Filosofía

Aproveitando que non vai nin unha semana da celebración das nosas eleccións autonómicas, e continuando co noso compromiso de educar en valores democráticos, esta mañá do 22 de febreiro celebramos no salón de actos do noso centro un coloquio sobre o Parlamento de Galicia. 

A sesión comezou coa proxección dun vídeo divulgativo sobre a historia e funcionamento da institución, e continuou cos relatorios de dous invitados de honra: María Pilar García Negro e Ángel Ramón Mesa Torreiro, que falaron en calidade de exdeputados.

María Pilar García Negro introduciunos na historia do noso parlamento, falounos da súa bagaxe persoal e profesional, e sinalou algúns dos logros da institución. Pechou a súa charla coa lectura duns versos de Rosalía de Castro, aproveitando a proximidade do seu aniversario.

Ángel Ramón Mesa Torreiro incidiu na importancia da palabra para acadar consensos, e reivindicou o valor do parlamento como espazo de debate e representación da pluralidade ideolóxica da cidadanía galega. Rematou a súa intervención convidándonos a visitar o parlamento e a coñecer as formas de participación cidadá a través da súa páxina web.

A esta actividade, organizada polo Departamento de Filosofía, asistiu todo o alumnado de Educación en Valores Cívicos e Éticos de 3º da ESO, en compañía do alumnado de Filosofía de 4º da ESO.

Esta mañá do 2 de febreiro o alumnado de Psicoloxía de 2º de bacharelato, en compañía dos grupos de Afondamento en Historia da Filosofía e Afondamento en Lingua Galega e Literatura participaron nun obradoiro organizado no marco do Contrato Programa Iguála-T.

O obradoiro foi impartido pola Cooperativa Aventeira e nel tivemos ocasión de debater sobre os modelos de relación que temos e os que soñamos, desmontando os mitos do amor romántico, reflexionando criticamente sobre a orixe e consecuencia dos celos na parella, e aprendendo ferramentas de comunicación non violenta que nos axuden a vincularnos de forma máis respectuosa, igualitaria e sa.

"A maxia do cine permítenos compartir un soño de maneira colectiva", dicía Ángel Rueda, codirector do (S8) Festival de Cinema Periférico, na conversa que mantivo cos nosos estudantes de primeiro de bacharelato esta mañá do 29 de maio na sala de proxeccións do museo Domus da Coruña.

A visita, organizada polo Departamento de Filosofía, permitiunos asistir ás xornadas de cine para centros públicos que se levan a cabo cada ano no marco do festival. Nela tivemos ocasión de visionar cinco curtametraxes internacionais de temática social, a través das cales nos achegamos á realidade doutros países e contextos, toda vez que coñeciamos novas linguaxes fílmicas. A proxección estivo seguida dun pequeno coloquio en que lles demos continuidade e profundidade ás reflexións sobre o papel e o sentido da arte iniciadas nas nosas clases de estética filosófica.

O pasado martes 17 de xaneiro de 2023 o alumnado de 1º de bacharelato visitou o TSXG, nunha saída organizada polo departamento de Filosofía e encadrada no marco do programa "Educar en xustiza".

Á nosa chegada fixemos unha visita guiada polo Palacio de Xustiza, edificio proxectado polos arquitectos Ricardo Boán y Julio Galán que data do 1929. Os estudantes tiveron ocasión de coñecer os espazos máis emblemáticos do lugar, e algúns mesmo aproveitaron a sala de xuízos para resolver os seus asuntos pendentes.

A continuación asistimos a unha clase maxistral da man do presidente do tribunal José María Gómez y Díaz-Castroverde, quen tras explicarnos algúns aspectos básicos do funcionamento do sistema xudicial español, non escatimou tempo en responder a tódalas dúbidas dos nosos estudantes. Esta oportunidade permitiunos de falar sobre as diferenzas entre o Tribunal Constitucional e o Poder Xudicial, as vantaxes de optar polos estudos de Dereito, e mesmo de aclarar as controversias actuais respecto das leis máis recentes do noso país.