REGULAMENTO DE RÉXIME INTERNO (pendente de actualizar)
O presente Regulamento de Réxime Interno nace como resposta á reiterada demanda de actualización do anterior RRI e coa intención de afrontar as novas situacións que se presentan no Centro de acordo coa lexislación vixente.
Entendemos que o RRI é un instrumento básico para a organización e o funcionamento do Centro e pertence ó ámbito aplicativo (regulación de actividades) da planificación. Asimesmo é un documento xurídico-administrativo que comprende o conxunto de normas que regularán o Centro e no que participa e afecta a toda a comunidade educativa.
Coa súa elaboración pretendemos facilitar a organización e o funcionamento do Centro adaptando as normas xerais ás caracteristicas do mesmo.
Na súa elaboración participou todo o profesorado do Centro e unha representación dos pais e nais e do alumnado, sobre todo nos aspectos do Regulamento que incidían especialmente sobre eles.
O resultado é o presente Regulamento, entendendo que con el, o CEP Antonio Magariños Pastoriza ten a súa Constitución pola que se rexirá no sucesivo toda a Comunidade Educativa.
DEFINICIÓN/ IDENTIDADE
Centro Colexio de Educación Primaria: CEP
Composición: De acordo coa orde de 1 de setembro de 1998 o Centro componse de 12 unidades de Educación Primaria. Contará cos postos de traballo seguintes:
Educación Primaria 10
Filoloxía Inglesa 2
Filoloxía Francesa 1
Educación Musical 1
Educación Física 2
Pedagoxía Terapéutica 1
Está adscrito ao Instituto "Ramón Cabanillas"
Os principios que envolven toda a actuación educativa enmárcanse no ámbito da Constitución , o Estatuto de Autonomía de Galicia, a LOXSE e demais leis que a desenrolan e baséanse:
. no respecto ós dereitos e liberdades fundamentais;
. na procura do pleno desenrolo da personalidade do alumno/a;
. no respecto ás direrencias persoais (éticas, políticas, físicas, psíquicas, ...);
. na preparación para participar activamente na vida social e cultural;
. na adquisición de aprendizaxes significativos(culturais, humanísticos,
históricos e estéticos) e de hábitos intelectuais e técnicas de estudio;
. no respecto á liberdade de cátedra que lle corresponde ao profesorado;
. no traballo en equipo do persoal docente...;
todo isto no marco dun clima de diálogo entre toda a comunidade educativa.
OBXECTIVOS DO REGULAMENTO DE REXIME INTERIOR
. Potenciar o respecto dos dereitos e liberdades fundamentais e o exercicio da tolerancia e a liberdade dentro dos principios democráticos de convivencia.
. Facilitar e mellorar a actividade educativa do Centro a nivel pedagóxico-didáctico e de administración e xestión
. Articular e mellorar a comunicación entre os distintos membros da comunidade educativa.
. Proporcionar un soporte normativo claro e difundilo para así clarificar responsabilidades, dereitos, deberes de toda a comunidade.
. Apoiar a realización de experiencias educativas.
. Dinamizar a vida do Centro.
. Establecer mecanismos de participación de tódolos membros da comunidade educativa
. Fomentar unha progresiva toma de decisións por parte do alumnado, asumindo responsabilidades e propiciando a súa educación integral e harmónica.
. Facilitar os procesos de avaliación institucional.
. Unificar a información e facela máis asequible.
ESTRUCTURA ADMINISTRATIVA DO CENTRO
Órganos unipersoais: Director/a, Xefe de estudios, Secretario/a
" Os órganos unipersonais de goberno constitúen o Equipo Directivo do Centro. Traballarán de forma coordinada no desempeño das súas funcións. O seu mandato será de catro anos..." (Artigo 13, título II, capítulo II do Regulamento Orgánico das escolas de educación infantil e colexios de educación primaria: Regulamento 374/1996 do 17 de outubro (DOGA do 21/10/96**)
** De aquí en diante Regulamento Orgánico
Órganos colexiados: Consello Escolar e Claustro
Consello Escolar
O Consello Escolar do Centro é o organo a través do cal participan na súa xestión os distintos membros da comunidade escolar.
Composición
A composición para centros de oito, ou máis, unidades é a seguinte. (Art. 37 do Regulamento Orgánico)
"a) O Director, que será o seu presidente
b) O Xefe de Estudios
c) Un concelleiro ou representante do Concello do municipio no que estea situado o Centro.
d) Un representante do persoal de administración e servicios
e) Cinco mestres elexidos polo Claustro
f) Cinco representantes dos pais de alumnos
g) O Secretario do Centro, que actuará como Secretario do Consello, con voz, pero sen voto."
h) Dous alumnos do Terceiro Ciclo da Educación Primaria, con voz pero sen voto
(Artigo 45 e artigo 94 do Regulamento Orgánico).
"Dos representantes que lles corresponden aos pais no consello escolar un será proposto pola APA..., os outros serán elexidos por votación..." (Artigo 39 do Regulamento Orgánico.).
Renovación
"... dous anos despois de que se constitúa o Consello Escolar, con tódolos membros, levarase a cabo a primeira renovación parcial del e serán substituídos dous mestres e tres pais". (Artigo 41.1 do Regulamento Orgánico). Continuarán no Consello Escolar os profesores e pais de alumnos que manteñan a súa vinculación ao Centro nos próximos dous anos; no seu defecto os que soamente a prolonguen un curso.
"Dous anos despois substituiranse os membros non considerados na renovación parcial anterior: o representante do persoal de administración e servicios, tres mestres e dous pais, un destes proposto pola asociación de pais de alumnos."(Artigo 41.2 do Regulamento Orgánico.)
