomentar a convivencia

O programa desenvolverase do 14 de abril ao 15 de xuño nun centro residencial en Galicia, en réxime de internado de domingo a sábado

Os centros poderá solicitar participar na iniciativa ata o 8 de marzo incluído

Idioma Gallego

A Xunta de Galicia vén de convocar o programa de estadías lingüísticas Spring Week, que se desenvolverá entre o 14 de abril e o 15 de xuño deste ano. A iniciativa, enmarcada na Estratexia Galega de Linguas Estranxeiras, vai dirixida a centros docentes sostidos con fondos públicos, nos que se impartan ensinanzas de 6º curso de Educación Primaria ou de ESO e poderán participar un total de 1.450 alumnos.

O programa desenvolverase nun centro residencial situado en Galicia en réxime de internado e ten como obxectivo a estimulación da práctica oral da lingua inglesa e a súa utilización en contextos comunicativos máis amplos que na contorna escolar.

Durante a estadía, que se realizará en quendas semanais de domingo pola tarde ata o sábado seguinte pola mañá, o alumnado contará co apoio de profesorado nativo en lingua inglesa. As actividades fomentarán a convivencia e xirarán arredor de temáticas de interese cultural, social, artístico e medioambiental.

A metodoloxía será activa, lúdica e cooperativa e promoverá aprendizaxes significativas por parte do alumnado, incidindo na educación en valores democráticos e nos aspectos relacionados coa sostibilidade e o coñecemento da contorna (enerxías renovables, produción e consumo responsable, cidades sostibles, acción polo clima...), segundo se recolle nos obxectivos de desenvolvemento sostible da Axenda 2030.

Un total de nove quendas

O prazo de presentación de solicitudes, que deberán tramitar os centros interesados a través da aplicación informática habilitada para tal fin, remata o 8 de marzo, incluído. A distribución de prazas por quendas é a que se relaciona no seguinte cadro:

 

QUENDA

DATAS

CURSO

ALUMNADO

1ª quenda

do 14 ao 20 de abril

4º de ESO

175

2ª quenda

do 21 ao 27 de abril

3º de ESO

175

3ª quenda

do 28 de abril ao 4 de maio

2º de ESO

175

4ª quenda

do 5 ao 11 de maio

1º de ESO

175

5ª quenda

do 12 ao 18 de maio

6º EP

175

6ª quenda

do 19 ao 25 de maio

6º EP

175

7ª quenda

do 26 de maio ao 1 de xuño

3º e 4º de ESO

125

8ª quenda

do 2 ao 8 de xuño

1º e 2º de ESO

125

9ª quenda

do 9 ao 15 de xuño

6º EP

150

TOTAL

1.450

 

Información xeral Consellería de Cultura, Educación, Formación Profesional e Universidades

Summary: 

Convértese no terceiro campus en acadar este recoñecemento, logo do Campus Industrial de Ferrol e do Campus Terra de Lugo

A Xunta asinará un convenio coa Universidade de Vigo para desenvolver o seu plan estratéxico, coa correspondente partida orzamentaria

Idioma Gallego

O Diario Oficial de Galicia publica hoxe a resolución pola cal se oficializa a acreditación do Campus Auga de Ourense, da Universidade de Vigo, como campus de especialización do Sistema Universitario de Galicia (SUG) centrado en actividades docentes, investigadoras e de transferencia de coñecemento en temáticas da auga e alimentación.

Esta resolución faise pública logo de acadar o informe favorable por parte do comité de avaliación e, deste xeito, convértese no terceiro campus en acadar este recoñecemento que xa ostentan o Campus Industrial de Ferrol e o Campus Terra de Lugo.

A acreditación, que estará vixente por un período de tres anos, implica a elaboración dun plan estratéxico para o fortalecemento de aspectos como a docencia e a investigación, para o desenvolvemento do cal a Xunta de Galicia, a través da Consellería de Cultura, Educación FP e Universidades, asinará un convenio de colaboración coa Universidade de Vigo, cunha dotación orzamentaria que se estima que superará os 3M€.

Así pois, o plan estratéxico convértese na folla de ruta para que o Campus Auga de Ourense camiñe na formación avanzada e de calidade en disciplinas relacionadas coa auga, que son as que diferencian este campus a nivel nacional e internacional; e na internacionalización da investigación multidisciplicar e na promoción da transferencia do coñecemento cara a aplicación en liña coa sociedade, a industria e as institucións, entre outros aspectos.

