Departamento de Ciencias Naturais
Olimpíada de Bioloxía - Fase galega
O venres 16 de xaneiro, celebrouse na Facultade de Bioloxía da Universidade de Vigo, a “X OLIMPÍADA DE BIOLOXÍA”, organizada polo Colexio Oficial de Biólogos de Galicia, e a colaboración das tres universidades galegas, a Consellería de Cultura, Educación e Ordenación Universitaria, e a Editorial SM.
Participaron máis de cen estudantes de 2º de bacharelato, representando, en grupos de catro alumnos, a centros de toda Galicia.
O I.E.S. “O Couto” presentou para a súa participación a catro alumnos do grupo de 2º A de bacharelato:
Garrido Suárez, Nerea
Gómez Rodríguez, Elisabet
González Fernández, Cristina
Picouto Moreda, Damián.
A participación foi promovida polo profesor de Bioloxía de 2º de bacharelato, Manuel Antonio Latorre Díaz, que os acompañou durante toda a xornada.
Despois da recepción de participantes, desenvolveuse o exame teórico en dúas aulas da Facultade.
Tras un pequeño descanso, e xa na Aula Magna, fixeron a proba práctica sobre imaxes proxectadas en común para todos os participantes.
Logo da comida posterior ( convite para alumnos e profesores, pola Facultade de Bioloxía) procedeuse á visita de varios departamentos, en grupos reducidos, e ás explicacións das diversas investigacións que se desenvolven neles.
Tiveron a oportunidade de facer pequenas observacións e manipulacións de material de microscopía e coñecer a contribución á divulgación (especialmente de páxinas web de acceso libre) dos membros dos departamentos visitados.
Posteriormente, asistiron á conferencia sobre ás “achegas da Bioloxía” á sociedade.
Por último, procedeuse ao acto de clausura e á entrega de premios aos gañadores.
Todos os participantes considéranse “finalistas” e, para certificalo, recibiron o seu correspondente diploma acreditativo da súa participación na Olimpíada de Bioloxía, nun vistoso desfile dos alumnos.
Os catro participantes do noso Cenro, amosaron a súa satisfación pola participación e gardarán seguramente un grato recordo da xornada.