Funcións
"a) Establecer as directrices e elaborar propostas para a elaboración do Proxecto Educativo do Centro, aprobalo, avalialo e, se é o caso, introducir modificacións, sen prexuicio das competencias que o Claustro de profesores ten atribuídas en relación coa planificación e organización docente.
b) Elexir o Director do Centro.
c) Propoñer a revogación do nomeamento do Director, logo de acordo dos seus membros, adoptado por maioría de dous tercios.
d) Decidir sobre a admisión de alumnos, con suxeción ao establecido na lexislación vixente.
e) Aprobar e modificar o Regulamento de Réxime Interior do Colexio.
f) Resolver os conflictos e impoñer as correccións con finalidade pedagóxica que correspondan a aquelas conductas do alumnado que prexudiquen gravemente á convivencia do Centro.
g) Aprobar o proxecto de orzamento do Centro e a execución del.
h) Aprobar e avaliar a programación xeral do Centro, respectando, en todo caso, os aspectos docentes que competen ao Claustro.
i) Aprobar a programación das actividades extraescolares e complementarias e avaliar o seu desenvolvemento.
l) Establecer as directrices para a participación do Centro en actividades culturais, deportivas e recreativas.
m) Establecer os criterios de colaboración con outros centros, entidades ou organismos.
n) Promover a renovación das instalacións e equipamento do Centro, e vixiar a súa conservación.
ñ) Analizar e valorar o funcionamento xeral do Centro, a evolución do rendemento escolar e os resultados da avaliación que do Centro realice a Administración educativa.
o) Colaborar coa inspección educativa nos planos de avaliación de Centro, nos termos que a Consellería de Educación e Ordenación Universitaria estableza.
p) Regular o procedemento de autorización das saídas voluntarias entre clase ou en períodos de lecer do alumnado do Centro." (Artigo 42, título II, capítulo II do Regulamento Orgánico)
q) Elaborar sempre que se estime oportuno e, en todo caso, unha vez ao ano, un informe que formará parte da memoria de final de curso no que se avaliarán os resultados da aplicación das normas de convivencia dando conta do exercicio polos alumnos dos seus dereitos e deberes, analizando os problemas detectados na súa aplicación efectiva e propoñendo a adopción das medidas oportunas. (Artigo 8 do Real Decreto 732/1995 do 5 de maio de dereitos e deberes de alumnos).
Comisión económica e Comisión de convivencia
No seo do Consello Escolar existirá unha comisión económica integrada polo Director, un mestre, un pai de alumno e o Secretario e unha comisión de convivencia constituída por profesores pais e alumnoselexidos polo sector correspondiente e será presidida polo Director/a. As funcións principais desta serán as de resolver e mediar nos conflictos plantexados e canalizar as iniciativas de tódolos sectores da comunidade educativa, o respecto mutuo e a tolerancia nos centros docentes. Adoptará as medidas preventivas necesarias para garantir os dereitos dos alumnos e para impedir a comisión de feitos opostos ás normas de convivencia do Centro
Claustro de profesores/as
"É o órgano propio de participación destes no goberno do Centro e ten a responsabilidade de planificar, coordinar, decidir e, se é o caso, informar sobre tódolos aspectos docentes del."
(Artigo 46.1 do Regulamento Orgánico)
Composición
"O Claustro estará integrado pola totalidade de profesorado que preste servicio nel e será presidido polo Director/a do Centro." (Artigo 46.2 do Regulamento Orgánico)
"Forman tamén parte do Claustro, os profesores de relixión propostos pola Comisión Episcopal de ensino e nomeados pola Delegación Provincial." (Artigo 2.2.2 da Orde do 22 de xullo de 1997)
RECURSOS MATERIAIS E ESPACIOS.
O Centro conta con 12 aulas de Primaria, aula de Inglés, aula de Usos Múltiples, Laboratorio e aula de Plástica, aula de Educación Especial, Biblioteca do alumnado e Biblioteca do profesorado, así como un almacén e arquivo.
Cada unha das alas nas plantas alta e baixa teñen, ao fondo, os servicios das alumnas (cor laranxa) e dos alumnos (cor azul).
Cando nun curso haxa alumnado ou profesorado con dificultades motoras asignaraselle a ese curso unha aula da planta baixa.
Tódalas persoas ou entidades que desexen facer uso das instalación do Centro fora do horario lectivo solicitaranllo ao Director/a con antelación suficiente.
Materiais curriculares aportados polo alumnado
Fixo para todos: libretas, lapis, goma de borrar, bolígrafo, folios, pegamento, tesouras, cartolinas e regra. Libros de texto.
Outro material segundo as necesidades do curso e ciclos (plastilina, ceras,...). Este material será inventariado e controlado polo profesor titor.
Desaloxo do Centro
1. O profesorado explicaralles aos alumnos/as da súa titoría estas normas, xustificarán a necesidade do seu estricto cumprimento e realizarán con eles/as algunha práctica de saída.
2. Sinal de alarma: un toque longo e continuado de timbre ou chifre.
3. Apertura de portas exteriores: profesorado que estea nas aulas máis próximas e a conserxe
4. Apertura da porta da aula: profesorado que estea nese intre nela.
5. Saída : deberá ser ordenada, silenciosa e rápida, sendo a profesora/o a última/o en sair. O profesorado que estea nas aulas contiguas aos servicios comprobarán que non quede ningún alumno/a.
7. Cada profesor/a procurará que o alumnado se alonxe das portas de saída e estea agrupados/as nos patios ou rúas exteriores.
8. Finalizado o simulacro o alumnado voltará en silencio e ordenadamente ás súas aulas.
Rotas de saída:
Seran fixadas cada curso na Programación Xeral Anual
ALUMNADO
Admisión de alumnos
" Non se poderá establecer ningunha discriminación por razón ideolóxica, relixiosa, moral, de raza, sexo, nacemento ou calquera circunstancia de carácter persoal ou social" .