Reforzo oferta académica

Precisamente un dos eixos fundamentais da especialización é a potenciación da oferta académica coa posta en marcha de dobres graos como Enxeñaría Agraria e Ciencia e tecnoloxía de Alimentos, Enxeñaría Agraria e Ciencias Ambientais ou Enxeñaría Agraria e Sensórica; o impulso dos másteres en Viticultura e Enoloxía, de Hidroloxía-Termalismo e de Economía circular; a posta en marcha de titulacións sobre Sensórica e a transformación tecnolóxica dos sectores agrícola e alimentario.

Así mesmo, o Campus deberá poñer en marcha accións encamiñadas á captación de talento, á potenciación da empregabilidade dos seus egresados, á promoción da internacionalización das titulacións e ao fortalecemento das infraestruturas de investigación.

Información xeral Consellería de Cultura, Educación, Formación Profesional e Universidades

Summary: 

O conselleiro de Cultura, Educación, FP e Universidades acompaña ao grupo nunha visita ao CRA de Valga para amosar o seu funcionamento

Idioma Gallego

O conselleiro de Cultura, Educación, FP e Universidades, Román Rodríguez, e o alcalde de Valga, José María Bello Maneiro, visitaron esta mañá o Colexio Rural Agrupado CRA de Valga acompañados por unha delegación da Consellería de Educación do Goberno de Canarias, que se desprazou a Galicia para coñecer o modelo do ensino rural galego.

A delegación canaria, encabezada pola directora xeral de Administración de Centros, Escolarización e Servizos Complementarios, Carolina León, puido comprobar de primeira a organización deste tipo de centros, constituídos por varias escolas unitarias, unha das cales exerce como sede principal e centro administrativo e de xestión e punto de encontro de toda a comunidade escolar do conxunto que conforma o Colexio Rural Agrupado.  

O CRA de Valga está constituído por seis escolas unitarias que aglutinan un total de 89 alumnos. A sede principal é a Escola de Campaña, onde a delegación canaria coñeceu o proxecto educativo que se leva a cabo, caracterizado pola colaboración e a dinamización de accións entre o conxunto das aulas que a conforman.  

Precisamente unha das vantaxes deste tipo de agrupamentos é que posibilita unha acción educativa coordinada, cun plan de centro e unha programación común; dinamiza a comunicación entre aulas, etapas e niveis educativos, e facilita a tarefa de coordinación, superando o illamento da escola unitaria independente. Así mesmo, favorece a optimización dos recursos materiais e humanos, incrementando a implicación do profesorado en proxectos de innovación e de formación, entre outros.

 A visita ao Centro Rural Agrupado de Valga é a primeira parada desta xira da delegación educativa canaria por Galicia, xa que mañá visitarán tamén os de Vilaboa e de Ribadavia.

Información xeral Consellería de Cultura, Educación, Formación Profesional e Universidades

Summary: 

Eugenia Pérez subliña “a grande demanda” dos ciclos vinculados ao ámbito comercial, de xestión de vendas e de loxística, onde este centro é un referente

Idioma Gallego

A directora xeral de FP, Eugenia Pérez, visitou esta mañá o Instituto IES Pontepedriña, en Santiago de Compostela, para analizar co equipo directivo do centro as posibilidades de impulso da oferta formativa na modalidade dual de cara ao vindeiro curso escolar, sobre todo no ámbito comercial, de xestión de vendas e de loxística, entre outros, cunha grande demanda por parte do tecido produtivo.  

A representante da Consellería de Cultura, Educación, FP e Universidades destacou a importante aposta pola Formación Profesional que está desenvolvendo o IES de Pontepedriña, especialmente no eido comercial, “onde está consolidado como un referente no sur da provincia da Coruña”.

Así pois, este encontro enmárcase no reforzo destas ensinanzas profesionais por parte da Xunta para atender a demanda que veñen manifestando as empresas do sector de contar con persoal con formación especializada para desempeñar postos de carácter estratéxico nas firmas. De feito, a taxa de inserción laboral do alumnado que realiza ensinanzas no ámbito do Comercio e do márketing é do 87,3 %, porcentaxe que se incrementa na modalidade de FP dual.

No presente curso escolar, o IES Pontepedriña oferta dez ciclos formativos, tanto de grao básico como medio e superior. Ademais, imparte en modalidade dual os ciclos superiores de Transporte e loxística e de Xestión de vendas e espazos comerciais, e o ciclo de grao medio de Comercialización de produtos alimentarios, todos eles en colaboración con importantes empresas como Leroy Merlin, Detacargo, Lidl, Sprinter, Carrefour, Ignacio de las Cuevas, Pérez Rumbao, El Corte Inglés, Gadisa e Coren, entre outras.

Información xeral Consellería de Cultura, Educación, Formación Profesional e Universidades