(Artigo 1.1, capítulo IV da orde do 22/7/97)
O procedemento para a admisión de alumnos regúlase no Decreto 87/1995, do 16 de marzo , así como na Orde do 5/4/95 (DOG 10/5/97)
Agrupamentos
"O agrupamento dos alumnos será mixto e flexible e favorecerá a coeducación e a aprendizaxe cooperativa, evitando calquera tipo de discriminación por razón de raza, sexo, relixión, rendemento escolar, etc."(Artigo 3.1, capítulo IV da orde do 22/7/97)
"Na formación dos grupos de alumnos evitarase calquera clasificación deles polos seus coñecementos, nivel intelectual ou rendemento, así como os grupos estables de recuperación, de repetidores ou de alumnos avantaxados."(Artigo 3.2, capítulo IV da orde do 22/7/97))
"De maneira especial debe prestarse atención á flexibilidade que permita a aplicación de adaptacións curriculares co alumnado que teña necesidades educativas especiais (minusvalideces, dificultades de aprendizaxe,...)" (Artigo 3.3, cap IV da orde do 22/7/97)
Teranse en conta ademais, os criterios seguintes:
O alumnado agruparase por orde alfabética do primeiro apelido.
As altas durante o curso incorporaranse na aula de menos alumnos do nivel correspondente.
Os rapaces que permanezan un ano máis no mesmo ciclo adscríbense segundo os acordos do grupo de ciclo que terá en conta: o historial do alumno/a, posibles problemas de conducta, equiparación numérica das aulas do mesmo nivel, orde alfabética, a necesidade de facer adaptacións curriculares.
Dereitos e deberes do alumnado
Aplicarase o disposto polo Real Decreto 732/1995, do 5 de maio (BOE do 2 de xuño), polo que se establecen os dereitos e deberes dos alumnos e as normas de convivencia nos Centro.
Dereitos
1. Recibir unha formación que asegure o pleno desenrolo da súa personalidade.
2. A unha xornada de traballo escolar acomodada á súa idade e unha planificación equilibrada das súas actividades de estudio
3. A non ser discriminado/a por razón de nacemento, raza, sexo, capacidade económica, nivel social, conviccións políticas, morais ou relixiosas, así como por discapacidades físicas, sensoriais e psíquicas, ou calquera outra condición ou circunstancia persoal ou social.
4. A que se atenda as súas necesidades de integración e educación especial.
5. Ao respecto da súa integridade física e moral e a súa dignidade persoal non podendo ser obxecto de trato vexatorio ou degradante.
6. A ser avaliado no seu rendemento escolar con plena obxectividade.
7. A reclamar contra as cualificacións que, ao seu xuicio, atenten contra o artigo anterior.
8. Á orientación escolar e profesional co fin de acadar o máximo desenrolo persoal, social e profesional segundo as súas capacidades, aspiracións e intereses.
9. A que a súa actividade escolar se desenrole nas condicións debidas de seguridade e hixiene.
10. Á reserva que o Centro debe gardar sobre as súas circunstancias persoais e familiares, salvo que se produza incumprimento das leis de protección ao menor.
11. A participar na vida e funcionamento do Centro.
12. Á asistencia médica e hospitalaria, nos termos que establece a lexislación vixente.
13. A ser informado polos Delegados das cuestións propias do seu Centro.
14. Á liberdade de expresión sen prexuicio dos demais membros da Comunidade Escolar.
15. A percibir protección social para compensar as carencias de xeito que se garantice a igualdade real e efectiva das súas oportunidades e que non se vexa forzado ao abandono dos estudios.
16. A que se respecten os seus dereitos. Para iso, poderá recurrir ante o órgano competente do Centro, que terá a obriga de esixir o cumprimento dos mesmos.
17. A utilizar as instalacións do Centro coas limitacións impostas polas actividades escolares (e extraescolares) e coas precaucións necesarias para a seguridade das persoas e a adecuada conservación dos recursos.
18.A manifestar a súa discrepancia respecto das decisións educativas que lle afecten.
"Os alumnos non poderán ser privados do dereito de asistencia ao Centro por ausencias do profesorado"(Artigo 6.2, capítulo IV da orde 22/7/97))
Deberes.
"O deber máis importante dos alumnos é o de aproveitar positivamente o posto escolar que a sociedade pon á sua disposición. Por eso o interese por aprender e a asistencia a clase, é dicir, o deber do estudio é a consecuencia do dereito fundamental á educación" Real Decreto 732 / 1995 de 5 de maio
É deber de todo alumno/a:
1. Asistir a clase con puntualidade e participar nas actividades orientadas ao desenrolo dos plans de estudio.
2. Cumprir e respectar os horarios das actividades do Centro.
3. Seguir as orientacións do profesorado respecto da súa aprendizaxe e mostrarlle o debido respecto e consideración.
4. Respectar o exercicio do dereito ao estudio dos seus compañeiros.
5. Coidar e utilizar correctamente os bens mobles e as instalacións do Centro e respectar as pertenzas dos outros membros da comunidade educativa.
6. Non discriminar a ningún membro da Comunidade Escolar.
7. Respectar o Proxecto Educativo de Centro, especialmente as normas de convivencia
8. Participar na vida e funcionamento do Centro.
Traballo
. Tódolos alumnos/as deben respectar aos seus compañeiros, gardar silencio, facer ordenadamente o seu traballo, atender ás explicacións do profesor e cumpri-las instrucións que este lle dicte.
. Cada alumno recollerá e ordenará o seu material de uso persoal e de uso común, sempre que saia da clase.
. As clases quedarán ordenadas e recollidas, coas sillas encima das mesas, ao finalizar a última sesión.
Os delegados/as de clase colaborarán cos titores no mantemento da orde da aula cando non se encontre presente o profesorado.
Entradas e saídas.
. O alumnado e o profesorado extremarán ao máximo a súa puntualidade,
. Cando un alumno/a chegue ao Colexio cun retraso superior ós 10 minutos entrará pola porta principal e presentará a xustificación escrita e asinada polo pai/nai/titor legal diante dalgún membro do Equipo Directivo que lle permitirá o acceso á correspondente clase. De non traer a xustificación instarase ó alumno/a que a presente á maior brevidade posible.
. No caso de inclemencias metereolóxicas permitirase un marxe de retraso de dez minutos.
. Os alumnos/as entrarán cando llo indiquen os profesores/as encargados das entradas, facendoo directamente ás súas aulas con orde e silencio.
. A circulación polos corredores farase en silencio, sin carreiras nin xogos.
. No caso de inclemencias metereolóxicas que impidan a saída ao patio no tempo adicado a recreo, os alumnos/as permanecerán nas aulas acompañados polo profesor que estivo impartindo clase antes do recreo.
. O tempo adicado ao recreo aproveitarase para facer uso dos servicios, non podendo permanecer o alumnado nas aulas, a non ser baixo a vixiancia dun profesor.
. Durante o recreo non poderán practicarse xogos que poñan en perigo a integridade física dos demais
. Poderáse acudir ao servicio co permiso previo dun profesor.
. Antes da saída procurarase deixar as clases ordeadas, coas sillas enriba das mesas, as luces apagadas e as ventás, sobre todo na planta baixa, pechadas.
Faltas de asistencia
O número de faltas inxustificadas que poderá implicar sistemas extraordinarios de avaliación será o que supere os 12 días completos ou sesenta sesións cada trimestre. (5.4, capítulo IV da orde 22/7/97
"Nos casos reiterados de faltas de asistencia sen xustificar, a dirección do Centro poñerao en coñecemento do Concello e da Inspección educativa."(Artigo 5.8, capítulo IV da orde 22/7/97) ."Calquera persoa ou autoridade que teña coñecemento de que un menor non está escolarizado ou, sen causa xustificada, non asiste ao centro escolar de maneira habitual, está obrigado a poñelo en coñecemento das autoridades públicas competentes para que adopten as medidas precisas para a súa normal escolarización" (Artigo 5.3, capítulo IV da orde 22/7/97)
As faltas de asistencia ou puntualidade dos alumnos serán xustificadas diante do profesor titor mediante nota escrita e sinada polos seus pais ou titores legais segundo o modelo que lle facilitará o titor.
O mestre titor será o encargado de controlar as faltas. Se o alumno/a non trae o xustificante e as faltas son reiteradas comunicaraselle ao Xefe de Estudios para que tome as medidas oportunas.
Se algún alumno tivera que ausentarse por causas xustificadas durante o horario escolar virá recollelo algún familiar ó Centro, avisará en Secretaría ou Dirección e esperará a que traian ó alumno da aula.
Relacións
As relacións, entre os membros da Comunidade Escolar, serán de respecto mutuo, tendo en conta os dereitos e deberes de cada un.
Traballos extraescolares.
"Con carácter xeral os centros evitarán que os alumnos se vexan obrigados a realizar traballos suplementarios fóra da xornada escolar.
En casos excepcionais, e con carácter transitorio, o profesorado poderalles propoñer a realización de actividades incluídas no curriculo do ciclo a aqueles alumnos do segundo e terceiro ciclos de educación primaria que, por ausencia prolongada ou outras razóns non poidan seguir o ritmo normal de traballo dos alumnos da súa clase.
Os traballos que se lles poñan a estes alumnos dirixiranse ao mellor aproveitamento educativo do tempo libre e ao desenvolvemento da súa creatividade e sociabilidade. Serán acordes coas características específicas de cada alumno e respectarán, en todo caso, as súas necesidades lúdicas, de convivencia familiar e de descanso. En ningún caso se lles poñerán traballos extraescolares aos alumnos do primeiro ciclo de educación primaria." (Artigo 9, capítulo IV da orde do 22/7/97)
Representación
Os alumnos teñen dereito á súa representación no Consello Escolar do Centro, con voz pero sen voto. Formaran parte dous representantes do Terceiro Ciclo elexidos por todo o alumnado..
Delegados
En tódalas clases elexiranse por tódolos alumnos, e de entre eles un Delegado/a e un Subdelegado/a, que serán portavoces da clase diante do profesor titor.
O seu mandato terá a duración dun curso escolar. Non obstante poderán cesar a petición propia, ou ser removidos no cargo por acordo da maioría da clase.
As súas funcións son:
a) Representar á clase ante o titor e os outros profesores.
b) Cooperar cos mesmos para o mantenimento da orde na clase.
c) Comunicarlle ao Xefe de estudios a ausencia do profesor/a pasados os 10 minutos primeiros de clase.
d)Informarlles aos seus compañeiros de aula dos acordos da Xunta de Delegados
e) Son funcións do Subdelegado substituir ao Delegado na súa ausencia, e cooperar co mesmo.
Xunta de Delegados/as
A Xunta de Delegados será a reunión formada polos Delegados e Subdelegados de curso e os/as representantes do alumnado no Consello Escolar e estará coordinada polo Xefe de Estudios.
A Xunta de Delegados/as terá como funcións:
a) Informar da problemática de cada clase.
b) Informar os representantes do alumnado sobre os temas tratados no Consello Escolar, no seu defecto dará esta información o Xefe de Estudios.
c) Elaborar informes para o Consello Escolar a iniciativa propia ou a petición deste.
d) Elaborar propostas de modificación do Regulamento de Réxime Interno.
e) Informar aos estudiantes das súas actividades.
f) Elaborar propostas de criterios para a elaboración dos horarios de actividades docentes e extraescolares.
g) Os membros da Xunta de Delegados non poderán ser sancionados polo exercicio, nos termos da normativa vixente, das súas funcións como voceiros dos alumnos/as.
6.7.3 Funcionamento
a) Reuniranse preceptivamente unha vez ao trimestre.
b) As reunións serán fora do horario das clases. Solicitarán do Director/a do Centro que lles asigne unha aula ou local a utilizar .
c) Os acordos das reunións recolleranse nunha acta e daranse a coñecer a tódalas clases a través dos seus Delegados/as
Atención a alumnos accidentados
O profesor que esté impartindo clase ou de garda no patio no momento en que se produce o accidente, procederá da seguinte maneira.
a) Lesión leve: Acompañará ao alumno ao lugar onde se atopa o botiquín do centro e efectuará as curas oportunas.
b) Se a lesión require asistencia médica, comunicarallo ao Equipo Directivo para poñerse en contacto coa familia en primeiro lugar."No suposto de que un familiar non puidera facerse cargo do alumno accidentado ou indisposto ou a urxencia o requira, acompañará o alumno - preferentemente a unha institución sanitaria da Seguridade Social- o seu titor ou outro mestre do centro, provisto, se procede, da fotocopia da tarxeta de beneficiario da Seguridade Social." (Artigo 12.1, capítulo IV, orde 22/7/97)
"Cando se trate dun alumno que non sexa beneficiario da Seguridade Social (...) acudirase á institución sanitaria máis próxima." (Artigo 12.3)
c) No caso de lesión moi grave o profesor comunicarallo ao Equipo Directivo que o levará ao centro correspondente e logo llo comunicará aos pais.
A Xefatura de Estudios arbitrará as substitucións oportunas e comunicaralle ao titor a situación do alumno/a accidentado.
Atención ao alumnado con necesidades educativas especiais
"A coordinación da atención aos alumnos con necesidades educativas especiais será realizada polo profesor de apoio á atención aos alumnos con necesidades educativas especiais. Este profesor será especialista en educación especial."(Artigo 82 do Regulamento Orgánico)
"Os alumnos con necesidades educativas especiais recibirán atención docente directa por parte dos profesores do grupo no que se integran, coa axuda, se é o caso, do profesorado de apoio na propia aula.
Excepcionalmente, en función das necesidades do alumnado e das adaptacións curriculares establecidas poderanse facer intervencións diferenciadas, debidamente temporalizadas, fóra da aula."
(Artigo 83 do Regulamento Orgánico)
Cando se detecten casos de alumnos con necesidades educativas especiais, que requiran unha valoración psicopedagóxica específica o titor informará aos pais, ao profesor de apoio e á Xefatura de Estudios
PAIS / NAIS / TITORES LEGAIS DE ALUMNOS/AS
Dereitos
a) A que os seus fillos/as reciban unha educación conforme aos fins establecidos na Constitución e na LOXSE.
b) A que os seus fillos/as reciban a formación relixiosa e moral que esté de acordo coas súas propias conviccións. Neste senso e de " acordo co principio de liberdade relixiosa os pais de alumnos do 2o ciclo de educación infantil e de educación primaria farán constar por escrito no momento de matricular os alumnos no Centro por primeira vez, ou ó inicio de cada curso escolar -sempre antes do 15 de setembro-, a súa decisión de que o alumno curse as ensinanzas de relixión e moral católica, doutras confesións relixiosas (evanxélicas, israelitas, islámicas), de cultura relixiosa ou doutras ensinanzas ou actividades alternativas ofertadas polo Centro".(Artigo 8.2, capítulo IV da orde do 22/7/97.
Asimesmo, no " momento da matrícula, e en todo caso antes de rematar o primeiro ciclo de educación primaria, os pais dos alumnos farán constar a lingua extranxeira que desexen que curse o seu fillo ou filla entre as ofertadas polo Centro".
c) A recibir información periódica do desenrolo do proceso educativo e do rendemento académico dos seus fillos.
d) A poder manter cambios de opinións co profesor titor/a do seu fillo/a, Xefe de Estudios e Equipo Docente sobre a marcha educativa do mesmo.
e) "A constituir Asociacións de Pais de Alumnos" (Artigo 3.1, capítulo VII da orde do 22/7/97)
f) A "reclamar contra as cualificacións otorgadas ao rematar un ciclo educativo, baseándose na inadecuación das probas propostas ao alumno en ralación cos obxectivos ou na incorrecta aplicación dos criterios de avaliación establecidos.
Os pais que non estean de acordo coa cualificación asignada ao seu fillo ao final dun ciclo poderán presentar, no plazo de cinco días unha reclamación por escrito ante o Director na que explique as razóns nas que fundamenta a súa solicitude." (Art. 11.1 e 11.2, capítulo IV da orde do 22/7/97)
Deberes
a) Velar porque os seus fillos/as asistan con regularidade e puntualidade ao colexio.
b) Estimulalos ao cumprimento das normas de convivencia e ao exercicio dos seus dereitos e deberes.
c) Atender ás chamadas ou avisos do titor, o Xefe/a de Estudios e o equipo docente para todo o que teña que ver coa formación dos seus fillos.
d) Procurar que os seus fillos sigan as clases con aprobeitamento.
e) Participar na vida e funcionamento do centro
Representación
A representación dos pais e nais no centro poderan exercitala:
a) Participando como electores e elexibles nas eleccións para representantes dos pais e nais no Consello Escolar
b) Participando na xestión do Centro, dentro da comisión económica que funciona no seo do Consello Escolar.
O proceso para a elección de representantes dos pais e nais ben recollido no Decreto 92/1988 do 28 de abril, modificado no Regulamento do 13/10/96
"A xunta electoral solicitaralle, cando proceda, á asociación de pais de alumnos do centro, legalmente constituída, que teña maior número de asociados a proposta dun representante para o Consello Escolar, dando un prazo de 10 días para o efecto." (Artigo 39.1 do Regulamento)
No caso de non existir proposta da Asociación de Pais para ocupar a praza qeu lle corresponde á mesma, esa vacante cubrirase conxuntamente e co mesmo procedemento que os outros representantes dos pais. Para efectos de futura renovación parcial, asignarase a praza correspondente á proposta da asociación de pais de alumnos ao candidato máis votado."(Artigo 39.2 do Regulamento Orgánico)
Relacións.
a) Poderán entrevistarse para os asuntos de carácter administrativo con calquera dos compoñentes do Equipo Directivo, nos horarios e lugares sinalados a tal fin, salvo casos moi urxentes nos que poderán realizalo en calquera momento.
b) Poderán entrevistarse co profesor titor en todo aquilo que se refira a recibir ou transmitir información, ou intercambio de opinións sobre a marcha escolar dos seus fillos. Para entrevistarse con calquera outro membro do equipo de profesores farao a través e con coñecemento do titor. A tal fin fixarase un lugar e horario para tales entrevistas.
Naqueles casos en que a problemática non poida ser resolta polo titor ou o equipo de profesores, poderán recurrir ao Equipo Directivo.
O acceso das nais e pais ou titores legais ó Centro farase pola porta principal do Colexio e nunca pola porta de acceso ó patio nen pola porta posterior. Tampouco accederán directamente as aulas a non ser que previamente sexan citadas polo mestre.
APAS
Logo do acordo do Consello Escolar a APA poderán utilizar as instalacións do centro para a realización de actividades que lle son propias, responsabilizándose en todo caso dos seus gastos ou dos estragos que se poidan ocasionar."(Artigo 3.3, capítulo VII da orde do 22/7/97)
"O programa de actividades que organicen as asociacións de pais no recinto escolar deberá ser aprobado polo Consello Escolar e figurar na correspondente Programación Xeral Anual" (Artigo 3.4)
A dirección, "cando as dispoñibilidades de locais o permitan e cando así o soliciten estas asociacións, facilitaralles o uso dunha dependencia para o desenvolvemento das funcións que lle son propias." (Artigo 3.5)
Funcións das APAS:
a) Elevarlle propostas ao Consello Escolar para a elaboración do Proxecto Educativo e ao Equipo Directivo para a elaboración da Programación Xeral Anual.
b) Informar o Consello Escolar daqueles aspectos da marcha do Centro que consideren oportunos.
c)Informar os asociados da súa actividade.
d) Recibir información, a través dos seus representantes no Consello Escolar,, sobre os temas tratados nel.
e) Elaborar informes para o Consello Escolar a iniciativa propia ou a petición deste.
f) Elaborar propostas de modificación do Regulamento de Réxime Interior.
g) Formular propostas para a realización de actividades complementarias e extraescolares que, unha vez aceptadas, deberán figurar na Progranmación Xeral Anual.
h) Coñecer os resultados académicos referidos ao Centro e á valoración que deles realice o Consello Escolar.
i) Recibir un exemplar da Programación Xeral Anual, do Proxecto Educativo, dos Proxectos Curriculares de Etapa e das súas modificacións.
l) Recibir información sobre os libros de texto e os materiais didácticos adoptados polo Centro.
m) Fomentar a colaboración entre tódolos membros da Comunidade Educativa.
n) Facer uso das instalacións do Centro nos termos que estableza o Consello Escolar de acordo coa lexislación vixente.
NORMAS DE CONVIVENCIA
As normas de convivencia do Centro, deben propiciar o clima de responsabilidade, de traballo e esforzo, que permita que tódolos alumnos/as obteñan os mellores resultados do proceso educativo e adquiran os hábitos e actitudes necesarios para vivir en comunidade.
Para que o Centro docente cumpra as súas funcións compre establecer un procedemento axeitado que integre e regule as relacións entre cantos constituen a comunidade Escolar. Esta relación basearase no respecto á dignidade, integridade, liberdade, funcións e demais dereitos de tódolos membros da Comunidade Educativa.
.O alumnado deberá asistir á clase en boas condicións de saúde e hixiene. En tanto perdure o problema de hixiene ou enfermidade deberá permanecer no seu domicilio. Neste caso e noutros polos que non poida asistir a clases deberao comunicar por escrito unha vez incorporado de novo a clases.
. Procurarase manter limpas as dependencias, servicios, mobiliario e patios do recinto escolar, evitando tirar ó chan papeis, pipas, chicles, etc, que ensucien as mesmas, polo que deberán facer uso dos recipientes e papeleiras instalados ao efecto.
. Os alumnos/as deberán respectar e utilizar axeitadamente o mobiliario, servicios e demais instalacións do centro, evitando no posible o seu deterioro.
. Para ir aos servicios desde a aula ou patio de recreo, será precisa a autorización do profesor correspondente.
. As relacións humanas entre os membros da Comunidade educativa basearánse no respecto á integridade física,moral e dignidade persoal dos mesmos.
. O profesorado só poderá fumar na Sala de Profesores.
Tipificacións e correccións
As tipificacións, correccións e sancións polo incumplimento das normas de convivencia do Centro rexiranse, respectivamente, as do profesorado polo Decreto 94/1991, do 20 de marzo, polo que se aproba o Regulamento de Réxime Disciplinario dos funcionarios da Administraciónda Comunidade Autónoma de Galicia (DOG, 25/03/91),e as do alumnado polo Real Decreto 732/1995, do 5 de maio (BOE do 2 de xuño) , polo que se establecen os dereitos e deberes dos alumnos e as normas de convivencia nos Centros.
Conductas contrarias ás normas de convivencia
1. A acumulación de faltas de asistencia sen xustificar.
2. A acumulación de faltas de puntualidade sen xustificar.
3. O deterioro, non grave, causado intencionadamente ou por neglixencia nas dependencias, no material destas ou das pertenzas dos membros da Comunidade Escolar.
4. Calquera acto inxustificado que perturbe o normal desenrolo das actividades do Centro:
a) incorreccións ou desconsideracións con outros membros da Comunidade;
b) falta de respecto no exercicio do dereito ao estudio dos compañeiros/as;
c) irrupcións ou interrupcións inxustificadas en clase.
d) actitude pasiva;
e) actos de indisciplina, inxurias, ofensas non graves contra calquera membro da Comunidade Escolar.
f) abandono do Centro sen permiso do profesorado.
Conductas gravemente perxudiciais para a convivencia do Centro
1. Os actos de indisciplina, inxuria ou ofensa grave contra os membros da comunidade educativa.
2. A reiteración por tres veces de conductas contrarias á convivencia.
3. A agresión física ou moral contra os demais membros da Comunidade ou a discriminación grave por calquera razón.
4. A suplantación de personalidade en actos da vida docente e a falsificación ou substracción de documentos académicos.
5. Os danos graves causados por uso indevido ou intencionado nos locais, materiais ou documentos do Centro ou nos bens doutros membros da Comunidade.
6. Os actos inxustificados que perturben gravemente o normal desenrolo das actividades do Centro.
7. As actuacións perxudiciais para a saúde e a integridade persoal dos membros da Comunidade, a incitación ás mesmas ou a pasividade diante destas.
8. O incumprimento das sancións impostas.
Correccións
As correccións que vaian a aplicarse polo incumplimento das normas de convivencia do Centro terán un caracter educativo e recuperador, deberán garantir o respecto aos dereitos do resto do alumnado e procurarán a mellora nas relacións de tódolos membros da comunidade Educativa.
Neste sentido informaráselles inmediatamente a nais/pais/titores/as das conductas contrarias á convivencia ou das conductas gravemente perxudiciais para a convivencia no Centro e solicitarase a súa colaboración no proceso corrector.
Na corrección dos incumplimentos deberá terse en conta:
1. A idade do alumnado, tanto no momento de decidir a súa incoacción ou sobreseimento como a efectos de graduar a aplicación da sanción cando proceda.
2. As circunstancias persoais, familiares ou sociais do alumnado antes de resolver o procedimento corrector.
3. O alumnado non poderá ser privado do dereito á educación nin do seu dereito á escolaridade.
4. Non poderán impoñerse correccións contrarias á integridade e á dignidade persoal do alumnado.
A efectos de gradación das correccións:
1. Considéranse circunstancias paliativas:
a) O recoñecemento espontáneo da súa conducta incorrecta.
b) A falta de intencionalidade.
2. Considéranse circunstancias acentuantes:
a) A premeditación e a reiteración
b) Causar dano, ou ofensa aos compañeiros de menor idade ou aos recen chegados ao Centro.
c) Calquera tipo de discriminación.
Poderanse correxir os actos contrarios ás normas de convivencia realizados polo alumnado no recinto escolar ou durante a realización de actividades complementarias e extraescolares. Igualmente poderán correxirse actuacións do alumnado que, aínda que realizadas fora do recinto escolar, están motivadas ou directamente relacionadas coa vida escolar e afecten aos seus compañeiros ou a outros membros da Comunidade Educativa.
Polas conductas contrarias ás normas de convivencia do Centro
a) Amonestación privada ou por escrito.
b) Comparecencia inmediata ante o Xefe de Estudios.
c) Realización de traballos específicos en horario non lectivo
d) Realización de tarefas que contribúan á mellora e desenrolo das actividades do Centro ou, se procede, a reparar o dano causado ás instalacións ou material do Centro ou ás pertenzas doutros membros da Comunidade Educativa.
e) Suspensión do dereito a participar nas actividades extraescolares ou complementarias do Centro.
f) Cambio de grupo do alumno/a por un prazo máximo dunha semana.
g) Suspensión do dereito de asistencia a determinadas clases por un prazo máximo de tres días.
h) Suspensión do dereito de asistencia ao Centro por un prazo máximo de tres días lectivos. Tanto na anterior como na presente corrección, o alumnado deberá realizar os deberes ou traballos que se determinen para evitar a interrupción no proceso formativo.
Polas conductas gravemente perxudiciais para a convivencia do Centro.
a) Realización de tarefas que contribúan á mellora das actividades do Centro ou, se procede, a reparar o dano causado ás instalacións ou ao material do Centro ou ás pertenzas doutros membros da Comunidade Educativa. Estas tarefas deberán realizarse en horario non lectivo.
b) Suspensión do dereito a participar nas actividades extraescolares ou complementarias do Centro.
c) Cambio de grupo.
d) Suspensión do dereito de asistencia a determinadas clases durante un período de tempo superior a 5 días e inferior a 2 semanas. O alumno/a deberá realizar as tarefas escolares que se determinen, o mesmo que no caso seguinte.
e) Suspensión do dereito de asistencia ao Centro durante un período superior a 3 días e inferior a 1 mes. Cando se impoña esta sanción o Consello Escolar poderá readmitir ao alumnado no Centro antes do agotamento do prazo previsto na corrección, previa constatación de que se producíu un cambio positivo na súa actitude.
f) Cambio de Centro. Neste caso a Administración educativa procuraralle ao alumno un posto escolar noutro Centro docente
Estas correccións prescribirán á finalización do curso escolar.
Procedemento para a tramitación dos expedientes disciplinarios.
. Os actos que non acaden a consideración de conducta contraria ás normas de convivencia serán correxidos polo correspondente profesorado e, no seu caso, polo titor/a do alumno.
. As conductas contrarias ás normas de convivencia serán correxidas tal e como se indica no apartado 10.4.3.1 deste Regulamento Orgánico:
polo profesorado correspondente, oído o alumno, nos párrafos a) e b), dándolle conta ao titor e ao Xefe de Estudios.
polo titor/a, oído o alumno/a, nos párrafos a), b), c) e d)
polo Xefe de Estudios ou o Director/a, oído o alumno/a e o seu profesor/a ou titor/a nos párrafos b),.c), e) e f).
O Consello Escolar, oído o alumno/a, nos párrafos g) e h) e seguindo o procedemento descrito no artigo 49.1.d) e seguintes do Real Decreto 732/1995, do 5 de maio (BOE do 2 de xuño)
. As corrección para as faltas gravemente perxudiciais para a convivencia do Centros serán impostas polo Consello Escolar, previa instrucción dun expediente disciplinario.
A instrucción do expediente, que se acordará nun prazo non superior a 10 días, dende que se tivo coñecemento dos feitos, levarase a cabo por un profesor/a do Centro designado polo Director/a.
Non poderán ser nomeados instructores:
o profesorado do curso afectado
os membros do Equipo Directivo
os representantes do profesorado no Consello Escolar
A incoacción comunicaráselles aos pais, titores ou responsables do menor.
O alumnado, as súas nais, pais ou representantes legais poderán recusar ao instructor ante o Director/a cando da súa conducta ou manifestacións poida inferirse falta de obxectividade na instrucción do expediente.
O Director, en calquera momento da instrucción, por decisión propia, ou a proposta do instructor, poderá adoptar as seguintes medidas provisionais:
. cambio temporal de grupo
. suspensión do dereito de aistencia ao Centro, por un período non superior a cinco días.
Estas medidas serán comunicadas ao Consello Escolar, que poderá revocalas en calquera momento.
O prazo de instrucción do expediente non deberá exceder de 7 días.
Comunicaraselle ao servivio de Inspección Técnica o inicio do procedemento e informaráselle da tramitación e resolución do mesmo. A resolución produciráse no prazo máximo dun mes dende a data de inicio do mesmo.
Contra a resolución do Consello Escolar poderá interpoñerse recurso ordinario ante o Delegado provincial, nos termos previstos nos artigos 114 e seguintes da Lei 30/1992 de 26 de novembro, de Réxime Xurídico das Administracións Públicas e do Procedemento Administrativo Común.
INFORMACIÓN.
. Recoñecese a liberdade de expresión e o dereito de información para todo o personal do Centro, sempre que non atente contra os dereitos individuais ou afectivos e ás normas de convivencia
. Será permitida a expresión pública de calquera tipo de anuncio, sempre que non afecte ás habituais normas de respecto e convivencia no Centro, a xuicio do Equipo directivo.
. Os anuncios colocaranse nos paneis habituais ao efecto: O alumnado nos taboleiros das aulas e dos corredores e o profesorado e documentos de organización interna do Centro na sala de profesores. Anuncios xerais no corredor.
. En cada aula haberá unha copia deste Regulamento e o titor informará do mesmo ao seu alumnado.
. O Secretario/a ou o Director/a encargaranse de recibir as informacións do personal non docente ou de tramitalas.
. Os comunicados irán sempre asinados e con data; deixarase unha copia na dirección.
. O horario de atención ó público do Equipo Directivo expoñerase nas portas de dirección e secretaría e pasaráselles unha nota a todo o alumnado co horario de atención a pais, nais e alumnos/as e as normas para acceder ao Centro.
Os pais, nais, alumnos/as e a APA poderán facer uso do boletín "Aturuxo" para informar de aspectos relacionados coa vida do Centro, previa autorización do equipo de redacción deste .
SEGUIMENTO DO RRI
Crearase unha comisión de seguimento do RRI composta polo director/a ou o Xefe De Estudios, un coordinador e un pai/ nai. Elaborará un informe ao final de cada curso curso.
REFORMA/MODIFICACIÓN DO RRI
O presente Regulamento poderá ser modificado cando varíe a lexislación escolar na que se apoia, na parte e medida que lle afecte ou cando o decida o Consello Escolar a proposta formulada polo Equipo Directivo, o Claustro de profesores, a Comisión de Coordinación Pedagóxica ou un tercio, alomenos, dos membros do Consello Escolar.
As modificacións propostas serán defendidas diante do Consello Escolar por un portavoz do grupo que as presentou e para ser aprobadas requerirase o voto favorable da maioría absoluta dos membros deste órgano.
As modificacións faranse, preferiblemente, no comenzo de curso.
Unha vez aprobada a modificación do Regulamento farase pública no taboleiro de anuncios do Centro para coñecemento da Comunidade Escolar e entrará en vigor aos vinte días da súa publicación, en quitando que expresamente se sinale outra data.
ÁMBITO E CUMPRIMENTO
Este Regulamento entra en vigor o 13 de outubro de 1999 e obriga ó seu cumprimento a cantos integran a comunidade escolar na parte e medida que a cada un deles afecta.
GLOSARIO DE TÉRMINOS
RRI: Regulamento de Réxime Interior PXA: Programación Xeral Anual
PCC: Proxecto Curricular de Centro PEC: Proxecto Educativo de Centro
APA: Asociación de Pais de Alumnos
Nota: Os anexos e referencias legais aos que se fai referencia no Regulamento así como o texto completo do Regulamento de Réxime Interno estarán na Secretaría do Centro e poderán ser consultados por calquera membro da Comunidade educativa que así solicite
documentos
